Te sma e sutu trawan kiri na skoro​—San Bijbel e taki?

Tapu 24 mei 2022 wan bigi ogri pasa di meki ala sma na a pikin foto Uvalde na Texas, Amerkankondre, sari srefisrefi. Wan koranti skrifi taki „wan man sutu 19 pikin nanga tu jufrow kiri na Robb lagiskoro”.​—The New York Times.

A sari fu taki dati den sortu ogri disi e pasa ala ten baka. Wan tra koranti skrifi taki na Amerkankondre nomo „a yari di pasa, a pasa 249 tron taki sma teki gon sutu sma kiri na skoro. Sensi 1970, a nomru disi bigi moro iniwan yari na fesi”.​—USA Today.

Fu san ede den bigi ogri disi e pasa? San wi musu du te sma e du den ogri disi? Howpu de taki wan ten o kon pe den takru sani disi no o de moro? Bijbel e gi piki tapu den aksi disi.

Fu san ede moro nanga moro sma e du ogri na grontapu?

•  Bijbel e kari a ten fu wi „den lasti dei” pe furu sma ’no ben o lobi trawan’ èn den ben o du „ogri-ati sani”. Den ben o du bigi ogri di ben o abi takru bakapisi. Den sortu sma disi ben o „kon ogri moro nanga moro” (2 Timoteyus 3:1-5, 13). Efu yu wani sabi moro fu a tori disi, dan leisi na artikel di nen „Is wat mensen elkaar nu aandoen in de Bijbel voorspeld?”

Furu sma e taki: ’Fu san ede Gado no e tapu sma fu du den sortu sari sani disi, soleki te sma e sutu trawan kiri na skoro?’ Efu yu wani sabi sortu piki Bijbel e gi tapu na aksi disi, dan leisi na artikel di nen „Takru sani e pasa nanga bun sma​—Fu san ede?”

San wi kan du te den ogri sani disi e pasa?

•  Den „sani di sma skrifi fositen, ben skrifi fu leri wi wan sani. Disi e yepi wi fu . . .  kisi trowstu fu Gado Buku, so taki wi kan abi howpu.”​—Romesma 15:4.

Den sani di Bijbel e leri wi kan yepi wi fu sabi san wi musu du na ini na ogri grontapu disi. Efu yu wani sabi moro fu a tori disi, dan luku A Waktitoren artikel di nen „Oiti wan kaba sa kon na ogridu?”

Efu yu wani feni bun rai di e sori papa nanga mama san den kan du fu yepi den pikin fu den te den yere den sortu takru nyunsu disi, dan leisi na artikel di nen „Wat het nieuws met een kind doet.”

Wan ten o kon taki ogri no de moro?

•  „A o kibri den libi, so taki sma no man kwinsi den moro noso du ogri-ati sani nanga den.”​—Psalm 72:14.

•  ’Den o naki den feti-owru kon tron plugu èn den lansri kon tron grasinefi. Nowan pipel o teki feti-owru fu go feti nanga wan tra pipel èn den no o leri fu feti moro.’​—Mika 4:3.

Gado o du sani di nowan libisma man du. A regering fu en na hemel o puru ala fetisani èn a o tyari wan kaba kon na ala ogri. Efu yu wani sabi moro fu den sani di Gado Kownukondre o du, dan leisi na artikel di nen „Onder Gods Koninkrijk ’zal volop vrede zijn.’”