„Vrede mu de nanga yu”
„Yesus ben kon èn ben tanapu ini den mindri èn ben taigi den: ’Vrede mu de nanga unu.’” — YOHANNES 20:19.
1. Fu san-ede den muiti fu libisma fu tyari vrede kon no sa waka bun?
„NA heri grontapu de ini na makti fu na goddelowsuwan” (Yohannes 5:19). Disi ben de tru ini Yohannes ten, èn moro tranga ete a e sori ensrefi ini wi ten nanga a kon moro furu fu tranga ogridu fu sma, terrorisme feti nanga bedrigifasi. Den wortu fu Yohannes di skrifi ondro krakti fu santa yeye no e gi ooktu no wan enkri howpu taki grontapu vre ede sa man fu kon nanga yepi fu libisma muiti, awinsi a paus, nationaal tiriman nanga den Verenigde Natie e du muiti. Fu san-ede? „’Nowan vrede de’, mi Gado ben taki, ’gi den goddelowsuwan.’” — Yesaya 57:21.
2. San a wortu „vrede” wani taki, spesrutu ini Hebrew èn Griki tongo?
2 Ma na wortu vrede kan wani taki wan tra sani leki soso taki vrede no de. Vrede kan sori ooktu tapu „wan toestand fu wan sma frustan ofu wan yeye toestand na ini san wan sma de fri fu skreki prakseri ofu firi: tiri fasi fu yeye èn ati”. Ma toku na Hebrew wortu fu „vrede” (sya.lōm) èn na Griki wortu fu disi (ei.re’ne) abi srefi wan moro bradi betekenis. Den e sori na tapu tanbun, soleki de ini den adyosi wortu: „Go ini vrede” (1 Samuël 1:17; 29:7; Lukas 7:50; 8:48). Disi e gi wi wan moro krin frustan fu na lobi broko-ede fu Yesus gi en disipel ini na tumsi muilek pisten dati lontu a dede fu en.
3. Fa Yesus baka en opobaka ben sori taki a ben broko en ede srefsrefi nanga en disipel èn nanga sortu bakapisi?
3 Yesus ben dede na tapu freida 14 Nisan fu na yari 33 G.T. Tapu sonde 16 Nisan a ben kisi opobaka fu dede, A ben go luku den disipel fu en soleki fa alaten a ben broko-ede sref srefi fu na tanbun fu den. Pe a ben feni den? A ben de na baka tapu-doro „fudi den ben frede den dyu”. A de wan sani fu frustan dati den ben de spanspan, èn nanga frede. Ma Yesus ben taki: „Vrede mu de nanga unu” (Yohannes 20:19-21, 26). Bakaten, di den ben kisi tranga kaba fu santa yeye den ben man fu kakafutu gi na situwâsi. Nanga fri fu taki èn sondro frede den ben teki na preikiwroko fu du èn ben yepi furu sma fu kisi wan vrede di ben komoto fu Gado.
Vrede fu Gado ini a ten disi
4. Fa Yehovah pipel ini a muilek ten disi kan kibri vrede fu ati èn yeye?
4 Wi e libi na ini a ten fu na kaba, ini „tranga ten . . . di muilek fu pasa” (2 Timotéus 3:1). Den asiman di Openbaring taki fu den na fesi e rij abra a heri grontapu — soleki yu kan si ini den feti, mankeri fu nyanyan nanga dede leki wan bakapisi fu siki (Openbaring 6:3-8). Ooktu Yehovah pipel e ondrofeni den bakapisi fu den toestand di de lontu den. Sobun fa yu kan kibri hori wan vrede fu Gado fu yeye èn ati? Fudi yu e tan krosbei na a liibi fonten fu trowstu nanga vrede. Soleki na artikel a fesi ben sori, dan a e aksi furu begi èn tranga begi. Tapu a fasi dati „na vrede fu Gado, di e pasa ala prakseri, . . . kibri yu ati nanga yu yeye koni nanga yepi fu Kristus Yesus”. — Filipi 4:6, 7.
