David ben abi leti fu fruwakti taki Gado poti prakseri na en? Gado e poti prakseri na yu? Furu sma no man bribi taki wan almakti Gado e poti prakseri na den. Fu san ede?

Wan reide na taki Gado hei omeni tron moro libisma. Efu yu luku a hei posisi di a abi, dan den pipel „de leki wan dropu watra na ini wan emre. A e si den leki a finifini doti di de na tapu wan wegi” (Yesaya 40:15). Wan skrifiman fu a ten disi di e krutu kerkileri, ben taki srefi taki „na drei-ai sma abi fu bribi taki wan Gado de di e broko en ede nanga libisma”.

Ma son sma feni taki a fasi fa den e tyari densrefi e meki taki den no warti fu Gado poti prakseri na den. Fu eksempre, Jim, wan man fu sowan 50 yari ben taki: „Doronomo mi e begi Gado fu no atibron èn fu yepi mi fu dwengi misrefi, ma toku mi ben e kisi atibron ibri leisi baka. Te fu kaba, mi bigin denki taki mi ati ben takru srefisrefi èn taki Gado no ben man yepi mi.”

A tru taki Gado de so farawe fu libisma taki a no e poti prakseri na wi? Fa a e si sondu libisma? Efu Gado srefi no taigi wi suma na en, dan nowan sma man sabi fa a e denki èn nowan sma o man piki den aksi dati. Ma Bijbel, a boskopu di Gado seni gi libisma, e pramisi wi taki a no de wan Gado di de so farawe fu libisma taki a no e poti prakseri na wi. Bijbel e taki: „Fu taki en leti, a no de fara fu nowan fu wi” (Tori fu den apostel 17:27). Na ini den fo artikel di o kon, wi o luku fa Gado e si libisma èn fa a sori taki a e broko en ede nanga sma leki yu.

FU SAN EDE SON SMA E TWEIFRI: Wan ondrosuku di sma du no so langa pasa, sori taki a stari sistema fu wi wawan kan abi awansi 100 milyard planeiti. Furu sma di e luku a bigi universum, e aksi densrefi: ’Fu san ede na almakti Mekiman ben o luku san libisma di no de noti e du na tapu so wan pikin planeiti?’

SAN GADO WORTU E LERI: Gado no gi wi a Bijbel, dan bakaten a frigiti wi. Na presi fu dati, Yehovah e pramisi wi: „Mi o gi yu rai èn mi o luku yu.”​—Psalm 32:8.

Luku a tori fu Hagar, wan uma fu Egepte di ben libi sowan 1900 yari Fosi Krestes. Hagar no ben sori lespeki gi Sarai, a misi fu en, èn dati meki Sarai bigin soso en, ne Hagar lowe go na ini a sabana. A de so taki Gado no ben e broko en ede moro nanga Hagar fu di a ben meki wan fowtu? Bijbel e taki: „Na engel fu Yehovah feni Hagar.” Na engel dati gi Hagar a dyaranti disi: „Yehovah yere fa yu bari krei di nowtu miti yu.” Ne Hagar taigi Yehovah: „Yu na wan Gado di e si ala sani.”​—Genesis 16:4-13.

A „Gado di e si ala sani” e luku yu tu. Luku na eksempre disi: „Wan lobi mama e luku den yongu pikin fu en heri bun fu di o moro a pikin yongu, o moro a abi en papa nanga mama fanowdu. Na so a de tu taki Gado e luku wi heri bun te wi swaki èn te wi abi yepi fanowdu. Yehovah e taki: „Mi e tan na wan hei èn santa presi. Mi de tu nanga den sma di kisi kwinsi èn di abi sakafasi. Mi o gi deki-ati na den sma di abi sakafasi èn mi o gi krakti na den wan di kisi kwinsi.”​—Yesaya 57:15.

Toku yu ben kan aksi yusrefi: ’Fa Yehovah e luku mi? A e luku a fasi fa mi de, noso a e teki ten fu kon sabi suma na mi?’

FU SAN EDE SON SMA E TWEIFRI: Furu sma feni taki Gado e si libisma soso leki sondusma di no krin èn di no warti fu a poti prakseri na den. Kendra di ben e firi brokosaka doronomo, ben e sari srefisrefi taki a no ben man du soifri san Gado ben e aksi fu en. Dati meki a taki: „Mi no e begi moro.”

SAN GADO WORTU E LERI: Yehovah e luku pasa den swakifasi fu yu èn a e frustan suma na yu. „Gado sabi heri bun fa wi meki”, na so Bijbel e taki, „a e hori na prakseri taki na fu doti wi meki”. Boiti dati, a no e gi wi „ala strafu di wi ben musu kisi gi den sondu fu wi”, ma a e sori sari-ati gi wi te wi abi berow.​—Psalm 103:10, 14.

Prakseri David, a kownu fu Israel di ben kari na ini a fosi artikel. David ben begi Gado: „Yu ai ben si mi di mi ben de na ini mi mama bere. Srefi di nowan pisi fu mi skin ben de ete, yu ben skrifi kaba na ini a buku fu yu . . . Mi Gado, ondrosuku mi èn kon sabi mi ati” (Psalm 139:16, 23). Iya, David ben bribi taki aladi a ben du sondu, èn srefi hebi sondu son leisi, toku Yehovah ben o si taki a ben abi berow na ini en ati.

