KAPITEL 20

Gado e kisi glori te wi e yepi wi brada nanga sisa di de na nowtu

FU SAN A KAPITEL E TAKI

Kresten e sori lobi te rampu de

1, 2. (a) Na ini sortu nowtu den Kresten na ini Yudea ben de? (b) Sortu yepi den Kresten na ini Yudea kisi na wan lobi-ati fasi?

NA INI a yari 46 Baka Krestes wan angriten ben de na ini Yudea. Fu di furu nyanyan no ben de, meki a ben diri so te, taki den Dyu Kresten no ben man bai en. Angri ben e kiri den èn notinoti ben de fu nyan. Ma Yehovah yepi den. A du wan sani di a no ben du ete gi nowan disipel fu Krestes. San a du?

² Na ini Antiokia nanga Siria den Dyu Kresten nanga den Kresten di no ben de Dyu, yere san miti den Kresten na ini Yerusalem nanga Yudea. Dati meki den tyari moni nanga tra sani kon na wán fu yepi den brada nanga sisa fu den. Baka dati den meki Barnabas nanga Saulus tyari den sani dati gi den gemeente owruman na ini Yerusalem. (Leisi Tori 11:27-30; 12:25.) A no de fu taki dati a naki na ati fu den Kresten na ini Yudea di den brada nanga sisa fu Antiokia sori lobi gi den na a fasi disi!

3. (a) Fa Gado pipel na ini a ten disi e teki na eksempre fu den Kresten di ben e libi na ini Antiokia? Gi wan eksempre. (Luku sosrefi a faki „A fosi leisi di Kotoigi fu furu kondre yepi trawan di de na nowtu”.) (b) Na sortu aksi wi o poti prakseri na ini a kapitel disi?

³ Disi na a fosi leisi di Bijbel taki fa Kresten fu a wan kondre yepi den Kresten brada nanga sisa di e libi na wan tra kondre. Na ini a ten disi wi e teki na eksempre fu den brada nanga sisa fu Antiokia. Te wi kon sabi taki wi brada nanga sisa na ini wan tra kondre de na nowtu, dan wi e yepi den.a Wan fu den frantwortu di wi leki Kresten abi, na fu yepi trawan di de na nowtu. Meki wi poti prakseri na dri aksi di o yepi wi fu frustan a tori disi moro bun: Fu san ede wi e si a yepi di wi e yepi wi brada nanga sisa, leki santa wroko? Fu san ede wi e yepi wi Kresten brada nanga sisa? Sortu wini disi e tyari kon?

Fu san ede a yepi di wi e yepi trawan na „santa wroko”?

4. Sortu wroko wi musu du soleki fa Paulus taigi den Kresten na ini Korente?

⁴ Na ini a di fu tu brifi di Paulus skrifi gi den Korentesma, a taki fu tu wroko di Kresten musu du. A ben skrifi a brifi disi gi den salfu Kresten, ma na ini a ten disi den sani di a skrifi abi fu du tu nanga den „tra skapu” fu Krestes (Yoh. 10:16). Wan fu den wroko di Paulus taki dati wi musu du, na fu „fruteri sma fa den kan kon bun baka nanga [Gado]”. Wi e du dati te wi e preiki gi sma èn te wi e studeri Bijbel nanga den (2 Kor. 5:18-20; 1 Tim. 2:3-6). A tra wroko di wi musu du, na „fu yepi den santawan” (2 Kor. 8:4). Na ini Grikitongo den pisi di vertaal nanga „a wroko fu fruteri sma fa den kan kon bun baka nanga [Gado]” èn „yepi den santawan” e kon fu a Griki wortu diakonia. Fu san ede a prenspari fu sabi disi?

