Pristeri na bun nyunsu — Fri sondro frede, ma nanga takt
1 Di Petrus nanga Yohannes ben kisi na order fu tapu nanga preiki, den ben piki: „Fu taki fu wi sei, wi no man fu tapu fu taki fu den sani di wi si èn yeri” (Tori. 4:20). San ben yepi den fu taki nanga sowan fri sondro frede? Den ben seni „tranga begi” na Gado èn „ben kon furu nanga santa yeye èn ben taki na Wortu fu Gado fri sondro frede” (Tori. 4:31). Seiker wi ooktu sa kon furu nanga dek’ati fu preiki efu wi waka baka na eksempre fu den.
2 Ma fa wi kan taki fri sondro frede èn na a srefi ten de taktvol? Wan wortubukudefinitie fu takt na ’wan fini firi fu san wan sma kan du ofu taki sondro fu den naki futu’. Na poti fu wan gemeenschappelek fondamenti sa yepi wi fu de taktvol. Leri fa fu tak-go-tak-kon nanga sma sa yepi wi ooktu fu de taktvol. Èn sortu yepi sani wi ben sa man gebroiki moro betre leki Tak-go-tak-kon nanga yepi fu den buku fu yepi wi fu de fri sondro frede èn ooktu taktvol.
ABI BALANS
3 A kibri fu balans a mindri taki fri sondro frede nanga takt de prenspari fu meki a preikiwroko fu wi du nanga bun winimarki. San wi ben sa kan taki fu eksempre teige den sma di e iti na aksi kon: ’A no de so taki na ini ala fasi fu anbegi wan bun sani e kibri?’ Wan wantewante ma taktvol piki de fu feni tapu bladzijde 360 fu na Tak-go-tak-kon-buku. Son sma e aksi fu san-ede Kotoigi fu Yehovah no e moksi densrefi na sani di e yepi fu meki na maatschappij de moro bun fu libi na ini. Tapu bladzijde 224 nanga 225 difrenti tumsi bun punt e tyari kon na fesi di e yepi wi fu taki fri sondro frede ma nanga takt.
EKSEMPRE
4 Petrus ben taki dati wi ’mu de alaten klarklari fu ferdeidigi wisrefi a fesi fu ibriwan sma di e aksi fu wi wan reide fu na howpu di de na wi ini’. Baka dati a ben taki morofara dati wi mu du disi „nanga safri-atifasi èn dipi respeki” (1 Petrus 3:15). Iya, Petrus ben erken na fanowdu fu de fri sondro frede, ma ooktu fu gebroiki takt. Na bun winimarki fu den preikiman di ben waka baka den methode disi, skrifi ini den publikatie fu na Genootschap — Wachttoren 86 1/4 blz. 6, 7; Wachttoren 86 1/8 blz. 21, 24; Yaribuku 87 blz. 53, 54.
5 Fu di wi e fertrow tapu Yehovah ini begi, dan wi, soleki fa furu eksempre e sori, sa kisi na yepi fu na santa yeye, di sa tranga wi fu taki fri sondro frede èn nanga takt. — Tori. 5:29.