Gi wisrefi njanjan nanga na kontroe foe den taki foe Jehovah
„Libisma no moe libi foe brede wawan, ma foe ibri taki di e komoto foe Jehovah mofo.” — MATTÉÜS 4:4.
1. Na sortoe fasi Jehovah de na Bigi man di e gi njanjan, ma san Jezus ben taki foe den fanowdoe foe libisma?
JEHOVAH de na Bigi man di e gi njanjan. Na ini na fosi kapitel foe na bijbel a ben sori ensrefi na a fasi dati na libisma (Genesis 1:29, 30). Langa ten a baka na psalmsingiman David ben taki nanga foeroe tangi na ati gi Jehovah: „Na joe den ai foe ala sma e loekoe nanga howpoe, na joe e gi den den njanjan na a leti ten. Joe e opo joe anoe èn e meki na lostoe foe ala san e libi doro en marki” (Psalm 145:15, 16). Ija, Jehovah ben sorgoe gi libisma èn gi meti ini njanjan pasa marki. Tokoe wan difrenti de. Aladi meti abi soso letterlek njanjan fanowdoe, Jezus ben sori dati libisma abi moro fanowdoe leki letterlek brede èn njanjan. A moe ’libi ooktoe foe ibri taki di e komoto foe en mofo’. — Mattéüs 4:4.
2. San wi moe sabi foe san den wortoe foe Jezus na ini Mattéüs 4:4 wani taki?
2 Nanga den wortoe disi Jezus ben piki Satan tapoe a proeberi foe en foe kori en go so fara foe kenki ston kon ini brede nanga jepi foe wan wondroe. Didibri no ben forseer na afersi ma es’esi a ben go tapoe wan tra tori. Efoe wi loekoe a fasi fa Satan ben gebroiki Psalm 91:11, 12 na wan fowtoe fasi, dan kande a no ben ferstan srefi san Jezus ben bedoel nanga en piki na tapoe a fosi tesi (Mattéüs 4:3-7). Ma wi leki dienstknegti foe Jehovah abi foeroe belangstelling na ini san Jezus ben taki. Oenoe di wani diki go moro dipi na ini na bijbel foe njan someni moro boen foe jeje njanjan kan aksi wisrefi: Jezus ben bedoel dati libisma, foe kan libi wan libi di foeroe nanga ala sani, moe studeri „ibri taki di ben komoto foe Jehovah mofo” èn kande leri den na ede? San a ben bedoel?
Den wortoe foe Jehovah
3, 4. Sortoe toe sani na wortoe „taki” na ini Griki nanga Hebrewtongo wani taki? Gi wan eksempre foe disi.
3 Di Jezus ben piki Satan a ben teki Deuteronomium 8:3 leki fa na Griki Septuaginta-vertaling foe na Hebrew tekst disi e taki. Na Griki wortoe (Rhè’ma) di vertaal nanga „taki” wani taki toe sani. Sontron a e vertaal nanga „wortoe”, „taki” ofoe „taki di e komoto na ini wan sma mofo”. Ma netleki na Hebrew equivalent foe en (davár) kan wani taki ooktoe „afersi” ofoe „zaak”.
4 Ini Lukas 1:37 wi e lési: „Na Gado no wan ferklari [rhé’ma] de wan sani di no kan.” Lukas 2:1-5 e taki: „Den herder ben taki na makandra . . . Meki wi go tog na Bethlehem èn si na afersi [rhè’ma] disi di ben pasa, di Masra ben meki bekenti na wi” (Herziene Voorhoeve-uitgave). Spesroetoe te na Griki wortoe disi e tjari kon ini akroederi nanga Jehovah, a kan sori soboen tapoe wan „wortoe”, wan „ferklari” ofoe wan „taki” foe Gado. Ofoe a kan sori tapoe wan „zaak”, a no abi trobi efoe a e sori a tapoe wan „sani di pasa” ofoe wan „doe”, na bakapisi foe san ben taki, na wortoe di kon troe.
