¿Yu Kan Go Dini na ini wan Tra Kondre?
„MI BEN dren ala ten fu go du zendingwroko. Di mi no ben trow ete, dan mi ben dini na Texas, Amerkankondre, pe furu preikiman ben de fanowdu. Mi wefi ben kon drape tu baka di wi ben trow. Di na umapikin fu wi gebore, dan mi ben prakseri: ’We, now mi no man du zendingwroko moro.’ Ma Yehovah e meki dren kon tru, spesrutu efu den abi fu du nanga a wani fu en.”—Jesse, di e dini na Ekwador now nanga en wefi èn den dri pikin fu den.
„Noiti mi ben prakseri taki mi ben kan du so wan sani sondro fu go na a zendingskoro Gilead. Te mi ben si taki wan fu den Bijbel studenti fu mi e gi wan lezing noso e preiki, dan mi ati ben prisiri, èn mi ben taigi Yehovah tangi taki a gi mi na okasi disi.”—Karen, wan uma di no trow èn di ben pionier aiti yari langa na Zuid-Amerika.
„Baka di mi ben du a furuten preikiwroko 13 yari kaba na Amerkankondre, mi nanga mi wefi ben abi a firi taki wi ben musu du wan nyun sortu wroko. Wi de moro koloku leki fosi; a de trutru wan kefalek moi fasi fu libi.”—Tom, di e pionier nanga en wefi Linda na ini a kontren fu na Amazone.
Den wortu disi fu sori a warderi, e kon fu sma di fu a situwâsi fu den ede no ben man go na a Waktitoren Bijbelskoro Gilead. Ma toku den ondrofeni a prisiri nanga den tyalensi fu dini na ini wan tra kondre. Fa disi ben du kon? ¿A wroko disi na wan sani gi yu?
A Yoisti Ati De Fanowdu
Efu yu wani abi bun bakapisi na ini wan tra kondre, dan moro de fanowdu leki soso na angri fu ondrofeni span sani. Den sma di horidoro, du dati nanga a yoisti ati. Neleki na apostel Paulus, na so den e si densrefi leki sma di abi wan paiman, no soso na Gado, ma na libisma tu (Romesma 1:14). Den ben kan gi yesi na a komando fu Gado fu go preiki te den ben du a diniwroko na a presi pe den komoto (Mateus 24:14). Ma den ben abi a firi taki den ben abi wan paiman èn den ben firi fruplekti fu du moro fu kan yepi den sma di no e kisi furu okasi fu yere a bun nyunsu.
Na angri fu wroko na ini kontren pe den kan abi moro bun bakapisi na ete wan reide — èn dati bun. Suma fu wi di e si taki wan tra fisiman e kisi furu fisi, no ben o go moro krosibei na a presi pe a fisiman de? Na so den nyunsu di e gi wi deki-ati èn di e taki fu a gro na ini tra kondre, ben gi furu sma deki-ati fu go pe „wan heri ipi fisi” de.—Lukas 5:4-10.
Teri den Kostu
Furu kondre no wani meki friwani relisiwrokoman fu wan tra kondre e du grontapu wroko. Dati meki a de moro furu so taki den sma di wani go dini na ini wan tra kondre musu man sorgu gi densrefi na moni sei. Fa trawan ben du nanga na ekonomia problema disi? Wan tu fu den seri noso yuru na oso fu den fu kan abi a moni di den abi fanowdu. Trawan seri a bisnis fu den. Son sma ben poti moni na wan sei fu doro a marki fu den. Èn trawan e dini wán noso tu yari na wan tra kondre, dan den e go na a kondre fu den baka fu wroko èn fu meki moni, èn baka dati den e go na a tra kondre baka fu go dini.
Wan wini di yu e kisi seiker te yu de na wan pôti kondre de taki yu no abi someni moni fanowdu fu tan na libi leki fa a de na ini wan kondre di no pôti so. Disi meki taki wan tu sma ben man libi na wan bun fasi nanga wan pikin pensyun. A no de fu taki dati den kostu fu wan sma sa anga furu fu a fasi fa a wani libi. Srefi na ini den pôti kondre, yu kan feni moimoi tanpresi, ma den diri srefisrefi.
