’Tan gi makandra pardon na wan fri fasi’

„Tan froedrage makandra èn gi makandra pardon na wan fri fasi.” — KOLOSESMA 3:13.

1. (a) Di Petrus ben gi rai taki wi moesoe gi trawan pardon „te seibi tron”, foe san ede a denki kande taki a ben lobi foe gi pardon srefisrefi? (b) San Jesus ben wani taki di a ben taki dati wi moesoe gi pardon „seibitenti na seibi tron”?

„MASRA, omeni tron mi brada kan sondoe teige mi èn mi moesoe gi en pardon? Te seibi tron?” (Mateus 18:21) Petrus prakseri kande taki a ben lobi foe gi pardon srefisrefi nanga a rai di a ben gi. Na a ten dati, gwenti foe den rabi ben taki dati wan sma no moesoe gi pardon moro leki dri leisi gi a srefi sondoe.a Prakseri fa Petrus ben froewondroe di Jesus ben piki: „Mi e taigi joe, no seibi tron, ma seibitenti na seibi tron”! (Mateus 18:22) A taki di Jesus ben taki seibi ete wan tron, ben de a srefi leki te a ben sa taki „sondro skotoe”. Ini a fasi fa Jesus e si en, dan pikinmoro skotoe no de na a nomroe di wan kresten moesoe gi trawan pardon.

2, 3. (a) San na wan toe situwâsi di kan gersi taki a moeilek foe gi trawan pardon? (b) Foe san ede wi kan abi a froetrow taki a e gi wi winimarki foe gi trawan pardon?

² Ma a no ala ten a makriki foe gebroiki a rai dati. Soema foe wi no firi a pen foe wan onregtfardiki sani di wan sma doe nanga wi? Kande wan sma di joe ben froetrow ben tjari wan froetrow afersi kon na krin (Odo 11:13). Den wortoe di wan krosibei mati e taki sondro foe hori trawan na prakseri, kan ’djoekoe leki wan feti-owroe’ (Odo 12:18). A grofoe fasi fa wan sma di joe ben lobi noso ben froetrow e handri nanga joe, kande hati joe srefisrefi. Te den sortoe sani dati e pasa, dan a fosi sani di wi sa doe kande, na foe kisi atibron. Wi kan kisi a firi foe no taki moro nanga a sma di doe a sani, èn efoe a kan, wai pasi gi en krinkrin. A kan gersi taki, te wi e gi en pardon, dan wi e gi pasi meki a gowe sondro foe a kisi strafoe foe a sani di a doe di hati wi. Ma te wi e tan kweki atibron, dan te foe kaba wi sa doe wisrefi ogri.

³ Dati meki Jesus e leri wi foe gi trawan pardon — „seibitenti na seibi tron”. Wi de seiker taki den leri foe en noiti no ben sa abi ogri bakapisi gi wi. Ala sani di a ben leri ben kon foe Jehovah, ’a Sma di e leri wi foe gi wisrefi wini’ (Jesaja 48:17; Johanes 7:16, 17). A de wan logis sani, taki a moesoe de so, taki a e gi wi winimarki te wi e gi trawan pardon. Bifo wi e go taki foe san ede wi moesoe gi pardon èn fa wi kan doe dati, a ben sa kan de wan jepi foe tjari kon na krin fosi san a wani taki foe gi pardon èn san a no wani taki. A fasi fa wi e denki foe a gi di wi moesoe gi pardon, kan abi wan krakti na tapoe a man di wi man gi pardon te trawan e doe sani di e hati wi.

4. San a gi di wi e gi trawan pardon no wani taki, ma san den e taki foe a gi di wi moesoe gi trawan pardon?

⁴ Foe gi trawan pardon foe den hati sani di den doe nanga wi, no wani taki dati wi e si a sani di den doe leki noti noso leki wan pikin sani; èn a no wani taki toe taki wi e meki trawan gebroiki wi na wan onregtfardiki fasi. Boiti dati, te Jehovah e gi wi pardon, dan seiker a no de so, taki a e si den sondoe foe wi leki sani di no serjoesoe, èn noiti a sa gi pasi meki sondoe libisma e trapoe a sari-ati foe en nanga foetoe (Hebrewsma 10:29). Soleki fa a skrifi na ini Hulp tot begrip van de bijbel, dan foe gi trawan pardon wani taki „a gi di wan sma e gi wan sma di sondoe pardon, san wani taki dati a sma no e mândi moro tapoe en foe en sondoe ede èn no e meki en pai ala sani baka” (Pisi 8, bladzijde 1533).b Bijbel e gi wi boen reide foe gi trawan pardon.

