A prisiri foe Jehovah na wi fortresi
„A dei disi santa gi wi Masra, èn no sari, bika a prisiri foe Jehovah na oen fortresi.” — NEHEMIA 8:10.
1, 2. (a) San na wan fortresi? (b) Fa David ben sori taki a ben soekoe kibri na Jehovah?
JEHOVAH na wan fortresi di joe no kan teki gersi nanga trawan. Èn san na wan fortresi? Wan fortresi na wan presi di meki kon tranga, wan presi foe seikerfasi noso wan presi pe sma kan tan na libi. David foe Israèl foe owroeten ben si Gado leki en fortresi. Foe eksempre, loekoe a singi di David ben singi gi a Moro Hei Sma „ini a dei di Jehovah ben froeloesoe en foe a mindri-anoe foe den feanti foe en èn foe na anoe foe Saul”, a kownoe foe Israèl. — Psalm 18, den wortoe di skrifi na a tapoesei foe a Psalm.
2 David ben bigin a singi dati di e naki sma ati, nanga den wortoe: „Mi sa abi firi foe lobi gi joe, O Jehovah mi krakti. Jehovah na mi klipston di e tanapoe leti-opoe èn mi fortresi èn a Sma di e sorgoe taki mi feni kibri. Mi Gado na mi klipston. Mi sa soekoe kibri na en, mi schild èn mi toetoe foe froeloesoe, a hei kibri presi foe mi” (Psalm 18:1, 2). Na wan onregtfardikifasi kownoe Saul ben froeklari taki David ben de wan ogriman èn nomonomo a ben soekoe foe kisi David. Ma David, di ben de opregti, ben soekoe kibri na Jehovah neleki fa wan sma kan lon go na wan presi di meki kon tranga foe pasa wan rampoe libilibi.
3. Foe san ede den djoe ini a ten foe Esra ben ondrofeni „bigi prisiri”?
3 A prisiri di Jehovah e gi, na wan troetroe fortresi foe ala ten gi den sma di e waka ini en pasi leki sma di e hori den soifri retifasi (Odo 2:6-8; 10:29). A no de foe taki, dati efoe sma wani abi a prisiri di Gado e gi, dan den moesoe doe a wani foe Gado. Ini a tori disi, loekoe san ben pasa na Jerusalem ini 468 bifo Gewoon Teri. Esra, a sma di ben skrifi sani abra, nanga trawan ben meki a pipel kon froestan sani, foe di den ben leisi a Wet na wan fasi di ben wani taki wan sani. Baka dati a pipel ben kisi tranga: „Go, njan den fatoe sani èn dringi den soekroe sani, èn seni den pisi foe dati go na a sma di noti no sreka gi en; bika a dei disi santa gi wi Masra, èn no sari, bika a prisiri foe Jehovah na oen fortresi.” „Bigi prisiri” ben de a bakapisi, foe di den djoe ben fiti a sabi di den ben kisi, na ini den libi èn den ben hori wan prisiri Wiwirikampoe-fesa (Nehemia 8:1-12). Den sma di ben abi ’a prisiri foe Jehovah leki a fortresi foe den’, ben kisi krakti foe anbegi en èn foe dini en. Foe di a prisiri foe Jehovah ben de a fortresi foe den, meki wi moesoe froewakti taki a pipel foe Gado ini a ten disi sa de nanga prisiri toe. Dan san na wan toe foe den reide di den abi ini a ten disi foe de nanga prisiri?
