„Tai Wan Denki fu Saka-atifasi Leki wan Banti Lontu Un Mindribere”
„Gado e kakafutu gi den heimemrewan, ma a e gi no-frudini bun-ati na den sakafasiwan.”—1 PETRUS 5:5.
1, 2. Sortu tu fasi fu denki di de kontrari fu makandra abi furu krakti na tapu a fasi fa sma e tyari densrefi?
TU FU den fasi fu denki di Gado Wortu e poti wi prakseri na tapu, na tu di de kontrari makandra. Den ala tu abi furu krakti na tapu a fasi fa sma e tyari densrefi. Wan den e kari „wan denki fu saka-atifasi” (1 Petrus 5:5). Wan wortubuku e taki dati „saka-atifasi” na „te wan sma e handri noso e denki na wan sakafasi: sondro fu abi wan asranti sortu bigifasi”. Wan denki fu saka-atifasi de a srefi leki sakafasi, èn na ini Gado ai a de wan kefalek moi eigifasi.
2 Kontrari fu en, bigifasi de. Disi na „a wisiwasi di wan sma e wisiwasi wan trawan”, a abi di wan sma abi „tumusi fruberde”. Na wan eigifasi di e poti prakseri na a sma wawan, èn a e suku wini na materia sei, noso wini di e sori taki a e prakseri ensrefi wawan, èn a e suku tra wini awansi sortu takru bakapisi a abi gi tra sma. Bijbel e kari wan fu den bakapisi: „Libisma tiri a tra libisma nanga ogri bakapisi gi en.” A e taki dati „a strei di wan sma e strei nanga wan trawan” na a srefi leki „a strei di wan sma e strei fu kisi a winti”, bika te wan sma dede dan „a no man tyari no wan sani gowe kwetikweti”. Na ini Gado ai a sortu bigifasi disi na wan sani di a no lobi srefisrefi.—Preikiman 4:4; 5:15; 8:9.
A Fasi fu Denki Di De na Heri Grontapu
3. San na a fasi fu denki di de na heri grontapu?
3 Sortuwan fu den tu fasi fu denki disi e sori fa grontapu de na ini a ten disi? San na a fasi fu denki di de na heri grontapu? World Military and Social Expenditures 1996 e taki: „No wan tra yarihondro di wi sabi de a srefi leki a di fu 20 yarihondro, . . . te a abi fu du nanga a tumusi takru fasi fa sma e du ogri nanga tranga.” A strei di sma e strei fu kisi politiek nanga ekonomia makti — so srefi a feti di kondre, relisi, lo, nanga ras e feti nanga makandra — kiri moro leki 100 milyun sma na ini a yarihondro disi. A de a denki di sma e denki ’densrefi fosi’ fu di den e suku den eigi bun nomo, kon moro furu tu. A Chicago Tribune ben taki: „Den siki fu a libimakandra na so srefi a du di den e du ogri nanga tranga sondro fu prakseri, a meshandri di sma e meshandri pikin, brokotrow, a drungu di sma e drungu, AIDS, a kiri di tini e kiri densrefi, drugs, ogriman di e wroko na ini wan grupu na strati, a dwengi di sma e dwengi trawan fu abi seks, pikin di gebore na papa nanga mama di no trow, a puru di sma e puru bere, sani di abi fu du nanga seks, . . . lei, fufuru, politiek krukafasi . . . Sma no e si bun nanga ogri leki moreel markitiki moro.” Fu dati ede na UN Chronicle ben warskow: „Den libimakandra e broko na pisipisi.”
4, 5. Fa Bijbel profeititori gi a ten fu wi e taki soifri fa a grontapu e denki?
