Gado ben sabi taki Adam nanga Eva ben o sondu?

FURU sma trutru wani kon sabi a piki tapu na aksi disi. Te a abi fu du nanga a tori fu san ede Gado e gi pasi taki ogridu e pasa, dan nofo tron sma e denki fu a sondu fu a fosi man nanga uma na ini a dyari fu Eden. Fu di Gado sabi ala sani, meki a kan pasa makriki taki son sma e denki taki Gado ben musu fu sabi na fesi taki Adam nanga Eva no ben o gi yesi na en.

Efu Gado ben sabi na fesi taki den tu sma disi di ben bun dorodoro, ben o sondu, dan san disi ben o sori? So wan denki ben o sori taki Gado no abi bun fasi. A ben o gersi leki Gado no abi lobi, taki a no e du san reti, èn taki a e hoigri. Son sma ben kan feni taki a de wan ogri sani fu meki so wan sani pasa nanga den fosi libisma, aladi a ben sabi na fesi kaba taki sani no ben o waka bun. A kan gersi leki na Gado e meki ala ogri pasa èn sosrefi a pina di sma ondrofeni sensi ten. Son sma ben o feni srefi taki a Mekiman fu wi don.

Na so Bijbel e taki fu Yehovah Gado? Fu man gi piki tapu na aksi dati, meki wi ondrosuku san Bijbel e taki fu den sani di Yehovah meki èn fu den fasi fu en.

„Den ben de heri bun”

Te a abi fu du nanga den sani di Gado meki èn sosrefi den fosi libisma na grontapu, dan a tori na ini Genesis e taki: „Gado luku ala den sani di a meki, èn a si taki den ben de heri bun” (Genesis 1:31). Adam nanga Eva ben meki heri bun sondro fowtu, èn den ben meki fu libi na grontapu. Noti no ben mankeri na a fasi fa den ben meki. Fu di den meki „heri bun”, meki den ben man tyari densrefi na wan bun fasi, soleki fa Gado wani. Den ben meki „soleki fa Gado de” (Genesis 1:27). Sobun den ben man sori den fasi fu Gado, iya, den ben man sori taki den koni, taki den abi trutru lobi, taki den man du san reti èn san bun. Te den ben o sori den fasi disi, dan dati ben o yepi den fu teki bosroiti di ben o tyari wini kon gi den, èn di ben o plisi den hemel Tata.

Yehovah gi den tu sma disi di ben abi krin frustan èn di de sondro fowtu, a grani fu teki den eigi bosroiti. Sobun, den no ben meki leki wan sortu masyin di musu plisi Gado. Denki a tori disi. San yu ben o feni moro bun: Te wan sma gi yu wan kado fu di a musu, noso te a du dati nanga en heri ati? A de krin san yu ben o warderi moro. Na so a de tu taki efu Adam nanga Eva ben bosroiti nanga den heri ati fu gi yesi na Gado, dan Gado ben o warderi dati moro. Fu di den fosi libisma ben man teki den eigi bosroiti, meki den ben kan gi yesi na Yehovah fu di den lobi en.​—Deuteronomium 30:19, 20.

Yehovah e du san reti, a e krutu sani na wan reti fasi, èn a e du san bun

Bijbel e sori wi san na den fasi fu Yehovah. Fu di Gado abi den fasi disi meki a no man abi noti fu du nanga sondu. Psalm 33:5 e taki dati Yehovah „lobi retidu èn a e krutu sani na wan reti fasi”. Sobun, Yakobus 1:13 e taki: „Nowan sma kan tesi Gado nanga ogri sani, èn Gado srefi no e tesi sma tu.” Fu di Gado ben broko en ede nanga Adam èn a ben hori en na prakseri, meki a gi en a warskow disi: „Fu ala den bon na ini a dyari yu kan nyan teleki yu bere furu. Ma fu a bon di nen ’Sabi san bun èn san ogri’, yu no musu nyan, bika na a dei di yu o nyan fu en, na dede yu o dede” (Genesis 2:16, 17). A fosi trowpaar ben kan bosroiti fu libi fu têgo noso fu dede. Gado ben o hoigri efu a ben warskow den gi wan spesrutu sondu, aladi a ben sabi kaba sortu takru bakapisi den ben o abi, a no so? Yehovah di ’lobi retidu èn di e krutu sani na wan reti fasi’, no ben o taigi den san den ben kan bosroiti fu du efu den sani dati trutru no ben de.

