Wi heri libi langa wi kisi leri fu Yehovah, wi Gran Leriman

A MOI EKSEMPRE FU MI P’PA NANGA M’MA

Na ini 1957, syatu baka di mi p’pa nanga m’ma kon leri sabi a waarheid, den froisi gwe libi Italiakondre fu go tan na ini a foto Kindersley, di de na ini Saskatchewan, Kanada. Den tru leri fu Bijbel ben tron a moro prenspari sani na ini den libi. Mi kan memre ete taki di mi ben yongu, mi ben e wroko langa na ini a preikiwroko makandra nanga mi famiri. Dati meki son leisi mi ben e taki dati mi ben de „yepipionier” di mi ben abi aiti yari!

Mi p’pa nanga m’ma ben pôti, ma a wani fu Yehovah ben de na a fosi presi na ini den libi. Fu eksempre, na ini 1963 den seri furu fu den sani di den ben abi fu kan abi nofo moni fu go na a internationaal kongres na ini Pasadena, Kalifornia, na Amerkankondre. Na ini 1972, wi froisi go na British Columbia, na ini Kanada, di ben de sowan 1000 kilometer moro fara. Wi go drape fu preiki gi den sma na ini a kontren dati di ben e taki Italiatongo. Mi p’pa ben abi a wroko fu krin wan bigi wenkri èn a ben sorgu taki a presi tan bun. Wan tu leisi den ben wani gi en wan moro hei posisi èn moro moni, ma a no ben wani. A ben poti ala en prakseri na a diniwroko fu Yehovah.

Mi p’pa nanga mama ben de trutru wan moi eksempre gi den pkin fu den èn mi e taigi den tangi gi dati. Na eksempre fu den ben yepi mi frukfruku kba fu kon sabi taki a diniwroko fu Yehovah na a moro prenspari sani. Den leri mi wan sani di mi no o fergiti noiti, èn dati na taki efu wi poti a Kownukondre na a fosi presi na ini wi libi, dan Yehovah o sorgu gi wi.​—Mat. 6:33.

MI BIGIN NANGA A FURUTEN DINIWROKO

Na ini 1980, mi trow nanga wan moi sisa di nen Debbie èn a ben poti en leki marki fu du moro gi Yehovah. Wi ben wani bigin nanga a furuten diniwroko, èn dati meki dri mun baka di wi trow, Debbie bigin pionier. Di wi ben trow wán yari kba, wi froisi go na wan gemeente pe moro preikiman ben de fanowdu èn mi bigin pionier makandra nanga Debbie.

Baka wan pisi ten wi ben e firi brokosaka èn wi ben wani froisi go na wan tra gemeente. Ma fosi wi du dati, wi taki fu a tori nanga a kring-owruman. Na wan lob’ati fasi a taigi wi krin: „Na unu e meki a situwâsi fu unu kon moro muilek. Unu e poti tumsi furu prakseri na den tesi di e miti unu, ma efu unu e poti moro prakseri na den sani di e go bun, dan unu o de nanga prisiri baka.” Dati ben de soifri a rai di wi ben abi fanowdu (Ps. 141:5). Wi fiti a rai di wi kisi wantewante èn wi kon si taki furu sani ben e go bun. Wan tu brada nanga sisa na ini a gemeente ben wani du moro gi Yehovah, sosrefi wan tu yonguwan nanga sisa di ben abi masra di no ben e anbegi Yehovah. Dati ben de wan prenspari les gi wi. Wi leri fu poti prakseri na den bun sani di e psa èn fu fertrow tapu Yehovah taki a o yepi wi fu hordoro na ini situwâsi di kan de wan tesi gi wi (Mika 7:7). Na so wi kon de nanga prisiri baka èn a situwâsi kon moro bun.

Den brada di ben e gi wi leri a fosi leisi di wi ben de na a Pionierskoro ben e dini fosi na ini tra kondre. Den sori wi fowtow, den taki fu den tesi di miti den, èn fu den blesi di den ben kisi di den ben e dini na ini tra kondre. A sani disi meki taki wi ben wani dini leki zendeling tu. Dati meki wi poti en leki marki fu dini leki zendeling wan dei.