Foe san ede wi moesoe gi trawan pardon?

5. Sortoe prenspari reide foe gi trawan pardon, sori na ini Efeisesma 5:1?

⁵ Wan prenspari reide foe san ede wi moesoe gi trawan pardon sori na ini Efeisesma 5:1: „Foe dati ede, kon de sma di e waka baka Gado, leki lobi pikin.” Na sortoe fasi wi moesoe „kon de sma di e waka baka Gado”? Den wortoe „foe dati ede” e hari den wortoe dati ini wan lin nanga a vers na fesi, di e taki: „Tron sma di abi switifasi gi makandra, di abi safoe sari-atifasi, èn di e gi makandra pardon na wan fri fasi, neleki fa Gado ben gi oenoe pardon na wan fri fasi nanga jepi foe Krestes” (Efeisesma 4:32). Ija, efoe a abi foe doe nanga a gi di wi moesoe gi trawan pardon, dan wi moesoe kon de sma di e waka baka Gado. Neleki fa wan pikin boi e proeberi foe de leki en papa, na so wi, leki pikin di Jehovah lobi srefisrefi, moesoe wani kon de leki wi hemel Tata di e gi sma pardon. Fa a moesoe prisiri na ati foe Jehovah foe loekoe komoto na hemel èn e si fa den pikin foe en na grontapoe e proeberi foe de leki en foe di den e gi makandra pardon! — Lukas 6:35, 36; teki gersi Mateus 5:44-48.

6. Na sortoe fasi wan bigi difrenti de na mindri a gi di Jehovah e gi sma pardon nanga a gi di wi e gi trawan pardon?

⁶ A troe, noiti wi kan gi trawan pardon na wan volmaakti fasi soleki fa Jehovah e doe dati. Ma dati e gi wi moro reide foe san ede wi moesoe gi makandra pardon. Prakseri disi: Wan bigi difrenti de na mindri a gi di Jehovah e gi sma pardon nanga a gi di wi e gi trawan pardon (Jesaja 55:7-9). Te wi e gi den wan pardon di sondoe teige wi, dan foeroetron wi e doe dati foe di wi sabi taki wan leisi wi kan abi den fanowdoe foe pai wi baka foe di den e gi wi pardon. Ala ten a de so nanga libisma, taki a de wan afersi foe sondari di e gi sondari pardon. Ma nanga Jehovah a de so, taki a gi di a e gi pardon, ala ten e kon foe wán sei nomo. A e gi wi pardon, ma noiti wi sa abi foe gi en pardon. Efoe Jehovah, di no e sondoe, kan gi wi pardon na so wan lobi-ati fasi èn so dorodoro, dan wi sondoe libisma no moesoe proeberi foe gi makandra pardon? — Mateus 6:12.

7. Efoe wi e weigri foe gi trawan pardon, ala di wan gron de foe sori sari-ati, dan fa a kan abi wan takroe krakti na tapoe a matifasi di wisrefi abi nanga Jehovah?

⁷ Moro prenspari srefi, efoe wi e weigri foe gi trawan pardon, ala di wan gron de foe sori sari-ati, dan a kan abi wan takroe krakti na tapoe a matifasi di wisrefi abi nanga Gado. Jehovah no e aksi wi nomo foe gi makandra pardon; a e froewakti foe wi foe doe dati. Soleki fa den Boekoe foe bijbel e sori, dan wan reide di e boeweigi wi foe gi trawan pardon, na so taki Jehovah ben sa kan gi wi pardon noso foe di a gi wi pardon (Mateus 6:14; Markus 11:25; Efeisesma 4:32; 1 Johanes 4:11). Efoe baka dati, wi no wani gi trawan pardon, ala di boen reide de foe doe dati, wi kan froewakti troetroe foe kisi pardon foe Jehovah gi so wan srefi sortoe sani? — Mateus 18:21-35.

