Tan ferwakti a foto di o tan fu ala ten

1. San ben o psa nanga a Yerusalem fu a fosi yarihondro, soleki fa Yesus ben taki?

WAN tu dei fosi Yesus Krestes dede, a ferteri den bakaman fu en wan profeititori. A profeititori disi kon tru fu a fosi leisi di Yerusalem nanga a tempel fu en ben kisi pori. Yesus ben warskow den taki wan dei ’legre ben o seti kampu lontu Yerusalem’ (Luk. 21:20). A ben taigi den bakaman fu en taki te den ben o si den legre dati, dan den ben musu lowe gwe libi Yudea wantewante. Den wortu fu Yesus kon tru. Den legre fu Rome ben seti kampu lontu Yerusalem​—Luk. 21:21, 22

2. Sortu rai na apostel Paulus ben gi den Kresten di ben e libi na ini Yudea nanga Yerusalem?

² Wan tu yari fosi den legre fu Rome ben seti kampu lontu Yerusalem, na apostel Paulus ben skrifi wan brifi gi den Kresten na ini Yudea nanga Yerusalem èn a brifi dati ben abi wan prenspari boskopu. Now wi sabi a brifi dati leki a buku fu den Hebrewsma. Na ini a brifi dati, Paulus gi den Kresten na ini Yudea nanga Yerusalem prenspari rai di ben o sreka den gi den muilek ten di ben o kon. San ben o psa? Yerusalem ben o kisi pori. Efu den Kresten dati ben wani tan na libi, dan den ben musu de klarklari fu libi den oso nanga den bisnis fu den na baka. Dati meki Paulus ben taki disi fu a foto Yerusalem: „Wi sabi taki wi no abi wan foto dyaso di e tan fu ala ten.” A ben taki moro fara: „Ma wi e angri fu si a foto di musu kon ete.”​—Hebr. 13:14.

3. San na a foto „di abi trutru fondamenti”, èn fu san ede wi e ferwakti en?

³ Di den Kresten besroiti fu gwe libi Yerusalem nanga Yudea, dan a kan taki sma ben e spotu den. Ma a besroiti di den ben teki fu gwe, kibri den libi. Na ini a ten disi sma e spotu wi tu fu di wi no e poti wi fertrow tapu moni èn fu di wi no e bribi taki na libisma o lusu den problema fu grontapu. Fu san ede wi no e du dati? Fu di wi sabi taki heri esi Gado kownukondre o pori na ogri grontapu disi. Wi e ferwakti „a foto di abi trutru fondamenti”, noso „a foto di musu kon ete”. Dati na Gado kownukondrea (Hebr. 11:10; Mat. 6:33). Na ini na artikel disi wi o taki fu den penti disi: (1) Fa den rai di Paulus gi den fosi Kresten yepi den fu tan fertrow tapu Gado kownukondre, (2) fa Paulus sreka den gi den sani di ben o miti Yerusalem, èn (3) fa den rai fu en e yepi wi na ini a ten disi.

FERTROW TAPU YEHOVAH FU DI NOITI A O GWE LIBI YU

4. Fu san ede Yerusalem ben prenspari gi den Kresten?

⁴ Yerusalem ben prenspari gi den Kresten. A fosi Kresten gemeente ben seti na ini a foto disi na ini a yari 33, èn den brada fu a tiri skin ben e tan drape tu. Boiti dati, furu fu den Kresten ben abi den oso nanga tra gudu na ini a foto dati. Tòg Yesus ben warskow den bakaman fu en taki den ben o abi fu gwe libi Yerusalem èn srefi Yudea.​—Mat. 24:16.

5. Fa Paulus sreka den Kresten gi san ben o psa?

⁵ Fu di Paulus ben wani taki den Kresten ben musu de srekasreka fu gwe libi Yerusalem, meki a yepi den fu ferstan bun fa Yehovah ben e si a foto dati. Paulus memre den Kresten taki Yehovah no ben feni a tempel bun moro, sosrefi den priester di ben e dini drape, èn den ofrandi di sma ben e tyari na a tempel (Hebr. 8:13). Furu fu den sma di ben e libi na ini a foto no ben e bribi na ini a Mesias. Sma no ben abi fu go na Yerusalem moro fu anbegi Yehovah. Na presi fu dati, Yerusalem nanga a tempel ben o kisi pori.​—Luk 13:34, 35.