4 Den situwâsi disi de na heri grontapu. A de leki fa Bijbel profeititori ben taki na fesi gi a ten fu wi: „Ini den lasti dei muilek ten sa kon, di tranga fu pasa. Bika sma sa lobi densrefi nomo, den sa lobi moni, den sa de asranti, den sa abi heimemre, den sa afrontu Gado, den sa trangayesi papa nanga mama, den sa de sondro tangi, den no sa de loyaal, den no sa abi natuurlijk firi fu lobi, den no sa de klariklari fu meki kruderi, den sa de ogri-ati leiman, den no sa man dwengi densrefi, den sa abi wan krasi fasi fu du sani, den no sa lobi bun sani, den sa de toriman, den sa tranga-ede, den sa abi bigimemre.”—2 Timoteus 3:1-4.
5 Dati na wan soifri fasi fu taki fu a fasi fu denki di de na heri grontapu. A de a denki di sma e denki ’densrefi fosi’ fu di den e suku den eigi bun nomo. A strei di nâsi e strei nanga makandra na wan prenki fu a strei di sma e strei nanga makandra. Fu eksempre, na ini sport pe den e strei nanga makandra, furu sportman wani de nomru wán, awansi o furu disi e hati trawan na emotioneel sei noso srefi na skin sei. A yeye disi fu a prakseri di sma e prakseri densrefi wawan, e bigin kaba na ini pikin-nengre èn a e go doro na ini furu kontren fu den libi leki bigisma. A bakapisi na „feantifasi, trobi, dyarusu, faya atibron, kesekese, pratifasi”.—Galasiasma 5:19-21.
6. Suma e meki sma e prakseri densrefi wawan, èn san Yehovah e prakseri fu a denki disi?
6 Bijbel e sori taki a fasi disi fu a prakseri di sma fu a grontapu disi e prakseri densrefi wawan, e sori a denki fu „a wan di den e kari Didibri nanga Satan, di e kori heri grontapu pe sma e libi”. Fu a krakti di Satan abi na tapu den sma di e libi na ini den tumusi muilek lasti dei disi, Bijbel e taki na fesi: „Helu fu grontapu . . . bika Didibri saka kon na unu, èn a abi bigi atibron, fu di a sabi taki a abi wan syatu pisi ten nomo” (Openbaring 12:9-12). So bun, en nanga den ogri yeye di e wroko makandra nanga en fu du moro muiti fu meki a libisma famiri prakseri ensrefi wawan. Èn fa Yehovah e prakseri fu so wan denki? En Wortu e taki: „Ibriwan sma di abi wan bigimemre ati, na wan tegu sani gi Yehovah.”—Odo 16:5.
Yehovah De Nanga Den Wan Di Abi Saka-atifasi
7. Fa Yehovah e si den sma di abi wan saka-atifasi, èn san a e leri den?
7 Na a tra sei, Yehovah e blesi den wan di abi wan denki fu saka-atifasi. Na ini wan singi gi Yehovah, Kownu David ben taki: „Yu sa frulusu den sma di abi sakafasi; ma den ai fu yu de teige den sma di abi heimemre, so taki yu kan lagi den” (2 Samuèl 22:1, 28). Fu dati ede a Wortu fu Gado e gi a rai: „Suku Yehovah, ala un safri-atisma fu grontapu . . . Suku regtfardikifasi, suku safri-atifasi. Kande unu sa kisi kibri tapu a dei fu Yehovah en atibron” (Sefanya 2:3). Den wan di e suku Yehovah na wan sakafasi e kisi leri fu en fu kisi wan heri tra denki leki di fu a grontapu disi. „A sa leri den safri-atisma a pasi fu en” (Psalm 25:9; Yesaya 54:13). A pasi dati na a pasi fu lobi. A abi gron tapu a du di sma musu du san bun akruderi den markitiki fu Gado. Soleki fa Bijbel e sori, a lobi disi di abi gron tapu gronprakseri „no e dyaf, a no abi bigifasi, . . . no e suku en eigi belang” (1 Korentesma 13:1-8). A de fu si tu te wan sma abi wan denki fu saka-atifasi.
8, 9. (a) Pe a lobi di abi gron tapu gronprakseri bigin? (b) O prenspari a de fu waka na baka a lobi nanga a sakafasi di Yesus ben sori?
