Tranga leri e tyari wan froktu fu vrede kon

„Now a gersi leki ibri tranga leri tapu a momenti srefi no de wan prisiriwan, ma e gi sari; toku a e tyari bakaten gi den di oefen nanga dati wan froktu fu vrede kon, dati wani taki regtvaardikifasi.” — HEBREWSMA 12:11.

1. San Yehovah Wortu e taki fu na makti fu libisma fu bepaal en libipasi, ma san libisma e taki toku ete? (b) Suma e sori taki a abi leti, èn suma no e sori dati?

YEHOVAH Wortu e taki: „A no de na wan man di e waka, srefi fu poti en futu a pasi” (Yeremia 10:23). Libisma e taki dati en kan du en wel èn sensi na bigin fu na opruru na ini Eden a ben handri na ini akruderi nanga dati. Fu sensi a momenti dati te nanga a dei fu tide a de so nanga furu sma leki nanga furu sma ini den dei fu den krutuman foe Israël: „Ibriwan sma ben gwenti fu du san de reti ini en eigi ai” (Krutuman 21:25). Ma den wortu fu Yehovah ini Odo 14:12 kon de tru: „Wan pasi de di letopu ini na ai fu wan man, ma den pasi fu dede de bakaten a kaba fu en”. Siksidusun yari langa libisma ben waka a pisi di ben gersi yoisti gi den, èn ini a heri pisten dati a ben waka kon gi den tapu feti, angriten, siki, kiri nanga dede. Historia ben bewijsi dati Yehovah Wortu de tru èn den pasi fu libisma leki wan bedrigiwan.

2. Fa pikinnengrepsycholoog e si na gi fu wan fonfon, ma san na den bakapisi fu den fu gi pasi na pikin fu san den wani?

² Onvolmaakti libisma abi tranga leri fanowdu. Den abi en fu sensi pikinnengreten fanowdu. A Wortu fu Gado e taki: „A sma di e kibri en wipi, abi ogri-ati gi en manpikin, ma a sma di lobi en e suku en nanga tranga leri” (Odo 13:24). Furu pikinnengrepsycholoog e strei taki na koni disi fu Gado no bun. Yari psa kaba wan fu den ben poti na aksi: „Yu e ferstan un mama dati ibritron te yu e naki yu pikin, e sori dati yu abi ogri-ati gi yu pikin?” Toku na gi di den ben gi pasi fu sani psa ben tyari sowan frudu fu ogridu fu pikinnengre dati wan krutubakra na wan krutubangi ini Brooklyn (New York) ben gi na srapu kommentaar di e kon now: „Mi denki dati gi wantu fu den yongusma wi abi wan lati fanowdu fu na udu loods. Ma disi sma e si ini a ten disi leki wan sani di no de ini modo moro. Now den e taigi wi dati yu no mag naki wan pikin; yu kan hendri wan koniman ini a gro fu en.” Ma na gi di den e gi pasi fu sani psa no ben meki koniman kon fu den koti leki froktu — soso wan kruktudu skwala fu tini ogriduman.