5. Fu san ede a prenspari fu yepi wi brada nanga sisa di de na nowtu?

⁵ Di Paulus gebroiki a srefi Griki wortu gi ala tu sani, a sori taki a yepi di wan Kresten musu yepi en brada nanga sisa prenspari a srefi leki den tra wroko di Kresten musu du na ini a gemeente. Na ini a fosi brifi di a skrifi gi den Korentesma, a ben taki: „Difrenti diniwroko de, ma toku na wán Masra nomo de. Difrenti fasi de fa a yeye e wroko, . . . ma na a srefi yeye e meki den sma du ala den sani disi” (1 Kor. 12:4-6, 11). Fu taki en leti, Paulus taki dati ala den wroko di wi e du na ini a gemeente na „santa wroko” (Rom. 12:1, 6-8).b Dati meki wi kan frustan fu san ede Paulus ben si en leki wan prenspari sani fu meki ten tu „fu yepi den santawan”!—Rom. 15:25, 26.

6. (a) Fu san ede a yepi di wi e yepi wi brada nanga sisa na wan prenspari pisi fu wi anbegi? (b) Fruteri fa wi e yepi wi brada nanga sisa na heri grontapu. (Luku a pisi „San fu du te rampu de?”)

⁶ Paulus yepi den Kresten fu Korente fu frustan san a yepi di den e yepi den tra Kresten, abi fu du nanga na anbegi fu Yehovah. Paulus tyari kon na krin taki Kresten di e yepi trawan di de na nowtu, e du disi fu di den „e gi yesi na a bun nyunsu fu Krestes” (2 Kor. 9:13). Fu di Kresten wani du san Yesus leri den, meki den e yepi den brada nanga sisa fu den. Paulus taki dati den bun sani di den e du gi den brada nanga sisa na fasi fa ’Gado e sori a bun-ati fu en di bigi moro ala tra sani’ (2 Kor. 9:14; 1 Petr. 4:10). Dati meki A Waktitoren fu 1 december 1975 ben taki a sani disi fu a yepi di wi e yepi wi brada nanga sisa: „Wi kan de seiker taki Yehovah Gado nanga en Manpikin Yesus Krestes e si a wroko disi leki wan trutru prenspari sani.” Iya, a yepi di wi e yepi wi brada nanga sisa na wan prenspari pisi fu wi anbegi.—Rom. 12:1, 7; 2 Kor. 8:7; Hebr. 13:16.

Fu san ede wi e yepi wi brada nanga sisa di de na nowtu?

7, 8. San na a fosi sani fu san ede wi musu yepi den wan di de na nowtu? Tyari disi kon na krin.

⁷ Fu san ede wi e yepi wi brada nanga sisa di de na nowtu? Paulus piki na aksi disi na ini a di fu tu brifi di a skrifi gi den Korentesma. (Leisi 2 Korentesma 9:11-15.) Na ini den vers disi Paulus e taki fu dri prenspari sani fu san ede wi musu ’wroko fu a bun fu trawan’, noso fu san ede wi musu yepi den te den de na nowtu. Meki wi luku den wan-fru-wan.

⁸ (1) Te wi e yepi den wan di de na nowtu, dan Yehovah e kisi glori. Luku omeni leisi Paulus e sori den brada nanga sisa fa Yehovah Gado e kisi glori te wi e du bun gi trawan. Na apostel ben memre den taki „sma o taki Gado tangi” èn taki ’furu sma o taki Gado tangi’ te wi du disi (Vers 11, 12). A sori taki te Kresten e yepi sma di de na nowtu, dan sma „o gi Gado glori” èn den o wani prèise en fu di a ’sori den a bun-ati fu en di bigi moro ala tra sani’ (Vers 13, 14). Te fu kaba Paulus taki fu a wroko disi: „Tangi fu Gado taki a gi wi wan kado di bigi pasa marki.”—Vers 15; 1 Petr. 4:11.