8 Paulus nanga tra Kresten fu a fosi yarihondro ben leri a lobi disi fu den sani di Yesus ben leri den. Èn Yesus ben leri disi fu en Tata, Yehovah, di Bijbel e taki fu En: „Gado na lobi” (1 Yohanes 4:8). Yesus ben sabi taki Gado ben wani taki a ben musu libi akruderi a wet fu lobi, èn a ben du dati tu (Yohanes 6:38). Na fu dati ede a ben abi sari-ati gi den sma di ben kisi kwinsi, den pôtiwan, den sondari (Mateus 9:36). A ben taigi den: „Kon na mi, un alamala di e wroko tranga èn di abi hebi lai, èn mi sa gi unu kowru-ati. Teki mi tyatyari na un tapu èn leri fu mi, bika mi abi safrifasi èn sakafasi fu ati.”—Mateus 11:28, 29.
9 Yesus ben sori den disipel fu en o prenspari a de fu waka na baka a lobi nanga a sakafasi fu en, di a ben taigi den: „Nanga disi ala sma sa sabi taki unu na mi disipel, efu unu abi lobi na un mindri” (Yohanes 13:35). Den ben o sori fu de sma di de tra fasi leki a grontapu disi di e poti prakseri na densrefi wawan. Na fu dati ede Yesus ben kan taki fu den bakaman fu en: „Den no de wan pisi fu grontapu” (Yohanes 17:14). Nôno, den no e waka na baka a denki fu Satan en grontapu di abi bigifasi èn e prakseri ensrefi wawan. Na presi fu dati, den e waka na baka a lobi èn a sakafasi di Yesus ben sori.
10. San Yehovah e du nanga den sma di abi wan saka-atifasi na ini a ten fu wi?
10 A Wortu fu Gado ben taki na fesi taki na ini den lasti dei disi, sakafasiwan ben o tyari kon na makandra na ini wan libimakandra na heri grontapu di abi lobi nanga sakafasi leki fondamenti. So bun, na ini wan grontapu di abi bigifasi moro nanga moro, a pipel fu Yehovah e sori wan heri tra denki leki di fu grontapu — wan denki fu saka-atifasi. Den sma disi e taki: „Meki wi opo go na a bergi fu Yehovah [en hei tru anbegi], . . . èn a sa leri wi fu den pasi fu en, èn wi sa waka na tapu den futupasi fu en” (Yesaya 2:2, 3). Yehovah Kotoigi de na ini a libimakandra disi di de na heri grontapu èn di e waka na tapu den futupasi fu Gado. Den de so srefi wan „bigi ipi” di e bigi moro nanga moro èn „di no wan sma man teri, di komoto na ala nâsi nanga lo nanga pipel nanga tongo” (Openbaring 7:9). A bigi ipi disi abi milyunmilyun sma now. Fa Yehovah e leri den fu abi sakafasi?
Leri fu Abi wan Denki fu Saka-atifasi
11, 12. Fa den futuboi fu Gado e sori taki den abi wan denki fu saka-atifasi?
11 A yeye fu Gado di e wroko na tapu en pipel di wani dati, e yepi den fu leri fa fu feti nanga a takru denki fu grontapu èn dan fu sori a froktu fu Gado en yeye. Disi de fu si na ini „lobi, prisiri, vrede, langa pasensi, switifasi, bun-ati, bribi, safri-atifasi, a dwengi di wan sma e dwengi ensrefi” (Galasiasma 5:22, 23). Fu yepi den futuboi fu Gado fu kweki den sortu eigifasi disi, den e kisi a rai fu no tron „sma di e prakseri densrefi nomo, fu di [den] e wiki strei nanga makandra èn e dyarusu tapu makandra” (Galasiasma 5:26). Na a srefi fasi na apostel Paulus ben taki: „Mi e taigi ibriwan sma drape na un mindri, fu no denki fu ensrefi moro leki a de fanowdu, ma fu denki nanga wan krin gosontu frustan.”—Romesma 12:3.
