Joe e gi pardon na a fasi fa Jehovah e gi pardon?
„Efoe oenoe e gi sma pardon foe den sondoe foe den, dan oen hemel Tata sa gi oenoe pardon toe foe den sondoe foe oenoe; ma efoe oenoe no e gi sma pardon foe den sondoe foe den, dan oen Tata no sa gi oenoe pardon toe foe den sondoe foe oenoe.” — MATEUS 6:14, 15.
1, 2. Osortoe Gado wi abi fanowdoe, èn foe san ede?
„JEHOVAH abi sari-ati nanga boenfasi, a no e atibron esi-esi èn a abi lobi boen-atifasi pasa marki. A no sa tan go doro foe feni fowtoe foe ala ten, èn a no sa atibron foe têgo. A no handri nanga wi akroederi den sondoe foe wi; èn a no gi wi san wi moesoe kisi akroederi den sondoe foe wi. Bika so leki den hemel moro hei leki grontapoe, na so en lobi boen-atifasi moro hei gi denwan di e frede en. So fara leki a son-opo de foe a sondongo, na so fara a ben poeroe den sondoe foe wi. Leki fa wan papa e sori den manpikin foe en sari-ati, na so Jehovah sori sari-ati na denwan di e frede en. Bika ensrefi sabi heri boen fa wi meki, foe di a e hori na prakseri taki wi na doti.” — Psalm 103:8-14.
2 Wi abi wan Gado tranga fanowdoe di ’e hori na prakseri taki wi na doti’, foe di wi mama kisi bere foe wi ini sondoe èn nanga fowtoe wi ben kon na libi èn wi gebore nanga onvolmaaktifasi di ala ten e proeberi foe meki wi de srafoe foe a wet foe sondoe. Drihondro jari baka di David ben froeteri finifini ini Psalm 103, na so wan moi fasi fa Jehovah de, dan wan tra bijbel skrifiman, Mika, ben hei a srefi Gado disi na pikinmoro a srefi fasi leki David, foe a gi di a ben gi en pardon na wan boen fasi foe den sondoe di a ben doe wan leisi: „Soema de wan gado leki joe: di e poeroe sondoe, di e gi pardon foe ogridoe, di no e tan atibron foe têgo, ma di e prisiri foe sori sari-ati? Abi ete wán leisi sari-ati nanga wi, trapoe den fowtoe foe wi, trowe ala den sondoe foe wi go na a dipi foe a se.” — Mika 7:18, 19, The Jerusalem Bible.
3. San a wani taki foe gi pardon?
3 Ini den Griki Boekoe foe bijbel, a wortoe „gi pardon” wani taki foe „meki pasa gowe”. Loekoe taki David nanga Mika di wi ben kari na tapoesei, e meki a srefi prakseri kon na krin ini switi wortoe nanga wortoe di e froeteri finifini a fasi fa den sani de. Foe wi man froestan heri boen o kefalek bigi a fasi fa Jehovah e gi pardon de, meki wi go loekoe sjatoe baka, wan toe foe den foeroe eksempre foe dati ini praktijk. A fosiwan e sori taki a prakseri foe Jehovah kan kenki foe gi pori, go na a gi di a e gi pardon.
Moses e taki gi den — Jehovah e arki
4. Baka sortoe demo di Jehovah ben demo a krakti foe en, tokoe den Israèlsma ben frede foe go na ini a Pramisi Kondre?
4 Jehovah ben tjari a nâsi Israèl na wan boen fasi komoto foe Egipti èn go krosibei foe a kondre di a ben pramisi den leki tanpresi, ma den ben weigri foe waka go na fesi, foe di na soso den man foe Kanan den ben frede. Den ben si fa Jehovah ben froeloesoe den foe Egipti nanga jepi foe den tin plaag di ben tjari pori kon. Èn den ben si fa a ben opo wan lowe pasi gi den na ini a Redi Se, èn ben pori na Egipti legre di ben proeberi foe hari go na den baka. A ben sroto a Wet froebontoe nanga den na a Bergi Sinai di ben meki taki den tron a nâsi di Jehovah froekisi, èn na wan wondroefasi a ben gi den mana foe hemel foe sorgoe gi den. Ma tokoe den ben frede foe go na ini a Pramisi Kondre, foe di wan toe Kanansma ben bigi toemoesi èn ben tranga. — Numeri 14:1-4.
