Kownoekondre wánfasi de now wan troetroe sani
„Te oenoe si den sani e pasa, sabi dan dati na kownondre foe Gado de krosbé kaba.” — LUKAS 21:31.
1. San Jezus ben taki na fesi na ini Lukas kapitel 21?
A MORO bigi proféti foe ala proféti, Jezus Kristus, e taki den wortoe di de na tapoesé dja. Èn na tapoe sortoe sani Jezus ben sori dja? Now, na tapoe den sani di wi e si e pasa lontoe wi na ini na disiten prati grontapoe! Na grontapoe disi e broko a pispisi. A dati na san Jezus ben taki na fesi leki na marki foe na „bosroiti” foe na grontapoe seti, di a ben taki foe „bigi feti nanga broejafasi èn na tapoe na grontapoe broeja skreki foe den naatsi, di no sabi wan pasi foe komoto” (Mattéus 24:3, 7, 8; Lukas 21:9, 25). Pratifasi de na alape! Ma Jehovah Kotoigi moe de nanga skreki-ati foe na pratifasi na ini na grontapoe disi?
2. Fa wi moe teki den grontapoe toestand, èn foe san-ede?
2 Meki wi Méstri gi na piki gi wi. Jezus ben taki: „Te den sani disi bigin now foe psa, opo tanapoe dan let’opoe èn opo oen ede go a tapoe bika joe ferloesoe e kon krosbé” (Lukas 21:28). Ferloesoe foe san? Foe wan prati grontapoe di de foe dede. — 1 Johannes 5:19.
Frede ini politik groepoe
3. Na ini sortoe negatief wortoe sma di sabi san e psa na grontapoe ben taki foe den politiek afersi?
3 Srefi den Verenigde Naatsi e handri kontrari den égi nen. A de ala fasi boiti ini wánfasi. Na sekretarsi-generaal foe den Verenigde Naatsi ben e sori foe na makti di na Veiligheidsraad no abi foe hori vréde nanga sékerfasi èn a ben ferklari: „Wi tanapoe kefarlek krosbé foe wan njoen internationaal anarchie (pe sma no e hori densrefi na wet moro).” Na pratifasi de wan sani di e gi sma skreki-ati. Wan skrifiman ini a Washington Post ben taki: „Den sani di e psa no de ondro wi makti moro.” „Sensi den jari ’60 dan den tiri foe ala presi, na ini Oostsé èn ini Westsé, stop foe wroko boen”, wan fosten asisteriman foe na Weti Oso foe den Amerkankondre èn wan politiek raiman ben skrifi. Èn wan fosten Amerkan ambassadeur na den Verenigde Naatsi ben taki dati na algemene komakandra ben tron „na kino foe lawfasi”.
4. Na tapoe sortoe aparti fasi Lukas 21:26 e kon now troe?
4 Ma a kan kon moro ogri ete, bika a kowroe feti e kon moro hebi èn den kondre di abi kernfetisani abi nofo atoom-ede di den poti na wan sé kaba, foe wai 1.600.000 foto leki Hirosjima poeroe na pasi. Wan fosten Amerkan ambassadeur ini Moskou abi na prakseri taki a pasi foe den toe supermakti „e tjari den go na wan toeka nanga makandra” èn a e taki, dati ’na wan bepaalde momenti a kan kon na wan explosie di joe no man foe tapoe’. Disi na den froktoe foe pratifasi ini wi disiten grontapoe. Na kefar de wan troetroe sani. A de soleki Jezus ben taki, dati a ben sa de na ini na ten foe na bosroiti foe na seti foe sani: „Den sma ben sa kon weri . . . foe frede èn ferwakti foe den sani di sa kon tapoe na grontapoe pe libisma e libi a tapoe; bika den krakti foe den hemel sa kon seki” (Lukas 21:26). Ija, srefi den hemel, bika den naatsi e sreka sani kaba foe tjari sateliet nanga atoom-ede kon na ini wan pasi na ini na loktoe e drai lontoe na grontapoe!
