Gi na Manpikin grani, na moro prenspari fesiman foe Jehovah
„A sma di no e gi na Manpikin grani, no e gi na Tata grani, di ben seni en.” — JOHANES 5:23
1. Foe san-ede na bribi di na krestenhèit e bribi ini na Driwanfasi de wan sani di e gi Jesus sjen?
NA INI a ten disi foeroe sma na ini a krestenhèit e taki taki den e gi Jesus Krestes grani, tokoe den e doe heri tra fasi. Fa so? We, foeroe sma e taki taki Jesus na a Almakti Gado, èn taki Gado, na Mekiman foe ala sani, ben kon a grontapoe èn ben libi èn ben dede leki libisma. Na bribi dati de ini a leri foe a Driwanfasi, di de na fondamenti leri foe na krestenhèit. Ma efoe na Driwanfasi no de troe, efoe Jesus, te joe e loekoe en boen, de moro mendri leki Gado èn na ondro en, dan a no de so taki na fowtoe fasi fa sma e tjari na matifasi foe en nanga en Tata kon na doro ben sa meki Jesus firi sari? Seiker, a ben sa si sowan fowtoe fasi fa sma e tjari sani kon na doro leki wan sjen sani gi en srefi èn ala sani di a ben leri sma.
2. Fa den Boekoe e sori krin taki Jesus de moro mendri leki Gado èn taki a de na en ondro?
2 Na waarheid de, taki Jesus noiti ben taki taki a de Gado, ma taki foeroetron a ben taki foe en srefi leki „Manpikin foe Gado”. Srefi den feianti foe en ben erken disi (Johanes 10:36; 19:7). Alaten Jesus ben de nanga a prakseri foe hei en Tata èn foe saka en srefi na ondro En, soleki a ben bekenti: „Na Manpikin no kan doe noti foe en srefi, ma soso san a e si na Tata e doe. Bikasi ala sani di En e doe, dati na Manpikin e doe so srefi. Mi no kan doe no wan enkri sani foe mi srefi . . . bikasi mi no e soekoe mi eigi wani, ma na wani foe en di seni mi.” Moro fara, a ben taki: „Mi e teki presi gi en, èn En ben seni mi.” A ben taki so srefi: „Na Gado mi ben komoto èn mi de dja” (Johanes 5:19, 30; 7:28, 29; 8:42). Noiti Jesus srefi ben taki taki en ben de Gado ofoe ben de a srefi leki en. Te sma e gi leri foe sowan sani dan den e gi Jesus sjen.
Tra fasi fa son sma e gi Jesus sjen
3. (a) Foedi den no e erken san ini a tori foe Jesus, meki sonwan ini na krestenhèit e gi en sjen? (b) Sortoe froeklari Jesus ben gi ini a tori foe na de na libi foe en bifo a ben tron wan libisma?
3 Ini a ten disi joe abi so srefi son sma na ini a krestenhèit di e gi Jesus sjen foedi den e taki taki a no ben de na libi bifosi a ben tron wan libisma èn dati na wan freimde sani. Ma, soso efoe wi man foe si taki Jesus ben saka komoto kon troetroe foe hemel wi kan bigin foe gi en grani na wan joisti fasi. Jesus srefi ben taki foeroetron taki a ben de a libi bifosi a ben tron wan libisma. „Nowan sma opo go te na ini hemel”, na so a ben taki, „leki en di ben saka komoto foe hemel, na Manpikin foe libisma.” Bakaten a ben froeklari: „Mi na a libi brede di ben saka komoto foe hemel . . . San, dan efoe joe ben sa si na Manpikin foe libisma ben opo go baka pe a ben de na fesi?” Èn so srefi: „Joe na foe na kontren a gron; mi na foe na kontren a tapoesei. . . . Foe troe, foe troe, mi e taigi joe: Bifosi Abraham ben kon na libi, mi ben de kaba” (Johanes 3:13; 6:51, 62; 8:23, 58). So srefi a neti di den ben tori Jesus, a ben taki na ini begi nanga en hemel Tata foe na libi foe en bifo a ben tron wan libisma. — Johanes 17:5.