5. Fa toe getrow spion ben proeberi foe gi Israèl tranga?
5 Moses nanga Aron ben froewondroe foe di den ben skreki foe a frede di a pipel ben frede gi libisma. Josua nanga Kaleb, toe getrow spion, ben proeberi foe gi Israèl tranga: ’A kondre na wan heri, heri boen kondre, wan kondre pe merki nanga oni e lon. No frede gi a pipel; Jehovah de nanga wi!’ Na presi foe den teki deki-ati foe den wortoe disi, a pipel di ben frede èn di ben opo densrefi teige Jehovah, ben proeberi foe trowe ston na tapoe Josua nanga Kaleb. — Numeri 14:5-10.
6, 7. (a) San Jehovah ben bosroiti foe doe di Israèl ben kakafoetoe foe waka go na ini a Pramisi Kondre? (b) Foe san ede Moses ben taki teige a kroetoe foe Jehovah na tapoe Israèl, èn nanga sortoe bakapisi?
6 Jehovah ben atibron! „Te foe kaba Jehovah ben taigi Moses: ’Olanga a pipel disi sa handri sondro respeki gi mi, èn olanga den no sa bribi mi, ala di mi ben doe someni marki na den mindri? Meki mi naki den nanga pestsiki èn jagi den gowe, èn meki mi meki joe tron wan nâsi di moro bigi èn moro makti leki den.’ Ma Moses ben taigi Jehovah: ’Dan foe troe den Egiptisma sa jere taki nanga jepi foe a krakti foe joe, joe ben opo a pipel disi poeroe foe den mindri. Èn foe troe den sa froeteri en na den sma di e tan ini a kondre disi. . . . Efoe joe ben sa kiri a pipel disi leki wán man, dan den nâsi di jere foe a barinen foe joe, foe troe ben sa taki disi: „Bika Jehovah no ben man foe tjari a pipel disi ini a kondre di a ben pramisi den, meki a ben kiri den ini a sabana.”’” — Numeri 14:11-16.
7 Moses ben begi tranga foe kisi pardon, gi a nen foe Jehovah ede: „Grantangi, gi pardon na a fowtoe foe a pipel disi akroederi a bigi foe joe lobi boen-atifasi, èn so leki fa joe gi a pipel disi pardon, bigin foe Egipti te leki now.” Ne Jehovah ben taki: ’Mi e gi pardon akroederi den wortoe foe joe.’” — Numeri 14:19, 20.
Na anbegi di Manase ben anbegi kroektoe gado èn a soetadoe foe David
8. Sortoe nen kownoe Manase foe Juda ben meki?
8 Wan toemoesi moi eksempre foe a gi di Jehovah gi pardon, na a kefal foe Manase, a manpikin foe kownoe Hiskia. Manase ben abi 12 jari di a ben bigin tiri na Jerusalem. A ben bow den hei presi, ben meki altari gi den Ba-al, ben meki santa postoe, ben boigi gi den stari foe hemel, ben doe obia nanga towfroe wroko, ben meki sma di de leki asi foe den jeje èn ben meki den doe loekoeman wroko, ben poti wan popki di koti nanga anoe, na ini a tempel foe Jehovah, èn ben meki den eigi manpikin foe en pasa ini a faja ini a Lagi presi foe Hinom. „A ben doe toemoesi foeroe sani di ben takroe ini den ai foe Jehovah” èn „a ben tan kori Juda nanga den sma di e libi na Jerusalem, foe doe ogri moro leki den nâsi di Jehovah ben kiri na fesi foe den manpikin foe Israèl”. — 2 Kroniki 33:1-9.
9. Fa a fesi foe Jehovah ben kon safoe gi Manase, èn nanga sortoe bakapisi?
9 Te foe kaba, Jehovah ben tjari den Asiriasma teige Juda, èn den ben teki Manase leki strafoeman èn tjari en go na Babilon. “Èn so esi leki a ben de ini banawtoe, a ben safoe a fesi foe Jehovah en Gado èn ben tan abi sakafasi srefisrefi foe a Gado foe den fositen tata foe en ede. Èn a ben tan begi En, so taki Ensrefi ben meki en tan begi en èn A ben jere a tranga aksi foe en foe a feni en boen èn foe poti en baka leki kownoe na Jerusalem” (2 Kroniki 33:11-13). Baka dati Manase ben poeroe den freimde gado, den kroektoe gado, nanga den altari èn ben meki den trowe den dorosei foe a foto. A ben bigin tjari srakti-ofrandi na tapoe na altari foe Jehovah èn ben bigin meki Juda anbegi a troe Gado. Disi ben de wan kefalek demo foe a wani di Jehovah wani foe gi pardon, te sakafasi, begi, nanga sani di sma e doe foe meki sani kon reti baka e gi froktoe di e fiti berow! — 2 Kroniki 33:15, 16.