5. Fu san-ede Paulus ben de seiker fu en dati „na vrede fu Gado” kan kibri wi ati?
5 Na apostel Paulus di ben skrifi den wortu disi ben ferdrage srefi kefar nanga muilekheid. A ben de ini straf’oso èn den dyu nanga Romeinsma ben naki en. Den ben iti ston na en tupu èn ben libi en na baka leki a ben dede. Waka fu na wan presi go na trawan ini a ten dati ben de wan risico; dritron a boto pe Paulus ben de na tapu ben naki broko èn furutron a ben de na ini a kefar dati rowfer ben fadon kon na en tapu. Furu neti sondro fu sribi a ben kisi èn ben pina furutron ini kowru èn angri èn drei watra. Boiti fu ala den sani dati dan a ben firi aladei „na sorgu fu ala gemeente” (2 Korinte 11:24-28). Paulus ben sabi sobun fu en ondrofeni o prenspari „na vrede fu Gado” de di kan kibiri wi ati.
6. Fu san-ede a de tumsi prenspari fu kweki wan waran èn krosbei banti nanga wi Mekiman èn hori dati?
6 Wi kan taki dati na „na vrede fu Gado” de leki wan firi fu rostu èn tirifasi, wan sori fu wan bun ma-tifasi nanga Gado. Disi de tumsi prenspari gi kresten spesrutu te den kon tanapu na fesi ferfolgu ofu benawtu. Fu san-ede? Now, wi alamala de onvolmaakti; te furu problema, spanning, gens ofu difrenti sortu fu muilekheid e kon a wi tapu, dan makriki wi ben kan kon frede. Dati ben sa kan meki dati wi libi wi soifri-retifasi a wan sei. Dati ben sa tyari syen kon tapu Yehovah nen, ben kan meki wi lasi Yehovah bun-ati èn ben kan meki wi lasi wi tego libi. Fa a a de fu dat’ede tumsi prenspari dati wi feti a baka fu kisi a vrede fu Gado di kan yepi wi fu kakafutu. Nanga bun winimarki gi den sortu tyalansi disi, Na vrede dati de seiker wan fu den ’bun presenti èn volmaakti kado’ di wi hemel Tata poti gi wi fu kisi. — Yakobus 1:17.
7, 8. (a) „Vrede fu Gado” abi sortu fondamenti? (b) Fa wi abi wan eksempre fu so wan sortu vrede ini a geval fu wan Afrikan brada?
7 Kande yu ben si dati son sma e psa a libi nanga wan korostu fertrow. Nofotron disi e kon fu natuurlek bekwaamheid, krakti inisei fu na osofamiri, gudu, wan famiri di abi furu makti, na opleiding di den ben kisi na skoro, èn tra fu den sortu sani disi. „Na vrede fu Gado” de wan heri tra sani. A toestand dati no abi en fondamenti tapu bun omstandigheden èn no e kon ooktu fu libisma bekwaamheid ofu redenering. A e kon fu Gado èn ’e psa ala prakseri’. J.B. Phillips e taki ini en vertaling fu Filipi 4:7 dati ’na vrede fu Gado e psa a frustan fu libisma’. Grontapusma furutron e tanapu fruwondru fu na fasi tapu fa kristensma e tanapu fesi na fesi nanga seryusu problema, mankeri na skin èn srefi dede.
8 Wan disi ten eksempre fu disi ben de wan sma fu Yehovah Kotoigi di ben hori wan kristen komakandra ini wan Afrikankondre, pe den ben kragi den kotoigi, moro furu fu di den katholieksma fu a kondre dati ben sutu faya, dati den de terrorist. Wantronso srudati-skowtu nanga bayonet tapu na gon fu den ben sori densrefi. Den sei den uma nanga pikin go na oso ma ben bigin naki den man. Na kotoigi e ferteri: „Mi no abi wortu fu na fasi fa den ben behandel mi. Na korporaal di ben de fesiman, ben ferklari na fesi fu ala sma dati den ben mu naki mi kiri. Den ben naki mi so nanga wan udu kodja dati 90 dei mi ben e psiti brudu ete. Ma mi broko-ede ben go na a libi fu den kompe fu mi. Ini begi mi aksi Yehovah fu sorgu fu na libi fu den skapu disi fu en”, èn den alamala ben tan a libi. Fa disi ben de wan moi eksempre fu na kibri fu korostufasi na ondro skreki omstandigheden èn fu lobi broko-ede gi trawan! Iya, na lobi hemel Tta fu wi e arki den begi fu en getrow dienstknegti seiker èn e gi den en vrede. Wan fu den srudati di ben fruwondru ben taki na a okasi dati dati na Gado fu den Kotoigi musu de ’na tru Gado’.
