Den frubontu di abi fu du nanga na têgo prakseri fu Gado
„Yehovah . . . ben prakseri srefi te ten di no abi marki na en frubontu, a wortu di a ben komanderi, te ini dusun geslakti.” — PSALM 105:7, 8.
1, 2. Fu san-ede wi kan taki taki wan frubontu abi krakti tapu moro furu fu wi?
SEIKER a kan de so taki wan frubontu ben abi krakti tapu yu — tapu a ten fu yu di psa, tapu a ten disi fu yu èn tapu yu tamara. ’Sortu frubontu?’ yu e aksi yu srefi kande. Ini a geval disi a de na trowlibi bika moro furu fu wi ben kon fu wan trowlibi èn furu fu wi ben trow ooktu srefi. Srefi den sma di no trow ete, kande e denki na den blèsi fu wan koloku trowlibi na ini a ten di e kon.
2 Hondrohondro yari psa kaba na Hebrew profeiti Maleachi ben skrifi fu „na uma fu yu yongu yari”, „yu patna èn na uma fu yu frubontu” (Maleachi 2:14-16). A ben kan kari na trowlibi wan frubontu, bika wan frubontu na wan kontrakti ofu wan formele kruderi, wan seti a mindri tu ofu moro partij fu du makandra wan sani. Na trowkruderi na wan tu-sei ofu bilaterali frubontu pe tu partij e kruderi fu tron man nanga uma, ala di den e teki fruplekti tapu den gi makandra èn nanga furu fruwakti é luku go a fesi taki na frubontu fu den sa tyari winimarki kon di sa tan alaten.
3. Fu san-ede tra frubontu kan abi moro bigi krakti tapu wi leki na trowlibi?
3 A ben sa kan gersi leki a trowlibi de na frubontu di abi na moro bigi krakti na tapu wi srefi, ma toku a beibri e taki fu frubontu di abi wan krakti di e go moro fara. Te wi e teki den frubontu fu beibri èn gersi den nanga den frubontu di gwenti fu de na ini relisi di no de fu beibri, dan wán encyclopedie e taki, taki soso na ini na beibri „na seti disi fu matifasi na mindri Gado nanga en pipli e tron wan sistema di abi ala sani na ini en nanga te fu kaba ala sani ini na heri universum”. Iya, den frubontu disi abi fu du nanga na têgo prakseri fu wi lobi Mekiman. Soleki yu sa si, dan na mogelekheiti de taki yu e kisi kefarlek bigi blèsi, ini na tori fu den frubontu disi. ’Ma fa dati de dan?’ yu kan aksi nanga leti.
4. Na ini sortu frubontu di ben sroto heri na ini na bigin na têgo prakseri fu Gado de na ini?
4 Yu sabi heri bun kaba sortu takru bakapisi a ben abi di Adam nanga Eva ben trowe a makti di Gado ben abi a tapu den a wan sei. Na fu den wi ben kisi onvolmaaktifasi, san de na fondamenti fu den siki di wi abi fu du nanga den èn di abi dede leki bakapisi (Genesis 3:1-6, 14-19). Ma wi kan de grantangi taki a sondu fu den no ben kan bruya na prakseri fu Gado fu furu na grontapu nanga tru anbegiman di e prisiri den srefi na ini têgo gesontu nanga koloku. Nanga disi na ini prakseri Yehovah ben sroto na frubontu di skrifi na ini Genesis 3:15: „Mi sa poti feyantifasi a mindri yu nanga na uma èn mindri yu siri èn en siri. A sa masi yu na ini na ede èn yu sa masi en na ini en bakafutu.” Fu na syatu fasi èn na agersitongo ede fu den wortu disi meki furu aksi ben tan sondro fu kisi wan piki. Fa Yehovah ben sa meki na pramisi di ben de na ini na frubontu disi kon tru?
5, 6 (a) Nanga yepi fu san Yehovah ben teki a bosroiti fu meki en prakseri kon tru? (b) Fu sanede wi mu abi belangstelling ini a wroko sani fu Gado fu meki en prakseri kon tru?
