Wánfasi na grontapoe — Fa dati sa kon?

NELEKI wan owroe broko oso di den sma di e joeroe en no e sorgoe boen èn di den broko srefisrefi, na so a disiten grontapoe sistema fiti gi soso wán sani nomo — foe den broko en poeroe èn poti wan trawan na ini en presi. Disi a no soso wan tra tweifri fasi fa sma di e taki foe rampoe na fesi e si sani. Soleki fa bijbel e taki, dan dati na a wan-enkri fasi foe si fa sani de troetroe. Foe san ede?

Den fondamenti foe a disiten grontapoe seti no de sondro kefar. A heri stroektoeroe lai nanga oedoeloso èn a pori. A staal konstruktie e froestoe. Skotoe di e hori en e kon swaki. A daki e saka. Den peipi e leki. A stroom sistema no boen èn de wan kefar. Den sma di e libi na ini e feti doronomo èn na wan ogri-ati fasi e broko a heri oso. A heri oso nanga a kontren lontoe na oso lai nanga insekt di kan kiri sma noso gi sma serjoesoe mankeri.

„Dansi na tapoe a lanki foe a grebi”

Bika foe doronomo politiek feti ede, bigi-ai, a soekoe di sma e soekoe foe feti, nanga tranga feantifasi foe ras nanga etnisch groepoe, meki „a heri libisma famiri e dansi na tapoe a lanki foe a grebi”, soleki fa Gwynne Dyer ben taki en. Na heri grontapoe, pikin groepoe di de fajafaja foe doro den marki foe den — groepoe di e hori a belang foe sma na prakseri, groepoe sma di e feti foe fri densrefi foe a makti foe trawan, groepoe foe ogriman, internationaal terrorist groepoe, nanga trawan — e feti na baka den eigi plan pe den e prakseri densrefi nomo èn a gersi taki den man pori iniwan fasi foe tjari vrede kon na grontapoe pikinmoro soleki fa den wani. Neleki sma di joeroe wan oso èn e broko en, na so den kan meki a libi de wan sari sani gi ala tra sma.

Ma akroederi foeroe sma di e froeklari sani di pasa, groepoe sma di abi tra prakseri foe a fasi fa sani moesoe tiri noso trangajesi sma, no de den wawan ini a meki di den e meki taki wánfasi na grontapoe no de. A moro bigi skotoe na a nationaal staat srefi. Den srefidensi nâsi de ini „wan fasi foe internationaal broeja”, na so S. B. Payne, Jr. e taki, skrifiman foe feti tori. Den e doe ala san moro boen gi den nationaal afersi foe den, èn foeroetron den no e hori tra sma na prakseri noso no e hori den na prakseri srefisrefi. A bakapisi de, taki na ini a heri historia „a wan libisma tiri a tra libisma nanga ogri bakapisi gi en”. — Preikiman 8:9.

A troe taki son tiri foe kondre abi wan toe boen bakapisi foe feti nanga onregtfardikifasi èn a kwinsi di sma e kwinsi trawan, na a pisi doti foe a kondre foe den èn, te na wan seiker marki, na wan internationaal fasi. Ten na ten, den doro wan fasi foe internationaal wánfasi. Ma srefi te son nâsi bondroe kon na wán foe doe wan sani teige wan nâsi di e soekoe foe feti, tokoe foeroetron a prakseri e tan, taki den ben handri foe den eigi belang ede, na presi foe handri opregti gi den belang foe trawan. A troetori de taki libisma tiri no abi wan finifini loesoe di e tan, gi a pratifasi na grontapoe. Gwynne Dyer e taki: „Na idea taki ala den nâsi foe grontapoe sa moksi densrefi foe stòp noso strafoe son srefidensi kondre di e bigin nanga a feti, boen, te joe loekoe en fini, ma soema e bepaal sortoe nâsi bigin nanga a feti, èn soema e pai den kostoe na moni sei èn na a sei foe sma libi, di kande de fanowdoe foe stòp a nâsi dati?”

A no de foe taki dati iniwan nâsi kan bigin foe feti nanga wan tra nâsi, soso te a moro bigi pisi foe den borgoe foe a nâsi di bigin nanga a feti, no e gens a feti dati. Ibritron baka, historia e sori taki a no soso na ini son „srefidensi kondre” taki den borgoe horibaka gi den fesiman foe den, efoe a boen noso fowtoe. Te joe loekoe en boen, dan a moro bigi pisi foe den sma di e libi na grontapoe doe a sani dati. Na wan breni fasi den ben waka baka „leitori, sani di e kori a pipel, nanga propaganda”, soleki fa a tijdschrift Time e taki en, sani di e kon foe wan lo politiek nanga relisi fesiman.

