Yu Kan Wini Yu Brada
„Go tyari a fowtu fu en kon na krin na mindri yu nanga en wawan. Efu a e arki yu, dan yu wini yu brada.”—MATEUS 18:15
1, 2. Sortu bun rai Yesus ben gi fu sori wi fa wi musu handri nanga fowtu di sma meki?
A TEN di Yesus ben abi ete fu du en diniwroko no ben kisi wán yari srefi èn a ben abi prenspari sani fu leri den disipel fu en. Yu kan leisi den na ini Mateus kapitel 18. Wan sani di a ben musu leri wi, ben de a prenspari di a prenspari gi wi fu abi sakafasi, neleki pikin-nengre. Baka dati, a ben sori krin taki wi no musu meki „wan fu den pikinwan disi” naki futu fadon èn taki wi musu pruberi fu tyari „den pikinwan” di komoto na tapu a pasi, kon na tapu a pasi baka, so taki den no dede. Ne Yesus ben gi rai di warti furu èn di sma kan gebroiki fu koti trobi na mindri Kresten.
2 Kande yu e memre den wortu fu en ete: „Efu yu brada e du wan sondu, dan go tyari a fowtu fu en kon na krin na mindri yu nanga en wawan. Efu a e arki yu, dan yu wini yu brada. Ma efu a no e arki, dan teki wán noso tu sma go nanga yu, so taki na a mofo fu tu noso dri kotoigi ibri tori kan poti reti. Efu a no e arki den, dan taki nanga a gemeente. Efu a no e arki a gemeente srefi, dan meki a de leki wan man di de fu den nâsi èn leki wan belastingman” (Mateus 18:15-17). O ten wi musu gebroiki a rai disi, èn sortu denki wi musu abi te wi e du disi?
3. San wi musu du moro furu te trawan meki fowtu?
3 Na artikel na fesi ben sori krin taki fu di wi alamala de onvolmaakti èn wi e meki fowtu makriki, dan wi musu du muiti fu de klariklari fu gi sma pardon. Dati de spesrutu so te wan Kresten hati den firi fu wi nanga wan sani di a ben taki noso di a ben du (1 Petrus 4:8). Nofotron a moro bun sani fu du na te wi no e tan prakseri a sani di a sma du di a ben afrontu wi — fu gi a sma pardon èn fu frigiti a tori. Wi kan si disi leki wan fasi fu tyari vrede kon ini a Kresten gemeente (Psalm 133:1; Odo 19:11). Ma wan leisi yu kan firi taki yu musu lusu wan tori nanga a brada noso a sisa fu yu di ben hati den firi fu yu. Te dati de so, dan Yesus wortu na tapusei e sori san wi musu du.
4. Te yu luku en bun, dan fa wi kan gebroiki Mateus 18:15 te trawan meki fowtu?
4 Yesus ben gi leki rai taki yu musu „tyari a fowtu fu en kon na krin na mindri yu nanga en wawan”. Dati na wan koni sani fu du. Son Doisri Bijbel e taki en so: taki fu a fowtu fu en „na ondro fo ai”, èn dati wani taki yu ai nanga en ai. Efu yu e taki fu wan problema na wan switifasi èn te yu de nanga en wawan, dan nofotron a moro makriki fu lusu a problema. Wan brada di ben du noso di ben taki wan sani di ben afrontu yu noso di no ben prisiri yu, kan erken moro makriki taki a meki wan fowtu te a de nanga yu wawan. Efu trawan ben e arki tu, dan a fasi fa onvolmaakti libisma tan ben sa meki kande taki a no wani erken taki a fowtu, noso a ben sa kan pruberi fu taki dati san a ben du abi wan bun reide. Ma efu yu e go taki fu a tori „na ondro fo ai”, dan yu kan kon si taki unu no frustan makandra bun, na presi taki a ben de wan sondu noso wan ogri di ben du fu espresi. Te unu ala tu kon si taki unu no ben frustan makandra bun, dan unu kan lusu a tori, fu di unu no wani meki wan pikin sani kon moro bigi èn a pori a banti di unu abi nanga makandra. Fu dati ede wi kan gebroiki a gronprakseri na Mateus 18:15 srefi gi pikin sani di sma e du èn di afrontu wi ini na aladei libi.