„De nanga prisiri nomonomo”
4. San na wan toemoesi aparti fonten foe prisiri gi a pipel foe Jehovah?
4 Wan toemoesi aparti reide foe abi prisiri na a sani di Jehovah seti foe meki wi kon makandra. Den konmakandra nanga den kongres foe Jehovah Kotoigi e gi den prisiri ini a ten disi, neleki fa den fesa di den Israèlsma ben hori ala jari, ben gi den troetroe prisiri. Den ben taigi a pipel foe Israèl: „Seibi dei joe sa hori a [wiwirikampoe-] fesa gi Jehovah, joe Gado, na a presi di Jehovah sa froekisi, bika Jehovah, joe Gado, sa blesi joe ini ala san joe e doe èn ini ibri wroko foe joe anoe, èn joe moesoe de nanga prisiri nomonomo” (Deuteronomium 16:13-15). Ija, Gado ben wani taki den „de nanga prisiri nomonomo”. Na so a de toe nanga kresten, bika na apostel Paulus ben gi kompe bribiman tranga: „Ala ten abi prisiri ini Masra. Ete wan leisi mi sa taki: Abi prisiri!” — Filipisma 4:4.
5. (a) San na prisiri, èn fa kresten kan kisi disi? (b) Fa wi kan abi prisiri awansi wi e kisi tesi?
5 Foe di Jehovah wani dati wi de nanga prisiri, meki a e gi wi prisiri leki wan foe den froktoe foe en santa jeje (Galasiasma 5:22, 23). Èn san na prisiri? A de a switi firi di wan sma e kisi, foe di a e froewakti wan boen sani di a wani troetroe noso foe di a sa kisi a sani dati. Prisiri na wan fasi foe troetroe kolokoe, srefi foe bigi prisiri. A froktoe disi foe a santa jeje foe Gado, e jepi wi foe horidoro te wi e kisi tesi. „Foe a prisiri ede di ben poti na en [Jesus] fesi, meki a ben horidoro na wan pina-oedoe, a ben wisiwasi sjen, èn a go sidon na a reti anoe foe a kownoestoeroe foe Gado” (Hebrewsma 12:2). A disipel Jakobus ben skrifi: „Si den sani disi leki soso prisiri, mi brada, te oenoe e kisi foe doe nanga difrenti sortoe tesi, foe di oenoe sabi taki na eigifasi disi foe oen bribi di kisi tesi, abi leki bakapisi a hori di oenoe e horidoro.” Ma san efoe wi no sabi san wi moesoe doe nanga wan bepaalde tesi? Dan wi kan begi nanga ala froetrow foe kisi a koni foe handri nanga a tesi disi. A handri di wi e handri akroederi a koni foe hemel, sa meki taki wi man loesoe problema noso man foe kakafoetoe gi tesi di e tan go doro, sondro foe lasi a prisiri foe Jehovah. — Jakobus 1:2-8.
6. San prisiri nanga a troe anbegi abi foe doe nanga makandra?
6 A prisiri di Jehovah e gi, e gi wi a krakti foe meki a troe anbegi go na fesi. Dati ben pasa ini den dei foe Nehemia nanga Esra. Den djoe foe a ten dati di ben abi a prisiri foe Jehovah leki a fortresi foe den, ben kisi a krakti foe meki den afersi foe a troe anbegi go na fesi. Èn a prisiri foe den ben kon moro bigi, foe di den ben meki na anbegi foe Jehovah go na fesi. Na so a de toe ini a ten disi. Leki sma di e anbegi Jehovah, wi abi sani foe san ede wi abi bigi prisiri. Meki wi go loekoe now, ete wan toe reide foe den foeroe reide di wi abi foe de nanga prisiri.
