Yesus libi nanga diniwroko

Wan nâsi e go lasi ma a no ala sma

SYATU baka Yesus takmakandra nanga den sma di ben konmakandra na dorosei fu na oso fu wan Fariseiman, dan son sma e ferteri en „fu den Galileiasma di [na Romein granman Pontius Pilatus] ben moksi a brudu fu den nanga den srakti ofrandi fu den”. Disi kande ben de den Galileiasma di den ben kiri di dusundusun sma ben opo protesteer taki Pilatus ben gebroiki moni fu na tempel gudukisi gi na bow fu wan aquaduct di ben mu tyari watra go na Yerusalem. Den sma di ben ferteri na afersi disi na Yesus, kande ben wani sori nanga disi taki den Galileiasma ben ondrofeni na rampu disi leki wan bakapisi fu den eigi goddelowsu du.

Ma Yesus e poti na denki fu den kon reti baka te a e taki: „Unu e prakseri taki den Galileiasma disi de moro takru sondari leki ala tra Galileiasma fudi den ben kon nyan pina fu den sani disi? Kwetkweti”, Yesus e piki. Baka dati a ben e broiki a tori disi fu ben warskow den dyu: „Efu un no abi beraw, dan un alamala sa dede na a srefi fasi tu.

Yesus ben poti dan a prakseri tapu wan tra rampu di ben psa drape, èn di kande ben abi fu du ooktu nanga a bow fu a aquaduct. A e aksi: „Ofu den tina-aiti sma dati di na toren na ini Silóam ben fadon na den tapu, sodati den ben dede; un e denki taki den sori taki den de moro bigi sonduman moro ala tra sma di ben e libi na ini Yerusalem?” Yesus e taki taki den sma disi no ben feni dede fu na takrudu fu den. Na presi fu dati „ten nanga sani di e psa èn di yu no kan si na fesi” de furu tron frantwortu fu den sortu rampu disi. Yesus e gebroiki na okasi agen fu warskow: „Ma efu un no abi berow, dan un alamala sa dede tapu a srefi fasi.”

Yesus e gebroiki dan wan agersitori di fiti èn a e tyari kon a krin: „Wan sma ben abi wan figa bon di a ben prani na ini en droifi dyari, èn a ben kon suku froktu, ma a no ben feni nowan. Ne a ben taigi na droifi dyariman: ’Mi e kon now dri yari kaba fu suku froktu fu na figabon disi, ma mi no ben feni nowan. Koti en trowe! Fu san-ede a ben sa teki fu soso a gron ete?’ A ben gi en leki piki: ’Meester meki a tan tanapu a yari disi ete, teleki mi diki wan olo lontu en èn poti mest; èn efu dan a no gi froktu, dan a bun; ma efu a no de so, dan yu mu kot’en trowe.’

Yesus ben proberi moro leki dri yari langa fu kweki bribi a mindri a dyu nâsi. Ma soso wantu hondro disipel yu kan teri leki den froktu fu a wroko fu en. Now, ini a ten fu a di fu fo yari disi fu en diniwroko, a e meki den muiti fu en kon moro bigi fudi na ini agersifasi a e diki wan olo lontu a dyu „figa bon” èn e poti mest lontu en, san a e du fudi a e preiki fayafaya na ini Yudea nanga Perea èn e leri sma. Ma a de soso! Na nâsi e weigri fu abi beraw èn e ferdini fu dat’ede fu kisi pori. Soso wan fikapisi fu na nâsi e teki a boskopu bun.

Syatu a baka dati Yesus e gi tapu wan sabbat leri na ini wan dyu kerki. Drape a e si wan uma di tina-aiti yari kaba e waka kron, fudi wan ogri yeye e dwengi en. Nanga furu sari-ati Yesus e taigi en: „Uma, yu kon fri fu yu swaki-fasi.” Tapu dati a e poti en anu tapu en èn wantewante a e opo tanapu ret’opo èn a e bigin prijse Gado.

Ma na fesiman dinari fu na dyu kerki ati e bron.” „Siksi dei de di sma mu wroko”, a e protesteer. „Kon na tapu dati èn meki den dresi yu.” Na dinari nanga disi e erken taki Yesus kan dresi sma, ma e krutu den sma di tapu a sabbat dei e kon fu kisi gesontu!

„Hoigriman”, Yesus e piki, „ibriwan fu unu no e lusu tapu na sabbat en kaw ofu en buriki fu na pen èn e tyari en go fu a dringi watra? A no e fiti dan taki na uma disi, di de wan umapikin fu Abraham, èn di Satan, luku! tina-aiti yari ben tai hori, tapu na sabbat dei ben kon lusu fu na banti disi?”

We, sodra den sma di ben de teige Yesus yere disi, dan den ben firi syen. Ma na ipi sma e prisiri fu ala den switi wroko di den ben si Yesus e du. Tapu disi Yesus e taki ete wantron tu profeitis eksempre fu na kownukondre fu Gado, eksempre di sowan yari psa kaba a fesi a ben ferteri komoto fu wan boto tapu a se fu Galilea. Lukas 13:1-21; Preikiman 9:11; Mattéus 13:31-33.

◆ Sortu rampu den e kari dya èn sortu leri Yesus e teki fu disi?

◆ San wi kan leri fu na eksempre fu na figa bon di no e gi froktu èn fu den muiti fu meki a bigin gi froktu?

◆ Fa na fesiman dinari e erken taki Yesus kan dresi sma, ma fa Yesus e puru na hoigrifasi fu na man kon a doro?