4. (a) Na sortoe fasi moro ete foeroe sma e gi Jesus sjen? (b) Sortoe boeweisi ben sa moesoe de nofo foe taki taki Jesus ben libi troetroe èn foe san-ede?
4 Son sma ini na krestenhèit go srefi sofara taki den e taki, taki Jesus no ben de wan historia sma, taki oiti a libi leki wan libisma. Efoe a no ben libi troetroe, dan a no ben abi no wan enkri waarde foe taki makandra foe san-ede èn fa wi moesoe gi en grani. Ma den foeroe ai-kotoigi froeklari di tan kibri na ini den Boekoe sa moesoe de boeweisi nofo foe taki sondro degedege taki Jesus libi troetroe na grontapoe (Johanes 21:25). Disi de spesroetoe na tori, foedi den fosi kresten nofotron ben gi sma leri foe Jesus nanga kefar foe den eigi libi èn fri (Tori foe den Apostel 12:1-4; Openbaring 1:9). Ma, a de so taki na de a libi foe Jesus kan boeweisi, aparti foe san den bakaman foe en ben skrifi foe en?
5, 6. Boiti den Boekoe, dan san historia boeweisi, e sori ini a tori foe na de di Jesus de na libi troetroe?
5 The New Encyclopædia Britannica (1987) e froeklari: „Aparti verslag e boeweisi taki ini owroeten srefi den gensman foe na krestendom noiti ben degedege taki Jesus ben de wan historia sma.” San na wantoe foe den aparti verslag disi? Akroederi na djoe koniman Josefus Klausner, dan den abi a froeklari foe na fosi Talmud boekoe. (Jesus of Nazareth, bladzijde 20). Den abi so srefi a froeklari foe na fosi jarihondro djoe historia skrifiman Josephus. Foe eksempel, a e froeteri foe na ston di den ben ston Jakobus, di a e meki sma sabi leki „Jesus brada, di ben abi na dreiginen na Krestes.” — Na djoe historia Boekoe (Bakratongo) XX, [kapitel IX, paragraaf 1].
6 Moro fara den abi a froeklari foe fositen historiaman foe Rome, spesroetoe di foe Tacitus di ben abi bigi nen. A ben skrifi ini a bigin foe a di foe toe jarihondro foe „wan groepoe di sma no ben e wani si na ai foe den tegoe sani foe den ede, èn di na pipel ben kari kresten. A nen foe den ben komoto foe Krestes, di ben kisi dedestrafoe foe na anoe foe wan foe den granman foe wi na ondro Keisri Tiberius” (The Annals, XV, paragraaf 44). Jean-Jacques Rosseau, na Fransi moraal-filosoof foe na di foe tina-aiti jarihondro, di ben feni taki den boeweisi di e sori taki Jesus ben de wan historia sma ben de pasa marki, ben kotoigi: „Nowan sma e prefoeroe foe degedege ini a tori foe na libi-historia foe Socrates, èn tokoe, den no abi so boen boeweisi gi disi leki na di foe Jesus Krestes.”
Reide foe gi na Manpikin grani
7. (a) Sortoe froeklari foe na bijbel e froeplekti wi foe gi Jesus Krestes grani? (b) Fa moro ete Jehovah gi en Manpikin grani?