Den bigi bisnis foe a grontapoe e degedege
5. Sortoe frede nanga doengroe ferwakti ben kon abra na bisnis grontapoe?
5 Sosrefi toe na ini den bisnis foe a grontapoe pratifasi nanga frede e rigeri. Na president foe na Grontapoebangi e taki: „Mi no denki taki ini den tin jari di e kon, dati wan sani sa de boen moro.” Tapoe wan komakandra na ini 1982, 24 bigi industrie kondre ben taki a fesi fa den e si sani na wan doengroefasi dati den ben sa abi na ini 1983, 30 miljoen sma di no abi wroko. Na profétitori e kon troe srefsrefi!
6. San a Wortoe foe Gado e taki foe na sari ekonomia situwasi foe den kerki èn a bakapisi foe dati?
6 Wan winiman foe a Nobelprijs gi economia wetenschap e taki foe den moni-afersi ini a grontapoe sjatoe nanga den wortoe: „A de alamala wan skreki sani.” Den kerki foe na grontapoe de dipi na ini a tori disi. „Den foeroe watra” foe Openbaring 17:1, 15 — „pipel nanga ipi nanga naatsi nanga tongo” foe na grontapoe di e libi sondro Gado — no e gi a jepi foe den moro langa na den kerki, sodati den moni jepi foe den kerki ben kon ’dré’. (Teki gersi Openbaring 16:12.) Ma na disiten sari ekonomia situasi foe den kerki no de noti srefsrefi te joe teki en gersi nanga na broeja skreki di sa pina den te na Soeverein Masra Jehovah o tjari na strafoe kon leki wan kontroe foe en Wortoe: „Wan rampoe, wan aparti rampoe, loekoe! a e kon. Tapoe den strati srefi den sa trowe den solfroe èn wan tegoe sani srefi den égi gowtoe sa tron. No den solfroe, no den gowtoe sa ferloesoe den na tapoe na dé foe na atibron foe Jehovah” (Ezechiël 7:5, 19). Èn den gridi fasi bidrigiman foe den bigi bisnis foe a grontapoe sa teki prati na a broeja skreki disi foe den kerki foe na grontapoe! — Openbaring 18:2, 3, 16.
Kerki pratifasi di de alaten
7. Fa na katholiek bribi no ben man srefsrefi foe tjari wánfasi kon?
7 Meki wi go loekoe now pikinso na kerki grontapoe moro krosbé. Na pratifasi de dja séker wan troetroe sani di e tegoe wi. Na katholik bribi e meki wi si na heri lo foe priester di e feti leki guerillafetiman te doro bisschop di e feti foe den poti kernfetisani na ini ijskasi. Na paus ben kari 1983 wan Santa Jari. Dati ben de so? Na kowroe feti kon moro tranga. Prakseri dati na jari 1933 ben de ooktoe wan Santa Jari foe a Paus èn san ben psa nanga dati? Hitler ben kon na makti èn nanga disi den sani ben bigin psa di ben tjari na di foe Toe Grontapoe Feti kon.
8. Sortoe broeja situwasi na anitri bribi e meki wi si?
8 Na Grontapoe Rai foe Kerki, di 301 anitri nanga orthodox sekte di abi so wan 400 miljoen memre e kraka den baka, ben si hondrohondro miljoen dollar na revolutionair politik man. Na ini den Verenigde Staten foe Amerkankondre soso kaba moro leki 1200 kerki groepoe de. Ma den dati e meki wi jere wan broeja trompet babari. Na pratifasi foe den ben tjari foeroe skreki sani èn „kroektoedoe” di Jezus ben taki taki den ben sa tron net so wan kroektoe sani na ini na ten foe na kaba. — Lukas 21:9; Mattéus 24:3, 12.
9. Fa wi kan kon sabi na troe kristen gemeente?
9 Na pratifasi di de now alaten foe si na ini den kerki foe na kristenheid, de kontrari na prenki di na apostel Paulus ben gi foe na troe kristen gemeente, di ’e feti na wan troe èn reti fasi foe hori na wánfasi foe memre ini a banti foe vréde di e tjari kon na wan’. Paulus ben taki: „Wán skin de èn wan jeje, wán Masra, wán bribi, wán dopoe, wán Gado èn Tata foe ala sma di de na tapoe ala sma èn nanga ala sma èn na ini ala sma.” — Efesesma 4:3-6.