10. Fa David ben proeberi foe kibri a sondoe foe en nanga a wefi foe Uria?
10 A soetadoe sondoe foe kownoe David nanga a wefi foe Uria a Hetitsma de wan bekènti sani. A no ben doe soetadoe wawan nanga en, ma na wan trikifasi a ben prakseri finifini foe kibri a tori di a wefi foe Uria ben kon de nanga bere. A kownoe ben gi Uria primisi foe no go na a feti, èn a ben e froewakti taki a ben o go na en oso foe abi seks demakandra nanga en wefi. Ma Uria ben weigri foe doe dati, foe di a ben abi respeki gi den kompe sroedati foe en di ben de na a fesilin foe a feti. Dan David ben gi en wan kari foe kon njan èn a ben droengoe Uria, ma tokoe Uria no ben go didon nanga en wefi. Baka dati David ben seni wan boskopoe go na a legre edeman foe en foe a poti Uria na a fesisei foe a feti, so taki den sa kiri en. Èn na so a ben pasa toe. — 2 Samuèl 11:2-25.
11. Fa a ben doe kon taki David ben abi berow foe a sondoe foe en, ma sortoe pina a ben pina?
11 Jehovah ben seni en profeiti Natan go na David foe poeroe a sondoe foe a kownoe kon na doro. „David now ben taigi Natan taki: ’Mi sondoe teige Jehovah.’ Na tapoe disi Natan ben taigi David: ’Jehovah, foe en sei, e meki a sondoe foe joe pasa gowe. Joe no sa dede’” (2 Samuèl 12:13). David ben firi taki a ben fowtoe srefisrefi foe den sondoe foe en èn a ben sori a berow foe en ini wan begi na Jehovah, di komoto na en ati: „Bika joe no e prisiri nanga srakti-ofrandi — noso mi ben sa gi en; nanga bron-ofrandi di bron dorodoro joe no e prisiri. Den srakti-ofrandi gi Gado na wan jeje di broko; wan ati di broko èn di masi, O Gado, joe no sa wisiwasi” (Psalm 51:16, 17). Jehovah no ben wisiwasi a begi foe David di a ben gi foe wan ati di broko. Tokoe David ben pina foe wan hebi strafoe, di de akroederi san Jehovah ben taki foe a gi di a e gi pardon, na Exodus 34:6, 7: „A no sa gi fri foe strafoe kwetikweti.”
A gi di Salomo ben gi a tempel abra na Jehovah
12. San Salomo ben aksi na a ten di a ben gi a tempel abra na Jehovah, èn san ben de a piki foe Jehovah?
12 Di Salomo ben kaba foe bow a tempel foe Jehovah, dan a ben taki ini a begi foe en foe gi a tempel abra: „Joe moesoe arki den tranga begi foe joe foetoeboi èn foe joe pipel Israèl te den e begi go na a presi disi, so taki joesrefi kan jere foe a presi pe joe e tan, na hemel; èn joe moesoe jere èn moesoe gi pardon.” Jehovah ben piki: „Te mi e tapoe hemel, so taki alen no kan fadon moro èn te mi e komanderi den sprenka foe den njan a kondre dorodoro èn te mi e seni wan pestsiki go na mindri a pipel foe mi, èn a pipel foe mi di abi a nen foe mi e saka densrefi èn e begi èn den e soekoe a fesi foe mi èn e drai baka gi den takroe pasi foe den, dan misrefi sa jere na hemel èn mi sa gi den pardon foe den sondoe foe den, èn mi sa dresi a kondre foe den.” — 2 Kroniki 6:21; 7:13, 14.
13. San Esekièl 33:13-16 e sori ini a tori fa Jehovah e si wan sma?
13 Te Jehovah e loekoe joe, dan a e teki joe gi san joe de nownow, no gi san joe ben de. A sa de so leki fa Esekièl 33:13-16 e taki: „Te mi e taigi a regtfardikiwan: ’Joe sa tan libi foe troe’, èn ensrefi e froetrow foe troe na tapoe en eigi regtfardikifasi èn a e doe kroektoedoe, dan ala den regtfardiki-doe foe en mi no sa hori na prakseri, ma foe a kroektoedoe di a ben doe — foe dati ede a sa dede. Èn te mi e taigi na ogriwan: ’Joe sa dede foe troe’, èn foe troe a e drai baka gi den sondoe foe en èn a e doe retidoe èn a e handri na wan regtfardikifasi, èn na ogriwan e gi baka san a ben teki leki borgoe èn a e pai den sani baka di a ben foefoeroe srefi èn e waka foe troe na baka den tirilin foe a libi, foe di a no e doe san no de reti, dan a sa tan libi foe troe. A no sa dede. Mi no sa hori no wan foe den sondoe di a ben doe, na prakseri teige en. Retidoe nanga regtfardikifasi na san a doe. A sa tan na libi foe troe.”
