Mi kisi jepi foe horidoro na ondro kefalek takroe tesi

SOLEKI FA ÉVA JOSEFSSON BEN FROETERI

Wan pikin groepoe foe wi ben kon makandra na ini a distrikt Oejpest foe Boedapest, na ini Hongaria, gi wan sjatoe konmakandra bifo wi ben go na ini a kresten diniwroko. A ben de na ini a jari 1939, sjatoe bifo a di foe Toe Grontapoefeti ben bigin, èn a preikiwroko foe Jehovah Kotoigi ben tapoe na ini Hongaria. Nofotron den ben e hori den wan di ben e leri bijbel na poebliki na a ten dati.

FOE di a ben de mi fosi leisi di mi ben doe a wroko disi, mi ben moesoe sori, taki mi ben e broko mi ede nanga disi èn taki mi fesi ben lasi kloroe. Wan moro owroe kresten brada ben drai loekoe mi èn ben taki: „Éva, noiti joe abi foe frede. Foe dini Jehovah na a moro bigi grani di wan libisma kan abi.” Den wortoe dati di ben sori taki a ben hori mi na prakseri èn ben gi mi tranga, ben jepi mi na ondro foeroe kefalek takroe tesi.

Wan djoe background

Mi ben de a moro owroe pikin na ini wan djoe osofamiri foe feifi pikin. Mama no ben de tevrede nanga a Djoe-bribi, èn a ben bigin ondrosoekoe tra relisi. Na a fasi disi a ben miti Erzsébet Slézinger, wan tra djoe oema di ben e soekoe bijbel waarheid toe. Erzsébet ben meki mama miti Jehovah Kotoigi, èn leki wan bakapisi foe dati, mi toe ben kon abi foeroe belangstelling gi den leri foe bijbel. Heri esi mi ben bigin froeteri tra sma san mi ben leri.

Baka di mi tapoe 18 jari na ini a zomer foe 1941, mi ben gi mi libi abra na Jehovah Gado èn leki wan simbôl foe dati mi ben teki dopoe na ini a Donau Liba. Mama ben dopoe na a srefi ten, ma papa no ben abi a srefi njoen kresten bribi foe wi. Heri esi baka a dopoe foe mi, mi ben meki plan foe go pionier, dati wani taki, foe doe a foeroeten-diniwroko. Mi ben abi wan baisigri fanowdoe, èn foe dati ede mi ben bigin wroko na ini na ondrosoekoe presi foe wan bigi krosi fabriki.

Den tesi e bigin

Den Nazi ben teki a makti na ini Hongaria, èn a fabriki pe mi ben wroko ben kon na ondro a tiri foe den Doisri. Wan dei den ben kari ala wrokoman foe kon na fesi den basi foe den foe sweri taki den sa de getrow na den Nazi. Den ben taigi wi taki efoe wi no ben sa doe dati dan dati ben sa abi serjoesoe bakapisi gi wi. Na a seremonia, pe den ben taigi wi foe taki ’heil Hitler’, mi ben tanapoe na wan lespeki fasi, ma mi no ben doe a sani di den ben aksi. A srefi dei dati den ben kari mi go na a kantoro, den ben gi mi, mi moni, èn den ben seni mi gowe. Foe di wroko no ben de, mi ben aksi misrefi san ben sa pasa nanga den plan di mi ben abi foe pionier. Ma a dei na baka, mi ben kisi wan njoen wroko pe mi ben kisi moro foeroe moni srefi.

Now na angri di mi ben abi foe pionier ben kan kon troe. Mi ben wroko nanga difrenti pionier patna, èn a lastiwan ben de Juliska Asztalos. Wi ben gebroiki soso wi bijbel na ini a diniwroko, foe di wi no ben abi poeblikâsi foe pristeri. Te wi ben feni sma di ben abi belangstelling, dan wi ben e tjari gobaka èn ben e leni den poeblikâsi.