Pe wánfasi de foe psa marki
10. Pe na „banti foe vréde di e tjari sani kon na wan” de now foe feni, èn foe san-ede soso drape wawan?
10 Pe wi moesoe soekoe dan na „banti foe vréde disi di e tjari sani kon na wan”? No na ini na grontapoe, bika wi e kisi ferloesoe komoto foe Satan grontapoe nanga en politik, economia èn kerki pratifasi. Leki kristen wi bow na tapoe na bijbel, wi no de wan pisi foe na grontapoe. Foe dat’ede meki Jezus ben taki, di a ben begi foe na boen foe en salfoe bakaman: „Den no de wan pisi foe na grontapoe, neleki mi no de wan pisi foe na grontapoe” èn a ben taki moro fara: „No wawan gi den mi e begi, ma sosrefi toe gi den di nanga jepi foe den wortoe e poti bribi na ini mi, sodati den alamala kan de wán, neleki joe, Tata, de na ini wanfasi nanga mi èn mi na ini wánfasi nanga joe, dati sosrefi toe den kan de ini wánfasi nanga wi, sodati na grontapoe kan bribi taki na joe ben seni mi kon”. — Johannes 17:16-21.
11. Fa troe kristen ben tron „wan ipi”?
11 So wan kefarlek moi wánfasi wi e si now a ini na internationaal gemeenschap foe Jehovah Kotoigi, kolokoe dati miljoenmiljoen sma foe alasé na grontapoe de poti prakseri na tapoe na wánfasi disi, èn foeroe foe den di e studeri a Wortoe foe Gado, e tjari kon now makandra leki „tra skapoe” foe Masra. Foe di den bondroe kon na wan nanga a „pikin ipi” foe salfoe kristen meki dati alamala e tron „wán ipi” na ondro na Toemsi Boen Herder (Johannes 10:16; Lukas 12:32). Den alamala e feni en wan prisiri sani dati sma kari den Kotoigi foe Jehovah èn dati den tjari kon na wan makandra na ini wan kownoekondre-wánfasi di de wan troetroe sani srefsrefi.
Foe san-ede „Kownoekondre wánfasi”
12. (a) Foe san-ede na Kownoekondre foe Gado moe de wan thema na ini wi libi di e tjari sani kon na wan? (b) Foe san-ede wi moe prisiri, aladi pratifasi na ini na grontapoe e kon moro nanga moro?
12 Foe san-ede wi e gebroiki na wortoe Kownoekondre-wánfasi? Now, na kownoekondre foe Gado no de na thema foe na heri bijbel? Na kownoekondre no moe de wan thema di e bondroe sani kon na wan na ini wi libi? A ben de wan span tori foe si fa na marki di Jezus ben gi e kon troe èn nanga dati na bewijsi e gi dati en kownoekondre ben opo na ini hemel na ini na prenspari jari 1914. Èn Jezus ben taigi wi dati wi moe prisiri te wi si foe sensi na ten dati fa den doengroe dondroe wolkoe foe Armageddon e kon na makandra. A ben ferteri dati na „libisma-lo” foe 1914 — na jari pe na marki ben bigin kon troe — „no ben sa psa kwetkweti te leki ala den sani ben psa” (Mattéus 24:34). Wantoe sma foe na „libisma-lo” dati ben kan de kande na libi ete na a kaba foe na jarhondro, ma wan lo sani de di e sori taki na „kaba” de moro krosbé!
13. Foe san-ede meki wi no e teki prati na ini na frede foe na prati grontapoe?
13 Nanga den wortoe di e kon now na proféti foe Jehovah e taki foe na rampoe di e kon: „Tan loekoe nanga foeroe ferwakti foe a kon . . . A no sa kon toemsi lati” (Habakuk 2:3). Ma ini a pisiten disi wi no e teki prati na ini a frede foe na prati grontapoe, bika na ini na heri grontapoe wi bondroe kon na wan na ondro na Kownoekondre. A Kownoekondre foe Gado di wi e begi foe en kon tron wan troetroe sani (Mattéus 6:9, 10). Èn wi glori wánfasi de wan troetroe sani. Disi ben doe kon alamala na ini akroederi nanga na sani di den proféti foe Jehovah foe owroeten ben taki na fesi. — Jesaja 9:6, 7; Daniël 2:44; 7:13, 14, 27.