12 A Wortu fu Gado e taigi tru Kresten fu no du „noti fu di unu lobi fu meki trobi noso prakseri unsrefi nomo, ma nanga wan denki fu saka-atifasi, fu di unu e si den tra sma [den futuboi fu Gado] moro hei leki unsrefi, e hori ai, no soso fu persoonlijk belangstelling ede na tapu un eigi afersi, ma so srefi fu persoonlijk belangstelling ede na tapu di fu den trawan” (Filipisma 2:3, 4). „Meki ibri sma no tan suku en eigi bun, ma di fu a tra sma” (1 Korentesma 10:24). Iya, „lobi e bow” tra sma nanga den sani di wi e taki èn e du sondro fu prakseri wisrefi wawan (1 Korentesma 8:1). A e meki sma wroko nanga makandra, no fu strei nanga makandra. Na den futuboi fu Yehovah, presi no de gi a denki di sma e denki ’densrefi fosi’.
13. Fu san ede wi musu leri a denki fu saka-atifasi, èn fa wan sma kan leri disi?
13 Ma fu di wi gebore nanga onvolmaaktifasi, meki wi no gebore nanga wan denki fu saka-atifasi. (Psalm 51:5). Wi musu leri na eigifasi disi. Èn disi kan muilek gi den wan di fu sensi den pikin-nengreten no ben leri den pasi fu Yehovah, ma di e leri den te den kon moro owru. Den kisi eigifasi kaba di gersi a denki fu na owru grontapu disi. Fu dati ede den musu leri fu „puru na owru fasi fa wan sma de, di de akruderi a waka nanga libi di [den] ben abi fosi èn di e pori akruderi den bedrigi lostu fu en, èn [den] musu weri a nyun fasi fa wan sma de, di ben kria akruderi a wani fu Gado na ini trutru regtfardikifasi nanga loyaalfasi” (Efeisesma 4:22, 24). Nanga a yepi fu Gado den opregtiwan kan du san a e aksi fu den: „Weri gi unsrefi den safu firi fu lobi fu sari-ati, bun-ati, denki fu saka-atifasi, safri-atifasi nanga langa pasensi.”—Kolosesma 3:12.
14. Fa Yesus ben taki teige a hei di sma wani hei densrefi?
14 Den disipel fu Yesus ben musu leri dati. Den ben de bigisma di den ben tron disipel fu en èn den ben abi pikinso fu a denki fu grontapu di lobi strei. Di a mama fu tu fu den disipel ben suku bigi nen gi den manpikin fu en, Yesus ben taki: „Den tiriman fu den nâsi e basi den [a pipel] èn den bigiman abi makti na den tapu. A no de so nanga unu; ma a sma na un mindri di wani kon bigi, musu de un dinari, èn a sma na un mindri di wani de a fosiwan, musu de un srafu. Neleki fa a Manpikin fu libisma [Yesus] no ben kon fu sma dini en, ma fu dini sma èn fu gi en sili leki wan lusu-paiman ini a presi fu furu sma” (Mateus 20:20-28). Di Yesus ben taigi den disipel fu en fu no gebroiki titel fu pruberi fu hei densrefi, dan a ben taki tu: „Un alamala na brada.”—Mateus 23:8.
15. Sortu denki den wan di e suku a wroko fu wan opziener musu abi?
15 Wan tru bakaman fu Yesus na wan futuboi, iya, wan srafu gi kompekresten (Galasiasma 5:13). Disi de spesrutu so nanga den wan di wani doro den markitiki fu teki fesi na ini a gemeente. Noiti den musu strei fu kisi bigi nen noso fu kisi makti; den no musu ’basi den wan di de a gudu fu Gado, ma den musu tron eksempre gi den’ (1 Petrus 5:3). Iya, wan man di e prakseri ensrefi wawan e sori taki a no fiti fu teki fesi. So wan sma ben sa du a gemeente ogri. Fu tru, a bun fu „suku fu kisi wan wroko leki opziener”, ma disi musu kon fu na angri di a sma abi fu dini tra Kresten. A wroko disi a no wan posisi fu kon pôpi noso fu kisi makti, bika den wan di e teki fesi musu de den wan di abi wan denki fu saka-atifasi, moro ala tra sma na ini a gemeente.—1 Timoteus 3:1, 6.
