Sma na heri grontapu abi furu lespeki gi Bijbel. Ma kande den no sabi so furu fu a buku disi, noso kande den no sabi srefisrefi san skrifi na ini. Na so a de nanga milyunmilyun sma na ini Asia, ma sosrefi na ini kondre pe bun furu sma abi wan Bijbel.

Kande yu e aksi yusrefi: ’Fu san ede mi musu kon sabi san skrifi na ini Bijbel?’ Te yu kon frustan den sani di skrifi na ini Bijbel, dan yu o kisi wini na den fasi disi:

• Yu o de koloku

• Yu o sabi san fu du te problema de na ini yu osofamiri

• Yu o sabi san yu kan du te yu abi broko-ede

• Yu o man libi moro bun nanga tra sma

• Yu o sabi fa fu gebroiki yu moni na wan bun fasi

Luku na eksempre fu Yoshiko di e libi na ini Yapan. A ben aksi ensrefi san Bijbel e taki. Dati meki a bosroiti fu leisi en. San ben de a bakapisi? „Bijbel yepi mi fu si san na a moro bun fasi fu libi èn a meki taki mi abi wan howpu now”, na so Yoshiko taki. A taki tu: „Mi no e firi moro leki mi e libi fu soso.” Amit, di wi kari na a bigin fu na artikel, bosroiti fu studeri Bijbel en srefi. A taki: „Noiti mi no ben denki taki Bijbel abi so furu bun rai di kan yepi ala sma.”

Bijbel kenki a libi fu milyunmilyun sma. Wi e gi yu deki-ati fu ondrosuku san Bijbel e taki, dan yu o si fa yu srefi kan kisi wini fu en.

Bijbel na wan bun owru buku. O owru a de? Sma bigin skrifi Bijbel sowan 3500 yari pasa. Dati ben de na a pisi ten di a makti famiri Shang ben e tiri China èn sowan 1000 yari fosi a Buda bribi bigin na ini India.​—Luku a faki „Wan tu sani fu Bijbel”.

Sma kan kisi wini fu wan buku, te den man frustan en èn te den man leri wan sani fu en. Bijbel na so wan buku. A e gi bun piki tapu den moro prenspari aksi di sma abi fu a libi.

Oiti yu aksi yusrefi: ’Fu san ede wi de dya?’ Dusundusun yari langa libisma pruberi fu feni a piki tapu na aksi disi èn te nanga now furu sma no feni a piki ete. Ma a piki de fu feni na ini den fosi tu kapitel fu a fosi buku fu Bijbel, Genesis. Na ini a buku disi Bijbel e fruteri san ben pasa „na a bigin”. Dati na milyunmilyun yari pasa di Gado meki sani soleki den stari, den planeiti, a son nanga grontapu (Genesis 1:1). Baka dati a e fruteri fa Gado sreka grontapu safrisafri, so taki meti nanga libisma ben kan libi na tapu. A e fruteri tu fa a meki libisma èn fu san ede a meki ala den sani disi.

BIJBEL SKRIFI NA WAN FASI DI WI MAN FRUSTAN

Bijbel abi rai di kan yepi wi fu lusu problema di wi e kisi na ini na aladei libi. Den rai dati makriki fu frustan. Tu sani e meki taki wi man frustan den.

A fosi sani, na taki Bijbel e taki sani krin èn a skrifi na wan fasi di e hari sma. Bijbel no e gebroiki wortu di e bruya sma noso di sma no man frustan. Ma a e sori krin fa sani de trutru èn a e taki fu sani di ibri sma man frustan. Te den skrifiman ben wani tyari dipi tori kon na krin, den ben e gebroiki wortu di sma e taki na ini na aladei libi.