6. Fu san ede den Kresten ben abi a rai fanowdu di skrifi na Hebrewsma 13:5, 6?

⁶ Di Paulus ben skrifi a brifi gi den Hebrewsma, dan sma ben abi wan switi libi na ini Yerusalem èn furu sma ben lobi go drape. Wan skrifiman fu Rome di ben e libi na a ten dati, ben taki dati Yerusalem ben de a moro pôpi foto na a pisi dati fu grontapu. Dyu fu furu tra kondre ben e go na Yerusalem ibri yari fu teki prati na den fesa èn den ben e spen furu moni na ini a foto dati. A no de fu taki dati son Kresten di ben e du bisnis na ini Yerusalem ben e meki furu moni. Kande na fu dati ede Paulus ben taigi den: „No meki a fasi fa unu e libi sori taki unu lobi moni. Ma un musu breiti nanga den sani di unu abi now.” Baka dati, a taki fu a dyaranti disi di Yehovah e gi wi na ini a Wortu fu en: „Mi no o libi yu kwetikweti èn noiti mi o gowe fu yu” (Leisi Hebrewsma 13:5, 6; Deut. 31:6; Ps. 118:6). Bakaten, den Kresten di ben e libi na ini Yerusalem nanga Yudea ben o abi fu memre a pramisi disi. Fu san ede? Fu di syatu baka di den kisi a brifi disi, den ben musu gwe libi den oso, den bisnis, èn furu fu den gudu di den ben abi. Den ben o abi fu bigin wan nyun libi na wan tra presi.

7. Fu san ede wi musu leri fu fertrow tapu Yehovah nownow kba?

⁷ San disi e leri wi: San o psa heri esi? A „bigi banawtu” o bigin èn a ogri grontapu disi o kisi pori (Mat. 24:21). Neleki den Kresten na ini Yerusalem, wi musu tan na ai èn wi musu sreka wisrefi gi a ten dati (Luk. 21:34-36). Na a ten fu a bigi banawtu, a kan taki wi lasi wi oso nanga ala tra sani di wi abi. Na a ten dati wi o abi fu fertrow dorodoro taki Yehovah no o gwe libi wi noiti. Nownow kba srefi, fosi a bigi banawtu bigin, wi kan sori o furu wi e fertrow tapu Yehovah. Aksi yusrefi: ’Den besroiti di mi o teki na ini a ten di e kon èn den sani di mi wani du e sori taki mi no e poti mi fertrow tapu moni, ma tapu Yehovah?’ (1 Tim. 6:17) Na eksempre fu den Kresten na ini a ten di psa kan yepi wi fu tan getrow na a ten fu a „bigi banawtu”. Ma a ten fu a „bigi banawtu” o de a moro muilek ten di Kresten ondrofeni oiti. Sobun, fa wi o sabi krin san wi musu du te a bigi banawtu dati bigin?

GI YESI NA DEN WAN DI E TEKI FESI

8. Sortu rai Yesus ben gi den disipel fu en?

⁸ Wan tu yari baka di den Hebrew Kresten ben kisi a brifi di Paulus ben skrifi gi den, den legre fu Rome lontu a foto Yerusalem. Di dati psa, dan den Kresten ben sabi taki den ben musu lowe gwe libi Yerusalem nanga Yudea, fu di a foto Yerusalem ben o kisi pori heri esi (Mat. 24:3; Luk. 21:20, 24). Ma pe den ben musu go? A wan-enkri sani di Yesus ben taigi den, na disi: „Meki den sma di de na Yudea, bigin lowe go na den bergi” (Luk. 21:21). Wan lo bergi ben de na ini a kontren drape. Sobun, fa den ben o sabi na sortuwan fu den bergi den ben musu lowe go?