7 Now wi e doro na a afersi taki Jesus Krestes moesoe kisi grani. Taki den bakaman foe en abi na plekti foe gi en grani, sma kan si foe den wortoe foe en na ini Johanes 5:22, 23: „Bikasi na Tata no e kroetoe no wan sma kwetikweti, ma a gi na heri kroetoe na a Manpikin, sotaki ala sma ben sa gi na Manpikin grani soleki den e gi na Tata grani. Na sma di no e gi na Manpikin grani, no e gi na Tata grani, di seni en.” Sensi na opobaka foe Krestes, Jehovah gi na Manpikin foe en moro bigi grani ete, foedi a ’poti wan kownoe-ati foe glori èn grani na en tapoe foedi a ben kon dede’ (Hebrew sma 2:9; 1 Petrus 3:22). Te joe loekoe en boen, dan wi abi reide foe gi Jesus grani foe a sma di a de èn foe den sani di a doe.
8. Foe sortoe spesroetoe sani ede ini a tori foe Jesus Krestes a e froedini grani?
8 Jesus Krestes e froedini grani foedi, leki na Logos, ofoe a Wortoe, a de na moro prenspari takiman foe Jehovah. Foe den boekoe a e kon a krin taki „na Wortoe” abi foe doe nanga Jesus bifosi a ben kon na grontapoe èn so srefi bakadi a ben opo go na hemel (Johanes 1:1; Openbaring 19:13). Na ini Openbaring 3:14 a e taki foe en srefi leki „na bigin foe den sani di Gado meki.” A no de soso „na fosi gebore wan foe na heri mekisani”, ma leki na „wan enkri gebore Manpikin” a de na wan enkri sma di Jehovah Gado ben meki langalanga (Kolose sma 1:15; Johanes 3:16). Boiti foe dati, „ala sani ben kon a libi nanga jepi foe en, èn aparti foe en nowan sani srefi ben kon a libi” (Johanes 1:3). Te wi e leisi na in Genesis 1:26 taki Gado ben taki: „Meki wi meki libisma leki na prenki foe wi, akroederi san wi gersi,” dan na „wi” dati abi so srefi na ini na Logos, ofoe a Wortoe. Foedi a de so taki Jesus ben abi na toemoesi moi grani foe teki prati nanga Jehovah ini a meki foe sani di a ben de na libi bifosi a ben tron libisma, dan dati e meki taki seiker a warti foe kisi bigi grani.
9. Foe san-ede wi e kon na a bosroiti taki Jesus na a gran engel Mikaèl, èn fa Mikaèl ben gi Jehovah grani ini a tori di abi foe doe nanga na skin foe Moses?
9 Morofara Jesus Krestes e froedini grani bika a de na moro prenspari engel ofoe gran engel. Na tapoe sortoe gron wi e doro na a bosroiti dati? We, na wortoe di poti a fesi engel, „gran”, èn di wani taki „edeman” ofoe „moro prenspari sma”, abi na ini toe taki soso wan gran engel de. Na wortoe foe Gado e taki foe en te a e sori go na Masra Jesus Krestes di ben kisi opobaka foe dede. Wi e leisi: „Masra srefi sa saka komoto foe hemel nanga wan komando kari, nanga na sten foe wan gran engel èn nanga a tronpeti foe Gado, èn den wan di dede ini wanfasi nanga Krestes sa opobaka fosi” (1 Tesalonika sma 4:16). Na gran engel disi abi wan nen, soleki wi e leisi na ini Judas 9: „Di Mikaèl na gran engel ben abi wan kesekese nanga Didibri èn ben strei foe na skin foe Moses, a no ben prefoeroe foe tjari wan kroetoe teige en nanga wortoe di e kosi sma, ma ben taki: ’Meki a de so taki Jehovah strafoe joe.’” Jesus ben gi en hemel Tata grani, bika a no ben waka na fesi foe Jehovah foedi a ben prefoeroe foe tjari kroetoe teige Didibri.
10. (a) Fa Mikaèl e teki fesi ini na feti foe na boen foe Gado Kownoekondre? (b) Sortoe ròl Mikaèl ben prei ini a tori di abi foe doe nanga na nâsi Israèl?