9. Gi wan eksempre di e sori fa sma e bigin denki tra fasi fu wi te den e si fa wi e yepi trawan di de na nowtu.

⁹ Neleki Paulus, den futuboi fu Gado na ini a ten disi e si a yepi di den e yepi trawan leki okasi fu gi Yehovah glori èn fu moi a leri fu en (1 Kor. 10:31; Tit. 2:10). Fu taki en leti, furu sma e bigin denki tra fasi fu Yehovah nanga den Kotoigi fu en te den e si fa wi e yepi trawan di de na nowtu. Fu eksempre, wan uma ben poti wan bord na tapu en doro pe skrifi: „Yehovah Kotoigi no musu kon dya.” Ma baka di wan bigi winti pori a heri kontren, a si fa sma ben e yepi fu bow wan oso na abrasei fu en. Omeni dei langa a luku fa den sma disi e wroko so switi nanga makandra. Te fu kaba a go aksi suma na den. Di a kon sabi taki na Yehovah Kotoigi, a ben e fruwondru, dan a taki: „Somaar mi ben e denki takru fu unu.” San pasa baka dati? A puru a bord na tapu en doro.

10, 11. (a) Sortu ondrofenitori e sori taki wi e gi wi brada nanga sisa „ala san den abi fanowdu”? (b) Sortu brochure de wan yepi gi den Kotoigi di e go yepi trawan di de na nowtu? (Luku a faki „Wan brochure gi den wan di e go yepi te rampu de”.)

¹⁰ (2) Wi e gi wi brada nanga sisa „ala san den abi fanowdu” (2 Kor. 9:12a). Te wi brada nanga sisa de na nowtu, dan wi wani yepi den wantewante èn wi wani gi den san den abi fanowdu. Fu san ede? Fu di a Kresten gemeente de leki „wán skin”, èn „efu wán pisi fu a skin e pina, ala den tra pisi e pina tu” (1 Kor. 12:20, 26). Fu di wi abi lobi nanga sari-ati gi makandra, meki furu brada nanga sisa na ini a ten disi de klariklari fu poti den eigi tori na wan sei, fu go yepi tra brada nanga sisa di kisi fu du nanga wan rampu (Yak. 2:15, 16). Fu eksempre, baka di wan tsunami ben de na Yapan na ini 2011, a bijkantoro fu Amerkankondre seni wan brifi gi den Bowkomte na ini Amerkankondre fu aksi den efu „wan tu brada” de di man go yepi bow Kownukondre zaal na Yapan. San ben de a bakapisi? Na ini wan tu wiki nomo, pikinmoro 600 brada nanga sisa gi den nen fu go yepi. Den ben agri srefi fu pai nanga den eigi moni fu go na Yapan! A bijkantoro fu Amerkankondre taki: „Wi no ben e fruwakti taki someni sma ben o wani go yepi.” Wan brada fu Yapan ben aksi wan fu den Kotoigi fu wan tra kondre fu san ede a kon yepi den. A piki: „Wi nanga den brada nanga sisa fu Yapan na ’wán skin’. Te den e pina, wi e pina tu.” Fu di Kotoigi abi lobi gi makandra, meki son leisi den e go yepi den brada nanga sisa na presi pe furu ogri de, awinsi den kan lasi den libi srefi.c—1 Yoh. 3:16.

Switserland, 1946

A FOSI LEISI DI KOTOIGI FU FURU KONDRE YEPI TRAWAN DI DE NA NOWTU

NA INI september 1945, wan tu mun baka di a Di Fu Tu Grontapufeti kaba na ini Europa, Brada Knorr meki bekènti taki den wani tyari sani kon na wán fu yepi den brada nanga sisa na ini den kondre mindrisei fu Europa.

Wan tu wiki baka di Brada Knorr meki a sani disi bekènti Kotoigi na ini Kanada, Amerkankondre nanga tra kondre bigin tyari krosi nanga nyanyan kon na wán fu seni den gowe. Na ini yanuari 1946 den bigin seni den sani disi gi den brada nanga sisa na ini Bakrakondre, Belgia, Bulgaria, Deinsikondre, Doisrikondre, Fensikondre, Fransikondre, Grikikondre, Hongaria, Ingrisikondre, Italiakondre, Noorwegen, Oostenrijk, Polen, Rumeinia, Tyeko-Slowâkia, èn China nanga Fillipijnen.