Ibritron baka mi nanga Juliska ben moesoe kenki a kontren pe wi ben e wroko. Disi ben de foe di te wan priester ben kon sabi taki wi ben e fisiti den ’skapoe foe en’, dan a ben e meki bekènti na ini kerki taki efoe Jehovah Kotoigi ben sa fisiti den skapoe foe en, dan den skapoe ben moesoe froeteri en dati, noso froeteri skowtoe. Te boen-ati sma ben froeteri wi taki a ben meki a sani disi bekènti, dan wi ben e froisi go na wan tra kontren.

Wan dei, Juliska nanga mi ben fisiti wan jongoe boi di ben sori belangstelling. Wi ben meki wan mofo foe go baka èn foe leni en wan sani foe leisi. Ma di wi ben go baka, dan skowtoe ben drape, èn den ben hori wi èn ben tjari wi go na skowtoe-oso na ini Dunavecse. Den ben gebroiki a boi leki wan trapoe foe kisi wi. Di wi ben doro na a skowtoe-oso, dan wi ben si wan priester drape èn wi ben sabi taki en toe ben de ini a tori.

A moro takroe tesi foe mi

Drape na a skowtoe-oso, den ben skér ala wiwiri foe mi ede, èn mi ben moesoe tanapoe sososkin na fesi pikinmoro twarfoe skowtoe. Den ben poti aksi gi mi èn ben wani sabi soema ben de wi fesiman na ini Hongaria. Mi ben taki dati wi no ben abi no wan tra fesiman leki Jesus Krestes wawan. Dan den ben fon mi na wan ogri-atifasi nanga den baleta, ma mi no ben tori den kresten brada foe mi.

Baka dati, den ben tai mi foetoe na makandra èn ben hori mi anoe pasa mi ede èn ben tai den na makandra toe. Dan, a wan baka a trawan, den ben abi seks nanga mi nanga tranga, den alamala, boiti wán skowtoe. Den ben tai mi so strak taki dri jari na baka mi ben abi marki na mi pols ete. Den ben doe so kefalek takroe ogri nanga mi, taki den ben hori mi toe wiki langa na a ondro-oso teleki den moro serjoesoe mankeri foe mi ben kon betre pikinso.

Wan pisi ten foe froelekti

Baka ten den ben tjari mi go na wan strafoe-oso na ini Nagykanizsa, pe foeroe Jehovah Kotoigi ben de. Ala di wi ben de na strafoe-oso, tokoe toe prisiri jari ben de baka dati, te joe teki den gersi tra jari. Wi ben e hori ala wi konmakandra na wan kibri fasi, èn wi ben e wroko pikinmoro a srefi fasi leki wan gemeente. Wi ben abi so srefi foeroe okasi foe gi okasi kotoigi. Na ini a strafoe-oso disi mi ben miti Olga Slézinger, wan sisa foe Erzsébet Slézinger, na oema di ben leri mi mama nanga mi a bijbel waarheid.

Pikinmoro a jari 1944 den Nazi na ini Hongaria ben abi a fasti bosroiti foe kiri ala den djoe foe Hongaria, soleki fa den ben kiri den akroederi wan sistema na ini tra kontren di den ben abi na ini den makti. Wan dei den ben kon foe teki mi nanga Olga. Den ben lai wi na ini wan lokowagi di e tjari meti, èn baka wan kefalek moeilek rèis na ini Tjekiaslovakia, wi ben doro a presi pe wi ben moesoe go na a zuidsei foe Polen — a dedeman kampoe Auschwitz.

Pasa Auschwitz libilibi

Mi ben firi taki noti no ben kan pasa nanga mi te mi ben de nanga Olga. A ben kan meki sma lafoe na ini moeilek situwâsi srefi. Di wi ben doro na ini Auschwitz, wi ben kon na fesi a takroebari-nen man Datra Mengele, di ben abi a wroko foe prati den njoen sma di no ben gosontoe foe wroko, foe den trangawan. Den wan di no ben gosontoe ben seni go na den gaskamra. Di wi ben moesoe kon na en, dan Mengele ben aksi Olga: „Omeni jari joe abi?”