9. Sortu bakapisi na leisi fu na bijbel èn a go prakseri dipi fu en kan abi?
9 Ini a muilek ten disi furu kristen abi problema di e bruya den èn e meki den lasi-ati. Wan tumsi moifasi fu hori vrede fu yeye de fu leisi bijbel èn fu go denki dipi fu en. Disi kan gi wan sma na krakti èn na faste bosroiti fu go doro èn fu tan stanfaste. „A wortu fu Gado de a libi èn a abi krakti.” — Hebrewsma 4:12.
10. Fa na vermogen fu kari tekst kon ini yu prakseri, kan de wan blesi.
10 Ma efu sani no waka bun gi wi now te wi no abi nowan bijbel? Wan kristen fu eksenpre den kan kisi en wantronso èn trowe en go ini dungru-oso sondro en bijbel. Ini a geval dati a ben sa de wan blesi efu wan sma kan memre tekst leki Filipi 4:6, 7; Odo 3:5, 6; 1 Petrus 5:6, 7 èn Psalm 23. Yu no ben sa warderi en srefsrefi efu yu ben sa man fu kari den sortu tekst disi kon ini yu prakseri èn go denki fu den? Inisei fu ferferi dungru-ososkotu a ben sa de leki Yehovah srefi e taki nanga yu. A Wortu fu Gado kan dresi wan geest di kisi mankeri, gi tranga na wan degedege ati èn poti vrede ini a presi fu hebi skreki ini a sili. (Luku Psalm 119:165.) Iya, a de tumsi prenspari fu skrifi tekst go dipi ini wi geest now di wi de ini a okasi dati ete.
11. Fa wan brada ini Nederlanti ben sori a fanowdu di a abi fu yeye nyanyan?
11 Arthur Winkler ben de wan sma di ben abi dipi warderi gi na bijbel spesrutu ini a ten di den doisri Nazi-sma ben hori Nederlanti na den ondro èn di den kotoigi ben mu go doro nanga den kristen activiteit fu den na kibrifasi. Na Gestapo ben suku fu kiri brada Winkler. Di te fu kaba den ben kisi en, dan den ben proberi — te den weri fu tyari en kon sofara fu skeki ensrefi. Ne den ben naki en te a ben flaw. Den ben poti en na ini wan dungru-oso cel nanga tifi di ben naki komoto ini en mofo wan ondro kakunbe di ben komoto a skrufu èn wan skin di naki priti opo. Ma a sma di ben luku en sori en bun-ati èn switifasi. Brada Winkler ben suku a tiri fu Yehovah ini begi. A ben firi ooktu bun tranga na fanowdu fu yeye nyanyan èn ben aksi na man di ben luku en fu yepi en. Bakaten na cel-doro ben opo èn wan bijbel ben trowe kon inisei. ’Fa a ben de wan prisiri’, brada Winkler bakaten ben taki, ’fu nyanbun aladei fu den den switi wortu fu waarheid . . . mi ben firi misrefi moro tranga na yeyefasi.’a
Na vrede fu Yehovah sa kibri
12. Fu san-ede wan spesrutu fanowdu de fu kibri wi ati èn wi yeye vermogen?
12 Yehovah e pramisi dati en vrede „sa kibri yu ati èn yu yeye vermogen” (Filipi 4:7). Disi de tumsi prenspari! Na ati de na sdonpresi fu den buweigi fu wi ati èn den firi. Ini den laste dei disi wi ati makriki kon swaki fu frede èn broko-ede, ofu kori wi go fu du ogri. Na algemene model fu libi esesi e kon moro lagi. Alaten wi mu de nanga ai. Boiti dati wi abi wan tranga ati fanowdu, dan wi mu sorgu ooktu dati Gado tranga èn tyari wi „yeye vermogen” nanga yepi fu en Wortu, èn en gemeente.
