AKSI 6
San mi kan du te pikin e dwengi mi fu du san den wani?
SAN YU BEN O DU?
Luku a tori disi: Te tu boi fu skoro e waka kon miti Brian, a e bigin beifi. Na tu leisi kaba a wiki disi, den e pruberi fu dwengi en fu smoko. Now den wani pruberi en baka.
A fosi boi e taki:
„Na yu wawan de baka? Mi abi wan sani gi yu.”
A e lafu wan doti lafu, dan a e pusu en anu go na ini en saka teki wan sani èn a e langa en gi Brian.
Brian e si taki a boi e hori wan sigaret na ini en anu. Now Brian en ati e naki moro snel.
A e taki: „Mi ben taigi yu kaba taki mi no e smoko, tòg?”
Now a tra boi e taki: „No du leki wan vriendje!”
Brian e teki deki-ati, dan a e taki: „Mi a no wan vriendje!”
A boi e poti en anu lontu Brian skowru, dan a e taki safri: „Yu kan teki en.”
A fosi boi e kon moro krosibei na Brian èn a e hori a sigaret na ini en fesi. A e taki safri: „Wi no o taigi nowan sma. Nowan sma o sabi, dus yu no abi fu frede.”
Efu yu ben de Brian, san yu ben o du?
DENKI A TORI!
Yu denki taki na gewoon den tu boi disi opo, dan den bigin smoko? A no sori so. Kande na tra pikin dwengi den. Èn fu di den ben wani taki trawan lobi den, meki densrefi bigin smoko tu.
Efu disi miti yu, san yu kan du so taki trawan no dwengi yu?
DENKI SAN KAN MITI YU
Bijbel e taki: „A koniwan si taki ogri o miti en èn a go kibri, ma a sma sondro ondrofeni waka go doro èn dati meki a musu kisi strafu.”—Odo 22:3.
Furu leisi yu kan sabi na fesi san kan miti yu. Kon meki wi taki dati yu si wan tu skoropikin di e smoko e waka kon. Te yu si kaba taki den o fruferi yu, dan yu o man sabi san yu musu du.
DENKI FA YU O FIRI
Bijbel e taki: „Tan abi wan bun konsensi.”—1 Petrus 3:16.
Aksi yusrefi: ’Fa mi o firi efu mi du san tra pikin wani?’ A tru taki den o lobi yu kande. Ma dati no o de fu langa. Fa yu o firi bakaten? Yu o kibri suma yu de, soso fu di yu wani meki den pikin fu yu klas lobi yu?—Eksodes 23:2.
LUKU SAN YU O DU
Bijbel e taki: „A koniwan e luku bun pe a e poti en futu.”—Odo 14:15.
Ala sma o abi fu teki bosroiti wan dei èn den o abi fu libi nanga dati. Bijbel e taki fu man leki Yosef, Yob nanga Yesus. Ala den man disi teki bun bosroiti. Ma Bijbel e taki tu fu man di teki don bosroiti. Den man dati na Kain, Esau nanga Yudas. Dus san yu o du?
Bijbel e taki: „Tan du bun” (Romesma 12:9). Te yu denki na fesi san kan pasa èn yu sabi kaba san yu o du, dan a no o muilek gi yu fu taigi den pikin krin fa yu e denki. Yu o firi bun tu.
Ma yu no abi fu hori wan lezing gi den pikin. Taigi den nomo taki yu no o du en. Dati sari kaba. Noso yu kan taigi den tu:
„Un libi mi!”
„Mi no e du den sortu sani dati!”
„Yu sabi taki mi no de nanga den sani dati tòg?”
Dus te pikin wani dwengi yu, dan piki den wantewante sondro fu tweifri. Te yu du dati, dan yusrefi o si taki den no o fruferi yu moro.
SAN YU KAN DU TE PIKIN E LAFU YU?
Te yu e meki tra pikin dwengi yu fu du san den wani, dan yu o tron leki wan robot fu den
San yu kan du te tra pikin e lafu yu? Kon meki wi taki dati den taigi yu: „San pasa? Yu frede? Yu a no wan bobo tòg?” Pikin lobi taki den sani disi te den wani dwengi trawan fu du san den wani. Fa yu ben o piki den? Yu kan du tu sani.
Yu kan gi den leti. Kande yu kan taki: „Ai, mi frede.” Dan taigi den syatu fu san ede yu no o du en.
Yu kan taki wan sani fu tapu den mofo. Sori den fu san ede yu no wani du en, dan yu kan taki: „Mi no ben denki taki so wan koni pikin leki yu ben o smoko!”
Efu den e tan dreigi yu, waka gowe! Want o moro yu o tan arki san den e taki, o moro den o wani dwengi yu. Ma te yu e waka gowe, dan yu e sori taki yu no o meki sma kenki yu kon de leki fa den wani.
Wi sabi taki ala ten pikin o wani dwengi trawan fu du san den wani. Ma yu srefi musu luku san yu wani du. Taki krin san yu e denki èn no meki sma tapu skreki gi yu. Iya, na yu srefi e bepaal san yu wani du nanga yu libi!—Yosua 24:15.