5 Gado ben teki a bosroiti moro fara fu seti sani gi wan spesrutu lo fu frubontu fu Gado, seibi ala nanga ala efu wi teri na frubontu fu Eden ooktu. Ibriwan fu wi di e howpu fu kisi têgo blèsi, mu frustan den frubontu disi. Disi wani taki taki wi mu sabi oten èn fa den ben sroto den, suma ben de ini na tori, san ben de den marki ofu bepaling fu den èn fa den frubontu e kruderi nanga makandra ini a kontru fu Gado prakseri fu blèsi a libisma famiri di e gi yesi nanga têgo libi. A de now na yoisti ten fu taki fu den frubontu disi bika tapu 22 maart 1989 gemeente fu kristensma sa kon makandra fu go memre na Avondmaal fu Masra, di den frubontu disi abi langalanga fu du nanga en.
6 A no de fu taki taki a wortu frubontu kan kon abra na tapu son sma leki wan soi tori di e go fu wèt, wan sani pe furu fu na libisma elementi komopo na ini. Ma luku san na Theological Dictionary of the Old Testament e taki: „Den wortu gi ’frubontu’ ini na owru Krosbei Owstusei èn ooktu ini na Griki nanga na Romeini grontapu . . . prati na ini tu bodoi grupu: sweri nanga kruderi na a wan sei, lobi nanga matifasi na a tra sei.” Ala tu fasi — sweri nanga matifasi — wi kan si leki a fondamenti fu den frubontu fu Yehovah.
Na frubontu nanga Abraham — na fondamenti fu têgo blesi
7, 8. Sortu frubontu Yehovah ben sroto nanga Abraham? (1 Kronieken 16:15, 16)
7 Na famiri-edeman, „na papa fu ala sma di abi bribi”, ben de „Yehovah mati” (Romeini 4:11; Yakobus 2:21-23). Gado ben sroto wan frubontu nanga en di ben kisi krakti nanga wan sweri èn di de a fondamenti gi na mogelekheiti taki wi e kisi têgo blèsi. — Hebrewsma 6:13-18.
8 Ala di Abraham ben de na ini Ur, dan Yehovah ben komanderi en fu hari go na wan tra kondre, di ben sori taki a ben de Kanaän. Yehovah ben pramisi Abraham na a ten dati: „Mi sa meki yu tron wan bigi nâsi èn mi wani meki yu nen bigi; . . . èn ala famiri fu na grontapu seiker sa blèsi den srefi nanga yu” (Genesis 12:1-3).a Baka dati Gado safrisafri ben poti moro fini pisi a tapu san nanga leti wi e bodoi leki na frubontu nanga Abraham: Abraham siri ofu erfgenaam ben sa kisi na Pramisi Kondre; en siri ofu bakapikin ben sa tron wan bun bigi ipi sma. Komoto fu Abraham nanga Sara kownu ben sa kon. — Genesis 13:14-17; 15:4-6; 17:1-8, 16; Psalm 105:8-10.
9. Fa wi sabi taki wi kan de na ini a frubontu nanga Abraham?
9 Gado ben kari dati „mi frubontu mindri mi nanga yu [Abraham]” (Genesis 17:2). Ma seiker wi mu frustan taki ooktu wi libi de ini na tori bika baka ten Gado ben meki san a frubontu wani taki kon moro bigi nanga na fruklari: „Mi sa blèsi yu seiker èn yu siri seiker sa kon furu leki den stari na hemel èn leki den ai-santi di de na sekanti; èn yu siri sa teki na portu fu en feyanti abra. Èn nanga yu siri ala nasi fu grontapu seiker sa blèsi den srefi” (Genesis 22:17, 18) Wi de wan pisi fu den nasi dati; na mogelekheiti fu kisi wan blèsi, e wakti wi.