Nationalisme soetoe faja gi den faja firi foe sma di, te joe e loekoe en boen, de reidelek sma di abi sari-ati èn meki den doe kefalek ogri-ati ogri nanga mansma, oemasma nanga pikin-nengre foe wan tra nâsi. Foe eksempre, a historia skrifiman J. M. Roberts sori go na a Fosi Grontapoefeti èn e taki: „Wán foe den sani di de kontrari makandra na ini 1914 èn di e froewondroe sma, na taki na ini ibri kondre a gersi taki kefalek foeroe sma, foe ala partij, bribi nanga famirilin, de klariklari èn breiti foe go feti.” Sma leri wan sani sensi a ten dati? Nôno! Na ogri foe „nationalisme di e breni sma”, soleki fa a skrifiman Rod Usher ben kari en, e tan pori iniwan okasi foe kan abi wánfasi na grontapoe.

Dorosei krakti e doe wan sani

Ma wan moro bigi skotoe de gi wánfasi na grontapoe. Bijbel e tjari kon na krin taki dorosei krakti e doe wan sani. Den e meki wi kon sabi den leki Satan Didibri nanga den prenspari bakaman foe en, den ogri jeje. Soleki fa bijbel e taki, dan Satan na „a gado foe a seti foe sani disi [di] breni a froestan foe sma di no e bribi”, so taki „a glori boen njoensoe foe Krestes” no e naki na ati foe den. — 2 Korentesma 4:4; Openbaring 12:9.

A no de foe taki dati disi no e poeroe a frantiwortoe di ibri sma abi foe den sani di densrefi doe. Ma a e tjari kon na krin foe san ede den libisma tiri noiti no kan seti wan grontapoe di troetroe de ini wánfasi. So langa Satan Didibri e tan de, a sa abi krakti na tapoe mansma nanga oemasma foe kweki den sani di bijbel e kari „den wroko foe a skin”, so srefi ’feantifasi, trobi, kesekese nanga pratifasi’. — Galasiasma 5:19-21.

Wán tiri gi heri grontapoe

San na a loesoe dan? So wan seibi hondro jari pasa kaba, a poewema skrifiman nanga filosoofman Dante foe Italia, di sma sabi heri boen, ben sori go na a piki. A ben taki dati wán tiri gi heri grontapoe wawan kan gi a djaranti foe a vrede nanga wánfasi foe a libisma famiri. A howpoe tapoe iniwan fasi foe wán tiri gi heri grontapoe na soso wan falsi idea gi foeroe sma, a no de wan sani pe den kan poti den froetrow troetroe na tapoe. „Wán tiri gi heri grontapoe”, na so a skrifiman Payne di wi kari na fesi kaba, e bosroiti, „na wan sani di no kan na ini a pisi ten disi na ini a historia.” Foe san ede? Bika iniwan tiri di de gi heri grontapoe èn di abi boen bakapisi, ben sa moesoe gi a djaranti foe toe sani di gersi taki libisma no man doe dati krinkrin, namkoe, taki „wan tiri di de gi heri grontapoe sa tjari wan kaba kon na feti èn taki wan tiri di de gi heri grontapoe no sa de wan tiri di e tiri heri grontapoe na wan ogri-ati fasi”.

A de seiker taki no wan libisma tiri oiti sa man doe dati. Ma Gado en Kownoekondre ini anoe foe Jesus Krestes kan èn sa poeroe feti (Psalm 46:9, 10; Mateus 6:10). Ija, a sa poeroe ala sma di e soetoe faja gi feti. A profeiti Danièl e sori taki na a kaba foe a ten di Gado poti foe libisma tiri grontapoe, libisma tirimakti ben sa „sori foe abi pratifasi” neleki „isri . . . [di] moksi nanga a safoe doti” (Danièl 2:41-43). Disi ben sa abi leki bakapisi taki na politiek sei den sa broko na pisipisi, nanga feti di den no man wai pasi gi. Tokoe Danièl e taki dati Gado en Kownoekondre „sa broko ala den kownoekondre disi [di lobi nationalisme èn di e tjari pratifasi kon] na pisipisi èn tjari wan kaba kon na den”, noso tiri, èn poti en Kownoekondre ini anoe foe Jesus Krestes, di sma wakti langa ten kaba, na ini a presi foe den. — Danièl 2:44.