10 Na gran engel Mikaèl e feti gi na Kownoekondre foe Gado, èn e teki fesi te den e krin hemel poeroe Satan nanga den ogri jeje legre foe en (Openbaring 12:7-10). Èn na profeiti Danièl e taki taki ’a e opo doe wan sani foe a boen foe na pipel foe Gado’ (Danièl 12:1). Soboen a e sori, taki Mikaèl na a srefi sma leki „na engel foe na troe Gado di ben e waka na fesi foe na kampoe foe Israèl” èn taki en na a sma di Gado ben gebroiki foe tjari en pipel go na ini a Pramisi Kondre. „Poti ai na joe srefi tapoe foe en ede èn gi jesi na a sten foe en,” Gado ben komaderi. „No tjari joe srefi na wan oproeroe fasi teige en, . . . foedi mi nen de na ini en” (Exodus 14:19; 23:20, 21). Sondro pikinso degedege na gran engel foe Jehovah moesoe foe kisi wan bigi belangstelling gi na pipel foe Gado di ben de leki wan prenki èn di ben tjari en nen. A fiti srefisrefi taki en ben kon jepi wan tra engel di den ben seni go foe trowstoe na profeiti Danièl, èn di wan makti ogri jeje ben meki a lasi ten (Danièl 10:13). Foe dati-ede kande a de wan froestan sani foe prakseri taki na engel di ben pori den 185.000 fetiman foe Sanherib, ben de nowan tra sma moro leki na gran engel. — Jesaja 37:36.
11. Foe san-ede Jesus e froedini na grani foe wi foe na libi nanga waka foe en na grontapoe?
11 No wawan a de so taki Jesus e froedini grani foe na sma ede di a de, ma a e froedini so srefi na grani foe wi foe den sani ede di a doe. A de foe eksempel, na wan enkri libisma di libi wan volmaakti libi. Adam nanga Eva ben meki leki volmaakti libisma, ma na volmaaktifasi foe den ben de foe wan sjatoe ten. Ma, Jesus Krestes tan ’loyaal, sondro fowtoe, aparti foe sondari’, aladi Didibri ben kan tjari ala sortoe kori èn froefolgoe na en tapoe. Na ondro ala den sani disi „a no doe sondoe, èn den no ben feni bidrigi na ini en mofo.” Nanga reti a ben kan tjalensi den relisi gensman foe en taki: „Soema foe oenoe e overtoigi mi foe sondoe?” No wan foe den ben kan doe dati! (Hebrew sma 7:26; 1 Petrus 2:22; Johanes 8:46). Èn foedi Jesus ben kibri en soifri retifasi sondro foe doe sondoe, meki a ben regtfardiki na hemel Tata foe en leki na reti Universeel Soeverein èn ben boeweisi taki Didibri na wan lagi èn bigi leiman. — Odo 27:11.
12. (a) Sortoe sma Jesus ben de, èn san a ben doe èn pina foe na boen foe tra sma? (b) Foe san-ede joe ben sa taki taki Jesus e froedini na grani foe wi foe den sani ede di a ben doe èn foe den sani ede di a ben pina?
12 Jesus Krestes no e froedini na grani foe wi wawan, foedi a libi wan volmaakti libi, sondro sondoe, ma so srefi foedi a ben de wan boen sma, wan sma di no ben soekoe wini gi en srefi nomo, èn di ben òfer en srefi. (Teki gersi Rome sma 5:7.) Sondro foe weri a ben sorgoe gi den jeje èn skin fanowdoe foe na pipel. Fa a ben sori faja gi na oso foe en Tata, èn fa a ben sori pasensi ini en demakandra nanga den disipel foe en! Sortoe hebi pina a ben de klariklari foe njan foe doe na wani foe en Tata! Foe na tesi foe en ini a djari foe Getsemane, na bijbel e taki: „Ma di a ben kon firi hebi skin-ati, a ben go doro foe begi nanga moro faja; èn na sweti foe en ben tron leki dropoe broedoe, di ben fadon na gron.” Ija, a „ben òfer tranga begi nanga faja begi . . . nanga tranga babari èn watra-ai” (Lukas 22:44; Hebrew sma 5:7). O soifri na profeiti Jesaja ben taki a fesi foe den tesi foe en na ini Jesaja 53:3-7!