14. San de wan aparti sani foe a gi di Jehovah e gi pardon?
14 A gi di Jehovah Gado e gi wi pardon abi wan aparti marki, wan di de moeilek gi libisma mekisani foe den doe dati te den e gi pardon na makandra — a e gi pardon èn a e frigiti. Son sma sa taki: ’Mi man gi joe pardon gi san joe doe, ma mi no kan (noso no wani) frigiti en.’ Kontrari foe dati, loekoe san Jehovah e taki dati a sa doe: „Mi sa gi den pardon foe den fowtoe foe den, èn den sondoe foe den mi no sa memre moro.” — Jeremia 31:34.
15. Sortoe nen Jehovah abi foe a gi di a e gi pardon?
15 Doesoendoesoen jari langa kaba Jehovah ben e gi den anbegiman foe en na grontapoe pardon. A ben e gi pardon foe sondoe di den sabi taki den ben doe, èn so srefi foeroe foe den sondoe di den no sabi srefi. Den sani di a seti foe sori sari-ati, langa-pasensi, nanga a gi foe pardon, no abi kaba. Jesaja 55:7 e taki: „Meki na ogrisma libi en pasi, èn a man foe takroedoe den prakseri foe en; èn meki a drai go baka na Jehovah, di sa sori en sari-ati, èn go na wi Gado, bika a sa gi foeroe pardon.”
A gi di Gado gi pardon ini den kresten Griki Boekoe foe bijbel
16. Foe san ede wi kan taki dati a gi di Jesus e gi pardon de ini wánfasi nanga a di foe Jehovah?
16 Den tori foe a gi di Gado gi pardon de ini a heri verslag foe den kresten Griki Boekoe foe bijbel. Jesus e taki foeroetron foe dati, san e sori taki a de ini wánfasi nanga a fasi fa Jehovah e prakseri foe a tori. A fasi fa Jesus e prakseri e kon foe Jehovah, a e prenki Jehovah, a de a soifri prenki foe a de di Jehovah de troetroe; te joe si en dan joe si Jehovah. — Johanes 12:45-50; 14:9; Hebrewsma 1:3.
17. Fa Jesus ben sori a gi di Jehovah e gi „foeroe” pardon?
17 Dati Jehovah e gi foeroe pardon, sori na ini wan foe den agersitori foe Jesus, a di foe wan kownoe di ben fri wan srafoe foe wan paiman foe 10.000 talenti (so wan 33.000.000 Amerkan dala). Ma di a srafoe dati no ben wani fri wan kompe srafoe foe en foe wan paiman foe 100 denari (so wan 60 Amerkan dala), dan a kownoe ben atibron srefisrefi. „Takroe srafoe, mi ben taigi joe taki ala a moni di joe ben moesoe pai, joe no ben abi foe pai moro di joe ben begi mi tranga. Dan joe foe joe sei no ben moesoe sori sari-ati gi joe kompe-srafoe, so leki mi ben sori sari-ati na joe? Foe dati ede en masra ati ben kon bron srefisrefi èn a ben gi a srafoe na den waktiman foe a doengroe-oso foe a tan drape, te leki a ben pai ala en paiman baka.” Dan Jesus e fiti a tori: „Na so mi hemel Tata sa doe toe nanga oenoe efoe oenoe no gi oen brada pardon nanga oen heri ati.” — Mateus 18:23-35.
