Prèise Jehovah nanga wan singi
1 Grantangi opo joe singiboekoe na a kafti na bakasei. San joe e si? Wan groepoe foe leviet singiman na ini a santa tempel foe Jehovah, di e singi fajafaja nanga den mofo di opo bradi. Singi ben de wan prenspari pisi foe na troe anbegi na ini a tempel foe Jehovah. Na ini a ten foe kownoe David, dan moro leki 10 procent foe denwan di ben e dini na a tempel, ben abi na wroko foe prèise Jehovah nanga pokoe. Èn foe na nomroe dati, 288 ben de singiman di ben kisi skoro foe doe dati, „alamala sabiman”. Joe kan de seiker taki den ben teki na wroko foe den foe singi serjoesoe. — 1 Kron. 23:3, 5; 25:7.
2 Foe taki foe na kresten pisiten, wi e leri taki Jesus nanga en apostel ben singi wan singi na a kaba foe na Memrefesa foe Masra (Mark. 14:26). Èn na apostel Paulus e taigi oenoe foeroetron foe singi prèisesingi gi wi Gado. Na ini Kolose sma 3:16 a ben skrifi: „Na wortoe foe Krestes moesoe libi foeroe na ini joe ini ala koni. Tan gi makandra leri èn serjoesoe froemane nanga psalm, prèisesingi gi Gado, jeje singi nanga switifasi, aladi joe e singi na ini joe ati gi Jehovah.” — Loekoe so srefi Efeise sma 5:19, 20.
3 Na singi foe kownoekondre-singi na wan foe den fasi fa wi e prèise Jehovah. Wi no moesoe singi foe dati-ede nanga wi heri ati? Te wi e doe dati, wi e prèise Jehovah. A e arki den singi foe wi, di e seni go na en, neleki fa a e arki den begi foe wi. Te wi e singi troetroe nanga krakti, dan wi kan gi trawan so srefi prisiri èn wi srefi e kisi wini foe dati.
4 Poti prakseri na tapoe den moi wortoe foe den singi foe wi. Den de troetroe wan jepi foe ’gi makandra leri èn foe gi makandra serjoesoe froemane’. Fa den singi foe wi abi toemoesi boen rai! Foedi wi e teki na rai dati serjoesoe, wi kan kisi jepi foe kweki den froktoe foe na jeje so taki wi kan sori den foeroe èn foe kan de na ai gi na poesoe kon na inisei foe skinfasi krakti foe grontapoe. ’Singi na ini wi ati’ e gi wi deki-ati foe dini Jehovah fri èn sondro frede èn nanga prisiri.
5 Foe gi na singi di wi e singi na den konmakandra wan boen bigin, dan na fesiman ben sa kan kari no wawan na nomroe foe na singi, ma so srefi na thema, ofoe titel. Son leisi a kan sori na tapoe na tekst pe na singi abi en fondamenti na tapoe èn a kan gi sjatoe komentaar fa a e fiti nanga na bodoi di wi e pristeri.
6 Den Kownoekondremelodie (Bakratongo) èn so srefi den piano-cassettes foe den singi foe wi de boen jepisani foe jepi wi famiri foe kon sabi den singi moro boen. Te wi e drai den leki bakagron pokoe dan na wan toemoesi prisiri fasi wi e kon sabi den singi foe wi moro boen.
7 Den Boekoe e memre wi foeroetron na a froeplekti foe wi foe prèise wi lobi hemel Tata nanga singi. Meki wi doe disi nanga wi heri ati. Na a fasi dati wi kan gi a freimde sma di e kon na wi mindri wan kotoigi di e waran na ati. Ija, meki wi singi èn meki melodie gi Jehovah neleki fa David foe owroeten ben doe. — Ps. 108:1-3.