16. Fu san ede den ben krutu Diotrefes na ini a Wortu fu Gado?
16 Na apostel Yohanes e poti wi prakseri na wan sma di ben abi a fowtu denki, taki: „Mi ben skrifi wan sani gi a gemeente, ma Diotrefes di lobi fu teki a fosi presi na den mindri, no e kisi noti fu wi nanga lespeki.” A man disi no ben handri trawan na wan lespeki fasi èn a ben pruberi fu bigi en eigi posisi. Na presi fu dati, a yeye fu Gado ben buweigi Yohanes fu poti na ini Bijbel a krutu di Diotrefes ben kisi bika a ben denki ensrefi fosi.—3 Yohanes 9, 10.
A Yoisti Denki
17. Fa Petrus, Paulus, nanga Barnabas ben sori wan denki fu saka-atifasi?
17 Furu Bijbel eksempre de fu a yoisti denki, wan denki fu saka-atifasi. Di Petrus ben go na ini na oso fu Kornelius, dan a man dati „ben fadon na en [Petrus] futu èn ben anbegi en”. Ma na presi taki Petrus ben teki a grani dati, „Petrus ben opo en, èn ben e taki: ’Opo; Mi srefi na wan libisma tu’” (Tori fu den Apostel 10:25, 26). Di Paulus nanga Barnabas ben de na ini Listra, dan Paulus ben dresi wan man di ben lan sensi di a gebore. Fu dati ede den ipi-ipi sma ben taki dati den apostel disi ben de gado. Ma Paulus nanga Barnabas „ben priti den tapusei krosi fu den èn ben dyompo go mindri den sma, èn den ben e bari taki: ’Un man, fu san ede unu e du den sani disi? Wi na libisma tu di abi den srefi swakifasi di unu abi’” (Tori fu den Apostel 14:8-15). Den Kresten disi di ben abi sakafasi no ben wani meki libisma gi den glori.
18. San wan makti engel ben taigi Yohanes fu di na engel ben abi sakafasi?
18 Di na apostel Yohanes ben kisi „wan openbaring fu Yesus Krestes”, dan a ben kisi en nanga yepi fu wan engel (Openbaring 1:1). Fu di wan engel abi makti, meki wi kan frustan fu san ede Yohanes ben fruwondru, bika wán engel ben kiri 185.000 Asiriasma na ini wán neti (2 Kownu 19:35). Yohanes e fruteri: „Di mi ben yere èn ben si, dan mi ben fadon na gron fu anbegi na fesi den futu fu na engel di ben sori mi den sani disi. Ma a e taigi mi: ’¡Luku bun! ¡No du dati! Mi na soso wan kompesrafu fu yu èn fu den brada fu yu . . . Anbegi Gado’” (Openbaring 22:8, 9). ¡A makti engel disi trutru ben sori fu abi wan denki fu saka-atifasi!
19, 20. Poti a heimemre fu den legre-edeman fu Rome di ben e wini feti kontrari a denki fu saka-atifasi di Yesus ben abi.