10. San wi kan leri fu a frubontu nanga Abraham?
10 Meki wi tan pikinso prakseri san wi kan leri fu na frubontu nanga Abraham. Net so leki na frubontu fu Eden di waka na en fesi na so na frubontu nanga Abraham e sori tapu wan „siri” di ben o kon èn na sofasi e meki kon a krin taki na siri ben sa abi en rutu na libisma (Genesis 3:15) Na geslaktilin fu na siri dati ben sa waka fu Sem go na Abraham èn moro fara via en manpkin Isaäk. Na lin disi ben sa abi na ini wan kownuwroko èn tapu a wan ofu tra fasi ben sa meki dati no soso wán famiri ma libisma fu ala kondre ben sa kisi blèsi. Fa na frubontu dati ben kon tru?
11. Fa wan letterlijk kontru fu na frubontu nanga Abraham ben du kon?
11 Den bakapikin fu Abraham via Yakob ofu Israël ben kon furu te leki den tron wan bigi nâsi. Leki wan letterlijk siri fu Abraham di yu no kan teri den ben gi den srefi abra na a soifri anbegi fu na Gado fu Abraham, Isaäk nanga Yakob (Genesis 28:13; Exodus 3:6, 15; 6:3; Tori fu den apostel 3:13). Nofotron den Israëlsma ben drai baka gi na soifri anbegi, ma toku „[Yehovah] ben sori den en bun-ati èn ben sari den fu en frubontu ede nanga Abraham, Isaäk nanga Yakob; èn a no ben wani trowe den go na ini pori” (2 Kownu 13:23; Exodus 2:24; Leviticus 26:42-45). Srefi bakadi Gado ben teki na Kristengemeente leki en pipli, a ben tan wan heri pisiten fu sori spesrutu bun-ati gi den Israëlsma leki wan pipli di den de na letterlijk siri fu Abraham. — Daniël 9:27.
Na yeye siri fu Abraham
12, 13. Fa Yesus ben sori taki a de na fosi pisi fu na siri fu na frubontu nanga Abraham na ini na kontru na yeye fasi?
12 Na frubontu nanga Abraham ben abi ete wan tra kontru na yeyefasi. Fu na moro bigi kontru disi wan krin frustan fu en no ben de bifo a ten tu Yesus, ma wi kan bribi taki disi de wèl so na ini wi dei. Na ini Gado Wortu wi e feni san na kontru fu en wani taki. Paulus e skrifi: „Den pramisi now ben taki gi Abraham nanga gi en siri. Den no skrifi: „Èn na den siri, soleki ini a geval fu furu fu den, ma so leki ini na geval fu wán: ’Èn na yu siri’, dati na Kristus.” — Galasiasma 3:16.
13 Iya, na siri ben sa kon via soso wan geslaktilin ofu famiri, èn Yesus fu dati-ede ben gebôre leki wan dyu na skinfasi, wan letterlijk bakapikin fu Abraham (Mattéus 1:1-16; Lukas 3:23-24). Boiti fu dati a ben de wan pisi fu na famiri fu na moro Bigi Abraham ini heymel. Prakseri taki na famiri-edeman Abraham ini bribi di no e seki ben de klariklari fu offer en manpikin Isaäk efu Gado ben wani dati (Genesis 22:1-18; Hebrewsma 11:17-19). Na a srefi fasi Yehovah ben seni en wan enkri gebore Manpikin go na grontapu fu tron wan frulusu-ofrandl gi na libisma famiri di e bribi (Romeini 5:8; 8:32). A de fu dati-ede wan sani fu frustan fu san-ede Paulus e meki sma kon sabi Yesus leki a moro prenspari pisi fu na siri fu Abraham tapu a gron fu na frubontu nanga Abraham.