Nanga deki-ati, èn nanga lafoe, a ben piki: „20.” Ma troetroe a ben de toe tron moro owroe leki dati. Ma Mengele ben lafoe èn ben meki a go na a reti-anoesei èn na so fasi Olga ben tan na libi.

Ala strafoeman na ini Auschwitz ben kisi simbôl na den strafoeman-krosi — djoe ben abi a Stari foe David, èn Jehovah Kotoigi ben abi wan parsi dri-oekoe. Di den ben wani nai a Stari foe David na wi krosi, dan wi ben taigi den taki wi ben de Jehovah Kotoigi èn taki wi ben wani a parsi dri-oekoe. Disi no ben de foe di wi ben sjen taki wi ben gebore leki djoe, ma foe di now wi ben de Jehovah Kotoigi. Den ben proeberi foe dwengi wi foe teki a simbôl foe den djoe foe di den ben skopoe èn naki wi. Ma wi ben tanapoe kánkan teleki den ben erken taki wi na Jehovah Kotoigi.

Baka ten mi ben miti mi sisa Elvira, di ben jongoe dri jari moro mi. Wi heri famiri, di ben abi seibi memre, ben tjari go na Auschwitz. Soso Elvira nanga mi den ben feni boen foe wroko. Papa, mama nanga den dri brada nanga sisa foe wi ben dede na ini den gaskamra. Na a ten dati Elvira no ben de wan Kotoigi, èn wi no ben tan na ini a srefi pisi foe a kampoe. A ben tan na libi, ben froisi go na Amerkankondre, èn ben tron wan Kotoigi na ini Pittsburgh, Pennsylvania, èn baka ten a dede drape na ini 1973.

Pasa tra kampoe libilibi

Na ini a winter foe a jari 1944/1945 den Doisri ben bosroiti foe froisi gowe foe Auschwitz, foe di den Rosiasma ben e kon. Foe dati ede den ben froisi wi go na Bergen-Belsen, na a noordsei pisi foe Doisrikondre. Sjatoe baka di wi ben doro, den ben seni mi nanga Olga go na Braunschweig. Djaso den ben wani meki wi jepi krin den broko-broko sani, na baka di den Geallieerden legre ben iti bom fajafaja na tapoe a presi. Olga nanga mi ben taki foe na afersi. Foe di wi no ben sabi seiker efoe a wroko disi ben sa broko a neutraliteit foe wi, meki wi ala toe ben bosroiti foe no doe a wroko.

A bosroiti foe wi ben tjari wan heri djoegoedjoegoe kon. Den ben fon wi nanga leriwipi èn dan den ben tjari wi go na fesi wan groepoe sroedati di ben o soetoe wi. Den sroedati ben gi wi wán miniti foe prakseri foe a tori, èn den ben taigi wi taki efoe wi no ben kenki wi prakseri, dan den ben o soetoe wi. Wi ben taigi den taki wi no ben abi ten fanowdoe foe denki bika wi sabi san wi taki kaba. Ma foe di a komandanti foe a kampoe no ben de èn en wawan ben abi a makti foe gi komando foe kiri sma, meki a kiri foe wi ben skoifi poti na wan tra ten.

Ma bifo dati ben pasa, den ben dwengi wi foe tanapoe heri dei na a djari foe a kampoe. Toe sroedati nanga gon ben hori wakti na wi, èn baka ibri toe joeroe toe trawan ben kon na ini den presi. Den no ben e gi wi njanjan, èn wi ben e kowroe kefalek foe di a ben de na ini februari. Wán wiki ben pasa foe sensi di den ben handri so nanga wi, ma a komandanti no ben kon ete. Na so, den ben poti wi na ini a baki foe wan truck, èn wi ben froewondroe taki wi ben feni wisrefi na Bergen-Belsen baka.