Yehovah e du furu bun sani tu (Psalm 31:19). Di Yesus ben taki fu den bun sani di Gado du, dan a ben taki: „Suma fu unu sa gi en manpikin wan ston, te a e aksi en brede? Noso kande te a e aksi en wan fisi, dan a no sa gi en wan sneki, a no so? Fu dati ede, efu unu di abi takru fasi, sabi fa fu gi un pikin bun sani, dan a no abi misi taki un Tata di de na hemel sa gi bun sani na den sma di e aksi en!” (Mateyus 7:9-11) Gado e gi „bun sani” na ala den sani di a meki. A fasi fa libisma meki èn a fasi fa a Paradijs ben sreka gi den leki tanpresi, e sori taki Gado e du bun sani. So wan bun Gado di de a Moro Heiwan, no ben o du so wan ogri-ati sani fu meki wan moi tanpresi efu a ben sabi kaba taki a ben o lasi gowe, a no so? Nôno. A bun Mekiman fu wi di e du san reti, no de frantwortu gi a opo di libisma opo densrefi teige en.

Gado „abi ala koni”

Bijbel e sori tu taki Yehovah „abi ala koni” (Romesma 16:27). Den engel fu Gado na hemel si na den furu sani di Gado meki, taki a koni trutru. Den ben ’prèise Yehovah nanga wan tranga sten’ di a ben meki sani na grontapu (Yob 38:4-7). A no de fu taki dati den koni yeye disi, ben wani sabi fa sani ben o waka na ini a dyari fu Eden. Prakseri a sani disi: Wan koni Gado e meki kefalek sani na hemel èn tumusi moi sani na grontapu. A kan taki a ben o meki den yeye manpikin disi si fa a meki den tu aparti sma disi na grontapu, aladi a ben sabi kaba taki sani no ben o waka bun? A de krin taki a no ben o seti sani na fesi fu meki so wan rampu pasa.

Ma toku wan sma kan taki: ’Ma fa wan Gado di abi ala koni no ben man sabi disi?’ A tru taki fu di Yehovah abi bigi koni meki a man sabi na „a bigin san o pasa te fu kaba” (Yesaya 46:9, 10). Ma a no abi fu du dati, neleki fa a no abi fu gebroiki ala en krakti ala ten. Na wan koni fasi Yehovah e bosroiti o ten a wani sabi na fesi san o pasa. A e du dati te a de fanowdu èn te a fiti a situwâsi.

Gado man bosroiti efu a wani sabi na fesi san o pasa. Wi kan agersi a sani disi so: Wan sma di e luku wan futubal plèi di a ben teki tapu video cassette, kan bosroiti fu luku den lasti miniti fu a plèi fu kon sabi suma wini. Ma a no abi fu bigin na a fasi dati. Suma ben o krutu en efu a ben o bosroiti fu luku a heri plèi fu a bigin? Na so a te tu taki a Mekiman bosroiti fu no luku san ben o pasa te fu kaba. Na presi fu dati, a bosroiti fu wakti èn si fa den pikin fu en na grontapu ben o tyari densrefi.

Soleki fa wi ben si kaba, dan fu di Yehovah koni, a no meki den fosi libisma leki masyin fu du wán sani nomo. Na presi fu dati, na wan lobi-ati fasi a gi den a grani fu teki den eigi bosroiti. Efu den ben o du san reti, dan den ben kan sori taki den lobi en, den e warderi en, èn den e gi yesi na en. Na so fasi den ben o prisiri moro èn den ben meki na ati fu Yehovah, den hemel Tata, prisiri moro.​—Odo 27:11; Yesaya 48:18.