A no wán leisi nomo den du a sani disi. Den tan seni sani gi den tu nanga afu yari langa! Na ini a pisi ten dati sowan 85.000 brada nanga sisa seni moro leki 300.000 kilo nyanyan, moro leki 450.000 kilo krosi èn moro leki 124.000 susu gi den brada nanga sisa na ini den kondre pe a feti ben de. Na ini augustus 1948 den tapu nanga a bigi wroko disi. Wan Waktitoren na ini 1949 taki: „A no de fu taki dati disi ben de wan moi fasi fa wi sori lobi gi makandra. Wi sabi taki den brada nanga sisa du disi fu gi Masra grani aladi den hori na prakseri taki den sani disi ben o yepi den trawan fu go doro na ini a tru anbegi. Dati meki den si en leki wan bigi grani fu man yepi den brada nanga sisa fu den na so wan fasi.” A sani disi meki taki furu sma bigin prèise Yehovah, furu brada nanga sisa kisi yepi, èn a wánfasi fu den brada nanga sisa na heri grontapu kon moro tranga.

¹¹ Sma di no de Kotoigi abi warderi tu gi a wroko di wi e du te rampu de. Na ini 2013 wan rampu ben de na ini a distrikt Arkansas na Amerkankondre. Wan koranti ben fruteri fa den Kotoigi kon fu yepi wantewante. A taki: „Yehovah Kotoigi e orga a wroko fu den so bun, taki den sabi soifri san fu du te rampu de.” Iya, soleki fa na apostel Paulus ben taki, wi e gi wi brada nanga sisa „ala san den abi fanowdu” te den de na nowtu.

12-14. (a) Fu san ede a prenspari fu yepi den wan di de na nowtu fu go doro nanga a diniwroko fu den? (b) Fa den sani di den brada nanga sisa taki e sori o prenspari a de fu go doro nanga a diniwroko?

¹² (3) Wi e yepi den wan di de na nowtu fu go doro nanga a diniwroko fu den. Fu san ede disi de prenspari? Paulus ben taki dati den sma di e kisi yepi o wani „taki Gado tangi” (2 Kor. 9:12b). A moro bun fasi fa den wan di de na nowtu kan taki Gado tangi, na fu go doro nanga a diniwroko fu den so esi leki a man (Fil. 1:10). Wan Waktitoren fu 1945 taki: „Paulus ben feni en bun . . . taki den brada nanga sisa tyari moni nanga tra sani kon na wán, fu di a ben o de wan yepi gi . . . den tra Kresten di ben de na nowtu. Na so den ben o kisi krakti fu man du a preikiwroko gi Yehovah èn den ben o man poti moro prakseri na a wroko dati.” Na fu a srefi sani dati ede wi e yepi wi brada nanga sisa na ini a ten disi. Te den man bigin preiki baka den kan trowstu den birtisma èn den srefi e kisi deki-ati tu.—Leisi 2 Korentesma 1:3, 4.

¹³ Luku san son brada nanga sisa taki di den ben kisi na okasi fu preiki baka fu di den trawan kon yepi den èn gi den deki-ati. Wan brada taki: „A ben de wan blesi di wi ben man go baka na ini a preikiwroko. Te wi ben e pruberi fu trowstu den sma na ini a preikiwroko, dan wi ben frigiti den problema fu wi na a momenti dati.” Wan sisa taki: „A rampu ben pori ala sani. Ma te mi ben e poti prakseri na a preikiwroko, dan mi no ben e denki den sani dati. Mi ben e firi so korostu.” Wan tra sisa taki: „Ala sani na wi lontu ben bruya, ma a preikiwroko ben yepi mi osofamiri fu poti prakseri na a moi howpu di wi abi. Te wi ben e fruteri den sma taki wan nyun grontapu o kon, dan dati ben e tranga wi bribi taki ala sani o kon nyun.”

