Leri di gi ini bijbel ten
„Oenoe moesoe leri den toe na oen manpikin.” — DEUTERONOMIUM 11:19.
1. San e sori taki Jehovah abi belangstelling gi a kisi di den foetoeboi foe en e kisi leri?
JEHOVAH na a Gran Leriman. Noiti a ben libi den foetoeboi foe en na ini don. Ala ten a ben de klariklari foe prati sabi nanga den. A e leri den en wani nanga en pasi. En wan enkri gebore Manpikin ben de na en sei, ini a ten foe someni jaridoesoen di sma no man teri, ala di a ben e teki leri doronomo leki Gado „meester wrokoman” (Odo 8:30). Di Jesus ben de na grontapoe, a ben taki: „Den sani disi mi e taki so leki a Tata ben leri mi” (Johanes 8:28). Di Elihu ben sori na Gado leki a Leriman di no abi en speri, a ben aksi: „Soema na wan leriman leki en?” (Job 36:22) A profeiti Jesaja ben taki foe Jehovah leki a „Gran Leriman” foe a pipel foe En èn a ben taki na fesi: „Ala oen manpikin sa de sma di sa kisi leri foe Jehovah, èn a vrede foe oen manpikin sa de pasa marki” (Jesaja 30:20; 54:13). Sondro degedege, Jehovah wani, taki den koni mekisani foe en, kon fri foe a de di wan sma de sondro joisti sabi nanga kisi boen leri.
Leri di gi na a ten foe den famiri-edeman
2, 3. (a) Fa den getrow famiri-edeman ben si a gi di den ben gi leri na den pikin foe den èn sortoe ordroe Jehovah ben gi Abraham? (b) San ben de a bigi prakseri na baka na ordroe foe gi leri na den bakapikin foe Abraham?
2 Wan foe den fondamenti grani foe na osofamiri-edeman na a ten foe den famiri-edeman, ben de a gi di a ben gi leri na en pikin nanga en osofamiri. Gi den foetoeboi foe Gado a gi di den ben gi leri na den pikin foe den, ben de wan froeplekti tapoe a kontren foe relisi. Jehovah ben taki foe en foetoeboi Abraham: „Mi kon sabi en so taki a kan komanderi en manpikin nanga en osofamiri baka en, so taki den sa hori troetroe Jehovah pasi foe doe regtfardikifasi èn retidoe; so taki Jehovah troetroe sa tjari kon na Abraham tapoe san a taki foe en.” — Genesis 18:19.
3 A froeklari disi foe Gado, e sori taki Jehovah ben si a gi di den ben moesoe gi leri leki wan toemoesi prenspari sani. Gado ben aksi Abraham, Isak nanga Jakob foe leri den osofamiri foe den na ini den pasi foe En foe regtfardikifasi nanga retidoe, so taki den geslakti di ben o kon na baka ben sa de ini a posisi foe hori Jehovah pasi. So boen, Jehovah ben sa meki den pramisi foe en kon troe di ben abi foe doe nanga a siri foe Abraham èn a blesi di a e blesi „ala den nâsi foe grontapoe.” — Genesis 18:18; 22:17, 18.
A leri sistema na Israèl
4, 5. (a) San ben meki a leri sistema foe Israèl aparti foe di foe tra nâsi? (b) Sortoe tra prenspari difrenti den e tjari kon na krin ini na Encyclopaedia Judaica, èn san ben jepi sondro degedege foe meki a difrenti disi de?
4 Na Encyclopaedia Judaica e taki: „Bijbel na a moro prenspari fonten foe kon froestan a fasi fa sma ben kisi leri na Israèl foe owroeten.” Jehovah ben gebroiki Moses leki a fosi libisma leriman foe Israèl (Deuteronomium 1:3, 5; 4:5). Moses ben tjari den wortoe di Jehovah ben gi en, kon abra na den sma (Exodus 24:3). So boen, foe taki en leti, dan Gado ben de a moro prenspari Leriman foe Israèl. Disi wawan ben poti a leri sistema foe Israèl, aparti foe di foe tra nâsi.