13. Sortoe toemoesi moi eksempel Jesus ben gi wi ini a tori foe a gi grani na en Tata na ini hemel?
13 Jesus e froedini so srefi na grani foe wi foe na boen eksempel ede di a gi wi ini na gi foe grani na en hemel Tata. A ben kan taki nanga reti: „Mi e gi mi Tata grani” (Johanes 8:49). Alaten a ben gi Jehovah Gado grani nanga den wortoe èn doe foe en. Soboen, a bijbeltori no e taki, taki a pipel ben gi Jesus glori di a ben dresi wan man, ma taki „den ben gi Gado glori” (Markus 2:12). Foe dati-ede, na a kaba foe Jesus grontapoe diniwroko, nanga reti a ben kan taigi en Tata na hemel ini begi: „Mi gi joe glori na grontapoe, foedi mi kaba na wroko di joe gi mi foe doe.” — Johanes 17:4.
San a doe gi wi
14. San na dede foe Jesus ben doe gi wi foe san a e froedini grani?
14 Èn o foeroe Jesus Krestes e froedini na grani foe wi foe ala sani di a doe gi wi! A ben dede gi den sondoe foe wi so taki wi kan kon verzoen nanga Jehovah Gado. Jesus ben taki foe en srefi: „Na Manpikin foe libisma no ben kon . . . foe sma dini en, ma foe dini èn foe gi en sili leki wan loesoe paiman na presi foe foeroe sma” (Mateus 20:28). No so fasi na dede foe en ben meki taki ala sani di na Kownoekondre sa doe gi na libismafamiri ben kan: libi sondro dede na ini hemel gi den 144.000 di de en trowmisi èn têgo libi na ini wan paradijs grontapoe gi miljoenmiljoen trawan di e sori na bribi èn na gi jesi foe den na ondro tesi. — Psalm 37:29; Openbaring 14:1-3; 21:3, 4.
15. San na wán eksempel foe na fasi fa Jesus ben tjari na Sma di en Tata de kon na krin gi wi?
15 Leki na Bigi Leriman, Jesus Krestes e froedini grani toe foedi a meki na wani foe en Tata nanga a sma di a de, kon a krin gi wi na wan volmaaktifasi. Na ini a bergipreiki foe en, a ben sori foe eksempel tapoe na boen-ati fasi foe en Tata di ben seni son di e skèin èn alen gi boen èn gi ogri sma èn dan a ben taki: „Foe dati-ede oenoe moesoe de volmaakti so leki oenoe hemel Tata de volmaakti.” — Mateus 5:44-48.
16. Fa na apostel Paulus ben taki sjatoe baka foe Jesus libi nanga waka di e froedini grani?
16 Na apostel Paulus ben taki sjatoe baka foe Jesus en libi nanga waka di e froedini grani, di a ben skrifi: „Aladi a ben de na ini a skinfasi foe Gado, a no ben prakseri foe teki dati na wan ogri-ati fasi, dati wani taki, foe de leki Gado. Nôno, ma a ben libi en glori èn teki na skin foe wan srafoe èn ben tron leki libisma. Moro ete, di a ben de na ini a fasi foe wan libisma, a ben saka en srefi èn ben kon gi jesi te na dede, ija, dede na wan pina-oedoe.” — Filipi sma 2:5-8.
Fa wi kan gi na Manpikin grani
17, 18. Na sortoe difrenti fasi wi kan gi Jesus Krestes grani?