San A Ben Abi na Prakseri?
5, 6. Fu sortu sondu Mateus 18:15 ben taki te yu e luku den tra tekst na en lontu, èn san e sori taki disi de so?
5 Fu taki en krin, a sani di Yesus ben gi leki rai abi fu du nanga moro seryusu tori. Yesus ben taki: „Efu yu brada e du wan sondu.” Moro furu, „wan sondu” kan de iniwan misteik noso fowtu (Yob 2:10; Odo 21:4; Yakobus 4:17). Ma den tra tekst na en lontu e sori taki a sondu di Yesus ben abi na prakseri ben musu de wan seryusu sondu. A ben de so seryusu, taki sma ben sa kan si a sma di du na ogri „leki wan man di de fu den nâsi èn leki wan belastingman”. San den wortu disi wani taki?
6 Den disipel fu Yesus di ben yere den wortu dati ben sabi taki den kondreman fu den no ben o bumui nanga den Heiden (Yohanes 4:9; 18:28; Tori fu den Apostel 10:28). Èn den no ben wani bumui nanga belastingman kwetikweti, man di ben gebore leki Dyu, ma di ben tron sma di no ben handri bun nanga a pipel. So bun, te yu luku en bun dan den wortu na Mateus 18:15-17 ben abi fu du nanga seryusu sondu, no nanga na afrontu di sma afrontu yu noso a hati di den hati a firi fu yu, sani di yu kan gi den pardon fu dati èn di yu kan frigiti.—Mateus 18:21, 22.a
7, 8. (a) Sortu sondu den owruman musu ondrosuku? (b) Sortu sondu tu Kresten ben kan lusu, soleki fa Mateus 18:15-17 e sori?
7 A Wet ben sori taki son sondu ben abi moro fanowdu leki soso a pardon fu a sma di trawan ben afrontu. Sma ben musu go fruteri den owruman (noso den priester) efu wan trawan ben afrontu Gado, efu a ben fadon komoto na bribi, efu a ben anbegi kruktu gado, èn efu a ben du sondu na seks sei soleki hurudu, sutadu, nanga homoseks libi, èn den owruman (noso den priester) ben ondrosuku den afersi dati. Dati de so tu na ini a Kresten gemeente (Lefitikus 5:1; 20:10-13; Numeri 5:30; 35:12; Deuteronomium 17:9; 19:16-19; Odo 29:24). Ma luku taki na tu sma ben kan lusu den sortu sondu di Yesus ben kari dya. Fu eksempre: Wan sma e fruteri ogri-ati lei fu wan trawan fu di a ben atibron noso a ben dyarusu. Wan Kresten e meki wan kruderi taki a o du wan wroko nanga spesrutu sani fu bow èn taki a o kaba a wroko na wan spesrutu dei. Wan trawan e pramisi taki a sa pai a moni baka na tapu fasti dei noso na tapu wan spesrutu dei. Wan Kresten e pramisi taki efu a basi fu en e leri en a wroko, dan a no sa hori strei nanga en basi (srefi te a e teki wan tra wroko) noso a no sa pruberi fu puru den klanti fu en basi bifo wan spesrutu ten noso na ini wan spesrutu kontren di den ben agri.b Efu wan brada no e du san a pramisi èn a no abi berow fu den ogri dati, dan dati ben o de seryusu trutru (Openbaring 21:8). Ma den tu sma dati di abi fu du nanga a tori kan suku wan lusu gi den sortu ogri dati.