5 A srefi encyclopedie e froeklari: „Hei skoro noso a kisi foe leri di komoto na boekoe na Mesopotamia nanga Egipti, ben de wan sani di ben go akroederi sani di seti èn soso gi a skrifiman groepoe, san no e sori taki a ben de so na Israèl. Sondro degedege a difrenti ben de foe di den Hebrewsma ben gebroiki na alfabet sistema foe skrifi sani di ben moro makriki. . . . Sma no moesoe frigiti taki a skrifi foe sani nanga jepi foe na alfabet ben de prenspari gi a historia foe a leri di den ben gi leri. A ben de wan bigin foe a broko di den ben broko nanga den skrifi koeltoeroe di sma ben gwenti na Egipti, Mesopotamia nanga Kanan foe a di foe toe jari doesoen. Taki wan sma ben man leisi nanga skrifi no ben de moro langa wan sani di ben de a spesroetoe aparti marki foe ben kan kon sabi wan groepoe foe koni skrifiman nanga priester, di ben kisi leri ini den dangra boekoe di skrifi nanga a spikri nanga hieroglif fasi foe skrifi sani.”
6. Sortoe boeweisi foe bijbel de, taki sensi a bigin foe a historia foe den Israèlsma, den ben de sma di ben sabi fa foe leisi nanga skrifi?
6 Bijbel e gi boeweisi taki den Israèlsma ben de wan pipel di ben man leisi nanga skrifi. Srefi Bifo den ben go na a Pramisi Kondre, den ben taigi den foe skrifi den wet foe Jehovah na den doropostoe èn na den portoe foe den (Deuteronomium 6:1, 9; 11:20; 27:1-3). Ala di a komando disi sondro degedege den ben taki na agersi fasi, foe troe a no ben sa wani taki wan sani gi moro foeroe foe den Israèlsma efoe den no ben sabi fa foe leisi nanga skrifi. Bijbeltekst so leki Josua 18:9 nanga Kroetoebakra 8:14 e sori taki tra sma boiti den fesiman leki Moses nanga Josua, ben sabi fa foe skrifi langa bifo a kownoekondre ben seti na ini Israèl. — Exodus 34:27; Josua 24:26.
Den fasi foe gi leri
7. (a) Soema ben gi den pikin foe den Israèlsma a fondamenti leri foe den, so leki fa den Boekoe e sori? (b) Sortoe bodoi wan Fransi bijbel sabiman e gi?
7 Na Israèl, papa nanga mama ben gi leri na pikin ala di den ben de boen jongoe ete (Deuteronomium 11:18, 19; Odo 1:8; 31:26). Bijbel sabiman E. Mangenot ben skrifi ini a Fransi Dictionnaire de la Bible (Wortoeboekoe foe bijbel): „So esi leki a pikin ben man taki, a ben leri wan toe pisi foe a Wet. A mama foe en ben taki wan vers ibri tron baka; te a ben sabi en, a mama ben gi en wan trawan. Baka ten, a skrifi tekst foe den vers, di den pikin ben kan taki kaba na ede, ben sa poti na ini den anoe foe den. Na so fasi, den ben meki den pikin bigin nanga leisi, èn te den ben kon moro bigi, den ben kan go doro nanga a leri foe den tapoe a kontren foe relisi, foe di den ben leisi èn prakseri dipi foe a wet foe Masra.”
8. (a) Sortoe fondamenti fasi foe fa foe gi leri den ben gebroiki na Israèl, ma nanga sortoe prenspari marki? (b) Sortoe jepisani foe leri sani na ede den ben gebroiki?
8 Disi e sori taki wan fondamenti fasi di ben gebroiki foe gi leri, ben de a leri foe memre sani. Den sani di den ben leri èn di ben abi foe doe nanga den wet foe Jehovah nanga a fasi fa a ben handri nanga en pipel, ben moesoe pasa go dipi ini na ati (Deuteronomium 6:6, 7). Den ben moesoe prakseri dipi foe den sani dati (Psalm 77:11, 12). Foe jepi jongoewan nanga owroewan foe leri sani na ede, den ben gebroiki difrenti jepisani foe leri sani na ede. Disi ben wani taki so srefi akrostikon akroederi na alfabet, vers ini a psalm di e kon a wan baka a trawan èn di ibri lin foe en ben bigin nanga wan tra letter, so leki fa den e waka baka makandra ini na alfabet (so leki ini Odo 31:10-31); alliteratie (wortoe di e bigin nanga a srefi letter noso sten) èn a gebroiki di den ben gebroiki nomroe, leki den wan di den ben gebroiki ini a lasti afoepisi foe Odo kapitel 30. A de wan moi sani foe si taki son sabiman e denki taki a Geser Kalender, wan foe den moro owroe eksempel foe Hebrew skrifi foe owroeten, ben de wan lès foe wan skoroboi foe leri sani na ede.
