San na a Paskafesa?
A piki fu Bijbel
A Paskafesa ben de wan fesa di den Dyu ben hori. A ben abi fu du nanga a fri di Gado ben fri den Israelsma di ben de na ini katibo na ini Egepte na ini a yari 1513 Fosi Krestes. Gado ben gi den Israelsma a komando fu memre a prenspari dei disi ibri yari na tapu 14 fu a Dyu mun Abib, di kisi a nen Nisan bakaten.—Eksodes 12:42; Lefitikus 23:5.
Fu san ede den e kari en a Paskafesa?
A wortu „Paskafesa” e memre wi na a ten di Gado ben kiri ala den fosi pikin fu den Egeptesma, ma a kibri den Israelsma (Eksodes 12:27; 13:15). Bifo Gado kiri den fosi pikin fu den Egeptesma, a taigi den Israelsma fu srakti wan skapu noso wan bokoboko, baka dati den ben musu teki a brudu fu a skapu noso a bokoboko, èn poti a brudu na tapusei fu a doro nanga tapu den tu doropostu fu den oso (Eksodes 12:21, 22). Na so Gado ben o si a brudu di ben de leki wan marki fu a Paskafesa, èn na so Gado ben o „pasa den” fu no kiri a fosi pikin fu den oso dati.—Eksodes 12:7, 13.
Fa den ben musu hori a Paskafesa na ini Bijbel ten?
Gado taigi den Israelsma fa den ben musu hori a fosi Paskafesa.a Wi o taki now fu wan tu sani fu den Paskafesa di kari na ini Bijbel.
Ofrandi: Den famiri ben musu teki wan skapu (noso bokoboko) di ben abi wán yari tapu a di fu tin dei fu a mun Abib (Nisan), dan na tapu a di 14 dei, den ben musu srakti a skapu (noso bokoboko). Tapu a fosi dei fu a Paskafesa, den Dyu ben musu teki pikinso fu a brudu fu a skapu (noso bokoboko), dan den ben musu iti a brudu tapusei fu a doro nanga tapu den tu doropostu fu den oso. Den ben musu losi a heri meti, èn nyan en.—Eksodes 12:3-9.
Nyanyan: Boiti a skapu (noso bokoboko), den Israelsma ben musu nyan brede sondro srudeki tu, nanga bita gruntu leki wan pisi fu a Paskafesa.—Eksodes 12:8.
Fesa: Den Israelsma ben musu hori a fesa fu brede sondro srudeki seibi dei langa baka a Paskafesa. Sobun na ini a ten dati den no ben e nyan brede di ben abi srudeki.—Eksodes 12:17-20; 2 Kroniki 30:21.
Gi leri: Papa nanga mama ben gebroiki a Paskafesa fu leri den pikin fu Yehovah Gado.—Eksodes 12:25-27.
Go na Yerusalem: Bakaten den Israelsma ben go na Yerusalem fu hori a Paskafesa.—Deuteronomium 16:5-7; Lukas 2:41.
Tra gwenti: Na ini den dei fu Yesus den ben gwenti fu singi nanga dringi win tapu a dei fu a Paskafesa.—Mateyus 26:19, 30; Lukas 22:15-18.
Fowtu denki fu a Paskafesa
Fowtu denki: Den Israelsma ben nyan a Paska nyanyan tapu 15 Nisan.
San tru: Gado ben gi den Israelsma a komando fu srakti wan skapu baka te sondongo na tapu 14 Nisan èn fu nyan en a srefi neti dati (Eksodes 12:6, 8). Den Israelsma ben teri den dei fu sondongo te go miti sondongo (Lefitikus 23:32). Sobun den Israelsma srakti a skapu, èn nyan en na a bigin fu 14 Nisan.
Fowtu denki: Kresten musu hori a Paskafesa.
San tru: Baka di Yesus hori a Paskafesa na tapu 14 Nisan, fu a yari 33, dan a sori den apostel taki den ben musu hori wan nyun fesa: a Memrefesa fu a dede fu Yesus (Lukas 22:19, 20; 1 Korentesma 11:20). A nyanyan disi e teki a presi fu na Paskafesa, fu di a e memre wi na a ofrandi fu „Krestes, a Paska-ofrandi” (1 Korentesma 5:7). A srakti ofrandi fu Yesus bigi krinkrin moro a di fu a Paskafesa, fu di na ofrandi fu Yesus e fri ala sma fu sondu nanga dede.—Mateyus 20:28; Hebrewsma 9:15.
a Ma baka wan pisi ten dan wan tu sani ben musu kenki. Fu eksempre, den Israelsma ben musu hasti densrefi fu hori a fosi Paskafesa, bika den ben musu de klariklari fu gwe libi Egepte (Eksodes 12:11). Ma di den doro na ini a Pramisi Kondre, den Israelsma no ben abi fu hasti densrefi moro fu hori a Paskafesa.