Fu san ede wi kan abi howpu na ini 2023​—San Bijbel e taki?

Na a bigin fu 2023 wi alamala e howpu taki sani o waka bun nanga wi srefi èn den famiri fu wi. Fu san ede wi kan abi howpu?

Bijbel e gi howpu

Bijbel abi bun nyunsu. A e taki dati den problema di wi abi now na fu wan pisi ten nomo fu di wan lusu o kon heri esi. Fa wi sabi dati? Fu di Bijbel taki so. Den sani di skrifi na ini Bijbel na „fu leri wi wan sani. Disi e yepi wi fu . . . kisi trowstu fu Gado Buku, so taki wi kan abi howpu.”​—Romesma 15:4

• Efu yu wani sabi moro fu den sani di Bijbel e pramisi, dan leisi na artikel „Echte hoop op betere tijden.”

Wan howpu di kan yepi yu nownow kaba

A howpu di Bijbel e gi kan de leki „wan ankra gi wi libi” (Hebrewsma 6:19). A howpu dati kan meki wi de moro seiker na ini a libi. A kan yepi wi now nanga den problema fu wi, a kan yepi wi fu si a bun sei fu a situwâsi fu wi, èn a kan yepi wi fu de koloku fu ala ten. Luku wan tu eksempre:

• Fa a howpu di Bijbel e gi yepi wan man di ben de wan sopiman fosi? Luku a felem Mi ben fuga fu mi libi.

• Fa a howpu di Bijbel e gi kan yepi wi te wan lobiwan fu wi kon dede? Luku a felem Trowstu gi den sma di lasi wan lobiwan.

Meki a howpu fu yu kon moro tranga

Furu sma e howpu taki bun sani o pasa, ma den no kan de seiker taki den sani dati o pasa trutru. Ma den sani di Bijbel e pramisi o pasa trutru. Fu san ede wi kan bribi dati? Den pramisi na ini Bijbel e kon fu Yehovah Gadoa srefi èn Bijbel e taki dati a „no man lei” (Titus 1:2). Na Yehovah wawan abi a makti fu du ala san a pramisi. A kan du ’ala san a wani du’.​—Psalm 135:5, 6.

Nanga wi heri ati wi e winsi taki yu srefi kisi wini fu a howpu di Bijbel e gi. Yu kan kisi moro bribi na ini den pramisi fu Bijbel te yu „ondrosuku Gado Buku finifini” (Tori 17:11). Efu yu wani du dati, dan wi kan gi yu wan Bijbelstudie gratis. Bigin a yari 2023 nanga wan moi howpu!