A leri programa
9. (a) San ben de wan prenspari pisi foe a studie programa gi den Israèl pikin? (b) San wan bijbel encyclopedia e taki ini a tori foe a leri di ben gi ini a tori foe den alajari fesa?
9 A leri di ben gi ini Israèl no ben de wawan a leri foe leisi nanga skrifi. Wan prenspari tori di den ben leri ben de historia. A leri foe den wondroe wroko foe Jehovah gi a boen foe en pipel, ben de wan fondamenti pisi foe a leri programa. Den historia tori disi den ben moesoe leri sma foe geslakti go miti geslakti (Deuteronomium 4:9, 10; Psalm 78:1-7). A hori foe den alajari fesa ben de wan moi okasi gi a famiri-edeman foe gi leri na den pikin foe en (Exodus 13:14; Levitikus 23:37-43). Ini akroederi nanga disi The International Standard Bible Encyclopedia e taki: „Nanga jepi foe a leri foe a papa na oso èn a froeklari di a ben froeklari san den fesa ben wani taki, meki den Hebrew pikin ben kisi leri fa Gado ben sori Ensrefi na den ini a ten di pasa, fa den ben moesoe libi now èn san den pramisi foe Gado ben de ini a tori foe a ten di ben o kon gi a pipel foe En.”
10. Sortoe leri foe fa foe doe sani ini na aladei libi ben gi na oemapikin? na boi?
10 A gi di papa nanga mama ben gi leri ben wani taki toe a gi foe leri foe fa foe doe sani ini na aladei libi. Den ben leri oemapikin den koni foe doe osowroko. A lasti kapitel foe Odo e sori taki den wroko disi ben foeroe èn ben de difrenti sortoe sani; den ben abi na ini a drai foe keke foe meki titei, brei titei foe meki krosi, bori, a bai èn seri foe sani èn a sorgoe di den ben sorgoe moro foeroe gi den afersi foe na oso. A gwenti ben de, taki boi ben leri a grontapoe wroko foe a papa foe den, efoe a ben de now ini prani gronwroko noso wan vak noso wan anoewroko. Ini den ten di ben kon na baka, djoe rabi ben abi a gwenti foe taki: „A sma di no e leri a manpikin foe en wan vak di a kan gebroiki boen, e kweki en foe de wan foefoeroeman.”
11. San e sori a fondamenti marki foe a gi di den ben gi leri na Israèl èn sortoe leri disi abi na ini gi jongoewan ini a ten disi?
11 A dipi na jeje fasi foe den fasi fa foe gi leri di den ben gebroiki na Israèl, de krin foe si ini a heri boekoe Odo. A e sori taki a marki ben de foe leri „den wan di no abi ondrofeni” den sortoe hei sani leki koni, tranga leri, froestan, inzicht, retidoe, konifasi, sabi èn a man di wan sma man denki — ala disi ini „a frede gi Jehovah” (Odo 1:1-7; 2:1-14). A e poti krakti na tapoe den sani di moesoe boeweigi wan foetoeboi foe Gado ini a ten disi foe meki a leri foe na oemapikin noso manpikin kon moro boen.
Priester, Leifisma nanga profeiti
12. Soema boiti den papa nanga mama ben abi wan prati na a gi di den ben gi leri na den Israèlsma èn san na a fondamenti sani di a Hebrew wortoe di den vertaal nanga „wet”, wani taki?