13. Sortu winimarki kan kon fu en efu wi e kibri wi yeye vermogen?
13 Leki fa W.E. Vine e taki dan na Griki wortu no.e’ma (di ben vertaal nanga „yeye vermogen”) e tyari na ini en na prakseri fu „mark” ofu „marki di de na yu fesi” (An Expository Dictionary of New Testament Words). Sobun a vrede fu Gado kan gi wi tranga ini a feti baka na kristen marki fu wi èn kibri wi fu ibri firi fu kon swaki ofu fu kenki fu prakseri sondro bun reide. Las’ati ofu problema no ben sa skreki wi so makriki. Efu fu eksempre wi ben poti leki marki fu dini Yehovah ini wan spesrutu hoedanigheid, soleki fu teki na furutendienst tapu wi ofu fu froisi go na wan gebied pe bedinari de tranga fanowdu, dan „na vrede fu Gado” sa de wan bigi yepi gi wi fu tan wroko ini na richting fu na marki dati (Teki gersi nanga Lukas 1:3; Tori fu den Apostel 15:36; 9:21; Romeini 15:22-24, 28; 1 Thesalonika 2:1, 18). Fu kan tranga yu yeye vermogen moro fara dan yu mu gi ten bun furu na studi fu na Wortu fu Gado èn kristen komakandra. Na so yu e gi yu yeye èn ati nyanyan nanga krin prakseri di e bow yu bribi. Yu man fu gi nofo ten fu hori yusrefi bezig nanga den „taki” di kon nanga Gado santa yeye? Yu musu poti kande moro prakseri na den?
14. Tapu sortu rai di kon fu santa yeye wi mu poti prakseri bun?
14 A sa de krin dati na ati èn na yeye, èn den yeye vermogen de fu na tori fu a kisi èn nyanbun fu a „vrede fu Gado”. Na rai fu Gado e hori bakz gi disi: „Mi manpikin, poti tog prakseri na mi wortu. Beni yu yesi go na den taki fu mi. Meki den no drifi komoto fu yu ai. Kibri den let mindri fu yu ati. Bika den de libi gi den sma di e feni den èn gesontu gi heri a meti fu den. Kibri yu ati, ya, moro leki ala tra sani di de fu kibri, bika na fu drape den fonten fu libi e bigin.” — Odo 4:20-23.
15. Sortu prati Yesus abi dati wi abi „na vrede fu Gado”?
15 „Na vrede fu Gado” di e kon fu wan waran èn krosbei banti nanga Yehovah e kibri wi ati èn wi yeye vermogen „nanga yepi fu Kristus Yesus” (Filipi 4:7). Sortu rol Yesus e prei ini disi? Paulus e tyari kon na krin: „Meki no ferdini bunfasi èn vrede kon de wan pisi fu yu fu Gado, wi Tata èn Masra Yesus Kristus. A ben gi ensrefi fu wi sondu fu fri wi fu na disiten goddelowsu seti fu sani, akruderi na wani fu wi Gado èn Tata” (Galasia 1:3, 4). Iya, Yesus na wan lobifasi ben gi en libi sodati wi ben sa bai kon fri (Mattéus 20:28). Sobun a de ’nanga yepi fu Kristus Yesus’ dati Yehovah kan feni wi bun leki en dienstknegti di gi densrefi abra èn san de ini na positsi fu prisiri ini na vrede disi fu Gado di kan de leki wan kibri gi wi.
Kefar di de gi na vrede fu Gado
16. Sortu rai Paulus ben gi di kan yepi wi fu kibri „na vrede fu Gado”?
16 Te wi kisi na vrede fu Gado kaba dan wi mu sorgu dati wi tan hori a vrede dati. Furu sani kan fufuru a vrede fu kristensma. A moro algemeen wan èn seiker a moro kefarlek wan, de den krakti lostu fu don yongu yari. Paulus ben gi ini en di fu tu brifi na Timotéus di na a ten dati kande seiker ben de ini den dritenti yari na rai di e kon now: „Lon komoto gi den lostu di fasi na den yongu yari, ma feti na baka regtvaardikifasi, bribi, lobi, vrede, makandra nanga den di e kari Masra fu wan krin ati.” — 2 Timotéus 2:22.
17. San ben pasa nofotron nanga na seksualiteit di Yehovah ben gi?
17 A mindri den lostu dati yu abi den sekslostu, di na ini- sei fu na trowlibi abi wan krin presi. Ma ini na heri historia na lostu disi fu seks ben kon a fesi tapu wan ferkeertifasi ini a libi nanga makandra bifo wan sma trow ofu dorosei fu wan trowlibi, di alatu di koni mekiman no e feni bun (Hebrewsma 13:4; Genesis 34:1-3). Na kefar fu libi yusrefi abra gi sekshurudu de wan kefar now gi kristen, awinsi den de yongu ofu owru kaba. Ini den laste dei disi fu na grontapu di pori dan seks de gi furu sma soso wan angri fu na skin, nofotron nanga du di de gewoon a mindri mansma èn umasma di de homoseksueel. — Romeini 1:24-27.