Bijbel e sori taki na difrenti okasi Gado bosroiti fu no sabi na fesi san ben o pasa. Fu eksempre, di Abraham wan futuboi fu Gado di tan gi yesi na en, ben de fu gi en manpikin leki wan ofrandi, dan Yehovah ben kan taki: „Now mi sabi taki yu na wan sma di e frede Gado, fu di yu ben de klariklari fu gi mi yu wan-enkri manpikin” (Genesis 22:12). Ma tra okasi ben de tu pe son sma no ben tyari densrefi bun, èn a sani disi ben „hati en”. A ben o firi so efu a ben sabi langa ten na fesi san den ben o du?​—Psalm 78:40, 41; 1 Kownu 11:9, 10.

Sobun, a fiti fu taki dati Gado di abi ala koni, bosroiti fu no sabi na fesi taki wi fosi papa nanga mama ben o sondu. Gado no don fu meki libisma, soso fu si fa fruferi sani miti den, aladi a ben sabi kaba taki dati ben o pasa.

„Gado na lobi”

Satan, a feanti fu Gado, meki sma opo densrefi teige Gado na ini Eden, èn a sani disi tyari takru bakapisi kon, sosrefi sondu nanga dede. Sobun, Satan ben de „wan kiriman”. Boiti dati, en na „wan leiman èn a tata fu ala lei” (Yohanes 8:44). Fu di a abi ogri na prakseri, meki a wani sori taki wi lobi-ati Mekiman abi takru fasi. A wani meki sma denki taki na Yehovah abi a fowtu taki libisma sondu, na presi fu en.

Lobi na a moro prenspari reide fu san ede Yehovah bosroiti fu no sabi na fesi taki Adam nanga Eva ben o sondu. Lobi na a moro prenspari fasi fu Gado. „Gado na lobi”, na so 1 Yohanes 4:8 e taki. Lobi na wan bun sani, a no de wan ogri sani. A e suku bun na ini trawan. Iya, fu di Yehovah Gado na lobi, meki a wani den moro bun sani gi a fosi libisma paar.

Srefi aladi den pikin fu Gado na grontapu ben kan teki wan don bosroiti, toku wi lobi-ati Gado no ben denki takru fu den sma di a ben meki sondro fowtu, èn a no ben de so taki a no ben frutrow den. A ben gi den ala sani di den abi fanowdu na ini a libi èn a taigi den ala sani di den musu sabi. A fiti taki Gado ben musu fruwakti taki den ben o gi yesi na en na presi fu opo densrefi teige en. A ben sabi taki Adam nanga Eva ben man tan gi yesi na en, soleki fa a ben kon na krin bakaten nanga sondu libisma soleki Abraham, Yob, Danièl, èn furu trawan.

Yesus ben taki: „Gado man du ala sani” (Mateyus 19:26). A sani disi e trowstu wi. A lobi fu Yehovah, makandra nanga den tra prenspari fasi fu en, retidu, koni nanga krakti, e gi wi a dyaranti taki na a yoisti ten a o puru ala den bakapisi fu sondu nanga dede.​—Openbaring 21:3-5.

A de krin taki Yehovah no ben sabi na fesi taki a fosi trowpaar ben o sondu. Aladi a ben hati en taki libisma ben trangayesi en, èn taki someni pina kon leki bakapisi fu dati, toku Gado ben sabi taki a situwâsi disi no ben o tan langa. A situwâsi disi no ben o tapu en fu meki den sani di a abi na prakseri gi libisma nanga grontapu, kon tru. Fu san ede yu no e leri moro fu a sani dati di Gado abi na prakseri èn fu a fasi fa yu kan kisi wini fu a moi howpu disi?a

[Futuwortu]

[Prenspari pisi na tapu bladzijde 14]

Yehovah no ben meki den fosi libisma leki masyin fu du wán sani nomo

[Prenspari pisi na tapu bladzijde 15]

Gado ben sabi taki Adam nanga Eva ben man tan gi yesi na en