5. San Lukas 1:37 wani taki?
5 Te oen loekoe en ini a leti disi, dan Lukas 1:37 no wani taki dati Gado kan taki somaar ala sani. Nanga wan libisma disi kan de so awansi en wortoe kande no ben sa kon troe ofoe ben de foe soso. Ma san Lukas 1:37 e taki de taki efoe a e go foe san Gado e taki, no wan wortoe ofoe ferklari foe Jehovah kan tan sondro foe a kon troe. Na ferklari di na engel ben gi na fesi foe Maria, séker ben sa kon troe. Na prakseri di didon na ini na Hebrew nanga Griki wortoe di vertaal nanga Jehovah „wortoe”, „taki” ofoe „ferklari” e kon moi na fesi na ini a boekoe Jesaja. Jehovah e taki: „Bika net soleki den alen di e fadon èn a sneeuw di e saka foe hemel kon na gron èn no e drai go baka na a presi dati, efoe a no dringi go troetroe na ini na grontapoe èn a meki a tjari kon èn meki a kon sproiti èn e gi troetroe siri na a saiman èn brede na a njanman, na so mi wortoe [Hebrew: davár; Griki rhéma] sa de di komoto foe mi mofo. A no sa drai kon na mi sondro bakapisi, ma a sa doe séker na sani di mi ben abi prisiri na ini èn séker a sa waka boen ini san mi ben seni en.” — Jesaja 55:10, 11.
„No foe brede wawan”
6, 7. San ben de na historia nanga na geografis kontekst foe Deuteronomium 8:2, 3?
6 Foe kon baka na tapoe na tori di wi ben e taki, san Jezus ben bedoel di a ben teki Deuteronomium 8:3 di a ben taki: „Libisma no moe libi wawan foe brede, ma foe ibri taki di e komoto foe Jehovah mofo”? (Mattéüs 4:4) A ben taki dati na sma di e frede Gadoe ensrefi njanjan soso nanga taki, wortoe ofoe ferklari? So wan sabi ini a ferstan foe den sortoe taki disi foe Gado ben sa de nofo? Meki wi go loekoe na historia kontekst foe den wortoe di ben teki foe Deuteronomium pikinso.
7 Na bijbelstudie jepisani „Ala den boekoe foe Gado den meki den skrifi den èn den de boen” e gi wi na tapoe bladzijde 36 den bodoi di e kon: „Na boekoe Deuteronomium abi wan dynamis boskopoe gi Jehovah pipel. Baka fotenti jari di den ben waka lontoe na ini na gran sabana, den manpikin foe Israël ben tanapoe na na mofodoro foe na Kondre foe Pramisi.” Na jari ben de 1473 bifo G.T. Na presi? Den lagi kontren foe Moab. Na ini na di foe toe taki gi den Israëlsma di ben kon makandra Mozes ben ferklari: „Oen moe denki na heri na pasi di Jehovah, oen Gado ben meki oen go den fotenti jari disi na ini na sabana foe saka go èn foe tesi oen foe sabi san ben de ini oen ati efoe oenoe ben sa hori en komando ofoe no. A ben saka oen soboen èn a ben meki oenoe kisi angri èn ben gi oenoe njanjan nanga na manna, di oenoe no ben sabi èn ooktoe oen Tata no ben sabi, meki oenoe kon sabi dati libisma no e libi wawan foe brede, ma dati libisma e libi foe ibri taki foe a mofo foe Jehovah. — Deuteronomium 8:2, 3.
8. Na ini sortoe situwasi den Israëlsma ben de, èn foe san-ede Jehovah ben gi pasi foe disi?
8 Go prakseri pikinso! Miljoen miljoen Israëlsma — owroe nanga jongoe man nanga oema nanga pikin — ben waka lontoe fotenti jari langa na ini na „bigi gran sabana di ben e gi frede, nanga vergiftig sneki nanga schorpioen èn nanga wan doti di ben dré èn di no ben abi watra” (Deuteronomium 8:15). Den ben abi watra fanowdoe foe dringi èn njanjan foe njan. Jehovah ben gi pasi wawantron dati den ben abi dréwatra èn angri èn foe san-ede? Foe ben meki den ferstan boen dati „libisma no e libi wawan foe brede, ma foe ibri taki di e komoto foe na mofo foe Jehovah”.