A de krin taki yu musu teri den kostu bifo yu e froisi. Ma moro de fanowdu leki soso fu teri den kostu na moni sei. Kande den sani di wan tu sma taki èn di e dini na Zuid-Amerika kan leri yu furu.
A Moro Bigi Tyalensi
„Mi ben abi furu muiti fu leri Spanyoro”, Markku fu Finland e memre. „Mi ben prakseri taki fu di mi no ben sabi a tongo, dan a ben o teki wan pisi ten fosi mi kan dini leki wan dinari ini a diniwroko. ¡A ben fruwondru mi trutru di den ben aksi mi fu hori wan bukustudie baka soso tu mun! A no de fu taki, dati furu tron mi ben syen. Mi ben abi problema spesrutu nanga den nen. Wan dei mi ben kari Brada Sancho ’Brada Chancho (agu),’ èn noiti mi sa frigiti taki mi ben kari Sisa Salamea, ‘Malasea (godelowsuwan).’ Ma koloku taki den brada nanga sisa ben abi furu pasensi.” Te fu kaba, Markku ben dini aiti yari na ini a kondre dati leki wan kringopziener makandra nanga en wefi, Celine.
Chris, a wefi fu Jesse di wi ben kari kaba, e fruteri: „Mi e memre a fosi leisi di wi ben kisi a kringopziener, baka di wi ben dya dri mun nomo. Mi ben man si taki a brada ben gebroiki agersitori èn taki a ben taki wan moi sani fu pruberi fu doro wi ati, ma mi no ben man frustan en. Leti drape na ini a zaal mi ben bari krei. A no soso watra ben komoto na mi ai; mi ben krei bun tranga. Baka a konmakandra, mi ben pruberi fu tyari kon na krin gi a kringopziener fu san ede mi ben du so. A ben abi furu switifasi èn a ben taigi mi san ala tra sma ben tan taigi mi: ’Ten paciencia, hermana’ (’Abi pasensi, sisa’). Tu noso dri yari baka dati, wi ben miti makandra baka èn wi ben taki 45 miniti langa, breiti taki wi ben kan taki nanga makandra.”
„A de prenspari fu studeri”, na so wan tra brada e taki. „O moro muiti wi e du fu studeri a tongo, o moro betre wi man taki nanga sma.”
Ala sma e agri taki a muiti dati e gi furu wini. Wan sma e kisi sakafasi, pasensi, èn a e horidoro te a e pruberi fu leri wan nyun tongo. Furu okasi e opo fu preiki a bun nyunsu gi tra sma. Fu eksempre, te wan sma e leri Spanyoro, dan dati e meki taki a kan taki wan tongo di moro leki 400 milyun sma na heri grontapu e taki. Furu sma di ben musu go na a kondre fu den baka, man gebroiki a bekwaamfasi di den abi fu taki wan tra tongo fu yepi sma di abi Spanyoro leki mamatongo.
Fa A De Te wan Sma E Angri fu Go na En Kondre Baka?
„Di wi ben kon a fosi leisi na Ekwador na ini 1989,” na so Deborah e memre ete, di ben dini na ini na Amazone kontren makandra nanga en masra Gary, „dan mi ben angri trutru fu go na a kondre fu mi baka. Mi ben leri fu frutrow moro na tapu den brada nanga sisa fu a gemeente. Den ben kon de leki famiri gi mi.”
Karen, di wi ben kari na a bigin, e taki: „Mi ben man feti nanga na angri fu go na mi kondre baka, fu di mi e go na ini a diniwroko ibri dei. Na a fasi disi mi no ben prakseri oso so furu. Mi ben tan prakseri tu taki mi papa nanga mama, drape na mi kondre, breiti trutru taki mi e wroko na ini wan tra kondre. Mâ ben gi mi deki-ati ala ten nanga den wortu: ’Yehovah kan sorgu moro bun gi yu leki fa mi kan du dati.’”
Na wan fasi di e gi fu lafu, Makiko fu Yapan e taki tu: „Baka te mi wroko heri dei na ini a velddienst, dan mi weri trutru. Dati meki te mi doro oso èn mi e bigin angri fu go na mi kondre baka, dan nofotron mi e fadon na sribi. Dati meki a firi no e tan langa.”