Fu doro a marki dati, meki na ini 1984, wi froisi go na Kibek, pe sma e taki Fransitongo. Kibek de sowan 4.000 kilometer fu British Columbia. Dati wani taki dati wi ben musu kon leri sabi wan heri nyun kulturu èn wan heri nyun tongo. Wan tra problema di wi ben abi, na taki furu leisi wi no ben abi nofo moni. Fu wan pisi ten, a wan-enkri n’nyan di wi ben abi, na p’tata di wan gronman ben taki wi ben mag teki na ini a gron fu en. Debbie ben sabi meki omeni sortu switi nyan nanga den p’tata dati! Aladi den sani disi ben e miti wi, tòg wi ben e hordoro nanga prisiri. Ma san moro prenspari, na taki wi ben e si fa Yehovah ben e sorgu gi wi.​—Ps. 64:10.

Wan dei, den brada bel wi èn wi skreki. Den aksi wi efu wi ben wani dini na Betel fu Kanada. No solanga psa wi ben vul a formulier in fu go na Gileadskoro èn wi ben e aksi wisrefi efu wi ben musu go dini na Betel. Ma wi besroiti fu go na Betel. Di wi doro na Betel wi aksi brada Kenneth Little di ben de wan memre fu a Bijkantoro Komte, a sani disi: „San wi musu du efu wi kisi a kari fu go na Gileadskoro?” A piki wi: „Wi o taki fu a tori dati te yu kisi wan kari.”

Wán wiki baka dati, mi nanga Debbie kisi wan kari fu go na Gileadskoro. Sobun, wi ben musu teki wan besroiti. Brada Little taigi wi: „Awinsi sortuwan yu o teki, son dei yu o winsi taki yu ben teki a trawan. A wán no betre moro a trawan, fu di Yehovah kan blesi ala tu.” Wi besroiti fu go na Gileadskoro èn na ini den yari di psa wi si taki den sani di brada Little ben taki ben tru. Wi ben e taigi trawan den srefi sani di brada Little ben taki te den ben musu besroiti sortu toewijzing di ben o teki.

A LIBI FU WI LEKI ZENDELING

Wi ben breiti taki wi ben de na ini di fu 83 klas fu a Gileadskoro. A klas fu wi ben abi 24 studenti. A skoro ben hori na Brooklyn, New York, na ini april 1987. Brada Ulysses Glass nanga Jack Redford ben de den leriman fu wi. Den feifi mun di wi ben de na a skoro psa esi èn wi klari a skoro na tapu 6 september 1987. Wi kisi a toewijzing fu go na Haiti makandra nanga John nanga Marie Goode.

Baka di den lasti zendeling ben musu gwe libi a kondre na ini 1962, dan den brada no ben seni zendeling go drape moro. Dri wiki baka di wi klari a skoro, wi bigin du zendelingwroko na ini Haiti. Wi ben e dini na ini wan pkin gemeente di ben abi 35 preikiman. Den preikiman disi ben e libi dipi na ini a bergi kontren. Wi ben yongu di wi bigin na ini a toewijzing fu wi èn wi no ben abi ondrofeni. Boiti dati, wi ben e tan wi w’wan na ini wan zendeling-oso. Den sma di ben e libi na ini a kontren dati ben pôti srefsrefi èn furu fu den no ben man leisi. Di wi ben e tan drape, dan den sma na ini a kontren ben e du ogri fu di sani no ben e go bun na ini a kondre. Sma ben wani teki a kondre abra, den ben e protesteer, èn a kondre ben kisi fu du tu nanga bigi drai winti.

Wi ben man leri furu fu den brada nanga sisa na ini Haiti di ben abi wan tranga bribi èn di ben de nanga prisiri. Furu fu den no ben abi en makelek, ma den lobi Yehovah nanga a preikiwroko. Wan owru sisa di masra ben dede kba èn di no ben man leisi, ben sabi sowan 150 Bijbel vers na ede. Den sani di ben e psa na ini a kontren fu wi, ben e gi wi moro dek’ati fu ferteri sma taki na a Kownukondre fu Gado w’wan kan lusu den problema fu libisma. Wi breiti srefsrefi taki sowan fu den fosi Bijbelstudie fu wi drape tron gewoon pionier, spesrutu pionier, nanga owruman.

Di wi ben de na ini Haiti, wi miti wan yongu Mormoon zendeling di nen Trevor èn wi ben man taki nanga en fu Bijbel wan tu leisi. Wan tu yari baka dati, mi kisi wan brifi fu en di mi no ben ferwakti. A ben skrifi: „A kring di e kon mi o teki dopu! Mi wani go baka na Haiti leki spesrutu pionier fu dini na ini a srefi kontren pe mi ben e dini di mi ben de wan Mormoon zendeling.” Èn dati na soifri san a du furu yari langa makandra nanga en wefi.