8. Foe san ede a sa de gi a moro boen belang foe wi te wi e gi trawan pardon?

⁸ Jehovah e leri en pipel „a boen pasi pe den moesoe waka na tapoe” (1 Kownoe 8:36). Te a e leri wi foe gi makandra pardon, dan wi kan abi a froetrow taki a abi a moro boen belang foe wi na prakseri. Nanga boen reide bijbel e taigi wi foe „gi pasi na atibron” (Romesma 12:19). Atibron na wan hebi lai foe tjari na ini a libi. Te wi e tan hori sma na ati, dan a kan teki ala wi prakseri, pori a vrede foe wi, èn broko a prisiri foe wi. Atibron di e go nanga langa kan abi wan takroe bakapisi tapoe a gosontoe foe wi na skin sei, neleki djaroesoefasi (Odo 14:30). Èn ala di wi e ondrofeni ala den sani disi, kande a sma di e sondoe teige wi no sabi notinoti foe a sani di e trobi wi! Wi lobi-ati Kriaman sabi taki wi moesoe gi trawan pardon na wan fri fasi no soso foe di den kisi winimarki foe dati, ma so srefi foe wi kisi winimarki foe dati. Foe troe, a rai di bijbel e gi foe gi trawan pardon, na ’a boen pasi foe waka na tapoe’.

„Tan froedrage makandra”

9, 10. (a) Na sortoe situwâsi a no abi foe de so, taki a e aksi foe wi foe gi pardon na wan formeel fasi? (b) Sortoe prakseri den wortoe „tan froedrage makandra” e gi?

⁹ Mankeri na skin sei kan difrenti foe pikin koti te go miti bigi mankeri, èn a no ala mankeri e aksi a srefi sorgoe. A de a srefi nanga sani di sma e doe èn di e hati den firi foe wi — son sani e hati moro leki trawan. A de so, taki wi moesoe meki ibri pikin sani di trawan e doe di e hati wi èn di wi e ondrofeni ini a matifasi di wi abi nanga den, kon bigi? Pikinpikin sani di e froeferi wi, e afrontoe wi èn e hendri wi, na wan pisi foe a libi èn a no abi foe de so, taki sma moesoe aksi wi pardon na wan formeel fasi foe den sani dati. Efoe sma sabi wi leki wan sma di e wai pasi gi trawan foe ibri pikin sani di e hendri wi èn di wani nomonomo taki den sma di doe a sani e aksi pardon, bifo wi sa handri boen baka nanga den, dan kande wi e dwengi den foe de fersiktiki nanga wi te den de nanga wi — noso foe no abi toemoesi foeroe krosibei demakandra nanga wi!

¹⁰ Na presi foe dati, a moro boen srefisrefi foe „abi wan boen nen taki oenoe de reidelek sma” (Filipisma 4:5, Phillips). Leki onvolmaakti kriatoeroe di e dini skowroe na skowroe, a de reidelek foe froewakti taki ten na ten, den brada foe wi kan tanteri wi, foe taki en so, èn kande wi doe a srefi sani nanga den. Kolosesma 3:13 e gi wi a rai: „Tan froedrage makandra.” Den wortoe dati e gi a prakseri foe abi pasensi nanga trawan, foe froedrage a fasi fa den e tjari densrefi di wi no lobi noso den eigifasi di kande wi e feni taki den e tanteri wi. So wan pasensi èn a froedrage di wi e froedrage trawan, kan jepi wi foe kakafoetoe gi den pikin sani di e hati wi èn di wi e ondrofeni te wi e handri nanga trawan — sondro foe pori a vrede foe a gemeente. — 1 Korentesma 16:14.