Fa A De Nanga Pikin?
Te yu abi pikin, dan yu musu prakseri bun fu den sani di den abi fanowdu, soleki a leri di den musu kisi. Fu kan du disi, dan son sma bosroiti fu gi den pikin fu den leri na oso, ala di trawan ben meki den pikin fu den go na skoro na a presi pe den e tan.
Al ben froisi go na Zuid-Amerika nanga en wefi, en tu pikin, nanga en mama. A e taki: „Wi ben kon si taki fu di wi seni den pikin go na skoro, dan dati ben yepi den fu leri a tongo esi-esi. Baka dri mun den ben taki a tongo grati.” Na a tra sei, yu abi den tu tini boi fu Mike nanga Carrie di e studeri nanga yepi fu wan bun leriprograma di den e kisi nanga yepi fu post. A papa nanga a mama fu den e taki: „Wi ben kon si taki den pikin fu wi no ben kan du a studie dati den wawan. Wi ben musu teki prati na a leriprograma èn sorgu taki den boi ben tan skinskin nanga a skorowroko di den ben musu du.”
David nanga Janita fu Australia e taki san den e denki fu den tu boi fu den. „Wi ben wani taki den boi fu wi ben musu si nanga den eigi ai fa tra sma e libi. A makriki fu denki taki a fasi fu libi di wi ben gwenti, na a fasi fa sma musu libi, ma te yu luku en bun dan a no furu sma e libi so. Den si tu fa theokrasia gronprakseri e wroko na heri grontapu, awansi sortu kondre noso kulturu a de.”
„Mi ben abi soso fo yari di na osofamiri fu wi ben froisi gowe fu Ingrisikondre na ini 1969”, na so Ken e memre. „Ala di mi ben sari taki wi no ben libi na ini wan kampu di meki fu tokotoko èn di abi wan daki fu grasi, soleki fa mi ben prakseri, toku mi denki taki mi ben kweki na a moro switi fasi fa sma kan kweki wan yongu pikin. ¡Ala ten mi ben sari den tra pikin di no ben kisi a srefi okasi dati! Fu di wi ben abi furu demakandra nanga zendeling èn nanga spesrutu pionier, meki mi ben bigin nanga a yepi-pionierwroko di mi ben abi neigi yari.” Now Ken na wan opziener di e reis.
„Ekwador na wi oso now trutru”, na so Gabriella, na umapikin fu Jesse, e taki. „Mi breiti srefisrefi taki a papa nanga mama fu mi ben teki a bosroiti fu kon dya.”
Na a tra sei, yu ben abi pikin di no ben man gwenti, fu difrenti reide ede, èn na osofamiri fu den ben abi fu go na a kondre fu den baka. Dati meki a bun fu go luku a tra kondre, fosi yu e froisi. Na a fasi dati yu kan teki bosroiti baka te yusrefi go luku.
Den Blesi Di Yu E Kisi te Yu E Froisi Go na wan Tra Kondre
Iya, fu froisi go na wan tra kondre wani taki furu tyalensi nanga sani di yu musu libi na baka. ¿Den sma di ben froisi go na wan tra kondre, ben feni taki a ben bun fu du dati? Meki den fruteri wi.
Jesse: „Na ini den tin yari di wi de na ini a foto Ambato, wi si taki a nomru fu 2 gemeente ben kren kon tron 11 gemeente. Wi ben abi a grani fu yepi fu opo feifi fu den gemeente dati, èn wi yepi bow tu Kownukondre zaal. Wi ben prisiri tu fu yepi wan sani fu tu Bijbel studenti ibri yari fu doro den markitiki fu teki dopu. Wán sani nomo mi e sari — taki mi no ben kon dya tin yari na fesi.”
Linda: „A warderi di den sma abi gi a bun nyunsu èn gi a muiti di wi e du, e gi wi furu deki-ati. Fu eksempre, na ini wan pikin foto na busi, wan Bijbel studenti di nen Alfonso ben kon frustan o bun a ben o de efu publiki taki ben o hori na ini a kontren fu en. A no ben froisi langa ete na ini na udu oso fu en di a ben bow paspas, wan fu den oso di yu no ben feni furu na ini a dorpu. A ben kon si taki na oso fu en ben de a wan-enkri oso na ini a foto di ben warti gi Yehovah, èn dati meki a ben froisi go baka na ini a kampu fu en di ben meki fu grasi èn a ben gi den brada na oso fu en fu gebroiki dati leki wan Kownukondre zaal.”