Na a ten dati mi nanga Olga ben de ini kefalek takroe situwâsi. Mi ben lasi moro foeroe foe mi wiwiri èn mi ben abi hei korsoe. Soso nanga tranga moeiti mi ben man wroko pikinso. A watrawatra koro soepoe nanga wan pikin pisi brede ibri dei no ben nofo. Ma a ben de fanowdoe taki wi e wroko bika den ben kiri den wan di no ben man wroko. Doisri sisa di ben wroko nanga mi na ini a koekroe ben jepi mi foe rostoe pikinso. Te den waktiman di ben e kon ondrosoekoe sani ben de na pasi e kon, dan den sisa ben e warskow mi, so taki mi ben kan tanapoe na a wrokotafra, e doe leki mi e wroko tranga.

Wan dei, Olga no ben abi a krakti moro foe go na en wroko presi, èn baka dati wi no ben si en moro. Mi ben lasi wan mati èn kompe di ben abi deki-ati, wan di ben de wan bigi jepi gi mi na ini den moeilek moen dati na ini den kampoe. Leki wan salfoe bakaman foe wi Masra Jesus Krestes, a ben moesoe kisi en paiman foe go na hemel wantewante. — Openbaring 14:13.

Fri, èn a libi baka dati

Di na orlokoe ben kaba na ini mei 1945 èn fri ben kon, dan mi ben swaki so kefalek taki mi no ben man prisiri taki a tjatjari foe den kwinsiman, te foe kaba, ben kon kisi pori; èn mi no ben man go nanga den groepoe di ben tjari den sma di ben kon fri go na den kondre di ben wani teki den. Mi ben tan dri moen na ini wan ati-oso foe kisi krakti baka. Baka dati, den ben tjari mi go na Sweden, di ben tron mi njoen kondre. Wantewante mi ben meki kontakti nanga mi kresten brada nanga sisa èn baka wan pisi ten mi ben bigin baka nanga a warti goedoe foe a velddienst.

Na ini 1949 mi ben trow nanga Lennart Josefsson, di ben dini foeroe jari langa leki wan opziener di e rèis foe Kotoigi foe Jehovah. En toe ben de na strafoe-oso na ini a pisi ten foe a di foe Toe Grontapoefeti, foe di a ben tan hori en bribi. Wi ben bigin wi libi nanga makandra leki pionier na tapoe 1 september 1949, èn ben kisi a toewijzing foe dini na ini a foto Borås. Na ini den bigin jari di wi ben drape, wi ben hori doronomo tin bijbelstudie ibri wiki nanga sma di ben abi belangstelling. Wi ben abi a prisiri foe si a wán gemeente na ini Borås kon tron dri gemeente na ini wan pisi ten foe neigi jari, èn now feifi gemeente de drape.

Mi no ben man tan pionier langa bika na ini 1950 wi ben tron papa nanga mama foe wan oemapikin, èn toe jari na baka, foe wan manpikin. So boen, mi ben abi a switi grani foe leri den pikin foe wi a warti waarheid di a lobi brada na ini Hongaria ben leri mi di mi ben owroe 16 jari nomo, namkoe: „Foe dini Jehovah na a moro bigi grani di wan libisma kan abi.”

Te mi e prakseri baka foe mi libi, dan mi e froestan taki mi ondrofeni a troetori foe san a disipel Jakobus ben skrifi di a ben memre wi foe a horidoro di Job horidoro: „Jehovah abi foeroe safoe lobi firi èn a abi sari-atifasi” (Jakobus 5:11). Ala di mi toe ben ondrofeni kefalek takroe tesi, tokoe mi ben blesi nanga toe pikin, den trowpatna foe den, èn siksi granpikin — èn den alamala na anbegiman foe Jehovah. Boiti dati, mi abi foeroe, foeroe pikin nanga granpikin na jejefasi, èn wan toe foe den e dini leki pionier nanga zendeling. Now a bigi howpoe foe mi na foe miti den lobiwan foe mi di e sribi na ini dede èn foe brasa den te de sa opo baka foe den memre grebi foe den. — Johanes 5:28, 29.

[Prenkis na tapoe bladzijde 31]

Na ini a diniwroko na ini Sweden na baka a di foe Toe Grontapoefeti

[Prenkis na tapoe bladzijde 31]

Nanga mi masra