3. San na a firi di e kon na fesi ini a ten disi, soleki fa e kon a krin ini san difrenti sma e taki?

³ Winti e wai fu wan heri tra uku. Burton L. White, wan sabiman tapu a kontron fu na gro fu na pikin e taki dati na tranga fasi fu yu no sa meki dati yu pikin „go lobi yu mindri leki te yu sa gi pasi fu a du ala sani di a wani . . . srefi efu regelmatig yu e fon en, yu sa si dati a sa tan kon na yu.” A e poti krakti a tapu dati a pikin na ini a fosi presi abi kefarlek bun furu lobi fanowdu. Dr. Joyce Brothers ben meki wan rapport fu wan studi pe hondrohondro pikin fu na di fu feifi èn na di fu siksi-skoroyari ben de ini a tori èn na suma den ben hori anu tranga gi den na tranga leri. Den ben bribi dati den tranga regel „ben de wan tori fu lobi bi fu papa nanga mama”. Na Journal of Lifetime Living ben taki „Pikinnegrepsycholoog, di ben meki trobi fu a nyanyan akruderi schema kontrari nyanyan akruderi a fanowdu èn fonfon kontrari fu no fon, ben si dati noti e kisi lobi nomo.” Srefi dr. Benjamin Spock, na skrifiman fu na buku Baby- èn pikinnengre sorgu, ben teki wan pisi fu na fowtu tapu en fu na mankeri fu tranga fasi fu na sei fu den papa nanga mama èn na ogridu di e kon fu dati. A ben taki dati na fowtu ben didon na den sabiman, „den pikinegrepsychiaters, psycholoog, onderwijzer, maatschappelijk werkers nanga pikinnengredatra soleki mi”.

Na wipi fu tranga leri

4. San na wipi fu tranga leri e agersi, èn san e kon a krin nanga a yoisti gebroiki fu na wipi disi kontrari na libifasi fu gi wan pikin pasi fu du san a wani?

⁴ Na wortu di gebroiki dya a tapsei „wipi” no e sori tapu a gi fu wan fonfon ma e sori tapu na yepi sani nanga san na kenki e tyari kon, sortu vorm disi mag teki ooktu. The New International Version e taki: na a vers disi: „wipi. Seiker wa stijlfiguur gi ala sortu fu tranga leri di kan de tu.” Wan wipi na wan symbool fu tiri ofu respeki ini a geval disi fu papa nanga mama. Wan papa ofu mama no e kisi bakaten nowan tangi fu di a ben libi sani fu a pikin du fa a wani, èn e pori en: „Efu wan sma e pori en knegti [ofu pikin] fu yongu yari kaba dan srefi ini en libi bakaten a sa tron wan sma di de sondro tangi” (Odo 29:21). Fu offer na respeki fu papa nanga mama fu libi sani fu a pikin du fa a wani e tyari syen kon èn no de wan sori fu lobi ma fu mi-no-ke-fasi; fu gebroiki tapu wan switifasi ma toku nanga faste bosroiti na wipi fu tranga leri, e sori lobi nanga brok’ede. „Na wipi èn na pir’ai, den dati e gi koni; ma wan boi di den libi en na ensrefi sa meki en mama kisi syen.” — Odo 29:15.

5. (a) San wan kommentaar e taki fu Odo 13:24, èn nanga sortu tra bijbeltekst disi e kruderi? (b) Suma na den sma di Yesus nanga Yehovah e gi tranga leri?

⁵ Te Commentary on the Old Testament fu Keil Delizsch e sori tapu Odo 13:24, a e ferklari: „Wan papa di trutru wani si bun fu en manpikin mu gi en tranga leri biten fu gi en na yoisti tiri, aladi en yeye de opo-opo ete, èn no mu gi pasi dati takru pasi meki trutru ini en ati; ma wan sma di e libi en pikin fu du san a wani aladi a mu de streng, e handri leki trutru a wani foe si en dede.” San Odo 19:18 e taki akruderi Moffatts New Translation of the Bible, e akruderi nanga dati: „Gi tranga leri na yu pikin aladi howpu de ete gi en, èn no meki a waka go ini pori.” Tranga leri di de switi ma nanga wan faste bosroiti èn di sensi pikinnengreten e gi, de wan sori fu a lobi fu papa nanga mama. Yesus ben taki: „Gi ala sma di mi firi lobi gi mi e gi pir’ai èn mi e gi tranga leri.” Fu na sei fu Yehovah, „a sma di Yehovah lobi, e kisi tranga leri fu en”. — Openbaring 3:19; Hebrewsma 12:6.