Te sani di trawan e doe e hati wi srefisrefi

11. San kan jepi wi foe gi trawan pardon, te den e sondoe teige wi?

¹¹ Ma fa a de te trawan e sondoe teige wi èn de krin foe si taki a e hati wi firi? Efoe a sondoe no de toemoesi serjoesoe, dan kande a moeilek pikinso gi wi foe gebroiki a rai foe bijbel foe „gi makandra pardon na wan fri fasi” (Efeisesma 4:32). So wan fasi foe de klariklari foe gi trawan pardon e kroederi nanga den wortoe foe Petrus di skrifi na ondro a krakti foe a santa jeje: „Moro foeroe, abi tranga lobi gi makandra, foe di lobi e tapoe wan heri ipi sondoe” (1 Petrus 4:8). Te wi e hori na prakseri taki wi na sondari toe, dan dati e meki taki wi man hori den sondoe foe trawan na prakseri. Te wi e gi trawan pardon na a fasi dati, dan wi e poeroe na atibron, na presi foe kweki en. A bakapisi sa de, taki a matifasi di wi abi nanga a sma di sondoe teige wi, no kan ondrofeni iniwan ogri di e tan, èn wi e jepi toe foe kibri a vrede foe a gemeente di warti srefisrefi (Romesma 14:19). Baka ten, a memre di wi e memre a sondoe di a sma ben doe teige wi, kan gowe safrisafri.

12. (a) Sortoe sani wi moesoe bigin doe kande, so taki wi kan gi wan sma pardon di ben doe wan sani di hati wi srefisrefi? (b) Fa den wortoe na ini Efeisesma 4:26 e sori taki wi moesoe seti afersi esi-esi?

¹² Ma fa a de efoe wan sma e sondoe teige wi na wan moro serjoesoe fasi èn e hati wi firi srefisrefi? Foe eksempre, wan mati di joe e froetrow kan tjari son soifri persoonlijk afersi kon na krin di joe ben froetrow en. A sani e hati joe srefisrefi, a e gi joe sjen, èn a e gi joe a firi taki a sma tori joe. Joe proeberi foe poeroe en na joe prakseri, ma na afersi no wani komoto. Na ini so wan kefal, dan kande joe moesoe bigin doe wan sani foe loesoe a problema, kande foe di joe e taki nanga a sma di doe a sani. A de wan koni sani foe doe dati bifo na afersi e kisi wan okasi foe kon moro takroe. Paulus ben froemane wi: „Kisi atibron èn tokoe no sondoe [dati wani taki, foe di wi e tan prakseri noso doe wan sani tapoe na atibron foe wi]; no meki son dongo ala di joe de na ini wan atibron fasi” (Efeisesma 4:26). A rai foe Paulus abi moro krakti te wi e prakseri taki na mindri den djoe, sondongo ben marki a kaba foe wan dei èn a bigin foe wan njoenwan. Foe dati ede, a rai na: Loesoe na afersi esi-esi! — Mateus 5:23, 24.

13. San moesoe de a marki foe wi, te wi e taki nanga wan sma di doe wan sani di hati wi, èn sortoe rai kan jepi wi foe doro a marki dati?

¹³ Fa joe moesoe taki nanga a sma di doe a sani? „Soekoe vrede èn doe moeiti foe kisi en”, 1 Petrus 3:11 e taki. So boen, a marki foe joe no moesoe de foe sori taki joe ati e bron, ma foe meki vrede nanga joe brada. Foe doro a marki dati, dan a moro boen foe no gebroiki wortoe nanga gebaar di e tanteri a sma; den sani dati kan meki taki a tra sma e handri na a srefi fasi (Odo 15:18; 29:11). Boiti dati, no gebroiki wortoe di e meki a sani kon moro bigi leki a de, soleki: „Ala ten joe . . . !” noso: „Noiti joe . . . !” Den sortoe wortoe dati di e meki a sani kon moro bigi leki a de, kan meki nomo taki a sma e sreka ensrefi foe strei. Na presi foe dati, meki joe sten nanga a fasi fa joe fesi de, sori taki joe wani loesoe wan afersi di hati joe srefisrefi. Kari den sani spesroetoe te joe e tjari kon na krin fa joe e firi foe san ben pasa. Gi a tra sma wan okasi foe froeklari den sani di a doe. Arki na san a abi foe taki (Jakobus 1:19). Sortoe boen dati o tjari kon? Odo 19:11 e froeklari: „Na inzicht foe wan sma seiker e meki taki a no e kisi atibron esi-esi, èn a de wan glori foe en sei foe loekoe pasa a fowtoe.” Te wi e froestan den firi foe a tra sma nanga den reide foe san ede a doe den sani, dan dati kan poeroe den takroe prakseri nanga firi di wi abi gi en. Te wi e handri nanga a situwâsi nanga a marki foe meki vrede èn tan abi a fasi dati foe denki, dan kande srefi iniwan fowtoe fasi foe froestan makandra kan loesoe, a wan e aksi pardon na wan fasi di fiti, èn a trawan e gi pardon.