Fu eksempre, Yesus gebroiki furu makriki agersitori di ben abi fu du nanga sani di sma sabi na ini na aladei libi. Dati meki den leri fu en ben e naki sma ati. Furu fu den agersitori disi skrifi na ini a prenspari lezing di Yesus ben hori na tapu wan bergi. Yu kan leisi en na ini kapitel 5 te go miti 7 fu a Bijbel buku Mateyus. Wan sabiman taki dati den sani di Yesus taki na ini a lezing disi kan yepi sma nanga furu sani. Yesus no hori a lezing disi fu „furu wi ede nanga wan lo sani, ma a hori en fu sori wi fa wi musu tyari wisrefi”. Yu kan leisi den kapitel disi na ini sowan 15 te go miti 20 miniti. Yu o si taki den sani di Yesus taki no muilek fu frustan èn yu kan leri furu fu den.

Wan tra sani di e meki taki Bijbel makriki fu frustan, na taki a no e taki fu anansitori noso tori di no pasa trutru. Ma soleki fa wan wortubuku e sori, dan Bijbel e taki ’fu prenspari sma èn fu sma di no de so prenspari. A e taki tu fu den problema fu den sma disi, den sani di den ben e howpu, den fowtu di den meki èn den bun sani di den du’ (The World Book Encyclopedia). A no muilek fu frustan den tori disi di e taki fu sma di ben libi trutru èn fu sani di pasa trutru. Boiti dati, a no muilek fu frustan sortu prenspari sani wi kan leri fu den tori disi.​—Romesma 15:4.

ALA SMA KAN FENI WAN BIJBEL

Efu yu wani frustan wan buku, dan a musu skrifi na ini wan tongo di yu sabi. Furu sma na ini a ten disi man feni wan Bijbel na ini wan tongo di den e frustan, awinsi pe den e libi noso awinsi fu sortu kondre den de. Meki wi luku fa a du kon taki so furu sma kan feni wan Bijbel now.

Den vertaal Bijbel na ini difrenti tongo. Bijbel ben skrifi na ini Hebrewtongo, Arameisitongo nanga Grikitongo. A no de fu taki dati furu sma no ben man leisi den tongo dati. Fu sorgu taki Bijbel de fu feni na ini tra tongo, reti-ati sma wroko tranga fu vertaal en. Tangi fu a wroko di den du, meki a heri Bijbel noso pisi fu en de fu feni na ini sowan 2700 tongo. Disi wani taki dati moro leki 90 procent fu den sma di e libi na grontapu man leisi Bijbel na ini den eigi tongo.

Den meki furu Bijbel. Bijbel ben skrifi na tapu sani soleki metibuba nanga papirus. Fu di den sani disi e pori makriki, meki sma ben musu skrifi en abra ibri tron baka, so taki a boskopu fu Bijbel no lasi gowe. Fu di sma ben musu teki den ten fu skrifi en abra soifri, meki wan Bijbel ben diri na a ten dati. Sobun, furu sma no ben man bai wan. Ma moro leki 550 yari pasa, wan man di nen Gutenberg meki wan masyin di e druk buku. Nanga a masyin disi den ben man meki furu Bijbel. Wan ondrosuku sori taki moro leki feifi milyard Bijbel noso pisi fu en prati.

Nowan tra kerkibuku vertaal na ini so furu tongo leki Bijbel èn nowan fu den prati so furu. A de krin taki Bijbel na wan buku di ala sma musu man frustan. Ma a no ala ten a makriki fu frustan en. Ma yepi de. Pe yu kan feni yepi? Fa yu kan kisi wini fu Bijbel? A tra artikel o gi piki tapu den aksi disi.

Kon meki wi taki dati yu e go na wan kondre pe yu no go noiti ete. Yu no sabi den sma fu a kondre dati, yu no sabi den gwenti fu den, den nyanyan fu den èn a moni di den e gebroiki. Kande yu o bruya fu di yu no sabi noti fu a kondre.