6. Sortu vorm tranga leri e teki nofotron èn sortu eksempre e hori baka gi na piki fu yu?

⁶ Tranga leri wanwantron kan abi na ini en fonfon, ma nofotron disi no de so. Odo 8:33 no e taki „firi” tranga leri ma „arki na tranga leri èn kon koni”. Nofotron tranga leri e gi nanga wortu, no nanga wan fonfon: „Den pir’ai fu tranga leri de na pasi fu libi” „grabu tranga leri; no libi en. Kibri en bun, bika a de yu libi” (Odo 4:13; 6:23). Di Yehovah dienstknegti Yob ben mu kisi tranga leri, dan disi ben kon nanga wortu fu pir’ai, fosi fu a mofo fu Elihu èn dan fu na mofo fu Yehovah srefi (Yob kapitel 32-41). Yob ben teki na pir’ai èn ben taigi Yehovah: „Fu dat’ede mi e teki mi wortu baka èn mi abi trutru berow ini stof nanga asisi.” — Yob 42:6.

7. San na Griki wortu di vertaal nanga „tranga leri” wani taki, fa a mu gi, èn san a e tyari kon?

⁷ Pai.dei’a de na Griki wortu di vertaal nanga tranga leri. Na ini den difrenti vorm fu en a wani taki opleiding, kweki, vorm, ’gi leri nanga safrifasi’ (2 Timotéus 2:25). A abi moro fu du nanga wan opleiding ini wan patron fu waka nanga libi leki nanga na kisi fu sabi. Te tranga leri mu gi dan „ala langa pasensi nanga koni fu gi leri” mu kon ini a tori (2 Timotéus 4:2). Disi e ferklari bun ini a fermane di papa e kisi: „Èn unu, un papa, un no tergi un pikin, ma tan kweki den ini na tranga leri èn na seryusu fermane fu Yehovah” (Efese 6:4). Tapu wan switi èn nanga faste bosroiti na tranga leri disi fu kenki na denki fu pikin sodati den e go denki leki Yehovah.

Na fonten fu tranga leri

8. Fu sortu fonten tranga leri komoto èn tapu sortu fasi wi kan gi wisrefi tranga leri?

⁸ Den gronprakseri di abi fu du nanga na tranga leri gi pikin de ooktu gi bigisma. Na bijbel de na fonten fu bodoi di e ferteri sortu sma wi de ofu no mu de. Efu wi e leisi a bijbel, dan wi kan tesi wisrefi èn tyari kenki kon te dati de fanowdu (2 Korinte 13:5). Efu wi e denki fu Yehovah wet, na firi fu fowtu kan kon na ini wi, sodati wi e kisi yepi fu erken pe wi mu tyari den fanowdu kenki kon. Na Psalmsingiman ben ondrofeni disi: „Mi sa blesi Yehovah, di ben gi mi rai. Futru, ini den meti den niri fu mi [den moro dipi firi fu mi] ben poti mi a pasi” (Psalm 16:7). Net leki Paulus wi kan gi wisrefi tranga leri: „Mi e naki mi skin èn e tyari en leki wan srafu, fu no baka te mi ben preiki gi trawan den ben feni mi srefi tapu wan ofu tra fasi no bun.” — 1 Korinte 9:27.

9. Tapu sortu tra fasi tranga leri kan gi tapu wan bun fasi?

⁹ Tranga leri kan kon ooktu fu wan tra sma. A kan de ini wan luku, wan hari fu na fesi, wan wortu, wan gebaar, wan pir’ai di gi nanga mofo. Yesus ben luku soso go na Petrus èn na luku dati ben memre en dati Yesus ben taki na seryusu sondu fu en a fesi, èn a ben go na dorosei èn ben krei fu dati (Lukas 22:61, 62). Na wan tra okasi a ben de wan strafu di ben kon fu fo wortu di leki wan slag ben kon gi Petrus: „Go a mi baka Satan!” (Mateus 16:23) Te wi e leisi publikatie fu na genootschap, e go na konmakandra, e taki nanga tra sma, e psa muilek ondrofeni — ala disi sa opo wi ai gi kontren tapu san wi mu tyari kenki kon. Na moro prenspari fonten èn tyariman fu tranga leri na a Wortu fu Gado srefi. — Psalm 119:105.