¹⁴ Wan tra sani di wi brada nanga sisa musu pruberi fu du wantewante baka wan rampu, na fu bigin nanga den konmakandra. Luku san pasa nanga Kiyoko, wan sisa fu Yapan di ben pasa 55 yari kaba. A tsunami ben pori ala sani di a ben abi. Na soso den krosi na en skin èn den susu na en futu a ben abi èn a no ben sabi san fu du. Dan wan owruman taigi en taki den ben o hori konmakandra na ini a wagi fu en. Kiyoko taki: „Na so mi, na owruman, en wefi nanga wan tra sisa ben e sidon na ini a wagi e hori konmakandra. A no ben de wan konmakandra soleki fa wi gwenti hori na ini wan zaal, ma safrisafri mi frigiti a heri tsunami. A ben de leki wan wondru. Mi ben firi so korostu. A konmakandra dati sori mi o prenspari a de taki Kresten musu kon makandra.” Wan tra sisa di go na den konmakandra baka wan rampu, taki: „Den konmakandra yepi mi fu horidoro!”—Rom. 1:11, 12; 12:12.

Te wi e yepi den wan di de na nowtu, dan dati e tyari bun bakapisi fu ala ten

15, 16. (a) Di den Kresten fu Korente yepi den Kresten fu Yerusalem, dan sortu wini den alamala kisi? (b) Fa wi srefi e kisi wini te wi e yepi wi brada nanga sisa di de na nowtu?

¹⁵ Di Paulus ben sori den Korentesma taki Kresten musu yepi makandra, dan a ben sori den sortu wini den nanga tra Kresten ben kan kisi te den ben o du dati. A ben taki: „Den [Dyu Kresten na ini Yerusalem di kisi yepi] e begi fayafaya gi unu èn den e sori taki den lobi unu, fu di Gado sori unu a bun-ati fu en di bigi moro ala tra sani” (2 Kor. 9:14). Iya, fu di den Kresten na ini Korente ben de klariklari fu yepi den Dyu Kresten na ini Yerusalem, meki den Dyu Kresten ben o begi gi den Kresten na ini Korente awinsi den no ben de Dyu. Den ben o abi moro lobi gi den tu.

¹⁶ A Waktitoren fu 1 december 1945 ben sori fa den sani di Paulus taki e pasa tu na ini a ten disi te wi e yepi trawan. A taki: „Te a wan grupu Kresten e yepi wan tra grupu di de na nowtu, dan a wánfasi fu a santa pipel fu Gado e kon moro tranga!” Na dati den brada nanga sisa e ondrofeni te den e yepi trawan na ini a ten disi. Wan owruman di ben yepi baka wan bigi frudu, taki: „Di mi yepi mi brada nanga sisa mi kon lobi den moro.” Wan sisa di ben de nanga tangi taki den brada nanga sisa kon yepi en, taki: „Te mi e luku a wánfasi di wi abi, dan mi man si kaba fa a libi o de na ini a Paradijs na grontapu.”—Leisi Odo 17:17.

17. (a) Fa Yesaya 41:13 e kon tru te brada nanga sisa e yepi den wan di de na nowtu? (b) Fruteri wan tu ondrofenitori di e sori fa Yehovah e kisi glori èn fa a wánfasi fu wi e kon moro tranga te wi e yepi wi brada nanga sisa di de na nowtu. (Luku sosrefi a pisi „Brada nanga sisa fu heri grontapu e go yepi”.)

¹⁷ Te den brada nanga sisa e kon yepi te rampu de, dan den wan di de na nowtu e si na wan moi fasi fa a pramisi fu Gado e kon tru. A taki: „Mi, Yehovah, na yu Gado di e grabu yu reti-anu hori. Mi na a sma di e taigi yu: ’No frede. Misrefi o yepi yu’” (Yes. 41:13). Wan sisa di kisi fu du nanga wan rampu, taki: „Mi ben lasi-ati di mi si fa ala sani ben pori. Ma Yehovah langa en anu gi mi. Mi no abi wortu fu taki fa mi e warderi a yepi di den brada nanga sisa gi mi.” Baka wan rampu tu owruman skrifi fa den gemeente fu a kontren dati ben firi: „A gronseki tyari furu sari kon, ma Yehovah meki den brada nanga sisa yepi wi. Wi ben leisi ondrofenitori fa brada nanga sisa e yepi trawan di de na nowtu, ma now wi si dati nanga wi eigi ai.”