8 Ma san yu ben o du fu lusu a tori? Nofotron, sma prati den sani di Yesus ben taki na ini dri stap. Meki wi go luku ibriwan fu den stap. Na presi fu si den leki wan strak wet, pruberi fu frustan san den wani taki, èn noiti no frigiti taki yu e du disi nanga lobi.
Pruberi fu Wini Yu Brada
9. Sortu sani wi musu hori na prakseri te wi e gebroiki Mateus 18:15?
9 Yesus ben bigin: „Efu yu brada e du wan sondu, dan go tyari a fowtu fu en kon na krin na mindri yu nanga en wawan. Efu a e arki yu, dan yu wini yu brada.” A de krin taki disi a no wan stap di yu kan du soso fu di yu denki taki a sma du wan sani. Yu musu abi buweisi noso yu musu sabi sani finifini, so taki yu kan gebroiki disi fu yepi yu brada meki a si taki a ben du wan ogri èn taki a musu lusu a tori. A bun fu du sani wantewante, fu di yu no wani meki a tori kon moro seryusu noso taki a sa muilek fu kenki a fasi fa a brada e tyari ensrefi. Èn no frigiti taki te yu e tan broko yu ede nanga a tori, dan a kan du yu ogri tu. Fu di yu nanga en wawan musu taki fu a tori, no go taki fosi nanga trawan fu hari den kon na yu sei noso so taki den kan prakseri bun fu yu (Odo 12:25; 17:9). Fu san ede? Fu di yu abi wan sani na prakseri.
10. San sa yepi wi fu wini wi brada?
10 Yu musu abi na prakseri fu wini yu brada, no fu strafu en, fu gi en syen noso fu du en ogri. Efu a du wan ogri trutru, dan a no sa waka bun nanga matifasi di a abi nanga Yehovah. A de seiker taki yu wani meki a tan a Kresten brada fu yu. Yu sa man abi moro bun bakapisi te yu e taki nanga en wawan sondro fu atibron, sondro fu taki grofu noso na wan fasi di e gi a sma a prakseri taki yu e gi en a fowtu. Te yu e taki fu a problema na a lobi fasi disi, dan hori na prakseri taki un ala tu de onvolmaakti, sondu libisma (Romesma 3:23, 24). Te a e frustan taki yu no konkru fu en na trawan èn a e si taki yu wani yepi en trutru, dan wan lusu kan kon wantewante. Te yu e taki na a switifasi èn a krin fasi disi, dan a sa sori fu de wan koni sani spesrutu te a e kon na krin taki unu ala tu ben meki wan mistèik noso taki a problema kon fu di unu no ben frustan makandra bun.—Odo 25:9, 10; 26:20; Yakobus 3:5, 6.
11. San wi ben sa kan du, srefi efu wan sma di afrontu wi no e arki wi?
11 Efu yu e yepi en si taki wan ogri ben du èn taki a de wan seryusu ogri, dan a kan kisi berow. Ma hori na prakseri taki bigimemre kan de wan problema (Odo 16:18; 17:19). So bun, srefi efu a no e erken wantewante taki a du na ogri èn a no abi berow, dan yu kan wakti wan pisi ten bifo yu e go taki moro fara fu a tori. Yesus no ben taki ’go soso wán leisi èn tyari a fowtu fu en kon na krin’. Fu di a de wan sondu di yu kan lusu, dan luku efu yu wani go taki nanga en baka soleki fa Galasiasma 6:1 e taki èn „na ondro fo ai”. Kande yu sa abi bun bakapisi. (Teki gersi Yudas 22, 23.) Ma san efu yu sabi seiker taki a sma du wan sondu, èn taki a no wani arki?
Aksi a Yepi fu Lepi Sma
12, 13. (a) San na a di fu tu stap di Yesus ben kari, di wi musu du fu handri nanga wan fowtu di wan sma meki? (b) San na wan tu bun rai te wi wani du a stap disi?