„Dré bonjo” e kon baka na libi
14. Sortoe aparti tafereel skrifi na ini Ezechiël 37:1-4?
14 Meki wi loekoe ini a tori disi Ezechiël kapitel 37 pikinso. We, san na proféti e taki?
„Na anoe foe Jehovah ben de na tapoe mi, sodati a ben tjari mi go na dorosé na ini a jeje foe Jehovah èn a ben poti mi leti a mindri na lagi presi èn a ben foeroe nanga bonjo èn a ben meki mi waka psa en lontoe krinkrin, èn loekoe! boen foeroe ben de na tapoe na gron foe na lagipresi, èn loekoe! den ben dré srefsrefi. Ne a taigi mi taki: ’Libisma pikin, den bonjo disi kan kon baka na libi?’ Dan mi taki: ’Masra Jehovah, joesrefi sabi dati heri boen.’ Èn a ben taki gi mi moro fara: ’Taki profétitori foe den bonjo disi, èn joe moe taki gi den taki: „O joe dré bonjo, jere na wortoe foe Jehovah.”’” — Ezechiël 37:1-4.
15. Sortoe disiten situwasi e prenki dja?
15 Joe kan tjari disi kon pikinso na ini joe prakseri? Wan heri lagipresi nanga ipi-ipi dré bonjo! Ma disi no de wan agersifasi foe na situwasi baka Armageddon. A e agersi wan sani di ben psa a fesi kaba na ini wi jarhondro. Den bonjo dati ben teki a presi foe na toestand pe libi nanga wroko no ben de moro èn pe Gado salfoe dienstknegti ben de na ini na a ten dati.
16, 17. San Jehovah ben pramisi foe doe, èn foe san-ede disi ben sa de wan wondroe?
16 Ma Jehovah ben doe wan sani nanga na toestand dati. Arki na en égi wortoe:
„Disi na Masra Jehovah ben taki gi den bonjo: ’Loekoe, mi e tjari bro kon na ini oenoe, èn oenoe moe kon na libi. Èn mi wani poti tité kon na tapoe oenoe èn meki meti kon na oenoe tapoe èn mi wani poti boeba na oenoe tapoe èn poti bro na ini oenoe, èn oenoe moe kon na libi; èn oenoe sa moesoe sabi taki mi a Jehovah.’”
Soboen den ben kon baka na libi, wan bigi sroedati makti srefsrefi”. — Ezechiël 37:5-10.
17 Djaso Jehovah ben doe wan sani di no wan enkri koniman no kan waka na en baka foe doe. A no de wan problema gi den koniman foe meki wan skin foe bonjo foe wan sma soleki fa wi e si dati now na ini museum. Ma sortoe koniman oiti ben man gi wan skin foe bonjo, tité, skin nanga bro?
18. (a) Foe san-ede a ben gersi gi na pipel foe Gado na ini 1918 èn na a bigin foe 1919 wan sani pe howpoe no ben de moro? (b) San Jehovah ben sori, na ini akroederi nanga na profétitori, dati a no ben frigiti den getrow-wan disi?
18 Tokoe Jehovah Gado ben meki na wondroe disi pasa na ini na disiten historia foe Jeovah Kotoigi. Neleki den dré bonjo dati na so na pipel foe Jehovah ben panja go na alape na a ten foe na Fosi Grontapoefeti, na Edekantoro foe den na ini Brooklyn ben tapoe, den tiriman foe na maatschappij foe den foe tjari boekoe kon na doro ben de na ini doengr’oso, den ben kisi strafoe foe twenti jari èn na wroko foe den na ini na veld ben stop. Na a ten dati na ini 1918 èn na a bigin foe 1919, na situwasi foe den ben gersi wan, pe howpoe no ben de moro. Ma Jehovah no ben frigiti den getrow boskopoeman dati foe na kownoekondre. A ben tjari den kon baka na libi na ini 1919, precies soleki a ben tjari kon na fesi na ini Ezechiël 37:14:
„’Èn mi wani poti mi jeje na ini oenoe, èn oenoe moe kon na libi, èn mi wani poti oenoe na tapoe oen gron; èn oenoe sa moe sabi dati misrefi, Jehovah, ben taki èn ben doe en’, na so den wortoe foe Jehovah de.”