9. Fu san ede a kan taki den Kresten no ben sabi na sortuwan fu den bergi den ben musu lowe go? (Luku a karta.)

⁹ Disi na wan tu fu den bergi pe den Kresten ben kan go suku kibri: Samaria-bergikontren, Galilea-bergikontren, Hermon-bergi di de wan pisi fu Libanon-bergikontren, èn den bergi na abrasei fu Yordan-liba. (Luku a karta.) Na ini den bergikontren dati, wan tu foto ben de di sma ben kan si leki presi pe den ben o man feni kibri. Fu eksempre, a foto Gamla, ben de na a lanki fu wan hei bergi èn a ben muilek srefsrefi fu doro drape. Son Dyu ben feni taki a foto disi ben de wan bun presi fu libi. Ma den Romesma teki a foto dati abra èn den pori en. Furu sma di ben e libi drape lasi den libi.b

10-11. (a) Fa Yehovah tiri den Kresten? (Hebrewsma 13:7, 17) (b) Fa den Kresten kisi wini fu di den gi yesi na den wan di ben e teki fesi? (Luku a prenki.)

¹⁰ Soleki fa a sori, dan Yehovah gebroiki den wan di ben e teki fesi na ini a gemeente, fu tiri den Kresten. Bakaten, wan sabiman di nen Eusebius ben skrifi fu a ten dati. A ben taki dati Gado ben meki sonwan fu den brada na ini Yerusalem kon sabi taki den Kresten ben musu gwe libi Yerusalem èn taki den ben musu go na Pela, wan foto na ini Perea. A foto Pela ben den wan presi pe Kresten ben o man feni kibri. A no ben fara fu Yerusalem, sobun a no ben muilek fu doro drape. Boiti dati, furu fu den sma na ini Pela no ben de Dyu, sobun, den no ben e pruberi fu feti nanga den Romesma.​—Luku a karta.

¹¹ Den Kresten di ben lowe go na den bergi, fiti a rai di Paulus ben gi den fu ’gi yesi na den wan di ben e teki fesi’ na ini a gemeente. (Leisi Hebr. 13:7, 17.) Fu di den gi yesi, meki den no lasi den libi. Fu di den tan fertrow tapu Gado Kownukondre, „a foto di abi trutru fondamenti”, meki Yehovah no gwe libi den.​—Hebr. 11:10.

12-13. Fa Yehovah tiri a pipel fu en na ini muilek ten?

¹² San disi e leri wi: Yehovah e gebroiki den wan di e teki fesi na ini e gemeente fu sori a pipel fu en san den musu du. Bijbel lai nanga tori di e sori fa Yehovah gebroiki getrow man fu tiri a pipel fu en na ini muilek ten (Deut. 31:23; Ps. 77:20). Èn na ini a ten disi, wi si nofo beweisi di e sori taki Yehovah e tan gebroiki den wan di e teki fesi.

¹³ Fu eksempre, di a COVID-19 siki panya na heri grontapu, dan den brada ’di ben e teki fesi’, gi a gemeente rai fu sori den san den musu du. Den brada disi meki den owruman kon sabi fa den ben musu kon makandra fu tan anbegi Yehovah go doro. Syatu baka di a siki panya, wi ben abi wan kongres di hori na ini 500 tongo. Den brada nanga sisa fu wi ben man luku a programa tapu Internet noso tapu TV, noso den ben kan arki en na radio. Noiti ete sowan kongres ben hori. Na a ten di a siki ben panya, wi tan kisi prenspari rai fu Yehovah. A sani disi yepi wi fu tan na ini wánfasi. Wi kan de seiker taki awinsi sortu tesi e miti wi na ini a ten di e kon, Yehovah o tan yepi den wan di e teki fesi fu sori wi san na a moro bun sani fu du. Fu man de srekasreka gi a bigi banawtu èn fu man teki bun besroiti na ini a muilek ten dati, dan wi musu fertrow tapu Yehovah èn wi musu gi yesi na den wan di e teki fesi. Ma san moro de fanowdu?