WAN SANI DI KENKI EN HERI LIBI

SORTU krakti a kan abi tapu yonguwan te den e go yepi sma na presi pe rampu de? Luku san pasa nanga Peter Johnson di ben du dati di a ben abi 18 yari. A taki: „Di wi go yepi den brada nanga sisa, mi si fa den ben de nanga tangi èn mi ondrofeni omeni prisiri wan sma e kisi te a e yepi trawan. A sani disi ben abi furu krakti na mi tapu èn a meki taki mi ben wani gebroiki mi libi fu du ala san mi man gi Yehovah.” Baka dati Peter bigin pionier. A go wroko na Betel tu èn a tron wan memre fu wan Bowkomte. Peter taki: „Sensi di mi go yepi den brada nanga sisa na ini 1974, mi heri libi kenki.” Yu yongu ete? Yu kan teki na eksempre fu Peter? Kande yu libi o kenki tu èn kande yu o wani du moro gi Yehovah te yu e go yepi yu brada nanga sisa di de na nowtu!

Yu kan yepi tu?

18. San yu kan du efu yu wani go yepi pe rampu de? (Luku sosrefi a faki „Wan sani di kenki en heri libi”.)

¹⁸ Yu wani yepi yu brada nanga sisa tu te wan rampu de? Hori na prakseri taki furu fu den brada nanga sisa di e go yepi pe rampu de, na sma di e yepi bow Kownukondre zaal. Sobun, yu kan taigi den owruman taki yu wani gi yu nen fu yepi bow Kownukondre zaal. Wan owruman di abi ondrofeni na ini a wroko fu yepi sma di de na nowtu, gi a rai disi: „Soso te wan Rampu Komte seni kari yu, dan yu kan go yepi na wan presi pe rampu de.” Na a fasi disi ala sani o man orga bun te wi e go yepi den wan di de na nowtu.

19. Fa wi e sori taki wi na trutru bakaman fu Krestes?

¹⁹ Te wi e yepi den wan di de na nowtu, dan dati na wan moi fasi fa wi e gi yesi na Krestes di taki dati wi musu „lobi makandra”. Te wi e sori lobi na so wan fasi, dan wi na trutru bakaman fu Krestes (Yoh. 13:34, 35). A de wan bigi blesi na ini a ten disi fu abi so furu brada nanga sisa di de klariklari fu yepi den wan di de na nowtu èn di e horibaka gi Gado Kownukondre. Na so den e gi Yehovah glori!

a A kapitel disi e taki fu a wroko di Kotoigi du fu yepi den brada nanga sisa fu den. Ma furu tron den e yepi tra sma tu di no de Kotoigi.—Gal. 6:10.

b Di Paulus ben taki fu „dinari ini a diniwroko”, dan a gebroiki a wortu diakonos tu.—1 Tim. 3:12.

c Luku na artikel „Onze familie van gelovigen in Bosnië helpen” na ini De Wachttoren fu 1 november 1994, bladzijde 23-27.

BRADA NANGA SISA FU HERI GRONTAPU E GO YEPI

CENTRAAL AFRIKA NANGA WEST-AFRIKA

Na ini 1994 sowan 800.000 sma noso moro leki dati dede na ini Rwanda di tu lo na ini a kondre ben e kiri makandra. A sani disi meki taki furu sma lowe go na tra kondre na ini Centraal Afrika. Ma disi ben tyari problema kon na ini den kondre dati, fu di tumusi furu sma ben kon lai na ini den loweman-kampu. Nanga opolani den Yehovah Kotoigi na ini Belgia, Fransikondre, nanga Switserland seni sowan 300.000 kilo krosi, dresi, tenti, nyanyan nanga tra sani fu yepi den brada nanga sisa fu den di ben de na nowtu. Baka wan tu wiki nomo den sani disi doro den brada nanga sisa di ben de na nowtu.

