Kisi Wini fu „a Siri-nyanyan fu Hemel”
NO LANGA baka di den Israèlsma ben kon fri fu Egipti nanga yepi fu wondru, den ben sori taki den no ben bribi kwetikweti na ini Yehovah, a Frulusuman fu den. A bakapisi ben de, taki Yehovah ben meki den waka na ini a gran sabana fu Sinai 40 yari langa. A heri pisi ten dati, den Israèlsma nanga a „bigi moksi grupu” fu freimdesma di ben kon tu nanga den, ben nyan èn ben dringi „te leki den bere ben furu” (Exodus 12:37, 38). Psalm 78:23-25 e fruteri wi fa disi ben man: „A [Yehovah] ben gi den wolku fu hemel na tapusei a komando, èn a ben opo den doro fu hemel srefi. Èn a ben tan meki mana fadon kon na den tapu fu den nyan, èn a ben gi den siri-nyanyan fu hemel. Sma ben nyan a brede fu den maktiwan srefi; a ben gi den nyanyan gi den di ben furu den bere.”
Moses, di ben nyan a mana tu, ben taki fa na aparti sortu nyanyan disi ben de. A ben skrifi taki na mamanten, baka te „a dow di ben didon na gron ben drei gowe . . ., na tapu a gron fu a gran sabana wan sani ben de di ben gersi fini aleisibuba, a ben fini neleki rijp na tapu a gron. Di den manpikin fu Israèl ben si en, dan den ben taigi makandra: ’San na en?’” noso soleki fa den e taki en na ini Hebrewtongo, „man huʼ?” Soleki fa a sori, dan „mana” kon fu a wortu disi, a nen di den Israèlsma ben gi a nyanyan. Moses ben taki: „A ben weti leki koriander siri, èn a ben tesi leki plata onikuku.”—Exodus 16:13-15, 31, futuwortu.
A mana no ben de fu feni leki fa sma ben gwenti feni tra sortu nyanyan, soleki fa son sma e taki. Wan krakti fu tapusei ben abi fu du nanga a fasi fa a nyanyan disi ben gi. Fu eksempre, a no ben de fu feni na wán presi nomo noso na ini wán pisi ten fu a yari nomo. Efu a ben tan te leki a tra dei, dan a ben kisi woron èn a ben bigin tingi; ma toku a dobru porsi di ibri osofamiri ben piki a dei bifo na alawiki Sabadei, no ben pori a tra dei, so taki den ben kan nyan en tapu Sabadei — a dei di mana no ben kon. A de seiker taki a mana ben gi nanga yepi fu wan wondru.—Exodus 16:19-30.
Te den e taki fu „maktiwan” noso „engel” na Psalm 78, dan dati e sori taki kande Yehovah gebroiki engel fu gi a mana (Psalm 78:25, futuwortu). Awansi fa a no fa, a pipel ben abi ala reide fu taigi Gado tangi fu a bun-ati fu en. Ma moro furu fu den no ben sori tangi fu a Sma di ben fri den fu katibo na ini Egipti. Kande wi tu e si den sani di Yehovah e gi, leki wan soso sani noso srefi taki wi e kon de sondro tangi, efu wi no e prakseri dipi fu a lobi bun-ati fu en. Dati meki wi kan de nanga tangi taki Yehovah ben meki den skrifi a tori fu a fasi fa Israèl ben kon fri èn den sani di ben pasa baka dati, fu „gi wi leri”.—Romesma 15:4.
Den Sani Di Israèl Ben Leri, E Tyari Wini Kon gi Kresten
Di Yehovah ben gi a mana, dan a ben abi moro na prakseri leki fu sorgu nomo fu den sani di so wan dri milyun Israèlsma ben abi fanowdu gi den skin. A ben wani ’meki den kisi sakafasi èn a ben wani tesi den’, fu meki den kon moro bun èn fu gi den trangaleri fu a bun fu den (Deuteronomium 8:16; Yesaya 48:17). Efu den ben du akruderi a fasi dati fa Yehovah ben wani meki den kon moro bun èn gi den trangaleri, dan A ben o prisiri fu meki den ’feni bun na ini den dei di ben o kon’ fu di a ben o gi den vrede, a ben o meki sani waka bun na ekonomia sei, èn a ben o meki den feni koloku na ini a Pramisi Kondre.
Wan prenspari sani di den ben musu leri ben de taki „wan sma no e libi fu brede wawan, ma fu ibri wortu fu Yehovah en mofo” (Deuteronomium 8:3). Efu Gado no ben gi a mana, dan a pipel ben o dede — wan sani di den ben erken wantewante (Exodus 16:3, 4). Ibri dei, a mana ben memre den Israèlsma di ben abi warderi, taki den ben abi Yehovah fanowdu dorodoro èn fu dati ede den ben kisi sakafasi. Te den ben o de kaba na ini a Pramisi Kondre nanga ala en gudu di ben de bogobogo, dan den no ben o frigiti Yehovah so makriki èn frigiti taki den ben abi en fanowdu.