A kan taki na so yu o firi te yu leisi Bijbel fu a fosi leisi. Fu di a e taki fu owruten sani, a o gersi kande leki yu e go na ini wan kondre pe yu no go noiti ete. Yu o leisi fu wan pipel di sma ben e kari Filisteasma èn yu o leisi taki sma ben abi gwenti di yu no sabi. Wan fu den gwenti dati na ’a priti di den ben e priti den krosi’. Yu o leisi tu fu wan nyanyan-sani di den ben e kari mana, èn fu wan moni di den ben e kari talenti (Eksodes 16:31; Yosua 13:2; 2 Samuel 3:31; Mateyus 18:24). Kande yu o bruya te yu leisi fu ala den sani disi. Te yu ben o go na wan kondre di yu no sabi, yu ben o breiti te wan sma ben o yepi yu fu frustan sani, a no so? Yu wani wan sma yepi yu tu fu frustan Bijbel?

SMA BEN KISI YEPI NA INI OWRUTEN

Sensi di sma bigin skrifi Bijbel na ini 1513 Fosi Krestes, den ben e yepi trawan fu frustan san skrifi na ini. Fu eksempre, Moses, a fosi fesiman fu den Israelsma, ben „tyari den wèt kon na krin” gi den.​—Deuteronomium 1:5.

Sowan 1000 yari baka dati, yu ben abi leriman ete di ben sabi fruklari Bijbel gi sma. Na ini a yari 455 Fosi Krestes wan bigi grupu Dyu ben kon makandra na wan pren na ini a foto Yerusalem. Pikin-nengre ben de na ini a grupu disi tu. Leriman ben de drape di ben e ’leisi a santa buku nanga wan tranga sten’. Ma den no ben e leisi en wawan. „Den yepi a pipel fu kon frustan den sani di den leisi komoto na ini a wètbuku.”​—Nehemia 8:1-8.

Sowan 500 yari baka dati, Yesus Krestes ben e tyari Bijbel kon na krin gi sma tu. Fu taki en leti, den sma ben sabi en moro furu leki wan leriman (Yohanes 13:13). A no ben e gi wanwan sma leri nomo, ma a ben e gi leri tu na bigi grupu sma. Wan leisi a taki nanga wan bigi ipi sma di a ben hori wan prenspari lezing na tapu wan bergi. „Ala den sma fruwondru fu a fasi fa a ben gi leri” (Mateyus 5:1, 2; 7:28). Na a bigin fu a yari 33, Yesus ben taki nanga tu disipel fu en di ben e waka go na wan dorpu krosibei fu Yerusalem. Yesus ’meki den frustan finifini san skrifi na ini Gado Buku’.​—Lukas 24:13-15, 27, 32.

Den disipel fu Yesus ben e yepi sma tu fu frustan Gado Wortu. Wan leisi, wan heihei man fu Etiopia ben e leisi wan pisi fu Bijbel. A disipel Filipus go na en, dan a aksi en: „Yu sabi san yu e leisi?” Na Etiopiaman piki en: „We, fa mi ben sa sabi dati dan, efu nowan sma e leri mi?” Baka dati, Filipus fruteri en san a pisi di a leisi wani taki.​—Tori fu den apostel 8:27-35.

YEPI DE NA INI A TEN DISI

Neleki den sma fu owruten di ben e gi leri fu Bijbel, Yehovah Kotoigi na ini a ten disi e gi sma Bijbel leri na ini 239 kondre na heri grontapu (Mateyus 28:19, 20). Ibri wiki den e yepi moro leki neigi milyun sma fu frustan Bijbel. Furu fu den sma disi no de fu a Kresten bribi. Sma no abi fu pai fu studeri Bijbel nanga Yehovah Kotoigi èn den kan studeri na oso noso na wan tra presi di bun gi den. Son sma e studeri nanga yepi fu telefon, noso den e gebroiki den computer noso cel fu studeri tapu Internet.

Grantangi, taki nanga Yehovah Kotoigi fu sabi moro fini fa yu kan bigin nanga wan Bijbelstudie. Yu o si taki Bijbel a no wan buku di yu no man frustan. Na presi fu dati, yu o si taki Bijbel „bun fu gi leri, fu gi rai, fu poti sani kon reti èn fu gi piri-ai na wan reti fasi”. Na so yu ’kan kon bun dorodoro èn yu kan de srekasreka fu du ibri bun wroko’.​—2 Timoteyus 3:16, 17.