10. Fa den odo fu Salomo e gi warti tranga leri ma sortu libifasi sma wani waka, tog na en baka?

¹⁰ Den Odo fu Salomo ben gi na sma fu alaten sodati ’den kan sabi koni èn tranga leri, fu si den wortu fu na ferstan, fu kisi na tranga leri di e gi inzicht, regtvaardikifasi nanga reti èn opregtifasi, fu gi na den sma di no abi ondrofeni koni, na wan yonguman sabi nanga denki’. Ma kande wan sma no e meki soso „wortu poti en a pasi, bika a e ferstan ma a no e broko ede nanga den” (Odo 1:2-4; 29:19). Son sma di no abi ondrofeni e tanapu a tapu fu kon koni nanga yepi fu ogri nanga syen, net soleki na lasi manpikin bifo „a ben kon na en ferstan”. — Lukas 15:11-17.

11. (a) Fa na gemeente Korinte èn Yona ben kisi tranga leri? (b) Sortu tranga leri di ben de leki wan strafu David ben mu ondrofeni fu na sutadu ede fu en èn den muiti fu en fu tapu en sondu? (c) Fu sortu wortu di skrifi na ini Psalm 51 na dipi fu en berow e kon na fesi?

¹¹ Te ai gi kommentaar tapu wan brifi gi a kristen gemeente Korinte di a ben skrifi a fesi Paulus ben taki: „Na sari fu yu ben tyari yu kon kisi berow, bika na tapu wan Gado fasi yu ben kisi sari, . . . san ben tyari a kon bun baka fu na kruktudu” (2 Korinte 7:9-11). Yona ben kisi tranga leri nanga yepi fu wan bigi winti tapu na se èn wan bigi fisi (Yona 1:2, 3, 12, 17; 2:10; 3:1-4). Na sutadu fu David èn den muiti fu en fu tapu na sondu, ben meki a tron a sani fu tranga leri di ben de leki wan strafu, soleki e kon na krin na ini 2 Samuël 12:9-14. A berow fu en tapu wan fasi di e buweigi yu ati e kon na krin ini den wortu fu na di fu 51 Psalm: ’Wasi mi krin fu mi sondu, krin mi fu mi sondu. Mi sondu de alaten na fesi fu mi. Figi ala mi sondu puru, meki wan soifri ati gi mi, poti wan nyun yeye ini mi. No trowe mi gwe fu yu fesi. Wan broko èn masi ati, o Gado, yu no sa feragti.’ — Vers 2, 3, 9, 11, 17.

12. Sortu tranga maatregel de fanowdu, èn fa a kan waka gi son sma di e trowe pir’ai?

¹² Soleki Odo 26:3 e sori, dan kefarlek tranga maatregel de fanowdu gi son sma: „Wan wipi de gi na asi, wan ton de gi na buriki, èn na wipi de gi na baka fu den di no abi frustan.” Wanwantron Yehovah ben meki en natie Israël kon na ondro den muilekheid di den ben tyari kon a tapu densrefi: „Den ben tyari densrefi na wan tranga-ede fasi teigi den wortu fu Gado; an na rai fu na Moro heiwan den ben wiswasi. Fu dat’meki a ben go sofara fu saka na ati fu den na ondro muiti, den ben naki futu fadon, èn nowan sma ben de di ben yepi. Ne den ben bari kari Yehovah fu yepi ini a nowtu fu den; fu den benawtu fu den a ben yepi den leki fa a ben gwenti” (Psalm 107:11-13). Son sma di no e gebroiki den frustan e tranga densrefi so kefarlek dati nowan enkrifasi fu tranga leri fu meki den kon betre kan doro den ati: „Wan man di furutron kisi pir’ai ma e tan tranga en neki, wantewante sa broko, èn dati sondro a kisi betre.” — Odo 29:1