14. Suma de wan pisi fu na di fu tu pisi fu sa siri fu Abraham, èn disi e meki wi go taki fu sortu tra sani?
14 Mori fara Paulus e sori taki Gado „ben sa meki Abraham siri kon moro furu” ini na kontru na yeye fasi. A ben skrifi: „Te unu de fu Kristus, dan unu de trutru Abraham siri, erfgenamen ini na tori fu wan pramisi” (Genesis 22:17; Galasiasma 3:29). Dati na den 144.000 kristen di kisi salfu nanga na yeye èn di de na di fu tu pisi fu na siri fu Abraham. Den no de abra sei fu no fosi pisi fu a siri, ’ma de fu Kristus’ (1 Korintesma 1:2; 15:23). Wi sabi taki furu fu den no kan sori taki a rutu fu den komopo fu Abraham, bika den kon fu nâsi di no de dyu. Ma moro prenspari na ini na kontru na yeye fasi de taki fu nature den no de wan pisi fu na famiri fu na moro Bigi Abraham, Yehovah; den rutu komoto na presi fu dati fu na onvolmaakti famiri fu na sondari Adam. Wi sa si sobun nanga yepi fu bakaten frubontu fa den sa feni den bun fu kan go de wan pisi fu „Abraham siri”.
Na Wètfrubontu ben poti a tapu fu wan pisiten
15-17. (a) Fu san-ede na Wètfrubontu ben poti tapu na frubontu nanga Abraham? (b) Fa na Wèt ben meki den marki disi kon tru?
15 Fa na geslaktilin fu na siri ben sa kibri fu no kon doti ofu wai puru te leki na ten taki a ben mu sori en srefi, baka di Gado ben sroto na frubontu nanga Abraham leki wan fondamenti stap na ini na kontru fu en prakseri? Fa tru anbegiman, te na siri trutru ben kon, ben kan kon sabi en? Paulus e piki den sortu aksi disi te a e poti prakseri a tapu taki Gado na ini en koni ben gi na Wètferbontu a tapu fu wan pisiten. Na apostel e skrifi:
16 „Fu u san na Wèt e dini dan? Den ben poti en a tapu fu tyari sondu kon na krin, te leki na Siri ben sa kon, di ben kisi na pramisi, èn engel ben tyari en kon abra nanga anu fu wan mindriman . . . na Wèt ben tron wi leriman di e tyari wi go te na Kristus, so taki den ben sa fruklari wi regtvaardiki leki wan bakapisi fu bribi.” — Galasiasma 3:19, 24.
17 Na a bergi Sinaï Yehovah ben sroto wan aparti nationaal frubontu pe en srefi de na wan partij èn Israël na tra partij — na Wètfrubontu, nanga Moses leki na mindriman fu en (Galasiasma 4:24, 25).b A pipli ben agri fu ben teki poti na ini na frubontu disi èn a ben kisi krakti nanga na brudu fu burukaw nanga bokoboko (Exodus 24:3-8; Hebrewsma 9:19, 20). A ben gi Israël teokrasya wèt èn na ini bigi lin wan patron fu wan regtvaardiki tiri. A frubontu ben tapu sma fu trow nanga heidensma ofu teki prati na hurudu nanga falsi fasi fu anbegi. Na so fasi a wèt ben kibri den Israëlsma èn a ben de wan krakti di ben sorgu taki na famiri rutu fu na siri ben tan sondro fu doti (Exodus 20:4-6; 34:12-16). Ma fu di no wan enkri onvolmaakti Israelsma ben kan hori na Wèt dorodoro, meki a ben tyari sondu kon a krin (Galasiasma 3:19). Ooktu, na Wèt ben sori na fanowdu fu wan volmaakti priester di ben o tan alaten èn fu wan srakti—ofrandi di no ben abi fu tyari ibri yari baka kon. Na Wèt ben de leki wan leriman di e tyari wan pikin go na a fanowdu leriman gi en, èn dati ben sa de na Messías ofu Kristus (Hebrewsma 7:26-28; 9:9, 16-22; 10:1-4, 11). Te na Wètfrubontu ben sa doro en marki, dan a ben sa kon na wan kaba. Galasiasma 3:24, 25; Romeini 7:6; leku, „Aksi fu leisiman blz. 31.