14. Na sortoe fasi wi moesoe frigiti te wi e gi trawan pardon?

¹⁴ A gi di wi e gi trawan pardon wani taki dati troetroe wi moesoe frigiti san ben pasa? Memre Jehovah en eigi eksempre ini a tori disi, soleki fa wi ben taki foe dati na ini na artikel na fesi. Te bijbel e taki dati Jehovah e frigiti den sondoe foe wi, dan dati no wani taki dati a no man memre den (Jesaja 43:25). Na presi foe dati, a e frigiti na a fasi disi taki, efoe oiti a e gi wi pardon, dan den sondoe dati no abi krakti na tapoe a fasi fa a sa kroetoe wi na wan ten di de na wi fesi (Esekièl 33:14-16). Na a srefi fasi a de so, taki efoe wi gi kompe libisma pardon, dan a no abi foe de so, taki wi no sa man memre san den ben doe. Ma, wi kan frigiti na a fasi disi, taki wi no e gebroiki a sani di a sma ben doe nanga wi, teige en noso tjari a sani kon na en prakseri baka na ini a ten di e kon. Te na afersi seti na a fasi dati, dan a no ben sa fiti foe gongosa foe a tori; èn a no ben sa de wan lobi-ati sani foe wai pasi krinkrin gi a sma di doe a sani èn handri nanga en na so wan fasi neleki a ben sluit uit (Odo 17:9). A troe taki a kan teki ten foe meki a matifasi di wi abi nanga en, kon boen baka; a kan taki wi no abi a srefi krosibei matifasi moro leki fosi. Ma wi lobi en ete leki wi kresten brada èn e doe ala san wi man foe meki wan boen matifasi tan. — Teki gersi Lukas 17:3.

Te a gersi taki wi no man gi trawan pardon

15, 16. (a) Den e froewakti foe kresten foe gi wan ogri sma pardon di no abi berow? (b) Fa wi kan gebroiki a rai foe bijbel di de foe feni na ini Psalm 37:8?

¹⁵ Ma fa a de efoe trawan e sondoe teige wi na wan fasi di e hati wi srefisrefi, èn tokoe a sma di doe a sani no e erken a sondoe foe en, a no abi berow, èn a no e aksi pardon? (Odo 28:13) Den Boekoe foe bijbel e sori krin taki Jehovah no e gi sondari pardon di no abi berow èn di kon kisi tranga ati (Hebrewsma 6:4-6; 10:26, 27). Fa a de nanga wi? Hulp tot begrip van de bijbel e taki: „Den no e froewakti foe kresten foe gi den wan pardon di e doe ogri-ati sondoe foe espresi sondro foe abi berow. Den sortoe sma dati e tron feanti foe Gado” (Pisi 8, bladzijde 1534). No wan kresten di trawan handri nanga en na wan kefalek onregtfardiki, tegoe noso ogri-ati fasi, moesoe firi taki a moesoe gi wan ogri sma pardon di no abi berow. — Psalm 139:21, 22.