A gi èn a kisi fu pir’ai

13. San wi mu komoto na en pasi te wi e gi wan pir’ai, èn fa dati mu gi?

¹³ Sortu vorm na trana leri mag teki ooktu, noiti a musu gi na ini atibron. Te yu luku en bun ’dan atibron e meki trobi kon’ èn sobun no e de nowan yepi. Wi kisi ooktu na rai: „Wan sma di no de esi fu kisi atibron, de furu pasamarki na ini a koni fu si sani, ma wan sma di no abi pasensi, e opo lawfasi go na loktu.” Boiti fu dati „[na inzicht fu wan sma e demper] seiker en atibron, èn a de wan glori fu en sei fu luku psa na sondu” (Odo 29:22; 14:29; 19:11). Te tranga leri de fanowdu, dan disi noiti mu gi na wan marki di ben pasa. Gi en tapu na yoisti ten èn na ini a yoisti marki — no tumsi esi, no tumsi lati, no tumsi pkinso èn no tumsi furu.

14. Sortu tra richtlijn e gi a den sma di e gi pir’ai?

¹⁴ Dyaso wantu richtlijnen de gi den sma di e gi tranga leri: „No krutu wan owruman na wan trangafasi. Kontrari fu dati, taki nanga en tranga leki wan papa, yonguman leki brada, owru-uma leki mama, yongu-uma leki sisa nanga ala krinfasi” (1 Timotéus 5:1, 2). Yu e taki nanga wan sma tranga na presi fu tapu-skreki gi en? „Un brada, srefi efu wan sma du wan fowtu bifo a kisi ensrefi, dan yu, di abi yeyefasi, e pruberi fu tyari sowan sma kon baka na ini wan yeye fu safri-atifasi, aladi yu e hori ai tapu yusrefi, sodati yu tu no kisi tesi” (Galasia 6:1). Wi e gi nanga safri-atifasi rai, aladi wi de alaten sabisabi fu wi eigi fowtu di wi e meki? „Behandel den sma soleki yu wani meki den behandel yu” (Mattéus 7:12, Bigi Nyunsu Bijbel). Yu e sori empathie fu di yu e poti yusrefi na ini a situwasi fu a tra partij?

15. Fu san a e go na a pisi fu pir’ai, èn sortu extra rai e gi a den sma di e kisi pir’ai?

¹⁵ Na a kisi fu wan pir’ai a e kon tapu sakafasi. Na pir’ai e sori taki a de wan pikin nyofi sani, no de eerlek, onregtvaardiki? No meki hasti bosroiti. Go denki fu a tori. No de negatief. Luku na pir’ai nanga wan positief fasi. Efu a gersi taki a no abi honderd procent fu du nanga yu, dan tog wan pisi fu en de dati wel? Opo yu ferstan, sodati yu sa teki en; go krutu na waarde fu en leki fa a de. Yu e firi sani esesi, mandi esesi? Baka te na firi fu yu di ben kisi pen biginbigin ofu na ferferi fasi di yu ben firi kon kowru, dan a kan teki ten fu si na pir’ai ini wan positief leti. Wakti sobun. Hori yu mofo. Wegi-go-wegi-kon safri san ben taki. A kan de dati yu krutu sani a fesi kaba ini a tori fu a sma di gi a rai èn yu e poti fu dat’ede a rai na wan sei? Luku a pir’ai tog ete leki wan sani di de nanga wan bun prakseri èn no leki wan sani fu poti a wan sei esesi.

16. (a) Sortu tekst nanga aksi di abi fu du nanga dati wi mu luku te wi e kisi rai? (b) Fa wi kan abi den srefi firi leki na psalmsingiman e tyari kon na fesi?

