Meki wi go na fesi kon de publiki
1 San joe e prakseri noso firi efoe wan sma foe na fosi tron joe e jere taki ai gi wan piki tapoe na Wachttorenstudie noso efoe a e hori en fosi lezing tapoe na theokratis diniwrokoskoro? Joe no e firi taki joe e kisi dek’ati te joe e si na go na fesi foe en? Fa a de nanga joe égi jeje go na fesi? Disi de foe si gi joe nanga gi tra sma? Joe e hori sé nanga sé nanga na gro foe Jehovah organisaatsi? Wi no wani foe de soleki son sma foe soema Paulus ben taki: „Agen joe abi wan sma fanowdoe foe leri joe foe na bigin baka den gron sani foe den santa tori foe Gado” (Hebr. 5:12). Fa wi kan meki wi ’go na fesi kon de publiki gi ala sma’? — 1 Tim. 4:15.
GO NA FESI NA INI GI LERI NANGA FASI FOE TJARI WISREFI
2 Paulus ben taki gi Timóteus: „Poti alaten prakseri tapoe joesrefi èn na joe gi leri” (1 Tim. 4:16). Na dienstkomakandra e gi wi leri foe meki wi leri-bekwaamheid kon moro betre. Drape artikel foe Wi Kownoekondredienst e takmakandra foe na fasi fa wi kan gi leri tapoe osobijbelstudie, te wi e tjari go baka na ini na diniwroko oso foe oso. Wi e poti na rai disi ini wi libi èn wi e meki wi konifasi kon moro bigi ini ala sé foe dienst? — Odo 22:19.
3 Na theokratis diniwrokoskoro e gi wi heri moi rai foe jepi wi foe pristeri a boen njoensoe na tra sma. Joe e si a skoro disi leki wan seti foe Jehovah foe joe go na fesi na jejesé? Te joe e teki prati na a theokratis diniwroko-skoro, joe sa meki joe fasi foe doe sani boen ini na prékiwroko, kon moro betre èn kan gi trawan wan boen eksempre. — Loekoe Handleiding-boekoe, bladzijde 8, 9.
4 Go na fesi e kon na krin toe te wi e tjari wisrefi, wi taki èn wi maniri kon akroederi a Wortoe foe Gado. Tapoe na kontren disi Na bondroe kon na wan-boekoe, di wi e gebroiki now tapoe na boekoestudie foe studeri na ini, e gi materiaal di wi kan gebroiki heri boen. Na boekoe disi ben gi spesroetoe foe jepi ’foe wi gro kon lepi’ (Hebr. 6:1). Joe e loekoe ofoe e prakseri dipi ete wantron foe den bodoi di oenoe e kisi foe kan poti den na ini oen libi persoonlek? Meki ala sma kon si dati Gado Wortoe e wroko na ini joe. — 1 Thess. 2:13.
Meki moeiti foe kisi moro bigi grani
5 Jeje go na fesi e kon a krin toe te wan sma e meki moeiti foe kisi dienstgrani. Joe kan go na ini na jepi pionierdienst ini den moen di e kon? Joe kan sroiti joesrefi na den lin foe gewone pionier di e kon dé foe dé moro foeroe? Joe kan doe wroko pe na fanowdoe e firi moro tranga, ofoe joe kan feti foe kisi na zendingsdienst ofoe Betheldienst? (Loekoe Wi diniwroko-boekoe, kapiter 9.) Brada ini na gemeente kan sori den go na fesi foe di den e meki moeiti foe kan doe na ’heri moi wroko’ foe dinari na ini na diniwroko noso owroeman (1 Tim. 3:1, 13). Firi joesrefi fri foe takmakandra a afersi disi nanga owroeman ini joe gemeente ofoe nanga na kringopziener.
6 San de wantoe foe den sani di wi kan doe foe meki wi go na fesi kon publiki èn meki moeiti foe kisi moro bigi dienstgrani? Ibriwan foe wi kan meki moeiti foe sori den froktoe foe na geest na wan moro bigi fasi (Gal. 5:22, 23), Ooktoe a de prenspari foe fisiti komakandra doronomo, de faja prékiman foe a boen njoensoe, èn foe soekoe okasi foe de wan jepi èn dek’ati gi tra gemeente sma. Joe e doe boen foeroe moeiti na tapoe den kontren disi? ’Joe e doe joe diniwroko krinkrin’? (2 Tim. 4:5) Joe e doe joe theokratis toewijzing na wan getrow fasi èn joe e hori sé nanga sé nanga a waarheid foe di fajafaja joe e studeri na bijbel èn na jeje njanjan di komoto tradétradé na doro nanga jepi foe na „srafoe”? — Matt. 24:45-47.
7 Wan doronomo ipi foe njoensma di e go na a bergi foe Jehovah oso e poti tapoe ibriwan foe wi na fanowdoe foe gro na jejesé (Jes. 2:2, 3; 60:22). A seti foe sani disi e go miti en kaba! Na fanowdoe foe lepi sma di kan teki frantwortoe tapoe den, noiti ete ben de so bigi! Soboen: „Denki dipi foe den sani disi, prakseri en nanga joe heri ati, sodati joe go na fesi sa kon krin gi ala sma.” — 1 Tim. 4:13-15