Abi wan matifasi nanga Gado nanga jepi foe Krestes
7. Sortoe reide kresten abi foe de nanga prisiri, ini a tori foe Jehovah?
7 A krosibei matifasi di wi abi nanga Jehovah e meki wi de a moro kolokoe pipel na grontapoe. Fosi wi ben tron wan kresten, wi ben de wan pisi foe na onregtfardiki libisma libimakandra di de ’ini doengroe na froestan sei èn di no sabi a libi di de foe Gado’ (Efeisesma 4:18). Fa wi breiti taki wi no de sma moro di no sabi Jehovah! A no de foe taki, dati a e teki moeiti foe meki Jehovah tan feni wi boen. Wi moesoe „go doro ini a bribi, poti steifi na tapoe a fondamenti èn tanapoe kánkan, èn no e meki wan sma poeroe [wi] foe a howpoe foe a boen njoensoe dati” (Kolosesma 1:21-23). Wi kan de nanga prisiri taki Jehovah ben hari wi kon na en Manpikin, so leki fa Jesus en eigi wortoe e taki: „No wan sma kan kon na mi, boiti te a Tata di ben seni mi kon, e hari en kon” (Johanes 6:44). Efoe troetroe wi e warderi a warti matifasi di wi abi nanga Gado nanga jepi foe Krestes, dan wi sa kibri wisrefi gi iniwan sani di kan pori a matifasi dati.
8. Fa Jesus ben meki taki wi e prisiri?
8 A kisi di wi e kisi pardon foe sondoe nanga jepi foe a bribi di wi e poti ini a froeloesoe-ofrandi foe Jesus, na wan bigi reide foe abi prisiri, bika disi na san e meki taki wi man abi wan matifasi nanga Gado. Adam, wi fositen tata, ben tjari dede kon na tapoe a heri libisma famiri, foe di a ben sondoe foe espresi. Ma na apostel Paulus ben tjari kon na krin: „Gado e rikomanderi en eigi lobi na wi na ini disi, taki Krestes dede gi wi, ala di wi ben de sondari ete.” Paulus ben skrifi toe: „Foe di wán sma pasa a wet, meki ala sortoe sma ben kisi kroetoe, èn na so toe, foe wán regtfardiki doe ede, meki ala sortoe libisma e froeklari regtfardiki foe kisi libi. Bika neleki fa a trangajesi-fasi foe a wán sma ben meki foeroe sma kon tron sondari, na so a gi di a wán sma gi jesi, sa meki foeroe sma kon tron regtfardiki” (Romesma 5:8, 18, 19). Fa wi kan de nanga prisiri taki Jehovah Gado e prisiri foe froeloesoe den bakapikin foe Adam di e meki gebroiki foe so wan lobi-ati seti!
Kon fri na relisi sei èn kon sabi sani moro boen
9. Foe san ede wi abi prisiri te wi e loekoe en foe a sei foe relisi?
9 Foe kon fri foe Babilon a Bigiwan, a grontapoemakti foe falsi relisi, na ete wan tra reide foe de nanga prisiri. A de a waarheid foe Gado di meki wi kon fri (Johanes 8:32). Èn foe kon fri foe a relisi hoeroe disi, wani taki dati wi no abi wan prati ini den sondoe foe en, wi no e ondrofeni den plaag di a e kisi èn wi no e kon na wan kaba makandra nanga en te a sa kisi pori (Openbaring 18:1-8). A no wan sari sani kwetikweti foe lowe gi ala den sani dati!
10. Foe sortoe sani di wi kon sabi, wi e njanboen leki Jehovah en pipel?
10 Foe froestan a Wortoe foe Gado èn foe fiti dati ini wi libi, na reide foe abi bigi prisiri. Foe di wi kon fri foe a makti di falsi relisi abi, meki wi e njanboen foe na inzicht di wi abi na jeje fasi di e kon krin moro nanga moro, èn di wi hemel Tata ben gi nanga jepi foe „a getrow èn koni srafoe” (Mateus 24:45-47). Foe ala den sma di e libi na grontapoe, soso denwan di gi densrefi ini a dini foe Jehovah wawan, abi en santa jeje nanga a blesi foe froestan en Wortoe nanga en wani. A de so leki fa Paulus ben taki: „Na gi wi Gado tjari den [den sani di a sreka gi denwan di lobi en] kon na krin nanga jepi foe en jeje, bika a jeje e ondrosoekoe ala sani, srefi den dipi sani foe Gado” (1 Korentesma 2:9, 10). Wi kan de nanga tangi èn nanga prisiri taki wi e njanboen foe a froestan di wi e froestan sani boen moro nanga moro, so leki fa den wortoe foe Odo 4:18 e sori: „A pasi foe den regtfardikiwan de leki a brenki faja di e kon krin moro nanga moro, te leki a dei poti kon steifi.”