9. Na sortoe fasi Jehovah ben sorgoe gi den fanowdoe foe den Israëlsma nanga jepi foe den taki foe en?
9 Sortoe verband ben de a mindri den fanowdoe foe den Israëlsma èn den ferklari ofoe taki di ben komoto foe na mofo foe Jehovah? We, sortoe sani di den Israëlsma ben kan firi nanga anoe ben pasa na mindri den leki bakapisi foe den sani san Jehovah ben taki? Mozes ben skrifi: „Den djakti foe oenoe no ben broko èn oen foetoe no ben sweri . . . [A ben de Jehovah] di ben meki komoto foe na stonbergi foe fajaston watra, di ben gi oenoe na ini na gran sabana njanjan nanga manna” (Deuteronomium 8:4, 15, 16). Disi de soboen a verband: den Israëlsma no ben sa kisi noti foe ala dati efoe Jehovah no ben gi a komando foe dati. Den Israëlsma ben libi soboen letterlek foe „ibri taki [ofoe ibri komando] foe Jehovah mofo”.
Kisi njanjan nanga Jehovah taki
10, 11. Na sortoe tra fasi den Israëlsma ben kan gi densrefi njanjan nanga den taki foe Jehovah?
10 Fa moro den Israëlsma ben kan kisi njanjan nanga den taki foe Jehovah, boiti dati den ben anga foe Jehovah foe den sani na skinfasi soleki njanjan watra nanga krosi? Jeje blesi ben de ooktoe. Mozes ben taigi den Israëlsma dati Jehovah ben meki den pasa den ondrofeni disi na ini na gran sabana ’foe lagi den, foe tesi den, foe kan sabi san ben de na ini na ati foe den, ofoe den ben sa hori en gebod ofoe no’. A ben taki moro fara: „Oenoe sabi heri boen na ini oen ati dati net soleki wan man e poti en manpikin na pasi na so Jehovah, oen Gado ben poti oenoe na pasi . . . foe doe boen na ini den dé a baka.” — Deuteronomium 8:2, 5, 16.
11 Ija, efoe den Israëlsma ben wani njan boen dorodoro foe den ondrofeni foe den na ini na gran sabana, dan den ben sa leri ’foe libi foe ibri taki foe a mofo foe Jehovah’, no wawan foe di den ben sa gi jesi na en komando di ben skrifi, ma te joe loekoe en boen foe di den ben sa ondrofeni na ini na libi foe den leki naatsi èn na ini den persoonlek libi den bakapisi foe Jehovah taki. Den ben kisi nofo okasi foe ’tesi èn si dati Jehovah boen’ (Psalm 34:8). Den ondrofeni disi di e meki wan sma e kon goedoe èn di abi foe doe nanga den wortoe foe Jehovah — di ben taki èn di ben kontroe — ben moe gi den na njanjan na jejefasi.
12, 13. Fa Jozua ben leri sabi den taki foe Jehovah, èn foe san a ben gi kotoigi?
12 Jozua, di ben teki na presi foe Mozes leki tiriman foe Israël, ben leri sabi den taki foe Jehovah foe dl a ben go poti en prakseri a tapoe. A bribi foe en ben kon tranga foe di a ben kon si a kontroe foe den. Baka na dede foe Mozes Jehovah ben taki den wortoe di e kon now gi Jozua: „Na wetboekoe disi no moe komoto foe joe mofo èn joe moe lési na ini nanga wan safri sten dé nanga neti, sodati joe kan handri soifri akroederi ala sani san skrifi na ini; bika dan joe sa meki joe pasi waka boen èn dan joe sa handri koni.” — Jozua 1:8.
13 Na a kaba foe en libi, baka di a ben gi jesi na Jehovah wortoe èn ben si na kontroe foe en tapoe Jehovah pipel, Jozua ben tan kotoigi: „Na so Jehovah ben gi na Israël na heri kondre di nanga wan sweri a ben pramisi foe gi na den fosten tata foe den, èn now den ben teki en abra èn go libi na ini. Boiti foe dati, Jehovah ben gi den rostoe na lontoe, akroederi ala sani san a ben sweri na den fosten tata foe den èn no wán foe ala den féjanti foe den ben kan tan tanapoe na den fesi. Ala den féjanti foe den Jehovah ben gi na ini den anoe. No wan pramisi [Hebrew: davár; Griki rhé’ma] ben tan sondro foe kontroe. Ala den boen pramisi di Jehovah ben gi na a oso foe Israël, ala den sani ben kon de so” (Jozua 21:43-45). Ija, a ben de foe troe so, dati Jozua no ben libi wawan foe letterlek brede èn soso foe di a ben gi ensrefi njanjan nanga dati, ma dati a ben e libi „foe ibri taki di ben komoto foe Jehovah mofo”. — Mattéüs 4:4.
