Bigin bijbelstudie foedi joe e gebroiki Na soekoe di libisma e soekoe Gado
1 Jesus ben taki: „Fosi na boen njoensoe [moesoe] foe preiki na ini ala nâsi” (Markus 13:10). Disi ben wani taki taki den disipel foe en ben sa kon miti nanga sma foe foeroe difrenti tongo, koeltoeroe èn relisi bakagron. A ben wani taki toe taki den disiten disipel foe en, Kotoigi foe Jehovah, ben sa abi na wroko foe leri ala sortoe foe sma.
2 Sondro misi na njoen boekoe foe wi Na soekoe di libisma e soekoe Gado (Bakratongo) sa jepi foeroe reti-ati sma moro foe feni na troe Gado, Jehovah, èn teki na pasi foe waarheid foe en (Joh. 4:21-24). Fa wi kan bigin wan bijbelstudie te wi e meki gebroiki foe na publikâsi disi?
FA WI KAN BIGIN WAN STUDIE
3 Na fondamenti foe wan bijbelstudie kande ben poti na a fosi fisiti, di joe ben kon sabi sortoe relisi na ososma ben abi. Na a fosi fisiti dati joe ben poti na prakseri foe na ososma kande tapoe wan bepaalde kapitel ofoe tapoe wan seiker paragraaf. Ne, ofoe na wan tra fasi, na srefi penti kan gebroiki leki wan wrokosani foe wan takimakandra di e tjari joe go na wan studie. Foe di joe e gebroiki den aksi na ondrosei foe na bladzijde, meki joe abi wan fondamenti foe gi tranga na den prakseri èn na takimakandra. A no de foe taki, taki wi no abi belangstelling foe meki wan kesekese bigin, ma na presi foe dati wi wani kon na wan reidelijk loekoe foe na materiaal. Efoe wi bigin now na ini na fosi kapitel foe na boekoe ofoe na wan tra presi, na marki foe wi moesoe de foe poti na prakseri foe na ososma te foe kaba tapoe kapitel 10, 15 èn 16. Fu san-ede?
4 A soekoe di sma e soekoe na troe Gado sondro foe misi moesoe doe nanga jepi foe Krestes. Jesus ben taki: „Mi na a pasi èn na waarheid èn na libi. No wan sma e kon na a Tata leki nanga jepi foe mi” (Joh. 14:6). Na wan krin fasi kapitel 10 e gi piki tapoe na aksi: „Jesus ben de na pasi foe go na Gado?” A e poeroe kon a krin sortoe boeweisi Jesus ben abi taki a abi na makti, fa wi doe sabi taki a no ben de wan sma foe wan anansitori, fa den ben taki foe en na fesi na ini bijbel profeititori, foe san-ede den fosi disipel foe en ben bribi ini en leki na pasi foe go na Gado èn fa wi sabi taki Gado ben feni en boen (Joh. 6:44, 45). Kapitel 15 èn 16 e handri foe „Wan drai kon baka na a troe Gado” èn „Na troe Gado èn joe tamara”.
MAN FOE SI NA FANOWDOE FOE NA STUDENTI
5 Baka difrenti studie wi kan feni en wan boen sani foe abra go na wan publikâsi pe den e behandel moro fondamenti bijbel waarheid, soleki na boekoe Joe kan libi foe têgo na ini wan paradijs na grontapoe. Foedi na boekoe Na soekoe di libisma e soekoe Gado (Bakratongo) na a fosi presi meki foe hari sma nanga foeroe difrenti bakagron go na a troe Gado, meki a de so taki no ibri kapitel sa taki nanga ala sma. Wi moesoe sabi fa wi moesoe fiti na pristeri foe wi èn den seti foe studie na a fanowdoe foe na sma srefi di de ini a tori. — 1 Kor. 9:19-22.
6 Foe eksempel kande wi ben libi na boekoe na baka na wan sma di ben taki taki a ben de wan kresten. Now na aksi foe na gobaka ben sa kan de: „Foe san-ede someni relisi de di e taki taki den de kresten?” Soboen kapitel 11 foe na fadon komoto na bribi èn kapitel 13 foe na Reformatie ben sa kan de na gron foe bigin wan studie. Te a sma e kon si fa na krestenhèit doe kon, dan wi sa jepi en foe beredeneer taki den bijbel leri de kontrari den krestenhèit leri di fadon komoto na bribi. Wi e howpoe taki na waarheid sa fri na jeje foe na sma dati, sotaki a man ofoe oema kan kweki wan matifasi nanga Jehovah Gado (Joh. 8:31, 32). Dan den kan go morofara nanga na studie na ini kapitel 15 nanga 16 ofoe na ini a Têgo libi-boekoe.
MITI SMA FOE DEN NO-KRESTEN RELISI
7 Te wi e studeri nanga sma di abi tra bribi overtoigi, dan alaten wi moesoe sori kresten lobi nanga taktik. Paulus ben poti krakti tapoe dati di a ben skrifi: „Meki na taki foe oenoe de alaten switi, moksi nanga sowtoe, sotaki joe sabi fa joe moesoe gi ibriwan sma wan piki” (Kol. 4:6). Na den hindoe sma wi kan proeberi kande foe bigin wan studie na tapoe bladzijde 372 na ondro na ede „Wan njoen grontapoe di pramisi”. Dan go morofara na ini kapitel 5 foe na hindoe bribi. Na sroto foe doro boen bakapisi na foe sabi den fanowdoe foe na sma di de na ini a tori. — Teki gersi Tori foe den apostel 17:22, 23.
8 Te wi abi foe doe nanga Moslim dan taktik de spesroetoe fanowdoe. Sondro foe misi kapitel 12 foe na islam sa de wan span sani gi den. Aladi na tori dati e tjari kon a krin, dan den e teki bijbel tekst skrifi leki wan sani foe gersi en èn wan sani di de kontrari en, spesroetoe foe bigin foe paragraaf 23. Wi e kari den sma foe prakseri foe den sani, akroederi na kari di na bijbel e gi: „’Kon now, èn meki wi poti afersi reti na mindri wi’, Jehovah e taki.” — Jes. 1:18; 1 Petr. 3:15.
9 Proeberi foe jepi sma foe difrenti relisi foe soekoe na troe Gado. No frigiti taki aladi wi kande e prani èn e gi watra, taki te foe kaba a de Gado ’di kan sorgoe taki na waarheid siri e tan gro’ te na gron boen. — 1 Kor. 3:6, 7; Mat. 13:18-23.