WI BEN MUSU GO NA EUROPA​—BAKA DATI NA AFRIKA

Wi ben musu go dini na a pisi fu Europa pe a ben e kon moro makelek fu preiki. Na ini 1992, wi doro na ini Ljubljana, na Slofeinia, krosbei fu pe mi p’pa nanga m’ma ben gro kon bigi, fosi den froisi go na Italiakondre. Ma sma ben e feti ete na ini den kontren krosbei fu a kondre di ben nen Yugoslafia fosi. Den bijkantoro fu Wenen, Oostenrijk, Zagreb, Krowâsia, nanga Belgrado (Serfia), ben e orga a preikiwroko na ini a kontren drape. Nownowde ibriwan fu den bijkantoro disi abi den eigi Betel gebow.

Disi wani taki dati wi ben musu kon sabi wan heri nyun tongo èn wan heri nyun kulturu baka. Den sma fu a kontren ben o taki: „Jezik je težek.” Disi wani taki: „A tongo fu wi muilek.” Èn den ben abi leti! A ben moi fu si fa den brada nanga sisa ben de klarklari fu fiti densrefi na iniwan kenki di na organisâsi ben tyari kon èn wi si fa Yehovah blesi den. Wi si tu fa Yehovah ben e poti sani kon reti baka na a yoisti ten. Wi leri furu sani di wi ben de na ini Slofeinia èn den sani di wi ben leri fosi wi go drape yepi wi fu hordoro di problema miti wi.

Ma moro kenki ben de na pasi e kon. Na ini a yari 2000 wi kisi a toewijzing fu go dini na Ivoorkust, na West-Afrika. Na ini november 2002, wi ben musu go na Sièra Leon fu di feti ben broko na ini Ivoorkust. Na ini Sièra Leon wan feti di ben teki 11 yari langa, ben kon na wan kba no so langa psa, èn fu dati ede wi ben man froisi go drape. A ben muilek gi wi fu gwe libi Ivoorkust so esi, ma den sani di wi ben leri yepi wi fu tan nanga prisiri.

Wi ben e tan poti prakseri na den someni sma drape di ben wani leri sabi a waarheid èn sosrefi na wi brada nanga sisa di ben e hordoro omeni yari langa aladi feti ben de na ini a kondre. Den brada nanga sisa fu wi no ben abi furu, ma den ben wani prati san den abi. Fu eksempre, wan sisa ben wani gi Debbie wan tu krosi. Na a bigin Debbie ben e tweifri efu a ben musu teki den krosi, ma a sisa ben wani taki a teki den. Dati meki a taigi en: „Na a ten fu a feti, den brada nanga sisa fu tra kondre yepi wi. Now wi abi na okasi fu yepi trawan.” Sensi a ten dati wi poti en leki marki fu yepi trawan neleki fa den ben e du dati.

Te fu kba wi ben man drai go baka na Ivoorkust, ma fosi yu denki, feti broko baka na ini a kondre. Sobun, na ini november 2004 wi ben musu lowe gwe nanga opolani èn wi ben man tyari tu kofru fu 10 kilo nomo. Wi ben musu sribi tapu a gron na wan presi pe srudati fu Fransikondre ben seti kampu, èn a dei baka dati wi frei go na Switserland. Di wi doro mindrineti na a bijkantoro, dan den brada fu a Bijkantoro Komte, den leriman fu a Dinariskoro, nanga den wefi gi wi wan switikon èn wi kisi furu brasa fu den. Boiti dati, den gi wi nyan èn furu chocolade fu Switserland. Wi ben man firi taki den lobi wi.

Wi kisi a toewijzing fu go dini na Gana fu wan pisi ten èn baka dati wi ben mag go baka na Ivoorkust fu di a feti drape ben kon na wan kba. A swit’fasi di den brada nanga sisa sori gi wi di wi ben musu lowe èn di wi ben kisi tra toewijzing, yepi wi fu hordoro. Mi nanga Debbie sabi taki a pipel fu Yehovah ala ten e sori lobi gi makandra, èn wi e warderi dati trutru. Fu taki en leti, bakaten wi kon si taki aladi furu tesi ben miti wi na a ten dati, tòg wi leri furu prenspari sani fu Yehovah.