Libi now foe den taki foe Jehovah
14. (a) Fa wi kan ferstan moro boen san Jezus ben méne, te wi sa diki go moro dipi na ini Mattéüs 4:4? (b) San ben tranga den Israëlsma di ben foeroe nanga warderi?
14 Now di wi e go diki moro dipi na ini den wortoe di taki dja na tapsé èn di Jezus ben teki taki leki wan piki tapoe na kori foe Didibri, wi kan ferstan moro betre san Jezus ben bedoel. Na historia nanga geografis kontekst foe a tori foe Mozes, na ini foe san Jezus ben teki wan pisi, e meki wi si dati den taki foe Jehovah di man nanga oema di frede Gado abi fanowdoe foe kan libi, no de soso wortoe foe leri na ede. Gi den Israëlsma dati „ibri taki foe Jehovah mofo” ben abi foe doe nanga manna èn na watra di den ben kisi èn na krosi di no ben broko. Ija, den taki ben abi ooktoe na ini den na kontroe foe den, den wondroe sani di Jehovah ben doe gi en pipel. Foe di den ben ondrofeni den sani disi leki wan kontroe foe den taki foe Jehovah, den Israëlsma di ben foeroe nanga warderi ben kisi tranga.
15. Fa den taki foe Jehovah kan gi wi njanjan?
15 Na so ooktoe Jehovah pipel na ini a ten disi no e kisi njanjan soso nomo foe lési èn studeri taki foe Jehovah, o fanowdoe disi mag de ooktoe, ma moro foeroe foe ondrofeni leki wan groepoe èn leki aparti sma tapoe sortoe wondroefasi Jehovah e handri gi wi èn foe na boen foe wi. Omoro wi e ferstan fa Jehovah e bemoei nanga wi, omoro den taki disi foe en di kontroe, e gi wi njanjan, foe di wi bribi nanga wi jejefasi e kon moro tranga.
16. (a) Nanga san wan psalmsingiman ben hori ensrefi bezig fajafaja? (b) Fa wi moesoe doe disi ooktoe, èn fa disi sa jepi wi?
16 Wan psalmsingiman ben skrifi: „Mi sa prakseri den wroko foe Jah; bika mi wani prakseri moro foeroe joe wondroewroko. Èn séker mi sa go prakseri dipi foe ala joe activiteit èn ala den doe foe joe mi wani hori misrefi fajafaja bezig” (Psalm 77:11, 12). Efoe wi e hori wisrefi fajafaja nanga Jehovah wroko, wondroewroko, activiteit nanga doe foe na boen foe en pipel, ini a ferstan dati den de sani di joe kan firi foe den taki foe en, dan den wortoe disi foe na voorzienigheid foe Gado sa de leki jeje brede gi wi. Den sa tjari wi kon na ini wan moro krosbé persoonlek matifasi nanga Jehovah. Wi sa de leki Jezus. A ben wégri foe kenki ston kon tron brede tapoe na aksi foe Didibri. Na so wi sa sorgoe ooktoe foe no gi pasi dati wi fadon go na ini na trapoe foe Didibri èn drai wi baka gi na anbegi foe Jehovah foe den sani foe goedoe ofoe broko ede di no de fanowdoe na skinfasi.
17. Na sortoe fasi Jezus ben de wan toemsi moi eksempre?
17 Jezus ben taki: „Mi njanjan de, dati mi doe a wani foe en di ben seni mi kon èn foe klari en wroko” (Johannes 4:34). A ben de wan toemsi moi eksempre foe di a ben sori wi na tapoe wan krakti fasi dati libisma „no moe libi wawan foe brede, ma foe ibri taki di e komoto foe Jehovah mofo”. — Mattéüs 4:4.
Wakti tapoe moro instructie
18. Sortoe taki foe Gado e kontroe now?
18 Jehovah ben taki nanga jepi foe en Manpikin dati ’na boen njoensoe disi foe na kownoekondre ben sa préki na tapoe na heri grontapoe’ bifo na kaba kon (Mattéüs 24:14). Na taki disi foe Gado e kon now troe leki wan bakapisi foe na grontapoe prékiwroko foe Jehovah Kotoigi. ’Joe e libi’ foe na taki dati foe Jehovah mofo foe di joe abi wan prati dorodoro na a prékiwroko èn na so fasi e kisi jeje njanjan foe di joe e doe en wani?