12 ¿Yu ben sa wani taki trawan ben o libi yu na wan sei esi-esi efu yu ben du wan seryusu ogri? Kwetikweti. Dati meki Yesus ben sori taki baka te yu du a fosi stap, yu no musu tapu fu pruberi wini yu brada, so taki a kan tan wán nanga yu èn nanga trawan fu anbegi Gado na wan bun fasi. Yesus ben tyari kon na krin san na a di fu tu stap: „Efu a no e arki, dan teki wán noso tu sma go nanga yu, so taki na a mofo fu tu noso dri kotoigi ibri tori kan poti reti.”
13 A ben taki dati yu musu teki „wán noso tu sma”. A no ben taki dati baka te yu du a fosi stap, dan yu kan taki fu a problema nanga wan lo tra sma, meki kontakti nanga wan opziener di e reis noso skrifi den brada fu a problema. Ala di yu kan de seiker taki wan sma du wan ogri, toku a no ben lusu na wan bun fasi. Yu no ben sa wani fruteri sani di no tru èn di ben kan de ogri-ati lei fu yu sei (Odo 16:28; 18:8). Ma Yesus ben taki dati yu musu teki wán noso tu sma nanga yu. Fu san ede? Èn suma den ben kan de?
14. Suma wi ben sa kan teki nanga wi te wi wani du a di fu tu stap?
14 Yu e pruberi fu wini yu brada te yu e pruberi fu sori en taki wan sondu du èn fu di yu e gi en deki-ati fu abi berow so taki a kan abi vrede nanga yu èn nanga Gado. Fu kan du dati, dan a ben o moro bun efu den „wán noso tu sma” dati ben o de sma di ben sabi na ogri di ben du. Kande den ben drape di a pasa, noso den sabi nofo fu a sani di ben du (noso no ben du) na ini wan bisnis tori. Efu den sma dati no de, dan den sma di yu teki kon nanga yu abi ondrofeni kande nanga a tori dati èn fu dati ede den man taki efu a sani di ben pasa, ben de wan ogri trutru. Boiti dati, efu a de fanowdu baka ten, dan den kan de kotoigi fu den sani di ben taki, èn den kan taki efu den tru tori di ben tyari kon na fesi èn a muiti di ben du, de trutru so (Numeri 35:30; Deuteronomium 17:6). So bun, den no de sma nomo di no e teki partij, noso mindriman; toku den drape fu yepi wini a brada fu yu èn a brada fu den.
15. Fu san ede Kresten owruman ben sa kan de wan yepi efu wi musu du a di fu tu stap?
15 Yu no musu denki taki den sma di yu e teki kon nanga yu musu de man di de owruman ini a gemeente. Ma lepi man di de owruman kan gi yepi fu di den de bekwaam na yeye fasi. Den owruman dati de „leki wan kibripresi gi a winti èn wan kibripresi gi a sibibusi, leki watra di e lon ini wan kondre sondro watra, leki a kowrupe fu wan bigi stonbergi di tanapu leti-opo ini wan kondre di drei” (Yesaya 32:1, 2). Den sabi fa fu rideneri nanga brada nanga sisa èn fa fu meki den bun baka. Èn a sma di du na ogri abi bun reide fu frutrow den „presenti [dati] ini libisma” (Efeisesma 4:8, 11, 12).c Fu taki fu a tori pe den lepi sma dati de èn fu begi makandra nanga den kan kenki a situwâsi èn lusu sani di ben gersi fu no abi wan lusu.—Teki gersi Yakobus 5:14, 15.
Wan Lasti Muiti fu Wini En
16. San na a di fu dri stap di Yesus ben kari?
16 Efu a di fu tu stap di yu du fu lusu a tori no wroko bun, dan den gemeente owruman musu kisi fu du nanga a di fu dri stap. „Efu a no e arki [den wán noso tu sma], dan taki nanga a gemeente. Efu a no e arki a gemeente srefi, dan meki a de leki wan man di de fu den nâsi èn leki wan belastingman.” San disi wani taki?