18. Sortu fruwakti moro fara ben de ini na Wèt frubontu, ma fu san-ede disi ben de muilek fu frustan?
18 Gado ben sroto na frubontu disi fu wan pisiten, a ben fruteri ooktu fu na marki di ben gi tranga: „Efu unu gi yesi soifri na mi sten èn trutru hori mi frubontu, dan seiker unu sa tron mi spesrutu gudu . . . Èn unu sa tron gi mi wan kownukondre fu priester èn wan santa nâsi” (Exodus 19:5, 6). Fa disi ben de wan bigi fruwakti! Wan nâsi fu kownu-priester. Ma fa dati ben sa kan? So leki na Wèt baka ten ben tyari finifini kon a krin, dan na tirimanlo (Yuda) èn na priesterlo (Levi) ben kisi difrenti frantwortu (Genesis 49:10; Exodus 28:43; Numeri 3:5-13). No wan sma ben kan de tiriman tapu a pipli èn a srefi ten de priester. Toku den wortu fu Gado na ini Exodus 19:5, 6 ben gi reide fu bribi taki den sma di ben teki poti na ini na Wètfrubontu, ben sa kisi na okasi fu tron memre fu wan „kownukondre fu priester èn wan santa nâsi” tapu wan fasi di no ben tyari kon na krin ete.
Na Kownukondrefrubontu nanga David
19. Fa den frubontu ben sori go na tapu a kownuwroko?
19 Baka wan pisiten Yehovah ben poti ete wan frubontu a tapu, di ben tyari moro sani kon na krin fu na fasi fa a ben sa meki en prakseri kon tru, leki têgo blèsi gi wi. Wi ben si taki na frubontu nanga Abraham ben sori na fesi tapu a kownuwroko gi memre fu na letterlijk siri fu Abraham (Genesis 17:6). Na Wètfrubontu ooktu ben wiki na fruwakti taki kownu ben sa de mindri Gado pipli, bika Moses ben taigi Israël: „Te unu kon te fu kaba na ini na [Pramisi Kondre] . . . èn unu ben taki: ’Meki mi poti wan kownu a mi tapu, so leki ala nâsi di de lontu mi’, dan sondro mankeri yu mu poti wan kownu a yu tapu di Yehovah, yu Gado, sa teki . . .. Yu no sa poti wan dorosei sma a yu tapu” (Deuteronomium 17:14, 15). Fa Gado ben sa seti sani gi so wan sortu kownuwroko, èn fa a ben sa abi fu du nanga na frubontu nanga Abraham?
20. Fa David nanga en famirilin ben de ini na prenki?
20 Ala di a fosi kownu fu Israël, Saul, ben komoto fu a lo fu Benyamin, toku na deki-ati èn loyaal David fu Yuda ben go na en presi (1 Samuël 8:5; 9:1, 2; 10:1; 16:1, 13). Di David ben tiri kaba wan bun pisiten, dan Yehovah ben teki a bosroiti fu sroto wan frubontu nanga David. Fosi a ben taki: „Seiker mi sa wiki baka yu yu siri, di sa komopo fu yu inisei pisi; èn trutru mi sa poti en kownukondre steifi. A de en di sa bow wan oso gi mi nen, èn seiker mi sa poti na troon fu en kownukondre steifi te ten di no abi marki” (2 Samuël 7:12, 13). So leki sani ben sori drape, dan David manpikin Salomo ben tron na tra kownu. èn den ben gebroiki en fu bow na ini Yerusalem wan oso ofu tempel gi Gado. Ma moro ben de ete.
21. Na ini san na kownukondre frubontu fu David ben sorgu fu en?
21 Yehovah ben go abra fu sroto na tra frubontu nanga David: „Yu oso èn yu kownukondre seiker sa de na yu fesi steifi te ten di no abi marki; iya, yu troon sa tron wan di te ten di no abi marki sa poti steifi” (2 Samuël 7:16). A de krin taki Gado na so fasi ben poti wan kownulin gi Israël na ini David famiri. A no ben o de soso wan waka baka makandra doronomo fu kownu fu a famirilin fu David. Te fu kaba wan sma ben sa komoto kon fu a geslaktilin fu David di „te ten di no abi marki [ben sa tiri], èn en troon [ben sa de] leki na son gi [Gado]”. Psalm 89:20, 29, 34-36; Yesaya 55:3, 4.
