Yesus libi nanga diniwroko

Den koi nanga na herder

INI NA TEN fu na inwijding ofu Chanoekafeest, wan fesa pe den ben e memre taki na tempel ben gi nyun baka abra na Yehovah, Yesus ben de ini Yerusalem. Na ini 168 bifo G.T., sowan tu hondro yari na fesi, Antiochus IV Epiphanes ben wini Yerusalem èn ben meki na tempel nanga na tempel-altari lasi en santafasi. Dri yari na baka den ben wini Yerusalem baka èn a tempel ben gi abra ofu ben wij in. Bakadati dan na herinwijding ala yari den ben e nyan en.

Na inwijdingfesa disi den e hori tapu 25 Kislev, na dyu mun di e kruderi nanga na laatste pisi fu november èn na fosi pisi fu december fu wi disiten kalender. Du dat’ede baka sowan sani fu moro leki 100 dei na tumsi prenspari Paschafesa ini 33 G.T. sa hori. Fudi disi de na kowru pisten fu na yari, meki na apostel Yohannes e taki fu „winter”.

Yesus e gebroiki now wan agersitori pe a e taki fu dri koi èn e meki kon a krin san a o du leki na tumsi Bun Herder. Na fosi koi di a e taki fu en, de wan agersifasi fu na Wetsferbontu seti fu Moses. Na wet ben dini leki wan skotu di ben prati den dyu fu den libi nanga du fu den folku di no ben teki poti na ini na spesrutu ferbontu disi nanga Gado. Yesus ben tyari kon na krin: „Fu tru, fu tru, mi e taigi unu: A sma di no waka psa a doro go ini na skapukoi, ma na wan tra presi e kren go na tapu, en na wan fufuruman èn wan rover. Ma na sma di e psa na doro go na inisei, en na a herder fu den skapu.”

Tra sma ben kon èn ben taki taki den de na Messias ofu Kristus, ma den no ben de na tru Herder di Yesus e taki morofara fu en: „Na dorowaktiman e opo doro gi en, èn den skapu e arki na en sten èn a e kari en eigi skapu na den nen èn a e kari den go na dorosei. . . . Wan freemde sma den no sa waka na en baka kwetkweti, ma den sa lon gwe fu en, fudi den no sabi na sten fu freemde sma.”

Na „dorowaktiman” fu na fosi skapukoi ben de Yohannes na Dopuman. Leki na dorowaktiman Yohannes „ben opo doro” gi Yesus fudi a ben tyari kon na krin suma na Yesus gi den agersi skapu di Yesus e tyari go na dorosei fu nyan grasi. Den skapu disi, di Yesus e kari na nen èn e tyari go na dorosei, te fu kaba e kari go ini wan tra koi, soleki ai tyari kon na krin: „Fu tru, fu tru, mi e taigi unu: mi na a doro fu den skapu”, dati wani taki na doro fu wan nyun skapu koi. Te Yesus meki wan nyun ferbontu nanga en disipel èn ini na ten fu na fosi Pinksterfesa di e kon na baka komoto fu hemel e kanti santa yeye na tapu den, dan den sa tyari go na inisei fu na nyun skapukoi disi.

Te Yesus e tyari morofara kon a krin sortu rol a e du, a e taki: „Mi na a doro; alasma di psa mi go na inisei, sa kisi ferlusu. . . . Mi ben kon sodati den ben sa abi libi èn den sa abi en pasamarki. . . . Mi na a tumsi bun herder èn mi sabi mi skapu èn mi skapu sabi mi, soleki na Tata sabi mi èn mi sabi na Tata; èn mi e gi mi sili abra fu a bun fu den skapu.”

Syatu a fesi Yesus ben trowstu en bakaman nanga den wortu: „No frede, pikin ipi, bika unu Tata e feni en bun fu gi unu na Kownukondre.” Na pikin ipi disi di te fu kaba sa de 144.000 e tyari go na ini na nyun ofu di fu tu koi, ma morofara Yesus e taki: „Mi abi tra skapu ete, di no de fu disi koi, den dati ooktu mi mu tyari èn den sa arki mi sten, èn den sa tron wan ipi, wan Herder.”

Fudi den „tra skapu” „no de fu disi koi”, meki den mu de fu wan tra koi, wan di fu dri koi. Den skapu na ini den tu laatste koi di wi kari abi difrenti presi fu go libi. Na „pikin ipi” ini na wan koi sa tiri nanga Yesus ini hemel, aladi den „tra skapu” ini na tra koi sa libi tapu na paradijs grontapu. Ma aladi den skapu de na ini tu koi, toku dyarusu no de a mindri den, èn ooktu den no abi a firi taki wan prati de a mindri den, fudi den, soleki Yesus e taki, „e tron wán ipi” ondro „wan Herder”.

Na Tumsi Bun Herder, Yesus Kristus, de klarklari fu gi en libi gi den skapu na ini alatu skapukoi. „Fu eigi buweigi wi e gi en abra”, a e taki. „Mi abi makti a tapu fu gi en abra, èn mi abi makti a tapu fu teki en baka. Na gebod disi mi ben kisi fu mi Tata”. Te Yesus e taki dati, pratifasi e kon a mindri den dyu.

Furu ini na ipi e taki: „A abi wan ogri-yeye èn a law. Fu san-ede unu e arki en?” Èn trawan e piki: „Disi no de wortu fu wan sma di abi wan ogri-yeye na en tapu.” Èn aladi morofara den e sori kande tapu san ben psa wantu mun a fesi, di a ben dresi wan man di ben gebore breni, dan den e taki morofara: „Wan ogri yeye sontron kan opo den ai fu den breniwan?” Yohannes 10:1-22; 9:1-7; Lukas 12:32; Openbaring 14:1, 3; 21:3, 4; Psalm 37:29.

◆ San na na inwijdingfesa èn oten a ben hori?

◆ San na a fosi skapukoi, èn suma na a dorowaktiman fu na koi disi?

◆ Fa na dorowaktiman e opo na doro gi na herder èn na ini san den e tyari den skapu go morofara?

◆ Suma de na ini den tu koi fu na Tumsi Bun Herder, èn den e tron omeni ipi?