19 Yesus ben de a moro bun eksempre fu wan sma di ben abi wan denki fu saka-atifasi. A ben de a wan-enkri gebore Manpikin fu Gado, a sma di ben o tron Kownu fu Gado en hemel Kownukondre. Di a ben sori den sma taki na en ben o tron Kownu, dan a no ben du leki den legre-edeman di ben wini feti na ini a ten fu den Romesma. Den ben kisi bigi prodowaka — sma ben waka na ini bigibigi grupu — èn den ben rèi asiwagi di ben moi nanga gowtu nanga ivoor, di weti asi ben e hari, noso srefi asaw, lew, noso tigri. Na ini den bigibigi grupu di ben e waka, pokuman ben de di ben e singi winisingi, makandra nanga wagi di ben lai nanga sani di den ben wini na ini a feti èn bigi wagi di ben e prenki den feti di den ben feti. Yu ben abi so srefi kownu, kownupikin, nanga den legre-edeman, nanga den famiri fu den di den ben kisi hori, èn nofotron den ben puru ala krosi na den skin fu gi den syen. Den okasi disi ben du soso fu di den ben abi bigifasi nanga heimemre.
20 Poti dati kontrari a fasi fa Yesus ben sori ensrefi. A ben de klariklari fu meki a profeititori di ben abi fu du nanga en kon tru na wan sakafasi, di ben taki na fesi: „¡Luku! A kownu fu yu srefi e kon na yu. A de regtfardiki, iya, a kisi frulusu; a abi sakafasi èn a e rèi na tapu wan buriki.” Na wan sakafasi a ben rèi na tapu wan meti di e tyari lai, no na tapu wan asiwagi di kefalek sortu meti ben hari (Sakaria 9:9; Mateus 21:4, 5). ¡Den sma di abi sakafasi breiti srefisrefi taki Yesus sa de a Kownu di Yehovah poti fu tiri a heri nyun grontapu, wan kownu di trutru abi wan denki fu saka-atifasi, di abi sakafasi, di abi lobi, èn di abi sari-atifasi!—Yesaya 9:6, 7; Filipisma 2:5-8.
21. San wan denki fu saka-atifasi no e sori?
21 Taki Yesus, Petrus, Paulus, nanga tra bribi man nanga bribi uma fu Bijbel ten ben abi wan denki fu saka-atifasi, e puru a prakseri taki sakafasi na wan swakifasi. Na presi fu dati, sakafasi e sori taki wan sma abi tranga eigifasi, bika den man disi ben abi deki-ati èn den ben de fayafaya. Nanga a krakti di den ben abi na frustan sei èn na moreel sei, den ben horidoro na ondro hebi tesi (Hebrewsma, kapitel 11). Èn na ini a ten disi te den futuboi fu Yehovah abi wan denki fu saka-atifasi, dan den abi a srefi krakti bika Gado e horibaka gi den sma di abi wan denki fu saka-atifasi, nanga en makti santa yeye. Fu dati ede wi e kisi a tranga: „Unu alamala tai wan denki fu saka-atifasi leki wan banti lontu un mindribere, gi makandra, bika Gado e kakafutu gi den heimemrewan, ma a e gi no-frudini bun-ati na den sakafasiwan. Saka unsrefi fu dati ede na ondro a makti anu fu Gado, so taki a kan hei unu te a ten doro.”—1 Petrus 5:5, 6; 2 Korentesma 4:7.
22. Fu san wi sa taki na ini na artikel di e kon?
22 Wan tra bun penti de di abi fu du nanga wan denki fu saka-atifasi di den futuboi fu Gado musu abi. A de wan di e yepi furu fu tranga a yeye fu lobi na ini a gemeente èn a wroko di wi musu wroko nanga makandra. Iya, a de wan tumusi prenspari pisi fu wan denki fu saka-atifasi. Wi sa taki fu disi na ini na artikel di e kon.
Fu Luku Sani Syatu Baka
◻ Taki wan sani fu a fasi fa heri grontapu disi e denki.
◻ Fa Yehovah e denki fu den wan di abi wan denki fu saka-atifasi?
◻ Fu san ede wi musu leri fu abi wan denki fu saka-atifasi?
◻ San na wan tu Bijbel eksempre fu sma di ben sori wan denki fu saka-ati fasi?
[Prenki na tapu bladzijde 15]
Na engel ben taigi Yohanes: „¡No du dati! Mi na soso wan kompesrafu fu yu”