12 Ala di papa nanga mama ben gi a fondamenti leri, tokoe Jehovah ben gi a pipel foe en moro leri nanga jepi foe den priester, den Leifisma di no ben de priester nanga profeiti. Ini Moses lasti blesi gi a lo foe Leifi, a ben taki: „Meki den gi leri na Jakob ini den kroetoe bosroiti foe joe èn Israèl ini a wet foe joe” (Deuteronomium 33:8, 10). A prenspari sani de, taki a wortoe „wet” ini a Hebrewtongo (toh·rahʹ) komoto na wan roetoe di ini en werkwortoe vorm wani taki „foe sori”, „foe gi leri”, „foe gi lès”. Na Encyclopaedia Judaica e taki: „A wortoe [torah] wani taki foe dati ede ’leri’, ’kerkileri’ noso ’lès’.”
13. Foe san ede a Wet foe Israèl ben difrenti foe den wet sistema foe tra nâsi?
13 Disi toe ben poti Israèl aparti foe den tra nâsi èn srefi foe disiten nâsi. Politiek nâsi ini a ten disi, abi boen foeroe wet di moro foeroe sma foe a kondre sabi soso wan toe foe den. Te sma e kisi problema nanga a wet, dan den moesoe pai afkati foeroe moni foe taki gi den. Heiskoro foe leri wet-tori de soso gi aparti sma. Ma na ini Israèl a Wet ben de a fasi foe Gado foe froeteri a pipel foe en fa a ben wani foe den anbegi en èn libi ini akroederi nanga a wani foe en. Tra fasi leki reglementi di ben de akroederi den wet, a ben abi na ini en a lobi gi Gado nanga gi a sma na joe sei (Levitikus 19:18; Deuteronomium 6:5). A Wet no ben de srefisrefi wan wetboekoe di no ben hori sma na prakseri. A ben gi kerkileri, leri nanga lès ini wan fasi foe libi di den sma moesoe leri.
14. San ben de wán reide foe san ede Jehovah ben trowe a priesterwroko foe a lo foe Leifi? (Maleaki 2:7, 8)
14 Te den priester nanga den Leifisma ben de getrow, dan den ben doe a frantiwortoe foe den foe gi leri na a pipel. Ma moro foeroe tron, den priester no ben doe a wroko foe den foe gi leri na a nâsi. A misi disi di den ben misi foe gi leri ini a Wet foe Gado, ben sa abi toemoesi takroe bakapisi gi ala toe, den priester nanga a pipel. Ini a di foe aiti jarihondro bifo G.T., Jehovah ben taki na fesi: „Mi pipel foe troe sa kon de pî, foe di sabi no de. Foe di oensrefi ben trowe a sabi, meki mi sa trowe oenoe toe foe dini leki wan priester gi mi; èn foe di oenoe e tan frigiti a wet foe a Gado foe oenoe, meki Mi, ija Mi, sa frigiti oen manpikin.” — Hosea 4:6.
15. (a) Soema Jehovah ben meki kon boiti den priester, leki leriman ini Israèl èn san wan bijbel sabiman ben skrifi foe a ròl foe den leki leriman? (b) San ben pasa te foe kaba nanga Israèl nanga Juda, foe di den ben trowe a sabi foe Jehovah èn den pasi foe en?
15 No wawan den priester, ma so srefi profeiti Jehovah ben meki kon leki leriman. Wi e leisi: „Jehovah ben tan e warskow Israèl nanga Juda nanga jepi foe ala den profeiti foe en nanga ala sma di e kisi fisjoen, taki: ’Drai komoto na den takroe pasi foe oenoe èn hori mi komando, mi bosroiti, akroederi a heri wet di mi ben komanderi den fositen tata foe oenoe èn di mi ben seni kon gi oenoe nanga jepi foe mi foetoeboi, den profeiti’” (2 Kownoe 17:13). Ini a tori foe a ròl foe den profeiti leki leriman, a Fransi bijbel sabiman Roland de Vaux ben skrifi: „Den profeiti toe, ben abi wan wroko foe gi leri na a pipel; disi ben de awasi fa a no fa, netsomeni wan pisi foe a wroko foe den leki a taki foe sani na fesi foe a tamara foe den. Èn a taki di den ben taki profeititori nanga jepi foe santa jeje ben gi a preikiwroko foe den a makti foe wan wortoe foe Gado. A de wan seiker sani taki na ondro a kownoekondre, den profeiti ben de leriman foe a pipel na relisi sei èn na moreel sei; èn, efoe wi mag taki wan sani moro, den ben de den moro boen leriman foe den, ala di a no ala ten den ben de den wan di den sma ben arki moro foeroe na den.” Den Israèlsma ben gowe libi den pasi foe Jehovah, foe di den no ben kisi a joisti leri foe den priester nanga den Leifisma èn den ben misi foe arki na den profeiti foe Jehovah. Ini 740 bifo G.T. Samaria ben fadon ini den anoe foe den Asiriasma èn ini 607 bifo G.T. den Babiloniasma ben pori Jerusalem nanga a tempel foe en.