SORI LOBI GI MAKANDRA ÈN DE KLARKLARI FU YEPI MAKANDRA

14. Soleki fa Hebrewsma 13:1-3 e sori, dan sortu fasi Kresten ben musu sori syatu fosi Yerusalem kisi pori?

¹⁴ Te a bigi banawtu bigin, dan wi o abi fu sori lobi gi makandra leki noiti bifo. Na a ten dati, wi o abi fu teki na eksempre fu den Kresten di ben e libi na ini Yerusalem nanga Yudea. Den ben gwenti sori lobi gi makandra (Hebr. 10:32-34). Ma na ini den yari syatu fosi Yerusalem kisi pori, den ben musu du moro muiti fu „tan lobi makandra leki brada” èn „fu gi sma wan switikon”.c (Leisi Hebrewsma 13:1-3.) Wi o abi fu du a srefi te a grontapu disi fu Satan e kon na wan kba.

15. Fu san ede den Hebrew Kresten ben o abi fu sori lobi gi makandra èn yepi makandra baka te den ben lowe?

¹⁵ Di den legre fu Rome lontu Yerusalem èn den hari gwe baka wantronso, dan den Kresten lowe gwe nanga wan tu fu den sani nomo di den ben abi (Mat. 24:17, 18). Den ben musu yepi makandra di den ben de na pasi e go na den bergi. A musu fu de so taki furu fu den brada nanga sisa ben e mankeri ’den sani di den ben abi tranga fanowdu’, èn den Kresten ben kan teki na okasi dati fu sori lobi gi makandra èn fu gi makandra wan switikon.Den ​—Tit. 3:14.

16. Fa wi kan sori lobi gi wi Kresten brada nanga sisa di abi yepi fanowdu? (Luku a prenki.)

¹⁶ San disi e leri wi: Fu di wi lobi wi brada nanga sisa, meki wi wani yepi den te dati de fanowdu. Fu eksempre, furu Kotoigi ben de klarklari fu yepi den brada nanga sisa fu den di ben musu lowe gwe libi a kondre fu den fu di feti noso rampu ben psa drape. Wan sisa fu Ukraini ben gwe libi en oso fu di feti ben psa na ini a kondre fu en. A ben taki: „Wi ben e firi fa Yehovah ben e tiri wi èn fa a ben e gebroiki den brada fu yepi wi. Den gi wi wan switikon èn den yepi wi na ini Ukraini, na ini Hongaria, èn sosrefi now di wi de dyaso na ini Doisrikondre.” Te wi de klarklari fu yepi wi brada nanga sisa èn te wi e gi den san den abi fanowdu, dan wi e wroko makandra nanga Yehovah.​—Odo 19:17; 2 Kor. 1:3, 4.

17. Fu san ede a prenspari taki wi sori lobi gi wi Kresten brada nanga sisa èn taki wi e yepi den nownow kba?

¹⁷ A no de fu taki dati moro sma o abi yepi fanowdu na ini a ten di e kon (Hab. 3:16-18). Yehovah e leri wi nownow kba fu sori lobi gi wi brada nanga sisa èn fu yepi den. A prenspari srefsrefi taki wi du den sani disi na ini a ten di e kon.

SAN O PSA NA INI A TEN DI E KON?

18. Fa wi kan teki na eksempre fu den Hebrew Kresten na ini a fosi yarihondro?

¹⁸ Den Kresten di ben lowe go na den bergi, no lasi den libi di Yerusalem kisi pori. Den gwe libi a foto, ma Yehovah noiti no gwe libi den. San wi kan leri fu den? Wi no sabi soifri san o psa na ini a ten di e kon. Ma Yesus ben warskow wi taki wi musu de klarklari fu gi yesi (Luk. 12:40). Wi kan fiti tu san wi leri fu a brifi di Paulus ben skrifi gi den Hebrew Kresten. Boiti dati, Yehovah srefi pramisi ibriwan fu wi taki a no o gwe libi wi noiti (Hebr. 13:5, 6). Meki wi tan fertrow tapu Gado Kownukondre, a foto di o tan, so taki wi kan kisi blesi fu têgo.​—Mat. 25:34.