¹⁶ Dyaso wantu tekst de fu go denki fu en te yu e kisi pir’ai. „Ala sma di e hori en wortu, abi sabi, èn wan man di abi a koni fu si sani de tiri fu yeye” (Odo 17:27). Yu e arki èn tan tiri èn bedari? „Na pasi fu na lawwan de leti ini en eigi ai, ma a sma di e arki na rai koni” (Odo 12:15). Yu e teki esesi a bosroiti dati yu abi leti, ofu yu e arki nanga wan yeye di e teki sani? „De esi . . . fu yere, no de esi fu taki, no de esi ini a tori fu atibron” (Yakobus 1:19). Yu e handri ini akruderi nanga den wortu disi te yu e kisi rai? „No de esi ini yu yeye fu kon firi ferferi, bika ferferi fasi de ini na ati fu den sma sondro frustan” (Preikiman 7:9). Yu e kon ferferi esesi? Fa a ben sa de wan moi sani efu wi ben kan abi den srefi firi leki na Psalmsingiman: „Efu na rogtvaardikiwan ben sa naki mi, a ben sa de wan lobi bunfasi; èn efu a ben sa pir’ai gi mi a ben sa de oli tapu na ede, di mi ede no ben sa weigri.” — Psalm 141:5.

Ferdrage tranga leri èn koti wan froktu fu vrede

17. Fu san-ede tranga leri no de makriki alaten fu teki, ma fa wi sa kisi yepi fu ferdrage disi te wi e hori Hebrewsma 12:7, 11 ini prakseri?

¹⁷ Tranga leri no de alaten kumakriki fu teki. Kande a kan tyari yu kon ini ferleigi pikinso èn wantu skotu kan kon makandra nanga en. A kan gi yusrefi sari. Ma ferdrage ala disi. Den sortu sani disi sa hari psa èn baka dati na prisiri e kon. „San yu e ferdrage e dini leki tranga leri. Gado e behandel yu leki manpikin. Bika sortu manpikin de di wan tata no e gi tranga leri? Now ibri tranga leri e gersi tapu a momenti leki wan sani di no abi prisiri, ma sari; toku a e tyari bakaten gi den di oefen nanga dati wan fruktu fu vrede, dati wani taki regtvaardikifasi.” — Hebrewsma 12:7, 11.

18, 19. Sortu krakti firi Yeremia èn na psalmsingiman ben tyari kon na fesi èn san e sori san de na yoisti libifasi te wi e kisi tranga leri?

¹⁸ Sobun efu a tranga leri de nanga sari èn de muilek fu tyari, wakti dan tapu na froktu fu vrede di e kon baka dati. Wakti tapu Yehovah, netleki Yeremia: „Sondro mankeri yu sili sa prakseri mi èn sa boigi ensrefi abra mi. Disi mi sa tyari kon ini mi ati. Fu dat’ede mi sa sori wan fasi dati mi e wakti” (Kragisingi 3:20, 21). Hori ini prakseri san na psalmsingiman ben taki ini ensrefi di a ben de ini benawtu: „Fu san-ede yu de sondro howpu, o mi sili, èn fu san-ede yu de ini dyugudyugu? Wakti tapu Gado, bika mi sa prijse en ete leki a moro bigi yepi fu mi persoon.” — Psalm 42:5, 11; 43:5.

¹⁹ Sobun meki ibriwan fu wi wakti tapu Gado te wi e kisi tranga leri. Baka te disi oefen wi, dan wi sa koti na froktu fu vrede, dati wani taki regtvaardikifasi.

Yu kan memre disi ete

◻ Sortu waarde a abi fu gebroiki na wipi fu tranga leri?

◻ San na a moro prenspari fonten fu tranga leri?

◻ Sortu tra fonten fu tranga leri de?

◻ Sortu moro tranga maatregel kan de fanowdu boiti wortu di e gi pir’ai?

◻ San na wantu richtlijn gi na gi fu pir’ai?

◻ Sortu rai sa yepi wi fu teki pir’ai?

[Prenki na tapu bladzijde 7]

Yu de so ferstandiki ’fu arki na tranga leri’?