22. Fa na frubontu nanga David ben abi fu du nanga na famirilin fu na siri, èn nanga sortu bakapisi?
22 A de krin taki na frubontu nanga David ben skotu na lin fu na Siri moro soifri. Srefi den fosi yari hondro dyu ben frustan taki na Messías ben sa mu de wan bakapikin fu David (Yohannes 7:41, 42). Yesus Kristus, na fosi pisi fu na siri fu na frubontu nanga Abraham, ben de a sma di den ben feni bun fu tron na Erfgenaam fu na kownukondre fu David di ben o tan ala ten, so leki wan engel ben fruteri (Lukas 1:31-33). Na so fasi Yesus ben kisi na reti fu tiri tapu na Pramisi Kondre, na grontapu kontren di David ben tiri a tapu. Disi mu meki a frutrow fu wi na Yesus kon moro bigi; a no e tiri fu di sondro reti a ben teki sani abra, ma akruderi wan wèttelijk seti di ben poti, wan frubontu fu Gado.
23. Sortu aksi nanga afersi mu kisi wan lusu ete?
23 Wi ben luku soso fo fu den frubontu fu Gado di abi fu du nanga na fasi fa Gado ben seti sani fu meki en prakseri kon tru fu gi libisma famiri têgo blèsi. Kande yu kan si taki na prenki no de bun dorodoro. Aksi e tan abra ete: Sortu priester ofu sortu slakti-ofrandi ben sa kan tyari kenki kon fu ala ten, fu di libisma te yu luku en bun e tan onvolmaakti? Fa den ben kan feni sma bun fu go de wan pisi fu na siri fu Abraham? Reide de fu bribi taki na reti fu tiri ben sa bradi go na moro leki soso wan grontapu kontren? Fa na siri fu Abraham, na fosi presi, èn na di fu tu pisi fu en, ben kan gi blèsi na „ala nâsi fu na grontapu”, makandra nanga ibriwan fu wi? Meki wi gu luku pikinso.
[Futuwortu]
a Disi na wan wan sei ofu unilateraal frubontu, fu di soso wán partij (Gado), teki a frantwortu fu den bepaling disi.
b „Na frubontu-prakseri ben de wan spesrutu marki fu na fasi fu anbegi fu Israël, na wan enkri fasi fu anbegi di ben aksi ala loyaliteit èn na mogelekheiti fu loyaliteit na tu ofu moro gado so leki na ini tra fasi fu anbegi, ben poti a doro.” — Theological Dictionary of the Old Testament, Deel II, blz., 278.
San na a piki fu yu?
◻ Fa na frubontu nanga Abraham ben poti na fondamenti gi na mogelekheiti taki wi kisi têgo blèsi?
◻ Suma ben de wan pisi fu na letterlijk siri na skinfasi fu Abraham? Èn suma ben de na agersi siri?
◻ Fu san-ede na Wètfrubontu ben poti a tapu na frubontu nanga Abraham?
◻ Fa na kownukondre frubontu nanga David ben de wan stapu moro fara na ini na kontru fu na prakseri fu Gado?
[Schema na tapu bladzijde 9 di e tyari sani kon na krin]
(Efu yu wani si pe den sani disi skrifi, luku a tijdschrift)
Na frubontu fu eden Genesis 3:15
Na frubontu nanga Abraham
Na fosi pisi fu na siri
Na di fu tu pisi fu na siri
Têgo blèsi
[Schema na tapu bladzijde 11 di e tyari sani kon na krin]
(Efu yu wani si pe den sani disi skrifi, luku a tijdschrift)
Na frubontu fu Eden Genesis 3:15
A frubontu nanga Abraham
Na Wètfrubontu
Na frubontu nanga David
Na fosi pisi fu na siri
Na di fu tu pisi fu a siri
Têgo bresi
[Prenki na tapu bladzijde 3]
Fu meki en prakseri fu na bun fu na libisma famiri kon tru, meki Gado ben sroto wan frubontu nanga na getrow Abraham