Jeje a no sma di libi èn dede na grontapoe

Jeje de! Na a jejekondre di wi no man si, joe abi boen nanga ogri jeje. Den na sma di libi èn dede na grontapoe?

Nôno, den no de dati. Te wan sma dede, a no e go na a jejekondre, so leki fa foeroe sma e denki. Fa wi doe sabi dati? Na foe di bijbel e taki so. Bijbel na wan boekoe foe waarheid di kon foe a wan enkri troe Gado, di nen Jehovah. Jehovah ben meki libisma; a sabi heri boen san e pasa nanga den te den e dede. — Psalm 83:18; 2 Timoteus 3:16.

Bijbel e taki, dati Gado ben meki Adam, a fosi libisma, „foe a doti foe a gron” (Genesis 2:7). Gado ben poti en na a paradijs, a djari foe Eden. Efoe Adam ben gi jesi na a wet foe Jehovah, a no ben o dede; a ben o de a libi na grontapoe te leki now ete. Ma di Adam foe espresi ben pasa a wet foe Gado, meki Gado ben taigi en: „Joe [sa] drai go baka na a gron, bika na drape den ben teki joe poeroe. Bika doti joe de èn na doti joe sa drai go baka.” — Genesis 3:19.

San disi wani taki? We, pe Adam ben de bifo Jehovah ben meki en komoto na doti? A no ben de na no wan pe. A no ben de wan jeje na hemel di wan mama no ben meki ete. A no ben de. So boen, di Jehovah ben taki, dati Adam ben sa „drai go baka na a gron”, a ben wani taki, dati Adam ben o dede. A no ben go na a jejekondre. Na a ten di Adam ben dede, a ben kon de baka sondro libi, a no ben de. Dede wani taki, dati libi no de.

Ma fa a de nanga tra sma di dede? Den toe no de? Bijbel e piki:

• „Den alamala [libisma nanga meti] e go na wán presi. Den alamala kon foe doti, èn den alamala e drai go baka na doti.” — Preikiman 3:20.

• „Den dedewan . . . no sabi notinoti.” — Preikiman 9:5.

• „A lobi foe den, na ogri-ati foe den nanga a djaroesoe foe den lasi gowe kaba.” — Preikiman 9:6.

• „No wan wroko, no wan denki foe sani, no wan sabi, no wan koni de na Sjeool [a grebi], a presi pe joe e go.” — Preikiman 9:10.

• „[A libisma] e go baka na en gron; na a dei dati en prakseri e lasi gowe.” — Psalm 146:4.

Joe e feni en moeilek foe bribi den tekst disi? Efoe dati de so, go prakseri disi: Na foeroe osofamiri, a man e wroko moni foe sorgoe en oso. Te a man dede, a e pasa foeroe tron, taki a libi e kon tranga gi en osofamiri. Son tron en wefi nanga pikin no abi srefi nofo moni foe bai njanjan. Kande den feanti foe a man sa afrontoe na osofamiri. Aksi joesrefi now: ’Efoe a man dati e libi na a jejekondre, foe san ede a no e go doro foe sorgoe gi den sani di en osofamiri abi fanowdoe? Foe san ede a no e kibri en osofamiri foe takroe sma no doe den ogri?’ Na foe di den bijbeltekst abi leti. A man dati de sondro libi, a no man doe no wan sani moro. — Psalm 115:17.

Disi wani taki, dati den dedewan noiti sa kon a libi baka? Nôno, a no dati na a tori. Wi sa taki baka ten foe na opobaka. Ma a wani taki, dati dedesma no sabi san joe e doe. Den no man si joe, jere joe, noso taki nanga joe. Joe no abi foe frede den. Den no man jepi joe, èn den no man doe joe ogri. — Preikiman 9:4; Jesaja 26:14.