Leri di gi na a ten foe a katibo èn baka dati
16, 17. (a) Sortoe leri programa den ben dwengi Danièl nanga den dri kompe foe en foe teki? (b) San ben meki den man teki a leri disi foe Babilon èn tokoe tan getrow na Jehovah?
16 So wan tin jari bifo a pori foe Jerusalem, kownoe Nebukadnesar ben tjari kownoe Jojakin nanga wan groepoe tiriman nanga heiman gowe na Babilon (2 Kownoe 24:15). Na mindri den joe ben abi Danièl nanga dri tra jongoe heiman (Danièl 1:3, 6). Nebukadnesar ben gi komando taki dri jari langa den fo man dati ben moesoe kisi spesroetoe leri ini „a skrifi nanga a tongo foe den Kaldewsma.” Boiti dati, den ben kisi wan „aladei porsi foe den switisani foe a kownoe èn foe a win di a ben dringi” (Danièl 1:4, 5). Disi ben kan abi kefar na ini foe difrenti reide ede. So leki fa a sori dan, a leri programa no ben de soso wan lès foe dri jari, foe leri wan tongo. Son sma e denki taki a wortoe „Kaldew” ini a pisi disi no abi foe doe nanga „den Babiloniasma leki wan pipel, ma a groepoe sma di ben kisi leri” (The Soncino Books of the Bible). K. F. Keil e taki foe a boekoe Danièl: „Danièl nanga den kompe foe en ben moesoe kisi leri ini a koni foe den Kaldew priester nanga den man di kisi leri, san den ben leri ini den skoro foe Babilon.” A njanjan foe a kownoe ben tjari den kon toe ini a kefar foe pasa den skotoe di a Wet foe Moses ben poti ini a tori foe njanjan. Fa sani ben waka nanga den?
17 Leki takiman gi den fo jongoe djoe heiman, dan sensi a bigin Danièl ben froeklari krinkrin taki den no ben sa njan noso dringi, èn so fasi doe sani kontrari a konsensi foe den (Danièl 1:8, 11-13). Jehovah ben blesi a fasti bosroiti disi èn ben safoe na ati foe a heiman foe Babilon di ben abi a frantiwortoe foe den (Danièl 1:9, 14-16). Ini a tori foe den studie foe den, sani di ben pasa baka ten ini a libi foe ala den fo jongoe Hebrewsma e boeweisi sondro degedege taki a froeplekti dri-jari leri programa foe den ini a koeltoeroe foe Babilon no ben meki den drifi komoto na a dipi lobi gi Jehovah nanga a soifri anbegi foe en (Danièl, kapitel 3 nanga 6). Jehovah ben meki den komoto sondro foe wan sani pasa nanga den foe a soengoe di den ben soengoe go dipi ini a moro hei leri disi foe Babilon di den ben froeplekti foe teki dri jari langa. „Èn ini a tori foe den pikin disi, den fo foe den, na den a troe Gado ben gi sabi nanga inzicht ini ala fasi foe skrifi nanga koni; èn Danièl srefi ben abi froestan foe ala sortoe fisjoen nanga dren. Èn ini a tori foe ibri afersi foe koni nanga froestan di a kownoe ben aksi den foe dati, te foe kaba a ben kon si srefi taki den ben de tin tron moro betre leki ala den priester di ben doe obia èn den bonoeman di ben de ini a heri kontren foe a kownoekondre foe en.” — Danièl 1:17, 20.