Neleki den Israèlsma, na so Kresten musu tan hori na prakseri taki den abi Gado fanowdu gi den sani di den abi fu tan na libi — na skin fasi èn na yeye fasi (Mateus 5:3; 6:31-33). Di Yesus Krestes ben gi wan piki na tapu wan fu den tesi fu Didibri, dan a ben taki den wortu fu Moses di de fu feni na Deuteronomium 8:3, taki: „A skrifi na Buku: ’Libisma no musu libi fu brede wawan, ma fu ibri wortu di e kon fu Yehovah en mofo’” (Mateus 4:4). Iya, tru anbegiman fu Gado e feni bun te di den e leisi den wortu fu Yehovah di de fu feni na ini en Wortu. Boiti dati, a bribi fu den e kon moro tranga te den e ondrofeni den bun bakapisi fu den wortu disi na ini den libi te den e waka nanga Gado èn e poti Kownukondre afersi na a fosi presi.
Onvolmaakti libisma kan lasi a warderi fu den gi sani di e tron wan aladei sani na ini den libi — srefi te den sani disi e sori taki Yehovah e broko en ede nanga den fu di a lobi den. Fu eksempre, na ini a bigin den Israèlsma ben fruwondru fu a mana di ben gi nanga yepi fu wan wondru èn a ben meki den de nanga tangi tu, ma baka wan pisi ten furu fu den ben kragi. „Wi sili kisi wan tegu firi gi a tegu brede”, den ben kragi sondro fu abi lespeki — èn dati ben sori taki den ben bigin ’hari densrefi puru fu a libi Gado’ (Numeri 11:6; 21:5; Hebrewsma 3:12). Fu dati ede na eksempre fu den de „wan warskow gi wi, di doro den kaba fu den seti fu sani”.—1 Korentesma 10:11.
Fa wi kan poti prakseri na a eksempre disi di de wan warskow gi wi? Wan fasi na te wi no e meki den leri fu Bijbel noso den sani di a getrow èn koni srafu e gi, tron aladei sani noso wan gewoon sani gi wi (Mateus 24:45). Te wi e bigin si den sani di Yehovah e gi, leki wan soso sani noso te wi e fruferi fu den, dan a matifasi di wi abi nanga Yehovah e bigin kowru.
Yehovah sabi fu san ede a no e saka moi nyun sani kon na wi tapu bogobogo. Na presi fu dati, safrisafri a e meki leti skèin moro nanga moro na tapu en Wortu (Odo 4:18). Disi e gi a pipel fu en na okasi fu teki dati na ini den èn fu du den sani di den e leri. Yesus ben waka na baka na eksempre fu en Tata di a ben gi den fositen disipel fu en leri. A ben tyari a Wortu fu Gado kon na krin gi den „so fara den ben man arki en”, noso „frustan en” soleki fa son Bijbel e skrifi en.—Markus 4:33; teki gersi Yohanes 16:12.
Kisi Moro Warderi gi den Sani Di Gado Gi
Yesus ben taki fu a srefi sani moro leisi tu. A no de fu taki, dati a frustan kan frustan wan penti wantewante — fu eksempre wan gronprakseri na ini Bijbel — ma moro ten de fanowdu kande fu gi yesi na dati èn fu meki a tron wan pisi fu a „nyun fasi fa [wan Kresten] de”, spesrutu efu den owru grontapu fasi èn grontapu denki sidon dipi ete (Efeisesma 4:22-24). Dati seiker ben de so nanga den disipel fu Yesus te den ben musu puru bigimemre èn te den ben musu abi saka-atifasi. Na wan tu okasi Yesus ben musu leri den saka-atifasi, èn ibri leisi a ben taki fu a srefi penti na wan tra fasi so taki den ben kan frustan en bun, èn den ben kon frustan en baka wan pisi ten.—Mateus 18:1-4; 23:11, 12; Lukas 14:7-11; Yohanes 13:5, 12-17.
