Jezus libi nanga diniwroko
Njan boen foe den agersitori foe Jezus
TE DEN discipel e kon na Jezus baka a taki foe en gi den ipi sma tapoe a sjoro, den gridi foe sabi a rede foe en njoen methode foe leri sma. O ja, den ben jere en kaba e gebroiki agersi-tori, ma noiti ete na sowan bradi fasi. Foe dat’ede den wani sabi so te foe san-ede a e ’taki nanga jepi foe agersitori gi den’.
Wan rede foe dati de dati a wani meki den wortoe foe a proféti kon troe, di ben taki: „Mi wani opo mi mofo nanga agersitori, mi wani taki sani di ben de kibritori foe sensi na poti foe na fundamenti.” Ma dati a no ala sani ete. Na gebroiki foe en foe agersitori e meki ooktoe dati na ati toestand foe sma e kon a krin.
Te joe loekoe en boen dan a moro bigi pisi foe den sma abi belangstelling gi Jezus leki meesterferteriman èn a sma di e doe boen, no leki wan sma di den moe dini leki Masra èn di den moe waka na en baka sondro gridifasi. Den no e si en nanga prisiri dati wans ma e bemoei ensrefi nanga a fasi foe den foe loekoe sani ofoe a libifasi foe den. Den no wani dati na boskopoe go so fara. Jezus e taki foe dat’ede:
„Foe dat’ede mi e taki gi den nanga jepi foe agersitori, sodati, aladi den e loekoe, den e loekoe foe soso, èn aladi den e jere den e jere foe soso, èn no e froestan san a wani taki; èn foe a sé foe den na profétirori foe Jesaja e kon troe di e taki: ’. . . bika na ati foe na pipel disi no e teki sani.’”
„Ma kolokoe oenoe ai de”, Jezus e go moro fara, „foedi den e si, èn oenoe jesi foe di den e jere. Bika foetroe, mi e taigi oenoe: Foeroe proféti èn regtvaardiki sma ben angri foe si den san di oenoe e si èn den no ben si den èn foe jere den sani di onoe e jere èn den no ben jere den.”
Ija, den twarfoe apostel èn den sma di ben de na den ben abi ati di ben teki leri. Foe dat’ede Jezus ben taki: „Oenoe abi a boen ede foe froestan den boen tori foe na kownoekondre foe hemel, ma den no kisi dati.” Foedi den discipel ben wani froestan na leri foe Jezus, meki a e go tjari na agersitori foe na saiman kon na krin gi den.
„Na siri na a wortoe foe Gado”, Jezus e taki, èn na grontapoe na a ati. Foe a siri di e sai tapoe na tranga gron sé na lanki foe na pasi, „Didibri e kon èn e teki a wortoe komoto foe na ati foe den, sodati den ben sa bribi èn kisi ferloesoe.
Na siri na a tra sé di sai tapoe gron nanga wan ondro-gron foe ston, e sori tapoe ati foe sma di e teki a wortoe nanga prisiri. Ma foedi a wortoe ini den sortoe ati disi no meki roetoe dipi, meki den sma disi e fadon te wan ten foe tesi ofoe ferfolgoe kon.”
A siri di fadon a mindri den maka, so Jezus e go moro fara abi foe doe nanga sma di ben jere a wortoe. Ma den sorgoe nanga goedoe nanga prisiri foe a libi disi e srepi den gwe, so dati a e stek èn no e tjari noti kon ini volmaaktifasi.
Foe a sé foe a siri di sai na tapoe toemsi boen gron Jezus e taki, dati na den sma di, baka di den ben jere a wortoe nanga wan boenati, e hori faste na en èn e meki froktoe nanga jepi foe horidoro.
Fa den discipal disi di ben go fisiti Jezus foe kisi uitleg foe en leri ben kisi blesi! A de na prakseri foe Jezus dati sma froestan den agersitori foe en, so dati waarheid kan ferteri na tra sma. „Sma e teki sontron wan lampoe foe poti na ondro wan baskita ofoe foe poti en ondro wan bedi?” ai aksi. Nono, ’den e teki en foe poti en tapoe wan kandratiki’. Foe dat ede Jezus e taki moro fara: „Poti foe dat’ede prakseri na a fasi fa joe e arki.” Mattéus 13:10-23, 34-36; Markus 4:10-25, 33, 34; Lukas 8:9-18; Psalm 78:2; Jesaja 6:9, 10.
◆ Foe san-ede Jezus ben e taki na ini agersitori?
◆ Fa den discipel foe Jezus e sori taki den ben de tra fasi leki na ipi foe sma?
◆ Sortoe uitleg Jezus e gi foe na agersitori foe na saiman?