WI BEN MUSU GO NA A MIDDEN-OOSTEN

Na ini 2006 wi kisi wan brifi fu na edekantoro di ben e taki dati wi ben musu go dini na a Midden-Oosten. Dati ben wani taki dati wi ben musu kon leri sabi wan heri nyun tongo èn wan heri nyun kulturu baka. Boiti dati, wi ben o ondrofeni nyun sani drape èn wi ben o kisi nyun tyalensi. Na ini a kontren disi furu problema ben de, fu di furu dyugudyugu ben de na ini politiek èn na kerki sei. A ben moi fu si taki den brada nanga sisa na ini den gemeente drape ben man taki difrenti tongo èn taki wi ben man libi na ini wánfasi, fu di wi alamala ben fiti den rai fu na organisâsi. Wi e warderi den brada nanga sisa, fu di furu fu den hordoro di famiriman, pkin na skoro, sma na wrokope nanga birtisma ferfolgu den.

Wi ben go na a spesrutu Kongres fu 2012 na ini Tel Aviv, Israel. A kongres disi ben de a fosi leisi taki so furu sma fu a kontren ben kon na wán sensi a Pinksterfesa fu a yari 33. Noiti wi o fergiti a kongres dati!

Na ini den yari di wi ben de na a Midden-Oosten, den brada seni wi go na wan kondre pe lanti ben tapu a wroko fu wi. Wi ben tyari wan tu buku nanga tijdschrift fu wi go drape, wi ben e go na ini a preikiwroko makandra nanga den brada nanga sisa èn wi ben e go na pkin kring-konmakandra. Srudati nanga bigi gon ben de na ala sei, èn ala presi pe yu ben e go den ben e hori wakti. Ma wi no ben e frede fu di wi ben e du a preikiwroko na wan koni fasi makandra nanga a pkin grupu preikiman di ben de drape.

WI GO BAKA NA AFRIKA

Na ini 2013 wi kisi wan tra toewijzing fu go dini na a bijkantoro na ini Kinsyasa, Kongo. A kondre dati bigi èn a moi, ma furu sma drape ben e pina èn furu feti ben e psa drape. Di den brada seni wi go drape, dan biginbigin wi ben taki: „Wi sabi fa a libi de na ini Afrika, fu di wi ben e tan drape kba. Sobun, a no o muilek fu libi na ini Kongo.” Ma wi ben abi furu fu leri, spesrutu te wi ben musu go na den kontren pe pasi nanga broki no de. Wi ben e poti wi prakseri na den bun sani di ben e miti wi. Fu eksempre, wi ben e si fa den brada nanga sisa drape ben e hordoro nanga prisiri awinsi fa sani no ben e go bun na ini a kondre. Den ben lobi a preikiwroko èn den ben e du ala san den man fu go na den konmakandra nanga kring-konmakandra. Wi ben e si fa a preikiwroko ben e go na fesi, fu di Yehovah ben horbaka gi den èn a ben e blesi a muiti fu den. Wi leri prenspari sani na ini Kongo èn wi meki mati di de leki famiri gi wi.

Na kba fu 2017, wi kisi wan tra toewijzing èn wi ben musu go na Zuid-Afrika. A bijkantoro na ini Zuid-Afrika na a moro bigi bijkantoro pe wi ben musu go dini èn wi kisi wroko fu du di wi no ben du noiti ete. Wi ben musu leri furu sani dyaso tu, ma wi fiti den sani di wi ben leri na ini den toewijzing di wi ben kisi fosi a wan disi. Wi lobi den brada nanga sisa drape di e dini Yehovah getrow omeni yari kba. A moi fu si fa a Betelfamiri e wroko na ini wánfasi, aladi den brada nanga sisa de fu difrenti ras nanga kulturu. Yu man si krin taki Yehovah blesi en pipel èn dati meki den e libi na ini freide nanga makandra. A e yepi den fu kisi nyun fasi èn fu fiti Bijbel gronprakseri.

Na ini den yari di psa, mi nanga Debbie kisi difrenti toewijzing, wi ben musu fiti wisrefi na difrenti kulturu èn wi ben musu leri nyun tongo. A no ala ten a ben makelek, ma Yehovah gebroiki en organisâsi nanga wi brada nanga sisa fu sori taki a lobi wi (Ps. 144:2). Den someni sani di wi leri na ini a furuten diniwroko yepi wi fu dini Yehovah na wan moro bun fasi.

Mi e taigi mi p’pa nanga m’ma grantangi gi den sani di den leri mi. Mi e taigi mi lobi wefi Debbie grantangi tu gi a fasi fa a horbaka gi mi èn mi de nanga tangi tu gi den moi eksempre fu den brada nanga sisa na heri grontapu. Mi nanga mi wefi e luku go na fesi fu si sortu tra moi sani wi Gran Leriman o leri wi.