San e pasa nanga wan sma te a dede?

A piki fu Bijbel

Bijbel e taki: „Den libiwan sabi taki den o dede. Ma den dedewan no sabi notinoti” (Preikiman 9:5; Psalm 146:4). Fu dati ede, te wi dede wi no de moro. Den dedewan no man denki, den no man du sani èn den no man firi nowan sani.

„Na doti yu o tron baka”

Di Gado ben taki nanga a fosi man Adam, a ben taki san ben o pasa nanga wan sma te a dede. Fu di Adam ben trangayesi, Gado ben taigi en: „Na fu doti yu meki èn na doti yu o tron baka” (Genesis 3:19). Fosi Gado ben meki Adam fu „doti fu a gron”, Adam no ben de (Genesis 2:7). Sobun, di Adam dede a tron doti baka èn a no ben de moro.

A srefi sani e pasa nanga den sma di e dede now. Bijbel e taki fu meti èn sosrefi fu libisma: „Den alamala meki fu doti èn den alamala e drai go baka na doti”.​—Preikiman 3:19, 20.

Dede no abi fu de a kaba fu ala sani

Furu leisi Bijbel e agersi dede nanga sribi (Psalm 13:3; Yohanes 11:11-14; Tori fu den apostel 7:60). Wan sma di e sribi dipi no sabi san e pasa lontu en. Na a srefi fasi den dedewan no sabi noti. Toku Bijbel e leri taki Gado kan wiki den dedewan neleki na sribi den e sribi, èn a kan gi den libi baka (Yob 14:13-15). Gi den sma di Gado o gi wan opobaka, dede no de a kaba fu ala sani.