Na ini a ten disi, den Kresten konmakandra èn den buku fu A Waktitoren Genootschap e du a srefi sani di Yesus ben du, fu di den e taki furu leisi baka fu a srefi sani di den prakseri bun fu en. So bun, meki wi si disi leki wan fasi fa Gado sori taki a e broko en ede nanga wi fu di a lobi wi èn meki wi no kon weri noiti fu den sani di wi e kisi, soleki fa den Israèlsma ben kon weri fu a mana. Iya, te wi abi a pasensi fu teki den frumane na ini wi di Yehovah e gi doronomo, dan wi sa si den bun bakapisi fu dati na ini wi libi (2 Petrus 3:1). So wan fasi fu warderi sani, e sori trutru taki wi e „kon frustan” a Wortu fu Gado na ini wi ati èn na ini wi frustan (Mateus 13:15, 19, 23). ¡Fu disi, a psalm singiman David gi wi wan moi eksempre ala di a no ben abi ala den difrenti sortu nyanyan na yeye fasi di wi e kisi na ini a ten disi, èn toku a ben taki fu den wet fu Yehovah leki sani di „switi moro oni èn na oni di e lon fu den oni-oso”!—Psalm 19:10.
„Mana” Di E Gi Têgo Libi
„Mi na a brede di e gi libi”, Yesus ben taigi den Dyu. „Den fositen tata fu unu ben nyan mana na ini a gran sabana èn toku den dede. . . . Mi na a libi brede di ben saka kon fu hemel; efu wan sma e nyan fu a brede disi, a sa libi fu têgo . . . A brede di mi sa gi, na mi skin fu a bun fu a libi fu grontapu” (Yohanes 6:48-51). Trutru brede noso mana no ben gi sma têgo libi èn a no man du dati tu. Ma den sma di e bribi na ini a frulusu-ofrandi fu Yesus sa kisi den blesi fu a têgo libi te fu kaba.—Mateus 20:28.
Moro furu fu den sma di e kisi wini fu a lusu-paiman fu Yesus sa libi fu têgo na ini wan paradijs na grontapu. „Wan bigi ipi” fu den sma disi — di a „bigi moksi grupu” fu freimdesma di ben gowe libi Egipti makandra nanga den Israèlsma e prenki — sa pasa a „bigi banawtu” di sa puru ala godelowsufasi na grontapu (Openbaring 7:9, 10, 14; Exodus 12:38). Den sma di den Israèlsma srefi ben prenki, sa kisi wan moro bigi pai srefi. Na apostel Paulus ben taki fu den wan disi, di a nomru fu den na 144.000, leki sma di de na Israèl fu Gado na yeye fasi. Te den dede, dan a pai fu den sa de wan opobaka fu go libi na hemel (Galasiasma 6:16; Hebrewsma 3:1; Openbaring 14:1). Drape Yesus sa gi den wan spesrutu sortu mana.
San „a Mana Di Kibri” Wani Taki
„Na en di e wini, mi sa gi pikinso fu a mana di kibri,” na so Yesus di ben kisi wan opobaka ben taigi Israèl na yeye fasi (Openbaring 2:17). Na agersi mana di kibri, e meki wi prakseri a mana di Gado ben taigi Moses fu poti dati na ini wan gowtu batra na ini a santa ark fu a frubontu. Na Ark ben de na ini a Moro Santapresi fu a tabernakel. Drape sma no ben man si en, èn yu kan taki dati a ben kibri. A mana disi, di ben de wan marki fu memre sma na sani, no ben pori te a ben tan na ini na Ark, èn dati meki a ben o de wan bun simbôl fu nyanyan di no e pori (Exodus 16:32; Hebrewsma 9:3, 4, 23, 24). Te Yesus e gi den 144.000 sma a mana di kibri, dan a e gi den a dyaranti taki den, leki Gado en manpikin na yeye fasi, no sa man dede èn den no sa man pori.—Yohanes 6:51; 1 Korentesma 15:54.
„Na yu [Yehovah] a fonten fu libi de”, a psalm singiman ben taki (Psalm 36:9). ¡A mana — a trutru wan èn na agersi wan — e sori baka taki a prenspari waarheid disi tru! A mana di Gado ben gi Israèl fu owruten, na agersi mana di a ben gi leki a skin fu Yesus fu a bun fu wi, èn na agersi mana di kibri, di a e gi na den 144.000 sma nanga yepi fu Yesus, e memre wi alamala taki wi abi Gado fanowdu dorodoro fu kisi libi (Psalm 39:5, 7). Meki wi erken na wan sakafasi, na wan bescheiden fasi, èn doronomo taki wi abi Gado fanowdu na a fasi disi. Èn Yehovah fu en sei, sa ’du wi bun na ini den dei di sa kon’.—Deuteronomium 8:16.
[Prenki na tapu bladzijde 26]
Ala libisma di wani kisi têgo libi, abi „a libi brede di ben kon fu hemel” fanowdu
[Prenki na tapu bladzijde 28]
Te wi e go na ala den Kresten konmakandra, dan wi e sori taki wi e warderi den frumane fu Yehovah