18. Sortoe leri programa sma ben doe na Juda baka na katibo na Babilon?
18 Baka a katibo na Babilon, wan bigi wroko foe gi leri ben doe nanga jepi foe Esra, wan priester di „ben sreka na ati foe en foe go soekoe rai na a wet foe Jehovah èn foe doe en èn foe leri reglementi nanga regtfardikifasi na Israèl” (Esra 7:10). Ini a wroko disi a ben kisi jepi foe den getrow Leifisma, di „ben froeklari a wet na a pipel” (Nehemia 8:7). Esra ben de wan bijbel sabiman nanga „wan koniman foe skrifi sani abra”, noso sabiman foe boekoe (Esra 7:6). A ben de ini den dei foe en taki sabiman foe boekoe ben kon de prenspari leki wan groepoe.
Skoro foe den rabi
19. Sortoe groepoe foe leriman ben kon de foe si na Israèl na a ten di Jesus ben kon na grontapoe èn foe sortoe prenspari reide meki en nanga den disipel foe en no ben kisi moro hei djoe leri?
19 Na a ten di Jesus ben kon na grontapoe, den sabiman foe boekoe ben tron wan groepoe foe leriman di ben kisi spesroetoe grani èn di ben hori densrefi moro na gwenti leki na den troe leri foe a Wortoe foe Gado. Den ben lobi foe sma kari den „Rabi”, san ben tron wan grani nen di ben wani taki „Mi Bigi (Toemoesi Boen) Wan” (Mateus 23:6, 7, foetoewortoe). Ini den kresten Griki Boekoe, nofotron den ben kari den sabiman foe boekoe makandra nanga den Fariseiman, di sonwan foe den ben de den srefi leriman foe a Wet (Tori foe den Apostel 5:34). Jesus ben gi ala toe groepoe a fowtoe taki den ben meki a wortoe foe Gado lasi krakti leki wan bakapisi foe den gwenti foe den èn foe di den ben leri „sma gebod foe libisma leki kerkileri” (Mateus 15:1, 6, 9). A no de foe froewondroe, taki Jesus nanga moro foeroe foe den disipel foe en, no ben kisi leri na den skoro foe den rabi. — Johanes 7:14, 15; Tori foe den Apostel 4:13; 22:3.
20. San a sjatoe loekoe disi foe a gi di den ben gi leri na ini bijbelten ben sori wi èn san e sori taki den foetoeboi foe Jehovah abi leri fanowdoe?
20 A sjatoe loekoe disi foe a gi di den ben gi leri na ini bijbel ten, ben sori taki Jehovah na a Gran Leriman foe a pipel foe en. Nanga jepi foe Moses, Gado ben orga wan boen leri sistema na Israèl. Ma baka wan langa ten, wan djoe sistema foe moro hei leri ben gro kon di ben leri sani di ben de kontrari a Wortoe foe Gado. Ala di Jesus no ben go na den sortoe djoe skoro disi, tokoe a ben de wan Leriman di no ben abi en speri (Mateus 7:28, 29; 23:8; Johanes 13:13). A ben gi den disipel foe en a wroko toe foe gi leri, srefi te na a kaba foe a seti foe sani (Mateus 28:19, 20). Foe doe disi, den ben moesoe de boen leriman èn foe dati ede leri ben sa de fanowdoe. So boen fa troe kresten moesoe si a kisi foe leri ini a ten disi? Na aksi disi wi sa ondrosoekoe ini na artikel di e kon now.
Proeberi a memre foe joe
◻ Foe san ede wi kan de seiker taki Jehovah abi belangstelling gi a kisi di den foetoeboi foe en e kisi leri?
◻ Na sortoe fasi a lerisistema foe Israèl ben de tra fasi leki di foe tra nâsi?
◻ Sortoe leri den pikin foe den Israèlsma ben kisi?
◻ Sortoe fasi fa foe gi leri den ben gebroiki na ini Israèl?
◻ Foe san ede Jesus nanga den disipel foe en no ben go na djoe skoro foe kisi moro hei leri?
[Prenki na tapoe bladzijde 11]
Froeplekti leri na Babilon no ben meki Danièl nanga den kompe foe en drai komoto na Jehovah