19. (a) Fa èn na sortoe fasi Jehovah ben meki en pipel kon boen baka? (b) Foe san-ede a ben de na a heri grontapoe fanowdoe foe meki den faciliteit foe a Genootschap kon moro bigi?
19 Na so fasi Jehovah ben tjari en pipel di den ben ferfolgoe go baka na ini wan kondre foe jeje go na fesi èn a ben poti den na wroko nanga na komando foe gi wan kownoekondre-kotoigi di ben panja go na a heri grontapoe. Ala dé nownow moro leki wan miljoen joeroe e gi na a préki foe a boen njoensoe. Na kefarlek bigi kotoigi disi ben meki a de fanowdoe foe meki den faciliteit foe na Wachttoren Genootschap na ini Brooklyn èn na ini Wallkill, (New York, Amerkankondre) kon moro bigi. Nanga jepi foe na wroko di e doe dja ini krosbé wrokomakandra nanga foeroe tintin foe drukkerij nanga bijkantoro alape na grontapoe, meki bijbel, boekoe, nanga tijdschrift e druk, èn ooktoe poesoekrakti e gi na a préki foe ’na boen njoensoe disi foe na kownoekondre na tapoe na heri grontapoe pe libisma e libi leki wan kotoigi gi ala naatsi’. Te dati kon klari dan „na kaba sa kon”. — Mattéus 24:14.
20. San e tron now wan troetroe sani, èn soema e aksi na grani foe disi?
20 Soema e aksi ala grani foe na kon boen baka foe den kotoigi leki wan orga pipel sodati na toemsi aparti wánfasi disi foe doe sani ben man foe de? „’Misrefi ben doe en’, na so den wortoe foe Jehovah de”. Foe dat’ede a ben tron wan troetroe sani foe na kownoekondre.
Wan kotoigi wroko di e kon dé foe dé moro bigi
21. (a) Fa Jehovah Kotoigi e sori taki den de leki den fosi-jarhondro kristen? (b) Sortoe kari ben kon, èn nanga sortoe bakapisi?
21 Na toemsi bigi kotoigiwroko e tan panja ensrefi go na a heri grontapoe èn miljoenmiljoen getrow zendeling, pionier, nanga gemeente prékiman abi wan prati na ini. Neleki den fosi jarhondro kristen a so den disiten Kotoigi foe Jehovah e préki na howpoe foe na boen njoensoe „na ini na heri mekiwroko di de na ondro hemel”! (Kol. 1:23). Nanga a ferstan taki Jehovah „de wan bigi Gado èn wan bigi kownoe na tapoe ala tra gado” meki wi e kari ala reti-ati sma: „O kon, meki wi anbegi èn meki wi boigi wisrefl; èn meki wi kindi na fesi Jehovah, wi Mekiman.” Fa a de wan prisiri sani dati ala wiki gemiddeld moro leki 3.000 njoen sma e teki dopoe èn e tjari kon na inisé foe na wánfasi foe na ipi foe na Toemsi Boen Herder! Den e anbegi a Tata now „nanga jeje èn waarheid”. — Psalm 95:3-6; Johannes 4:23, 24.
22, 23. (a) Foe san-ede a de gi sma di gersi skapoe prenspari dati den de wán foe memre? (b) Fa na bijbel e skrifi foe wi wánfasi èn a réde di de foe dati?