A ben sa de foe soso foe meki wan boen kontren gi libisma efoe sma di de leki krasi boesimeti ben sa tan libi na grontapoe èn di ben sa tan meki a libi foe tra sma de wan sari sani. Ma, „den ogri sma srefi sa koti poeroe” (Psalm 37:1, 2, 9, 38; Odo 2:22). Foe dati ede, Krestes sa poeroe ala sma di foe espresi e weigri foe teki den markitiki foe Gado noso di e horibaka gi grontapoe tirimakti di e tjari pratifasi kon. A sa pori ala den sma di e pori a planeiti disi. Gado e pramisi „foe pori den wan di e pori grontapoe”. — Openbaring 11:18.

Disi no sa de wan sortoe tiri di e tiri heri grontapoe na wan ogri-ati fasi. Jesus Krestes sa handri „gi na afersi foe waarheid èn foe sakafasi èn foe regtfardikifasi” te a e prati den boen sma foe den ogri sma (Psalm 45:3, 4; Mateus 25:31-33). A fasi disi fa Jesus e handri, no de soso na wan negatief fasi èn foe tjari wan bigi pori nomo, wan fowtoe fasi foe gebroiki makti. Nôno! A no de neleki wan sma di e bai èn e seri oso noso gron èn di abi bigi-ai, e go broko wan moi fositen gebow. A sa de moro foeroe leki a broko di den e broko poeroe wan owroe broko oso di pori, foe meki pasi gi wan krin kontren di e gi sma prisiri.

Ma fa a de nanga den dorosei krakti di meki so wan pratifasi kon na ini a ten di pasa? Den sa kisi na okasi foe kon safrisafri na ini a njoen seti disi, so taki den sma di e libi na tapoe sa bigin baka nanga a fasi foe pori sani, e feti nanga den kompe sma di e libi na tapoe èn e meki a libi de wan sari sani gi ala sma? Kwetikweti. A poeroe di den sa poeroe sma èn a meki di sani o meki kon boen baka, sa de a lastiwan èn a sa doe krinkrin. „Banawtoe no sa opo kon wan di foe toe tron.” — Nahum 1:9.

Bijbel e agersi a lasti pori foe Satan nanga a bron di sma e bron doti. A e taki dati „den ben fringi Didibri, di ben e kori [den sma di e libi na grontapoe], go na ini a se foe faja nanga swarfoe” (Openbaring 20:10). Dati na troetroe wan krakti fasi foe agersi sani! Prakseri foe dati, den no e agersi a pori soso nanga wan pikin masjin di e bron pikinso sani nomo, ma nanga wan heri se foe faja, èn a e bron èn e poeroe ala sani krinkrin di takroe èn di kon doti. No wan sma, no libisma noso ogri jeje, sa kisi pasi foe go doro foe doe sani di de wan kefar gi na orde na ini a heri grontapoe, di e pasa den markitiki foe Gado foe boen nanga ogri, noso di e hati den kompe libisma foe den. Ala sma di e pori a wánfasi no sa de moro! — Psalm 21:9-11; Sefanja 1:18; 3:8.

Wan pipel di tjari kon na wán, komoto na ala nâsi

Den sma di sa pasa a bigi krin disi di den sa krin sani, libilibi, sa de „wan bigi ipi . . . di komoto na ala nâsi nanga lo nanga pipel nanga tongo” (Openbaring 7:9). Kesekese foe nâsi nanga lo no sa prati den. Den sa leri foe libi nanga makandra na ini wánfasi èn na ini vrede (Jesaja 2:2-4). San moro moi srefi, na taki sma di fosi ben libi na tapoe a planeiti èn di nanga jepi foe a moi seti foe na opobaka sa kon baka foe libi na tapoe a grontapoe di kon krin, sa moksi densrefi nanga den wan dati. — Johanes 5:28, 29.

Joe ben sa wani libi na so wan grontapoe? Soso den sma di e hori densrefi steifi na den markitiki foe Gado sa man libi na so wan grontapoe, èn den markitiki foe en poti krin na ini bijbel (Johanes 17:3; Tori foe den Apostel 2:38-42). Jehovah Kotoigi sa breiti foe jepi joe foe kon sabi san Gado e aksi foe wi, so taki joe kan abi a howpoe foe njan boen foe a libi foe têgo na ini wan grontapoe di troetroe de ini wánfasi.

[Prenki na tapoe bladzijde 7]

Tiri ini anoe foe Jesus Krestes sa gi wi a djaranti foe wan grontapoe di de ini wánfasi