¹⁶ Wi kan froestan taki den wan di trawan handri na wan ogri-ati fasi nanga den, kan firi pen nanga atibron. Ma memre taki, efoe wi tan atibron èn hori sma na ati, dan dati kan doe wi foeroe ogri. Efoe wi e wakti foe a sma erken en sondoe noso aksi pardon, di noiti e kon, dan wi kan mândi moro nanga moro nomo. Te wi e meki na onregtfardikifasi teki ala wi prakseri, dan a kan meki na atibron tan koekoe na ini wi, èn abi takroe bakapisi gi wi gosontoe na jeje sei, na emotioneel sei èn na skin sei. Te joe loekoe en boen, dan wi e gi pasi meki a sma di doe wan sani di hati wi, go doro foe doe sani di hati wi. Na wan koni fasi bijbel e gi a rai: „Libi wan faja ati na wan sei èn gowe libi hebi atibron” (Psalm 37:8). Foe dati ede, son kresten feni taki baka ten den ben man teki wan bosroiti foe gi pardon na a fasi disi taki den no e hori a sma na ati moro — den no e meki a serjoesoefasi foe a sondoe kon moro mendri, ma den e weigri foe meki atibron pori den. Foe di den e libi na afersi krinkrin ini na anoe foe a Gado foe retidoe, meki den ben ondrofeni foeroe froelekti èn ben man libi go doro sondro foe abi den tranga firi foe atibron. — Psalm 37:28.

17. Sortoe djaranti di e gi trowstoe, a pramisi foe Jehovah di skrifi na ini Openbaring 21:4, e gi?

¹⁷ Te a sani di wan sma doe nanga wi, e hati wi srefisrefi, dan kande wi no man figi a sani poeroe krinkrin foe wi prakseri, awansi fa a no fa, no na ini a seti foe sani disi. Ma Jehovah e pramisi wan njoen grontapoe pe „a sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba” (Openbaring 21:4). Awansi san wi kan memre na a ten dati, a no sa meki wi kisi a bigi pen di kande nownow na wan hebi gi wi ati. — Jesaja 65:17, 18.

18. (a) Foe san ede a de fanowdoe foe gi pardon te wi abi foe doe nanga wi brada nanga sisa? (b) Na sortoe fasi wi kan gi pardon èn frigiti, te trawan e sondoe teige wi? (c) Sortoe winimarki disi e gi wi?

¹⁸ Na a srefi ten wi moesoe libi èn wroko makandra leki brada nanga sisa di de onvolmaakti, sondoe libisma. Wi alamala e meki fowtoe. Ten na ten wi e meki makandra sari èn srefi e doe sani di hati makandra. Jesus ben sabi heri boen taki wi ben sa moesoe gi trawan pardon, „no seibi tron, ma seibitenti na seibi tron”! (Mateus 18:22) A troe taki wi no kan gi trawan pardon dorodoro neleki fa Jehovah kan doe dati. Tokoe na ini moro foeroe kefal, te den brada foe wi e sondoe teige wi, wi kan gi pardon na a fasi disi taki wi e wini na atibron èn wi kan frigiti na a fasi disi taki wi no e gebroiki na afersi teige den foe ala ten na ini a ten di e kon. Te wi e gi pardon èn e frigiti na a fasi dati, dan wi e jepi no wawan foe kibri a vrede foe a gemeente, ma so srefi wi eigi vrede foe jeje nanga ati. A moro prenspari sani de, taki wi sa abi a vrede di soso wi lobi-ati Gado, Jehovah, kan gi. — Filipisma 4:7.

[Foetoewortoe]

Aksi foe loekoe sani sjatoe baka

◻ Foe san ede wi moesoe wani foe gi trawan pardon?

◻ Sortoe situwâsi e aksi foe wi foe „tan froedrage makandra”?

◻ Te den sondoe di trawan doe hati wi srefisrefi, dan san wi kan doe foe loesoe na afersi na ini vrede?

◻ Na sortoe fasi wi moesoe frigiti te wi e gi trawan pardon?

[Prenki na tapoe bladzijde 16]

Te wi tan hori wan sma na ati, di doe wan sani teige wi, dan kande a sma no sabi notinoti foe a sani di e trobi wi

[Prenki na tapoe bladzijde 17]

Te wi e taki nanga trawan foe meki vrede, dan fowtoe fasi foe froestan makandra kan loesoe na wan makriki fasi