Yesus libi nanga diniwroko
ALADI di den de ete na ini na oso ini Kapernaüm, dan na takmakandra no e go wawan fu na kesekese fu den apostel ini na tori fu na aksi suma de na moro bigi wan, ma ooktu ete fu wan tra afersi. A sani disi ooktu kan ben pasa ini a ten fu a draibaka fu den go na Kapernaüm, di Yesus srefi no ben de drape. Na apostel Yohannes e ferteri: „Wi si wan sma di e gebroiki yu nen fu puru ogri yeye tapu sma èn wi ben e pruberi fu tapu en fudi a no ben e waka makandra nanga wi.”
Yohannes e si den apostel kande leki wan aparti grupu fu sma di e dresi trawan èn di wawan abi na makti fu dresi sma. Sobun a e prakseri dati a man no nanga leti e du krakti wroko, fudi a no de fu a grupu fu den.
Ma Yesus e gi na rai: „No pruberi fu tapu en, bika nowan sma di sa du wan krakti wroko tapu a gron fu mi nen, sa kan fu skempi mi esesi bika a sma di no de teigi wi, de fu wi. Bika ala sma di gi yu wan beker watra fu dringi tapu a gron fu a sani dati yu de fu Kristus, futru, mi e taigi yu, en paiman no sa gwe libi en kwetkweti.”
A man disi no ben afu waka letterlek baka Yesus fu de na a sei fu en. A kristelek gemeente no ben opo ete, sobun dati a no ben de wan pisi fu a grupu fu den no ben wani taki dati a ben de fu wan tra gemeente, A man ben poti trutru bribi ini Yesus nen èn ben man fu dat’ede fu puru ogri yeye tapu sma. A ben du wan sani di na wan bun fasi yu kan teki en gersi nanga wan sani nanga san wan sma leki fa Yesus taki den e feni en bun fu kisi wan paiman. Yesus e sori dati fu na fasi disi ede a no sa lasi en paiman.
Ma kon un taki now dati a man nanga den wortu èn du fu den apostel ben sa nakifutu. Dati ben sa de wan seryusu sani! Yesus ben taki: „Ala sma di meki wan fu den pikinwan disi di e bribi nakifutu, a ben sa moro bun gi en dati den anga na en neki wan miriston di wan buriki e hari lontu drai èn den trowe en go trutru ini se.”
Yesus e taigi den bakaman fu den mu puru ala sani di ben sa kan tyari den fu go naki futu awinsi a de wan diri sani leki wan anu, wan futu ofu wan ai. A de moro bun fu sondro fu abi wan diri sani èn go na ini Gado kownukondre leki fu hori na den èn den trowe yu go ini Gehenna — wan doti ipi pe faya e bron ini na birti fu Yerusalem, di de wan agersi fasi fu tego pori.
Yesus e warskow ooktu: „Sorgu dati yu, no feragti nowan fu den pikinwan disi, bika mi e taigi unu dati den engel fu den ini hemel alaten e si na fesi fu wi Tata di de ini hemel.” Moro fara a e gi agersitori fu na warti-fasi fu den „pikinwan” disi fu di a e ferteri fu wan man di abi 100 skapu ma di e lasi wan. Na man sa libi den 99 a baka fu go suku na wan lasi skapu, na so Yesus e tyari kon a krin èn efu a feni en, dan a sa prisiri moro fu en leki den 99. „Na so ooktu” Yesus e bosroiti moro fara, „mi Tata di de ini hemel no e feni en bun dati wan fu den pikinwan disi lasi gwe”.
Kande nanga ini prakseri ete na kesekese di ben de na mindri en apostel, Yesus e taki nanga krakti: „Abi sowtu ini yusrefi èn hori vrede a mindri makandra.” Nyanyan pe furu tesi no de na ini sowtu e meki kon moro switi. Na so a gersi sowtu e meki san wan sma taki, moro makriki fu teki. Efu wan sma abi a sowtu disi, dan wan sma kan kisi yepi fu kisi vrede.
Ma fu libisma onvolmaatktifasi ede wawantron seryusu kesekese sa kon. Yesus e gi ooktu firi fu handri na ini disi na wan yoisti fasi. „Te yu brada du wan sondu” Yesus e taki, „go tyari en fowtu kon a krin mindri yu nanga en wawan. Efu a arki na yu, dan yu wini yu brada.” Efu a no e arki, na so Yesus e gi rai, „teki dan wan ofu tu na yu ete sodati fu a mofo fu tu ofu dri kotoigi ibri afersi kon de reti”.
Soso leki na laste sani, na so Yesus e taki, den mu poti na afersi na fesi na „gemeente” dati wani taki na den frantwortu opziener fu na gemeente. Efu na sondari no saka ensrefi na ondro na krutu fu den, so Yesus e bosroiti, „dan a mu de gi yu net leki wan sma fu den natie èn leki wan belastingsma”.
Te opziener o meki sowan krutu bekenti dan den mu hori densrefi soifri na den wet ini Yehovah Wortu. Efu den bepaal sobun dati wan sma abi fowtu èn e ferdini strafu, dan na krutu dati „ben sa tai kaba ini hemel”. Èn efu den „lusu wan sani a grontapu”, den krutu wan sma taki a no abi fowtu, dan „a sa lusu kaba ini hemel”. „Pe tu ofu dri sma kon na makandra ini mi nen” na den sortu krutu disi, Yesus e taki, „dan drape mi de na den mindri”. Mattéus 18:6-20; Markus 9:38-50; Lukas 9:49, 50.
◆ Fu san-ede a no ben de fanowdu ini Yesus ten fu waka nanga en?
◆ O seryusu a de fu meki wan pikinwan stotu-futu fadon èn fa Yesus ben gi ini wan agersitori a prensparifasi fu den sortu pikinwan disi?
◆ San „tai” èn „lusu” wani taki?