Yehovah e frustan yu moro bun leki iniwan tra sma. „Libisma e si soso san na ai e si”, na so Bijbel e taki, „ma Yehovah e si fa na ati de” (1 Samuel 16:7). Gado sabi fu san ede yu e du den sani di yu e du. A sabi taki a famiri pe yu komoto, a fasi fa yu kweki, a presi pe yu kweki, nanga den fasi fu yu, abi krakti tapu a fasi fa yu e tyari yusrefi. A e si a muiti di yu e meki fu tron wan moro bun sma èn a e warderi dati, awansi yu e meki fowtu.

Ma fa Gado e gebroiki den sani di a sabi fu yu fu trowstu yu?

FU SAN EDE SON SMA E TWEIFRI: Srefi te son sma e angri fu kisi trowstu, toku den no wani aksi Gado fu yepi den nanga den problema fu den, fu di den feni taki den ben o denki densrefi nomo. Wan uma di nen Raquel e taki: „Te mi e luku den someni sma di de na grontapu, èn sosrefi den bigi problema di den abi, dan mi e si taki den problema fu mi pikin so te taki mi no wani aksi Gado fu yepi mi.”

SAN GADO WORTU E LERI: Gado du wan moi sani kaba fu yepi èn fu trowstu libisma. Ibri sma di de na grontapu kisi sondu, dati wani taki dati noiti wi o man du soifri san Gado e aksi fu wi. Ma Gado „lobi wi èn a seni en Manpikin [Yesus Krestes] kon leki wan ofrandi di e tapu den sondu fu wi èn di e meki wi kon bun baka nanga Gado” (1 Yohanes 4:10). Nanga yepi fu a srakti-ofrandi fu Yesus, Gado gi wi okasi fu kisi pardon fu sondu, fu abi wan krin konsensi, èn fu kon abi a howpu fu libi fu têgo na ini wan nyun grontapu pe freide o de.a Ma a srakti-ofrandi dati de soso gi a libisma famiri leki grupu, noso a e sori taki Gado e broko en ede nanga yu?

Luku a tori fu na apostel Paulus. A ben abi so furu warderi gi a srakti-ofrandi fu Yesus taki a skrifi: „Mi e bribi na ini a Manpikin fu Gado di lobi mi èn di gi en libi fu mi ede” (Galasiasma 2:20). A tru taki Yesus dede fosi Paulus ben tron wan Kresten. Toku Paulus ben si na ofrandi dati leki wan kado di Gado ben gi en.

A srakti-ofrandi fu Yesus na wan kado di Gado gi yu tu. A kado dati e sori o warti yu de gi Gado. A kan ’trowstu yu fu ala ten èn a kan meki taki yu kon abi wan moi howpu, so taki ala ten yu e du èn e taki san bun’.​—2 Tesalonikasma 2:16, 17.

Ma Yesus ben gi en libi leki ofrandi pikinmoro 2000 yari pasa. Sortu buweisi de taki Gado wani yepi yu na ini a ten disi?

FU SAN EDE SON SMA E TWEIFRI: Furu sma di e bribi na ini Gado e firi leki den no man kon sabi en trutru. Christina, wan uma fu Ierland di ben e go na kerki ibri wiki, e taki: „Mi ben e si en nomo leki a Gado di meki ala sani. Ma mi no ben sabi en. Nowan enkri leisi mi ben e firi leki mi sabi en.”

SAN GADO WORTU E LERI: Te wi e bruya, dan Yehovah e tan pruberi fu yepi wi. Yesus ben gi wan agersitori fu sori fa Gado e sorgu wi: „Efu wan sma abi wán hondro skapu èn wan fu den lasi, dan a sma dati o libi den neigitenti na neigi skapu na tapu den bergi fu go suku a lasi skapu, a no so?” San a ben wani leri wi? „Na so mi Tata na hemel no wani kwetikweti taki wan fu den pikinwan disi musu lasi libi.”​—Mateyus 18:12-14.

Ibriwan „ fu den pikinwan disi” prenspari gi Gado. Fa Gado e ’suku a wan di lasi’? Soleki fa a tekst e sori na a bigin, dan Yehovah e hari sma kon na en.

Luku san Gado du fu hari reti-ati sma kon na en. Na ini a fosi yarihondro, Gado seni a Kresten disipel Filipus go na wan heihei man fu Etiopia di ben e sidon na ini en asiwagi, fu fruklari gi en san a Bijbel profeititori di a ben e leisi wani taki (Tori fu den apostel 8:26-39). Bakaten, Gado meki na apostel Petrus go na a oso fu Kornelius, wan legre-ofsiri fu Rome, di ben abi a gwenti fu begi èn di ben e meki muiti fu anbegi Gado (Tori fu den apostel 10:1-48). Gado ben tyari na apostel Paulus nanga den mati fu en go na wan liba dorosei fu a foto Filipi. Drape den miti „wan anbegiman fu Gado” di nen Lidia èn ’Yehovah opo en ati bradi, so taki a ben kan poti prakseri’ na san Paulus ben taki.​—Tori fu den apostel 16:9-15.

Na ini ibriwan fu den situwâsi dati, Yehovah sorgu taki den sma di ben e suku en kisi okasi fu kon sabi en. Suma na ini a ten disi e go na sma oso èn na presi pe furu sma de fu fruteri trawan a Bijbel boskopu fu Gado? Furu sma ben o piki: „Yehovah Kotoigi.” Aksi yusrefi: ’A kan taki Gado e gebroiki den sma disi fu yepi mi?’ Wi e gi yu deki-ati fu begi Gado fu yepi yu so taki yu kan kon sabi en.a