19, 20. Sortoe tra taki foe Gado sa meki heri esi span sani psa?
19 Tra taki foe Jehovah na ini na krosbé ten di e kon sa tjari span sani di o pasa kon. „Den tin toetoe” èn „na wilder meti” sa drai densrefi tégen „na hoeroe oema”, na Babylon a Bigiwan.” Ija, na pori foe na grontapoe makti dati foe falsi fasi foe anbegi nanga anoe foe anti kerkilé elementi na inisé foe den Verenigde Naatsi sa de wan aparti doe di de a bakapisi foe na doe foe wan taki foe Jehovah. — Openbaring 17:16, 17.
20 Ete wan aparti taki foe Gado sa kontroe te Jehovah, foe teki en na agersifasi, sa naki „aka” na ini den kakoenbe foe Gog, ofoe Satan, èn tjalansi en nanga en „sroedati makti” foe fadon go na tapoe en pipel (Ezechiël 38:2-4, 8-12). Ete wan tra taki foe Gado sa tjari a pori konn foe den ipi foe Gog (Ezechiël 39:1-6).a Disi sa wani taki „na feti foe na bigi dé fde Gado na Almaktiwan” na Har-mágedon (Openbaring 16:14, 16; 19:11, 12). Fa a sa de wan span ten gi Jehovah getrow pipel foe si na kontroe foe den taki foe Gado, èn a mindri foe na fetibabari, foe taki en na agersifasi sa jere moro fara den wortoe disi: „Tan tanapoe èn loekoe na ferloesoe foe Jehovah foe na boen foe joe.” — 2 Kronieken 20:17
21. Sortoe sani sa sori densrefi te Jehovah o doe den sani di a taki?
21 Moro fara Kristus sa tjari kontroe ete wan taki foe Gado foe di a sa tai Satan nanga den ogri jeje foe en èn slinger den go doesoen jari „na ini na peti di no abi gron (Openbaring 20:1-3). Den doesoen jari dati sa gi na okasi foe na kontroe foe tra taki foe Jehovah, èn ooktoe foe na opobaka foe den dedewan èn foe na „kon boen foe den naatsi”, na libismafamiri di e gi jesi (Openbaring 20:11-15; 22:1, 2). Na ini na ten foe den doesoen jari kroetoeten Jehovah sa gi tra instructie moro, di nownow no de bekenti na wi, foe di njoen „boekoe lolo” sa opo (Openbaring 20:12). Fa a sa de wan kefarlek sani gi den sma di psa libilibi na bigi benawtoe èn gi den wan di opo baka na dede foe kisi leri nanga tiri nanga jepi foe den tra instructie disi di tanapoe na ini den „boekoelolo” foe Jehovah di sa opo” èn foe doe den instructie dati nanga foeroe prisiri!
22. Wi e kisi now dek’ati foe doe san?
22 Meki nanga so wan moi ferwakti na wi fesi, wi njan boen dorodoro foe na okasi di wi abi now foe kon sabi den taki foe Jehovah èn foe meki wan dipi persoonlek studie foe en Wortoe èn teki prati na a prékiwroko, e ferstan dé foe dé moro dati Jehovah e handri foe na boen foe wi.
[Foetoewortoe]
a Loekoe kapitel 19 nanga 20 ini na boekoe „De natiën zullen weten dat ik Jehovah ben” — Hoe? di ben tjari kon na doro nanga jepi foe na Watchtower Bible and Tract Society of New York, Tnc.
Joe kan memre disi ete?
◻ Fa den Israëlsma ben leri „foe libi foe ibri taki foe Jehovah mofo”?
◻ Fa den Israëlsma ben kan gi densrefi njanjan na jejefasi nanga den taki foe Jehovah?
◻ Fa wi kan libi now foe den taki foe Jehovah?
◻ Sortoe taki foe Jehovah sa kontroe ete?
[Prenki na tapoe bladzijde 6]
San a fasi fa Jezus ben doe tapoe a kori foe Satan wani taki gi joe?
[Prenki na tapoe bladzijde 8]
Dati den Israëlsma ben libi „foe ibri taki foe Jehovah mofo”, ben abi wini wantewante na skinfasi