Kownoekondre howpoe nanga têgo libi
11. Fa wi e prati a prisiri Kownoekondre howpoe nanga trawan?
11 Wi Kownoekondre howpoe e gi wi prisiri toe (Mateus 6:9, 10). Wan heri pisi ten kaba, wi leki Jehovah Kotoigi, preiki taki a Kownoekondre foe Gado na a wan-enkri howpoe gi a heri libisma famiri. Foe eksempre, loekoe a jari 1931 di wi ben teki a nen Jehovah Kotoigi ini wan resolutie, di nanga prisiri wi ben agri nanga dati na den 51 kongres na heri grontapoe (Jesaja 43:10-12). A resolutie dati nanga wan prenspari kongres lezing di J. F. Rutherford (di na a ten dati ben de presidenti foe a Waktitoren Genootschap) ben hori, ben poti ini a pikin boekoe The Kingdom, the Hope of the World (A Kownoekondre, a howpoe gi grontapoe). Ini a pikin boekoe dati ete wan tra resolutie ben poti, di den ben teki na a kongres dati, wan di ben kragi krestenhèit foe a fadon di a ben fadon komoto na bribi èn foe a handri di a ben handri nanga a rai foe Jehovah na wan wisiwasi fasi. A resolutie ben meki bekènti toe: „A howpoe gi grontapoe na a kownoekondre foe Gado, èn no wan tra howpoe no de.” Ini wan toe moen, Jehovah Kotoigi ben prati moro leki feifi miljoen eksemplaar foe a pikin boekoe disi na ini ala oekoe foe grontapoe. Sensi a ten dati nofotron wi taki dati a troe taki a Kownoekondre na a wan-enkri howpoe gi a libisma famiri.
12. Sortoe prisiri froewakti foe a libi poti na fesi foe denwan di e dini Jehovah?
12 Wi e prisiri toe foe di wi e froewakti têgo libi na ondro a Kownoekondre tiri. A „pikin ipi” foe salfoe kresten abi wan prisiri hemel howpoe. „Blesi foe a Gado nanga a Tata foe wi Masra Jesus Krestes”, na apostel Petrus ben skrifi, „bika akroederi en bigi sari-ati a ben gi wi wan njoen geborte foe wan libi howpoe nanga jepi foe na opo di Jesus Krestes ben opo baka na dede foe kisi wan goedoe di no e pori, di de sondro flaka èn di no e kon flaw. A poti na wan sei gi oenoe na hemel” (Lukas 12:32; 1 Petrus 1:3, 4). Ini a ten disi, a moro bigi pisi foe den Kotoigi foe Jehovah e howpoe fajafaja foe kisi têgo libi na ini a Paradijs na ini a Kownoekondre kontren (Lukas 23:43; Johanes 17:3). No wan enkri tra pipel na grontapoe abi wan sani di sma kan teki gersi nanga a prisiri froewakti foe wi. Fa wi moesoe hori a prisiri howpoe disi hei!
Wan blesi bradafasi
13. Fa wi moesoe si wi internationaal bradafasi?
13 Te wan sma de wan pisi foe a wan-enkri internationaal bradafasi di Gado feni boen, dan dati de wan fonten toe di e tjari bigi prisiri kon toe. Kolokoe taki wi abi kompe na grontapoe di sma wani troetroe, moro leki ala tra sani. Jehovah Gado srefi ben sori go na a ten foe wi èn a ben taki: „Mi sa seki ala den nâsi, èn den sani di sma wani troetroe foe ala den nâsi moesoe kon na ini; èn mi sa foeroe na oso disi nanga glori” (Hagai 2:7). A troe taki ala kresten na onvolmaakti sma. Ma Jehovah ben hari den sortoe sma dati kon na en nanga jepi foe Jesus Krestes (Johanes 14:6). Foe di Jehovah hari sma kon na en di a e si leki sani di sma wani troetroe, meki a prisiri foe wi sa kon moro bigi efoe wi e sori den brada lobi, abi foeroe lespeki gi den, èn e wroko makandra nanga den ini den wroko foe Gado, e horibaka gi den ini tesi di den e kisi èn e begi gi den.
