Gi piki na a lobi foe Jehovah ini joe jongoe jari
1 Oenoe jongoewan oenoe e si na ini na gemeente den bewijsi psa marki foe Jehovah bigi lobi di e lontoe oenoe? Oenoe e prisiri en nanga na fasi tapoe san oenoe e gi piki na a lobi dati? Fa oenoe kan doe dati?
2 A moro bigi pisi foe oenoe abi papa nanga mama di lobi oenoe foedi den e sorgoe gi oenoe na ini skinfasi èn jejefasi, ooktoe den firi nanga na froestan foe oenoe foe djaranti oenoe foe wan boen bigin ini a libi. Disi na troetroe wan bigi blesi foe Jehovah. Boiti foe dati a ben sorgoe nanga jepi foe en organisatie foe wan toe boekoe èn tijdschrift artikel di meki spesroetoe gi oenoe foe jepi oenoe foe kakafoetoe gi a libi èn foe si den problema foe ala dé ondro ai. Efoe oenoe e njanboen foe den seti disi, dan oen sa de srekasreka boen ooktoe foe gi moeilek situwasi, di e broeja den disi ten jongoewan. Oenoe e si ala disi leki wan bewijsi dati Gado lobi oenoe? — 1 Joh. 4:8, 19.
3 Jehovah ben sorgoe dati wi alamala, jongoewan ofoe owroewan abi na bijbel. Èn na blesi foe na loesoeprijs na ini san a ben sorgoe nanga jepi foe en Manpikin Jezus Kristus, de net so boen foe gebroiki gi jongoewan di e sori bribi èn gi getrow owroewan. Oenoe abi na Kownoekondrehowpoe makandra nanga den pramisi di de na ini foe wan paradijs grontapoe, pe oenoe kan de fri foe sorgoe di e pina joe sodati someni disi ten jongoesma di no ben leri sabi Jehovah e soengoe go na ini.
4 Oen ati no e foeroe nanga waran gi Jehovah, soso kaba na a prakseri dati sondro foe a ben aksi oenoe srefi a ben doe someni gi oenoe? (Rom. 5:8) Ma fa oen kan gi piki tapoe wan praktis fasi na a lobi foe Jehovah boiti dati oenoe abi soso wan inisé firi foe grantangi?
SORI DEN FIRI FOE JOE NANGA JEPI FOE WROKO
5 Oenoe kan doe sani foe meki a waarheid de wan pisi foe oenoe. Oenoe kan poti en leki marki foe eksempre foe lési na heri bijbel ini wan jari. Oenoe kan doro na marki disi te oenoe nanga wan fasti bosroiti e lési fo ofoe féfi bladzijde ibridé. Leri fa oenoe kan gebroiki den index di wi abi na ini a kondre disi foe feni piki tapoe den aksi foe joe. Ondrosoekoe-wroko èn boen studi-gwenti sa jepi dati oenoe go a fesi na jeje fasi (Odo 2:2-4; 1 Tim. 4:15). Teki fesi foe sreka joesrefi tapoe den komakandra èn de srekasreka foe gi piki. Meki aantekening foe ede-punt tapoe konmakandra èn congres èn taki foe dati bakaten nanga tra sma. Nanga den sortoe serjoesoe moeiti disi oenoe e sori nanga dati opregti warderi gi den sani di ben doe gi oenoe èn oenoe sa gro na jejefasi. — 2 Petr. 1:5-8.
6 Sani de ooktoe di oenoe kan doe foe jepi a gemeente. Oenoe kan opo doe wan sani tapoe wan toemsi moi fasi tapoe a lobi foe Jehovah foedi oenoe tapoe praktis fasi o jepi owroe brada nanga sisa ofoe malengri brada nanga sisa. Oen ben go prakseri kaba foe gi geregeld wan bijdrage foe tapoe den onkostoe foe a Kownoekondrezaal. Soso kaba te joe e lési Markus 12:41-44 oenoe sa kisi jepi foe si dati wan pikin bijdrage foe wan sma di no abi foeroe Jehovah Gado nanga en Manpikin e warderi srefsrefi. Pristeri den dienst foe joe te den o krin na Kownoekondrezaal ofoe na prasi di lontoe en. Efoe na fanowdoe de dan okasi kan de ooktoe foe doe wroko tapoe congres nanga kringkonmakandra.
Jepi trawan na jejefasi
7 Na apostel Paulus ben opo foe tapoe wan boenfasi sani tapoe a lobi foe Jehovah foe di a ben du ala san a man foe jepi trawan tapoe jeje fasi. Awansi oen de jongoe, tokoe oenoe kan doe asrefi foedi oenoe tapoe wan progressief fasi e meki a bekwaamheid foe oenoe kon moro boen èn e gi moro ten na a diniwroko. Oenoe ben poti gi oensrefi ibri wiki ofoe ibri moen wan bepaalde joeroe leki marki? Foeroe jongoe prékiman ben ori bijbelstudi nanga skoromati ofoe trawan. Kande joe kan doe disi ooktoe efoe joe aksi Jehovah foe jepi èn e doe dek’ati moeiti foe doro dati. Efoe joe dopoe kaba, dan na jepi pionierdienst e pristeri joe wan toemsi moi okasi foe jepi ini joe skoro fakansi tra sma na ini jeje fasi. Joe kan gi trawan dek’ati foe de makandra nanga joe na ini na jepi-pionierdienst?
8 Kristensma e kisi a warskow foe no teki a no-ferdini boenfasi foe Gado èn misi a marki (2 Kor. 6:1). Meki na toemsi boen reactie tapoe Jehovah lobi bewijsi taki oenoe abi warderi gi san a ben doe gi oenoe. Efoe oenoe e memre oenoe Gran Mekiman ini oen jongoe jari. dan te na ini ala tego ten oenoe sa njan boen foe en lobi. — Prékiman 12:1.