17 Foedi Jesus Krestes sondro pikinso degedege e froedini na grani foe wi, meki wi e doro na a aksi: Fa wi kan gi na Manpikin grani? Wi e doe dati foedi wi e sori bribi ini na loesoe paiman ofrandi foe en, èn wi e boeweisi na bribi dati foedi wi e doe den fanowdoe stap foe berow, drai wi libi, gi wi srefi abra, èn dopoe. Foedi wi e kon na Jehovah ini begi ini na nen foe Jesus, wi e gi Jesus grani. Morofara wi e gi en grani te wi e gi jesi na den wortoe foe en: „Efoe wan sma wani kon na mi baka, meki a drai baka gi en srefi èn teki en pina-oedoe èn waka doronomo na mi baka” (Mateus 16:24). Wi e gi Jesus Krestes grani te wi e waka baka den rai foe en foe tan soekoe fosi na Kownoekondre foe Gado èn en regtfardikifasi, èn wi e gi en grani te wi e gi jesi na en komando foe teki prati na a wroko foe meki disipel. Wi e gi Jesus grani, so srefi, te wi e sori na brada lobi di soleki a ben taki ben sa meki sma sabi ala den troe bakaman foe en. — Mateus 6:33; 28:19, 20; Johanes 13:34, 35.
18 Morofara, wi e gi na Manpikin grani foedi wi e teki na nen foe en na wi tapoe, foedi wi e kari wi srefi kresten, èn dan e libi morofara akroederi na nen dati nanga jepi foe na toemoesi boen fasi foe tjari wi srefi (Tori foe den Apostel 11:26; 1 Petrus 2:11, 12). Na apostel Petrus ben taki taki wi moesoe waka soifri na ini den foetoestap foe Jesus (1 Petrus 2:21). Foedi wi e waka na en baka na ini a heri fasi fa wi e tjari wi srefi, dan wi e gi en grani toe. Èn seiker, wi e gi en spesroetoe grani te wi e hori na Memrefesa foe na dede foe Krestes ala jari. — 1 Korente sma 11:23-26.
19, 20. (a) Sortoe paiman Jesus ben poti na fesi foe den bakaman foe en, now èn ini na ten di e kon, te den e gi en grani? (b) Sortoe froetrow wi kan abi ini a tori di abi foe doe nanga na Manpikin?
19 Sortoe paiman Jesus e poti na den disipel fesi te den e waka wan libi nanga waka di e gi en grani? A ben taki: „Foe troe mi e taigi oenoe. No wan sma libi oso ofoe brada ofoe sisa ofoe mama ofoe papa ofoe pikin ofoe gron foe mi ede èn foe na boen njoensoe ede, di no sa kisi now, ini na ten disi hondro tron, oso èn brada èn sisa èn mama èn pikin èn gron, nanga froefolgoe èn na ini a seti foe sani di e kon têgo libi. — Markus 10:29, 30.
20 Efoe wi e tjari ofrandi foe Jesus ede, dan a sa sorgoe taki wi e kisi pai. Jesus e djaranti wi: „Efoe wan sma, foe dati-ede e bekenti na fesi foe libisma taki a de na ini wanfasi nanga mi, dan mi sa bekenti toe na fesi foe mi Tata di de na ini hemel taki mi de na ini wanfasi nanga en” (Mateus 10:32). Wi kan abi na froetrow taki, soleki fa na hemel Tata e gi grani na den wan di e gi en grani, na so a wan enkri gebore Manpikin foe Jehovah sa waka na en Tata baka ini na tori disi, neleki fa na Manpikin e doe na ini tra afersi.
Fa joe ben sa piki?
◻ Fa foeroe sma ini a krestenhèit e gi na Manpikin sjen?
◻ Sortoe froeklari Jesus ben gi ini a tori foe na de di a ben de na libi bifosi a ben tron wan libisma?
◻ San na wantoe reide di wi abi foe e gi Jesus grani?
◻ San na wantoe fasi fa wi kan gi Jesus grani?
◻ Sortoe boen bakapisi a e abi te sma e gi Jesus grani?