22 Na ini na dé disi foe Jehovah kroetoe tapoe Satan prati grontapoe a de toemsi prenspari, dati ala den sma dati di gersi skapoe na ini ala naatsi na tapoe wánfasi poti prakseri na tapoe na boskopoe foe na engel di ben „meki boen njoensoe bekenti” èn di taki nanga tranga sten taki: „Frede Gado èn gi en glori, bika na joeroe foe en kroetoe di en e tjari kon doro kaba, èn anbegi foe dat’ede en di ben meki hemel nanga grontapoe èn se èn den watra fonten.” Joe ben tjari ooktoe kon na inisé foe na konwoekondre wánfasi dati? — Openbaring 14:6, 7.
23 Fa den 2.500.000 Kownoekondreprékiman de wan groepoe di bondroe kon na wan èn di e dini now na ini 205 kondre. Gado santa jeje e wroko na tapoe den èn den e meki den froktoe foe na jeje kon na fesi (1 Korintesma 2:12; Galaciasma 5:22, 23). Aladi na nationaal background foe den de tra fasi, tokoe den e taki na wán soifri waarheid-tongo (Zefanja 3:9). Skowroe na skowroe den e dini na ini kownoekondre-wánfasi!
24. Fa den vers 17, 22 foe Jesaja 60 ben kon troe?
24 Awinsi sortoe pratifasi ben kan de a ini na ten di psa, den dati ben komoto a pasi spesroetoe sensi di Jehovah ben tjari en pipel kon na ondro wan theokratis seti sensi na jari 1938. Disi ben de wan kontroe foe na profétis pramisi ini Jesaja 60:17: „Mi wani poti vréde leki oen opziener èn regtvaardikifasi leki a sma di e gi oen wroko.” Aladi den pori foe na di foe Toe Grontapoe Feti ben de èn ben go makandra nanga na ogri-ati ferfolgoe foe Jehovah Kotoigi, tokoe na kownoekondrewroko foe na pipel foe Gado di tjari kon na wan ben tan gro èn kon na fesi, sodati na ini na wan kondre go miti na trawan èn alasé foe grontapoe ben kon troe san tanapoe na ini Jesaja 60:22: „Na pikinwan srefi sa tron doesoen, èn na mofinawan wan makti naatsi. Misrefi Jehovah, sa meki a psa es’esi na en reti ten.”
25. San de wan kefarlek bewijsi foe kownoekondre-wánfasi?
25 Soema ben kan go prakseri taki na ini den moeilek dé foe na di foe Toe Grontapoe Feti di na a heri grontapoe joe no ben abi ete 100.000 kotoigi, dati na ini na bigin foe den jari ’80 moro leki 70.000 kotoigi ben sa wroko na ini wánfasi na ini na kondre Canada èn na srefi nomroe dati na ini Fransikondre èn 80.000 na ini Japan, 90.000 na ini Engeland èn moro leki 100.000 na ini Italië, ini na Bondsrepubliek Doisrikondre èn ini Nigeria, moro leki 130.000 ini Mexico èn moro leki 140.000 ini Brasion, èn ooktoe 250.000 loyaal kotoigi ini kondre pe lanti tapoe na wroko foe oenoe krinkrin ofoe afoe? Èn den Verenigde Staten foe Amerkankondre no so langa pasa kaba ben seni rapport foe 643.170 faja kotoigi di e wrko fajafaja. A de wan séker sani taki Jehovah ben hori ensrefi na en pramisi dati a ben sa meki en pipel tron wan „makti naatsi”. Foe troe wan kefarlek bewijsi taki Kownoekondre-wánfasi de wan troetroe sani!
San joe ben sa piki?
◻ Sortoe pratifasi wan sma e si na ini dri prenspari pisi foe Satan grontapoe-organisaatsi?
◻ Pe troetroe wanfasi de pasa marki, èn foe san-ede?
◻ Fa Ezechiël 37:1-14 ben kon troe?
◻ Kownoekondre-wanfasi ben meki sortoe kotoigiwroko doe kon?
[Prenki na tapoe bladzijde 2]
Na pratifasi di de wan ibridé sani ini a di foe 20 jarhondro politik, bigi bisnis nanga fasi foe bribi de a sani di e waka a fesi foe na kroetoe foe Gado
[Prenki na tapoe bladzijde 4]
Na dren foe Ezechiël foe den „dré bonjo” e agersi na kon boen baka foe Gado pipel na ini na go na fesi na jeje fasi