14. Sortoe deki-ati wi kan kisi foe 1 Petrus 5:5-11?
14 Ala den sani disi sa meki taki wi e prisiri. Ija, a de a prisiri foe Jehovah di de a fortresi foe wi jeje bradafasi na heri grontapoe. Ija, wi alamala e ondrofeni froefolgoe nanga tra problema. Ma disi moesoe hari wi kon na makandra èn gi wi wan firi foe wánfasi leki wan pisi foe a wan-enkri troe organisâsi foe Gado na grontapoe. So leki fa Petrus ben taki, dan wi moesoe saka wisrefi na ondro a makti anoe foe Gado, èn trowe ala wi broko-ede na en tapoe, foe di wi sabi taki a e sorgoe gi wi. Wi moesoe de na ai bika Didibri e soekoe foe njan wi, ma wi no de wi wawan, foe di Petrus e taki moro fara: „Kakafoetoe gi en, hori fasti ini bribi, foe di oenoe sabi taki den srefi sani disi, e miti a heri libimakandra foe oen brada na grontapoe, leki wan fasi foe kisi pina.” Èn a prisiri internationaal bradafasi disi noiti no sa broko, foe di wi abi a djaranti taki ’baka te wi pina foe wan sjatoe pisi ten, dan Gado sa tjari a leri di wi e leri, kon na wan kaba, èn a sa meki wi kon fasti, a sa meki wi kon tranga’ (1 Petrus 5:5-11). Prakseri foe disi nomo. A prisiri bradafasi foe wi sa tan foe têgo!
Wan libi di abi wan prakseri
15. Foe san ede sma kan taki dati Jehovah Kotoigi abi wan libi di abi wan prakseri?
15 Na wi abi prisiri ini a grontapoe disi di broeja, foe di wi abi wan libi di abi wan prakseri. Wi kisi wan diniwroko foe doe di e meki taki wi nanga trawan de kolokoe (Romesma 10:10). Foe troe, a de wan prisiri grani foe de kompe wrokoman foe Gado. Ini a tori disi Paulus ben taki: „San . . . na Apollos? Ija, san na Paulus? Bedinari di nanga jepi foe den oenoe ben tron bribiman, neleki fa Masra gi en na ibriwan foe oenoe. Mi ben prani, Apollos ben gi watra, ma Gado ben tan meki en gro; so taki a no a sma di e prani, di de wan sani, èn a no a sma toe di e gi watra, ma na Gado di e meki en gro. Now a sma di e prani èn a sma di e gi watra na wan, ma ibri sma sa kisi en eigi pai akroederi en eigi wroko. Bika wi na kompe wrokoman foe Gado. Oenoe na a gron foe Gado, di a e prani, na oso foe Gado.” — 1 Korentesma 3:5-9.
16, 17. Sortoe eksempre wi kan kari foe sori taki a pipel foe Jehovah abi wan prisiri libi di abi wan prakseri?
16 Wi ben sa kan kari foeroe eksempre foe sori taki te wan sma e dini Jehovah na wan getrowfasi, dan dati abi leki bakapisi wan libi di abi wan prakseri, èn di e foeroe wi nanga prisiri. Wan boen eksempre foe disi na a sani disi di wan sma ben taki: „Mi ben loekoe lontoe ini a Kownoekondrezaal di ben foeroe nanga sma, [na a dei foe na inwijding programa foe a zaal] èn mi ben kan si aiti memre foe mi osofamiri di ben de drape, pe mi nanga mi wefi ben de na ini, nanga dri pikin foe wi nanga den trowpatna foe den. . . . A wefi foe mi nanga mi troetroe ben abi wan kolokoe libi di abi wan prakseri ini a diniwroko foe Gado.”