17, 18. (a) Sortu eksempre e yepi wi fu frustan san den wortu ’taki nanga a gemeente’ wani taki? (b) Fa wi musu du a stap disi na ini a ten disi?
17 Wi no e si disi leki wan tirilin di e sori wi taki wi musu taki fu a sondu noso na ogri na tapu wan gewoon noso wan spesrutu konmakandra fu a heri gemeente. Nanga yepi fu Gado Wortu wi kan sabi san na a yoisti sani fu du. Luku san den ben musu du na ini Israèl fu owruten te wan sma ben meki opruru, te a ben de wan tapu-ala èn te a ben de wan drunguman: „Efu a e kon na krin taki wan man abi wan manpikin di trangayesi èn di e meki opruru, èn a no e arki a sten fu en papa noso a sten fu en mama, èn den piri-ai gi en, ma a no wani arki den, dan en papa nanga en mama musu grabu en èn tyari en go na den owru man fu a foto fu en èn na a portu fu a presi fu en, èn den musu taigi den owru man fu en foto: ’A manpikin disi fu wi trangayesi èn a e meki opruru; èn a no e arki wi sten, èn a de wan tapu-ala èn wan drunguman.’ Dan ala den man fu a foto fu en musu trowe ston na en tapu.”—Deuteronomium 21:18-21.
18 A no a heri nâsi noso ala den sma fu a lo fu a man ben kon arki sortu sondu a ben du èn fu krutu en. Ma den „owru man” di sma ben erken ben ondrosuku a tori leki sma di ben teki presi gi a heri gemeente. (Teki gersi Deuteronomium 19:16, 17 di e taki fu wan afersi di ’den priester nanga den krutuman di ben de na wroko na a ten dati’ ben ondrosuku.) Na so a de tu na ini a ten disi taki te a de fanowdu fu du a di fu dri stap, dan den owruman di e teki presi gi a gemeente, e ondrosuku a tori. Den abi a srefi sani na prakseri, fu wini a Kresten brada efu den kan du dati. Den e sori taki den wani du disi fu di den de eerlijk, èn den no e krutu na afersi na fesi kaba noso e teki partij.
19. San den owruman di kisi a wroko fu arki na afersi sa pruberi fu du?
19 Den sa du muiti fu ondrosuku den tru tori èn arki den kotoigi, fu di den musu luku efu trutru wan sondu ben du (noso e du ete). Den no wani meki sma pori a gemeente èn den wani hori a yeye fu grontapu dorosei fu a gemeente (1 Korentesma 2:12; 5:7). Akruderi a bekwaamfasi fu den di skrifi poti na ini Bijbel, den sa du muiti „fu frumane nanga yepi fu bun leri èn fu piri-ai gi den wan di e taki sani teige trawan” (Titus 1:9). A de fu howpu taki a sma di du na ogri no sa de leki den Israèlsma di a profeiti fu Yehovah ben skrifi fu den: „Mi ben kari unu, ma unu no ben piki, mi ben taki, ma unu no ben arki; èn unu ben tan du san no bun na mi ai, èn unu ben bosroiti fu du a sani di no ben plisi mi.”—Yesaya 65:12.
20. San Yesus ben taki dati musu pasa efu a sondari e weigri fu arki èn fu abi berow?
20 Ma a no e pasa someni taki a sondari e du leki fa den Israèlsma ben du. Efu dati de so, dan a rai fu Yesus de krin: „Meki a de leki wan man di de fu den nâsi èn leki wan belastingman.” Masra no ben gi leki rai taki wi no musu abi sari-ati noso taki wi musu hati a firi fu trawan. Ma a de krin san na apostel Paulus ben abi na prakseri di a ben taki dati den ben musu puru sondari di no abi berow, na ini a gemeente (1 Korentesma 5:11-13). Srefi disi kan abi leki bakapisi te fu kaba taki den e wini a sondari.