18. Fa wi kan teki a fasi fa Petrus ben si a gi foe pardon gersi nanga a fasi fa Jesus e si dati?
18 Leti bifo di Jesus ben gi na agersitori di skrifi na tapoesei, Petrus ben go na Jesus èn ben aksi: „Masra, omeni tron mi brada kan sondoe na mi èn mi moesoe gi en pardon? Te seibi tron?” Petrus ben prakseri foe ensrefi taki a ben lobi foe doe boen srefisrefi. Ala di den sabiman foe Boekoe nanga den Fariseiman ben poti wan marki ofara wan sma kan gi pardon, Jesus ben taigi Petrus: „Mi e taigi joe, no seibitron, ma te seibitenti na seibi tron” (Mateus 18:21, 22). Seibi tron no ben sa de nofo srefisrefi gi wan dei, so leki fa Jesus ben taki: „Poti prakseri na tapoe joesrefi. Efoe joe brada e doe wan sondoe, piri-ai gi en, èn efoe a abi berow, gi en pardon. Srefi efoe a sondoe seibi tron wan dei teige joe èn a e kon seibi tron baka na joe èn a e taki: ’Mi abi berow’, dan joe moesoe gi en pardon” (Lukas 17:3, 4). Te Jehovah e gi pardon, a no e hori wan raport foe den sondoe foe wi — dati de wan kolokoe gi wi.
19. San wi moesoe doe foe kisi pardon foe Jehovah?
19 Efoe wi abi a sakafasi foe abi berow èn foe erken den sondoe foe wi, dan Jehovah sa wani foe handri gi a boen foe wi: „Efoe wi e erken den sondoe foe wi, dan en de getrow èn regtfardiki, so taki a e gi wi pardon foe ala den sondoe foe wi èn e krin wi foe ala sani di no regtfardiki.” — 1 Johanes 1:9.
20. Na sortoe fasi Stefanus ben sori taki a ben wani foe gi pardon?
20 Di wan groepoe sma di ben atibron ben trowe ston na tapoe Stefanus, wan bakaman foe Jesus, dan a ben bari tranga ini begi ini wan toemoesi aparti jeje foe gi pardon: ’Masra Jesus, teki mi jeje.’ Dan a fadon na tapoe en kindi, ben bari nanga wan tranga sten: „Jehovah, no poti a sondoe disi na tapoe den.” Èn baka di a taki dati dan a sribi ini dede.” — Tori foe den Apostel 7:59, 60.
21. Foe san ede a ben de so wan froewondroe sani taki Jesus ben wani foe gi den sroedati foe Rome pardon?
21 Jesus ben gi wan moro froewondroe eksempre ini a wani di a wani foe gi pardon. Den feanti foe en ben aresteri en, ben kroetoe en na wan fasi di de kontrari wet, ben poti fowtoe na en tapoe, ben spotoe en, ben spiti na en tapoe, den ben wipi en nanga wan wipi di ben abi foeroe leri boeba di kande ben abi pisi bonjo nanga isri na ini den, èn te foe kaba den ben spikri en na wan oedoe èn den ben libi en foeroe joeroe langa na a oedoe. Den Romesma ben abi wan prati ini foeroe foe den sani disi. Tokoe, di Jesus ben e dede na a pina-oedoe dati, a ben taigi en hemel Tata, foe den sroedati di ben spikri en na wan postoe: „Tata, gi den pardon, bika den no sabi san den e doe.” — Lukas 23:34.
22. Sortoe wortoe foe a Bergi Taki wi moesoe proeberi foe doe?
22 Ini a Bergi Taki foe en, Jesus ben taki: „Tan lobi joe feanti èn tan begi gi denwan di e froefolgoe joe.” Ensrefi ben gi jesi na a gronprakseri dati, te na a kaba foe a diniwroko foe en na grontapoe. Disi na wan sani di e aksi toemoesi foeroe foe oenoe di e feti nanga den swakifasi foe wi skin di fadon? Wi moesoe proeberi nomonomo foe doe den sani di Jesus ben leri den bakaman foe en, baka di a ben gi den a model begi: „Efoe oenoe e gi sma pardon foe den sondoe foe den, dan oen hemel Tata sa gi oenoe pardon toe foe den sondoe foe oenoe; ma efoe oenoe no e gi sma pardon foe den sondoe foe den, dan oen Tata no sa gi oenoe pardon toe foe den sondoe foe oenoe” (Mateus 5:44; 6:14, 15). Efoe wi e gi pardon na a fasi fa Jehovah e gi pardon, dan wi sa gi pardon èn wi sa frigiti.
Joe e memre disi ete?
◻ Fa Jehovah e handri nanga den sondoe foe wi, èn foe san ede?
◻ Foe san ede Jehovah ben poti Manase baka leki kownoe?
◻ Sortoe aparti marki foe a gi di Jehovah e gi pardon, moeilek gi libisma foe den waka na baka dati?
◻ Fa a wani di Jesus ben wani foe gi pardon de so wan froewondroe sani?
[Prenki na tapoe bladzijde 31]
Natan ben jepi David foe si a fanowdoe foe kisi pardon foe Gado