YU BEN SABI A SANI DISI?

A de so trutru taki den Dyu di ben kon na Yerusalem na a Pinksterfesa fu a yari 33, ben „komopo fu ibri kondre na grontapu”?

Na ini Tori fu den apostel 2:5-11 skrifi taki ipi-ipi sma ben go na Yerusalem fu hori a Pinksterfesa na ini a yari 33. A Dyu historia skrifiman Filo di ben libi na ini a srefi ten dati, ben skrifi tu san ben pasa drape.

Filo ben skrifi fu den sma di ben go na Yerusalem: „Ipi-ipi sma fu furu foto e kon nanga futu èn nanga boto. Den komoto fu owstusei, westsei, noordsei nanga zuidsei, fu kon na ala den fesa.” Filo ben taki tu san ben skrifi na ini wan brifi di Agrepa I, a granpikin fu Herodes a Bigiwan, ben seni gi Grankownu Kaligula fu Rome. Na ini a brifi dati, Agrepa ben taki fu Yerusalem: „A Santa Foto . . . no de a mamafoto fu a kondre Yudea wawan, ma sosrefi fu furu tra kondre, bika bigi grupu Dyu go libi na ini den kondre dati tu.”

Na ini a brifi fu en, Agrepa kari difrenti presi pe bigi grupu Dyu ben e libi. Den ben e libi srefi na farawe presi na ini Mesopotamia, Noord-Afrika, Pikin Asia, Grikikondre, nanga den èilanti na ini a Mindrikondre Se. A sabiman Joachim Jeremias taki dati a brifi no e sori krin taki den Dyu di ben e tan na den presi dati ben e go na Yerusalem. Ma „toku wi kan frustan taki den sma disi ben e du dati, fu di ala Dyu di ben de bigisma kaba ben de fruplekti fu go” na den fesa di ben e hori na Yerusalem.​—Deuteronomium 16:16.

Pe den dusundusun sma ben e tan te den ben kon na den fesa di ben e hori na Yerusalem?

Dri fesa ben e hori na ini Yerusalem ibri yari. Dati na a Paskafesa, a Pinksterfesa nanga a Kampufesa. Na ini a ten fu den apostel, dusundusun sma ben e go na den fesa disi na ini Yerusalem. Den ben komoto na ala sei fu Israel èn fu ibri tra kondre pe Dyu ben e libi (Lukas 2:41, 42; Tori fu den apostel 2:1, 5-11). Ala den sma disi ben musu feni wan presi fu tan.

Son sma ben e tan na den mati fu den èn trawan ben e tan na ini hotel noso na tra presi pe sma ben kan yuru kamra. Furu trawan ben tan na ini tenti na ini a foto noso na dorosei fu a foto, krosibei fu den skotu. A lasti leisi di Yesus ben de na ini Yerusalem, a ben tan na ini a dorpu Betania di no ben de fara fu Yerusalem.​—Mateyus 21:17.

Krosibei fu a tempel, sma feni difrenti presi pe sma fu owruten ben e go fu wasi den skin. Sma e denki taki den presi disi ben abi kamra di sma ben kan yuru. Den e denki taki drape sma ben kan wasi den skin tu fosi den ben go na ini a tempel. Na tapu wan skotu fu wan fu den presi disi skrifi taki Theodotus di ben de wan priester èn wan fesiman fu wan snoga „meki a snoga pe sma ben kan go leisi a Tora. . . . Boiti dati, a meki a bigi oso pe sma kan yuru kamra. A poti watra na ini na oso dati, so taki den sma di ben kon fu tra presi ben kan wasi den skin”.