21. San kan pasa ete nanga wan sma di den puru na ini a gemeente?
21 Na agersitori fu Yesus di e taki fu a trangayesi manpikin e sori wi taki disi kan. Soleki fa a ben sori, dan baka di a sondari ben libi wan pisi ten sondro a lobi-ati matifasi na ini en papa oso, dan a sondari dati „ben kisi ensrefi” (Lukas 15:11-18). Paulus ben taigi Timoteus taki son sma di ben du ogri ben o kisi berow baka wan pisi ten èn den ben o „kisi densrefi baka èn komoto na a trapu fu Didibri” (2 Timoteus 2:24-26). Wi ben o howpu trutru taki iniwan sma di sondu sondro fu abi berow èn di den musu puru na ini a gemeente, sa firi san den lasi — a feni di Gado feni den bun èn so srefi a switi matifasi èn demakandra nanga loyaal Kresten — èn taki dan den sa kisi densrefi baka.
22. Fa wi kan wini wi brada ete?
22 Yesus no ben si sma fu den nâsi nanga belastingman leki sma di no ben man kisi frulusu. Wan belastingman, Mateus Leifi, ben kisi berow, èn a ben ’waka baka Yesus’ na wan opregti fasi èn Yesus ben teki en srefi fu de wan apostel (Markus 2:15; Lukas 15:1). Dati meki, efu wan sondari na ini a ten disi „no e arki a gemeente srefi” èn den e puru en na ini a gemeente, dan wi kan wakti fu si efu a sa kisi berow baka wan pisi ten èn meki a pasi pe a e waka kon reti baka. Te a e du dati èn a de wan memre baka fu a gemeente, dan wi sa breiti taki wi wini a brada fu wi fu kon baka na ini a koi fu a tru anbegi.
[Futuwortu]
a A Cyclopedia fu McClintock nanga Strong e taki: „Sma ben si den publikaan [belastingman] fu a Nyun Test[amenti] leki toriman èn leki sma di fadon komoto na bribi, sma di ben kon doti fu di den ben bumui furu nanga den heiden, èn di ben de sma di ben gi densrefi nanga den friwani na a kwinsiman so taki a disi ben kan gebroiki den. Sma ben si den leki sondari . . . No wan sma ben bumui nanga den, bika sma nanga bun maniri ben o wai pasi gi den, dati meki soso den sma di trawan ben drai baka gi den, sma di ben de leki den, ben de den mati noso kompe fu den.”
b Bisnistori noso monitori pe sma bedrigi, fufuru noso kori trawan, kan de wán fu den sondu di Yesus ben abi na prakseri. Yesus, di ben wani sori san a ben abi na prakseri, baka di a ben gi a rai di skrifi na Mateus 18:15-17, ben gi wan eksempre fu srafu (wrokoman) di ben abi wan paiman èn di no ben man pai a paiman.
c Wan Bijbel sabiman ben taki: „Son leisi a e pasa taki wan sma di du wan ogri sa wani arki tu noso dri sma (spesrutu te den na sma di warti fu kisi lespeki), moro leki te wán sma nomo de, spesrutu te a sma dati na wan sma di a ben abi wan kesekese nanga en.”
¿Yu E Memre Disi Ete?
◻ Nanga sortu sondu Mateus 18:15-17 abi fu du na a fosi presi?
◻ San wi musu hori na prakseri te wi musu du a fosi stap?
◻ Suma kan yepi wi te wi musu du a di fu tu stap?
◻ Suma abi fu du nanga a di fu dri stap, èn fa wi kan wini wi brada ete?
[Prenki na tapu bladzijde 18]
Den Dyu no ben wani bumui nanga belastingman. Mateus ben drai en libi èn ben waka baka Yesus
[Prenki na tapu bladzijde 20]
Nofotron wi kan lusu wan afersi „na ondro fo ai”