Wan grupu Kotoigi fu Fransikondre di ben de datra nanga ati-oso zuster ben go na Afrika tu fu yepi den brada nanga sisa di ben e nyan pina na den presi pe feti, angriten noso siki ben de. Na ini den tu yari di pasa a grupu disi yepi moro leki 10.000 sikisma. A wroko di den du meki taki sma bigin prèise Yehovah nanga en organisâsi. Wan fu den sisa di de wan ati-oso zuster taki: „Te wi doro na wan presi fu yepi wi brada nanga sisa, dan nanga lespeki den sma e taki: ’Den sma disi na Yehovah Kotoigi. Den kon yepi den brada nanga sisa fu den.’” Wan fu den sisa di kisi yepi taki: „Grantangi mi sisa. Grantangi Yehovah!”

Son leisi den brada nanga sisa e go yepi tu te wan ongoloku pasa. Na ini 2012 wan ongoloku pasa na tapu wan pasi na ini Nigeria. Tinadri Kotoigi fu wan pikin gemeente lasi libi èn 54 sma ben kisi hebi mankeri. Den brada seti sani, so taki ibri sma di ben de na ini na ongoloku ben kan kisi sorgu dei nanga neti. Di wan siki uma na a ati-oso drape si fa den Kotoigi ben e yepi den siki brada nanga sisa fu den, a bel a domri fu a kerki fu en, dan a taki: „Nowan sma fu wi kerki kon luku mi. Kon luku den Yehovah Kotoigi na a ati-oso dyaso, dan yu o si fa sma e sori trutru lobi!”

A sari taki so wan sani pasa nanga den brada nanga sisa fu a pikin gemeente disi, ma den kisi furu trowstu fu den tra brada nanga sisa fu den di sori lobi gi den na so wan fasi. Di son brada nanga sisa fu a gemeente dati si fa den trawan ben kon yepi den, dan den kisi deki-ati tu fu du moro na ini a preikiwroko. Fosi na ongoloku pasa a gemeente ben abi 35 preikiman. Ma na ini wán yari nomo den ben kon abi 60 preikiman.

AUSTRALIA

Na ini 2013 di wan bigi frudu kon na a sesyoro fu Queensland, 70 Kotoigi lasi den oso. Mark, Rhonda nanga na umapikin fu den lon komoto na ini na oso fu den di ben lai nanga watra. Di den doro na wan presi pe den sma fu a rampu ben e kisi yepi, a presi ben lai nanga sma. Rhonda taki: „Someni sma ben de taki wi no ben man sidon srefi.” Den helikopter di ben e opo èn saka kon ben e meki wan lo babari èn dati ben meki sani kon moro bruya srefi. Fu di Rhonda ben e broko en ede, a aksi en masra Mark: „San wi o du?” Mark begi Yehovah fayafaya fu yepi den. Rhonda taki: „Baka sowan 30 miniti wan oto stop èn dri brada komoto na ini. Di den si wi den taki: ’Un kon nanga wi. Wi o tyari unu go na wan brada oso.’” Rhonda taki: „Wortu no de fu taki fa wi ben e firi na a momenti dati di wi si fa Yehovah organisâsi sorgu gi wi na so wan lobi-ati fasi.”

Moro leki 250 brada nanga sisa go yepi den Kotoigi di kisi fu du nanga a rampu dati. Wan owru brada taki: „Wan grupu Kotoigi kon wantronso, dan den bigin wroko leki mira fu krin mi oso. Noiti mi nanga mi wefi o frigiti fa den kon yepi wi.”