17 A de wan sani toe di e gi deki-ati foe si taki sma foe ala libimarki kan bigin nanga wan prisiri libi di abi wan troetroe prakseri ini a diniwroko foe Jehovah. Foe eksempre, wan oema di ben leri a bijbel waarheid ini wan oso pe den e sorgoe gi siki noso owroe sma, ben teki dopoe leki wan foe den Kotoigi foe Jehovah na wan libimarki foe 102 jari. Na so wan fasi a ben kaba en libi nanga wan prisiri marki, ’foe di a ben e frede a troe Gado èn ben e hori den komando foe en’. — Preikiman 12:13.
Wan troetroe fortresi foe ala ten
18. San wi ben sa kan doe foe wini lasi-ati èn foe meki wi prisiri kon moro bigi?
18 Gi getrow sma, a prisiri foe Jehovah na wan troetroe fortresi foe ala ten. Ma tokoe, foe abi a prisiri disi no wani taki dati noiti wi no sa abi wan sari ten leki den ten di ben meki Jesus taki na Getseimanei: „Mi sili e sari srefisrefi, srefi te foe dede” (Markus 14:32-34). Kon wi taki dati lasi-ati de a bakapisi foe a feti di wi ben feti baka afersi pe wi e prakseri wisrefi nomo. Efoe dati de so, dan meki wi kenki a fasi fa wi e libi. Efoe a prisiri foe wi kon moro mendri, foe di wi e tjari wan hebi lai foe frantiwortoe di abi en gron na tapoe bijbel, sondro foe prakseri wisrefi nomo, dan kande wi kan tjari kenki kon di sa froelekti a stress èn meki wi kisi wi prisiri jeje baka. Boiti dati, Jehovah sa blesi wi nanga prisiri efoe wi e soekoe foe plisi en, foe di wi e kakafoetoe fajafaja gi a sondoe skin, gi na ogri grontapoe nanga gi Didibri. — Galasiasma 5:24; 6:14; Jakobus 4:7.
19. Fa wi moesoe si iniwan grani di wi abi ini na organisâsi foe Gado?
19 Wi abi bigi prisiri foe den reide ede di wi taki foe den, èn foe foeroe tra reide ede. Efoe wi na gemeente preikiman noso efoe wi abi wan prati na a foeroeten diniwroko na a wán noso tra fasi, wi alamala kan abi foeroe foe doe ini a wroko foe Masra, èn foe troe disi sa meki taki wi e prisiri (1 Korentesma 15:58). Awansi sortoe grani wi abi ini Jehovah en organisâsi, meki wi ati de nanga tangi foe den grani dati èn meki wi go doro nanga prisiri foe doe santa diniwroko gi wi kolokoe lobi-ati Gado. — 1 Timoteus 1:11.
20. San na a moro bigi grani di wi kisi, èn foe sortoe sani wi kan de seiker?
20 Spesroetoe wi abi reide foe de nanga prisiri foe a grani di wi abi foe tjari Jehovah en bigi nen leki den Kotoigi foe en. Ija, wi no de volmaakti èn wi e tanapoe na fesi foeroe tesi, ma meki wi hori na prakseri den toemoesi moi blesi foe wi leki Jehovah Kotoigi. Èn memre taki wi lobi hemel Tata noiti no sa drai en baka gi wi. Wi kan de seiker taki ala ten wi sa kisi blesi efoe a prisiri foe Jehovah na wi fortresi.
Fa joe ben sa piki?
◻ San na „a prisiri foe Jehovah”?
◻ Fa kresten e kisi troetroe prisiri?
◻ San na wan toe reide di e meki taki Jehovah Kotoigi abi prisiri?
◻ Foe san ede a prisiri foe Jehovah na wan troetroe fortresi foe ala ten?