Jim: „A ten di wi e gebroiki trutru fu taki nanga sma na ini a diniwroko na tin tron moro a ten di wi ben gebroiki na Amerkankondre. Boiti dati, den sma dya e libi na wan moro relaks fasi. Sondro tweifri wi abi moro ten fu studeri èn fu go ini a velddienst.”
Sandra: „Te mi e si fa a waarheid fu Bijbel kan kenki sma so taki den e kon moro betre sma, dan dati e gi mi furu prisiri. Wan leisi mi ben studeri Bijbel nanga Amada, wan uma fu 69 yari di ben abi wan pikin wenkri. Fosi, a ben gwenti poti 20 procent watra gi ibri liter merki. Boiti dati a ben bedrigi den sma di ben kon bai sani na en fu di a ben seri moro mendri fu a watramerki disi gi den leki san den ben musu kisi. Ma baka di Amada ben studeri den tori ondro na ondro-edeprakseri ’Eerlijkfasi e tjari kolokoe kon’ na ini kapitel 13 fu a buku Sabi di e tjari joe go na têgo libi, dan a no ben du den ogri disi moro. ¡A ben de trutru wan prisiri fu si taki a ben teki dopu wan pisi ten baka dati!”
Karen: „Noiti na fesi mi ben abi Yehovah someni fanowdu noso noiti na fesi a ben gebroiki mi someni leki fa a de dya. A matifasi di mi abi nanga Yehovah kon moro tranga.”
Fa A De Nanga Yu?
Na ini den yari di pasa, dusundusun Kotoigi froisi go na tra kondre fu go dini drape. Son wan e tan wán noso tu yari, trawan e tan moro langa. Den e tyari na ondrofeni fu den, a lepi di den lepi na yeye fasi èn a moni fu den, go nanga den fu di den abi na prakseri fu horibaka gi Kownukondre afersi na ini wan tra kondre. Den ben man dini na ini kontren pe den Kownukondre preikiman fu a presi drape no ben man dini fu di grontapu wroko no de fu feni makriki. Furu fu den ben bai four-wheel drive wagi fu wroko na ini kontren di yu no man doro tra fasi. Trawan di lobi fu libi na ini wan foto, yepi fu meki bigi gemeente di no abi furu owruman kon moro tranga. Ma trutru den alamala e taki dati den kisi moro furu blesi na yeye fasi, leki san den ben gi sma.
¿Yu kan teki prati tu na a grani fu dini na ini wan tra kondre? Efu a situwâsi fu yu no e tapu yu fu du disi, dan fu san ede yu no e luku efu yu kan du so wan sani? A fosi prenspari sani di yu ben sa kan du na fu skrifi go na a bijkantoro fu a Genootschap na ini a kondre pe yu denki taki yu wani dini. Den spesrutu tori di den seni kon gi yu, sa yepi yu fu luku efu yu sa man abi bun bakapisi. Boiti dati, yu kan feni furu bun rai na ini na artikel „Verlaat uw land en uw bloedverwanten” (Gowe Libi Yu Kondre Nanga Yu Famiri) na ini De Wachttoren fu 15 augustus 1988. Te yu e sreka sani bun èn Yehovah blesi yu, dan kande yusrefi kan ondrofeni a prisiri fu dini na ini wan tra kondre.
[Prenki na tapu bladzijde 24]
TOM NANGA LINDA NA TAPU WAN FARAWE PASI NA BUSI, FU GO NA A PRESI PE DEN SHUAR INGI E LIBI
[Prenki na tapu bladzijde 25]
FURU SMA E DINI NA INI QUITO, A MAMAFOTO FU EKWADOR
[Prenki na tapu bladzijde 25]
MAKIKO E PREIKI NA TAPU DEN ANDESBERGI
[Prenki na tapu bladzijde 26]
A FAMIRI HILBIG DINI NA INI EKWADOR FEIFI YARI KABA