BRASYONKONDRE

Na ini 2008 wan bigi frudu meki taki son pisi fu den bergi na ini a foto Santa Catarina broko fadon èn sowan 80.000 sma lasi den oso. Wan sma di ben e tan drape taki dati ’a ben gersi wan tsunami. Soso tokotoko, klèidoti nanga bon ben saka kon na den tapu’. Son brada nanga sisa di ben lasi den oso ben feni sribipresi na ini wan kongreshal. Márcio di ben e sorgu gi a kongreshal taki: „A wan-enkri sani di den ben abi, ben de den krosi na den skin di ben lai soso tokotoko.” Wan sisa taki: „Wi oso broko fadon. A ben de wan hati sani fu si fa dati pasa na ini wan tu sekonde nomo, ma noiti mi o frigiti fa den brada nanga sisa fu wi ben kon trowstu wi. Furu fu den ben taki sani di sori krin taki den lobi wi! A sani disi leri mi taki a bun fu abi warderi gi den sani di Yehovah e gi wi.”

Den tyari sani kon na wán na ini wan kongreshal na ini Santa Catarina na Brasyonkondre fu yepi den Kotoigi di kisi fu du nanga wan rampu na ini 2009

Na Rio de Janeiro a e pasa furu tron taki hebi alen e meki tokotoko saka kon fu den bergi èn a e pori furu presi na ini a birti drape. Den brada seti wan Rampu Komte spesrutu gi den sortu rampu disi. Te a bari na nyunsu taki so wan rampu o kon na wan presi, dan den brada fu a presi dati e seni boskopu gi a Rampu Komte. A no e teki langa fosi den seni sani nanga truck fu yepi den Kotoigi na den presi dati. Na tapu den truck skrifi „Yepi fu Yehovah Kotoigi”. Ala den brada nanga sisa di e kon yepi sabi sortu wroko den musu du èn fa den musu du dati. Den e weri dyakti di e sori krin taki den na Yehovah Kotoigi. Den e wroko makandra nanga den brada fu den Ati-oso Kontakti Komte fu yepi den brada nanga sisa di kisi mankeri. Den e tyari nyanyan, watra, dresi, krosi nanga sani fu krin oso. A no makriki srefisrefi fu puru a tokotoko na ini den oso. No so langa pasa wan fu den oso ben lai someni tokotoko taki 60 sma ben de fanowdu fu puru a tokotoko poti na ini fo truck!

SAN FU DU TE RAMPU DE?

Den owruman musu kon sabi pe ala preikiman de
Den owruman musu fruteri dati na a fesiman fu den owruman
A fesiman fu den owruman o seni boskopu gi a kring-opziener nanga tra brada di abi frantwortu. Dan den brada disi o seni boskopu gi a bijkantoro
So esi leki a man den o seni nyanyan, watra, tenti, krosi nanga dresi gi den Kotoigi pe a rampu de. Den o seni sma tu fu trowstu den èn fu tranga a bribi fu den
A bijkantoro o seni boskopu go na a Fesiman Komte fu a Tiri Skin fu fruteri fa a situwâsi de èn san den abi fanowdu
Wan Rampu Komte e orga sani fu yepi den brada nanga sisa na a pisi ten fu a rampu èn wan heri pisi ten baka dati
A Fesiman Komte e luku san musu du ete èn efu a de fanowdu den e seni brada nanga sisa fu tra kondre fu go yepi den wan di de na nowtu

WAN BROCHURE GI DEN WAN DI E GO YEPI TE RAMPU DE

NA INI yuni 2013 den brada meki a brochure „Fa Yehovah Kotoigi e yepi te rampu de” (Jehovah’s Witnesses and Disaster Relief). A brochure meki spesrutu gi den lantiman na ini Amerkankondre di e tiri a wroko fu yepi sma te rampu de. A e taki fu wan tu sani di wi du sensi a pisi ten fu 1945 fu yepi sma di de na nowtu. Wan karta fu grontapu de na ini tu di e sori taki wi du a wroko disi na ini furu kondre. Wan owruman di e yepi fu seti a wroko disi, taki: „Den brada di de memre fu den Rampu Komte e gebroiki a brochure disi te den e go taki nanga den lantiman fu den kontren pe furu rampu e pasa. Te den lantiman kon sabi fa wi e yepi sma di de na nowtu, dan a moro makriki gi wi fu kisi primisi fu go na den presi pe wan rampu pasa.”