18. Fu san-ede na ati fu son sma no de stanfaste, èn disi kan tyari sortu bakapisi kon?
18 Dati wi e libi ini sowan sortu klimaat, e poti wan streipi na ondro o prenspari a de gi wi fu abi wan tranga èn stanfaste ati di de gi a dini fu Yehovah. Son sma di ben teki a Kownukondreboskopu bribi den bijbel gronwaarheid èn e abi demakandra geregeld nanga Yehovah pipel no e kweki dipi waarderi gi Yehovah, en Wortu nanga en organisatie na a heri grontapu. Na ati fu den no de so stanfaste ete. Makriki den kan kon tapu wan seipasi nanga yepi fu „lostu di de fu den yongu yari”. Sonwan fu den sa kakafutu gi kori fu go ini hurudu ofu sutadu, ma soleki Paulus e warskow, e „kweki moro lobi gi lostu leki lobi gi Gado” (2 Timotéus 3:4). Den e gi furu moro ten na luku fu televisie, a leisi fu ontspanningslektuur èn na arki na wilder poku leki na persoonlek studi, kristen komakandra ofu na Kownukondrediniwroko. Disi makriki e meki dati wan sma e kon swaki na yeyefasi èn te fu kaba e fadon go na ini seryusu sondu.
19. San wi mu du fu no drifi gwe?
19 Den sortu sma disi net leki wan bigi boto sondro ankra, e meki wan watra fu wan liba drifi den gwe di e tyari den go na wan rampu. Paulus e gi na rai: „Fu dat’ede meki a de fanowdu dati wi poti moro leki gewoon prakseri na den sani di wi ben yere sodati wi no drifi gwe noiti” (Hebrewsma 2:1). Den sma di de ini kefar sobun mu „poti moro leki gewoon prakseri” na a studeri fu a Wortu fu Gado, na sreka fu kristen komakandra èn a prati fu kownukondrewaarheid gi tra sma. A no de fu taki dati esesi wi ben sa kan go prakseri kaba: ’Dati na bun rai ma mi no de ini na toestand dati èn a rai de sobun no fu mi.’ O moro bun ibriwan fu wi ben sa du fu wegi go kon seryusu fa wi kan krin wi ati èn den moro dipi prakseri èn lostu fu wi moro fara èn kan „feti na baka regtvaardikifasi, bribi lobi, vrede, makandra nanga den di e kari Masra fu wan krin ati” (2 Timotéus 2:22). Moro furu wi mu aksi Gado fu kisi tiri èn yepi fu tranga wi yeye.
20. San wan sma mu du di gi ensrefi abra na seryusu sondu?
20 Efu sma trutru gi densrefi abra na seryusu sondu ma e tapu en, dan a de krin dati den e lasi Yehovah bunati èn na „vrede fu Gado” di den abi. Den sa lasi ooktu den eigi vrede fu yeye. (Teki gersi 2 Samuel 24:10; Mattéus 5:22, 23.) A mu de fu dat’ede ooktu krin fu san-ede a de so fanowdu dati wan kristen di fadon go na ini bigi sondu, ferteri en sondu na Yehovah, èn ooktu na lobi owruman di kan meki yeye kon gesontu doro (Yesaya 1:18, 19; 32:1, 2; Yakobus 5:14, 15). Te wan sma di lasi en balansi tapu na grati pasi fu sondu, e suku yepi na lepi brada, dan a no sa tan hori na hebi nanga wan bruya konsensi èn tan de sondro na vrede fu Gado.
21. Sortu reide fu dipi grantangi na Yehovah wi abi na ini a ten disi, èn sortu faste bosroiti wi mu abi?
21 Fa a de wan grani ini a ten disi fu de wan sma fu Yehovah Kotoigi di gi ensrefi abra! Ala pe lontu wi na grontapu fu Satan fadon broko èn moro nanga moro e kon de ini bruya. Dyonsro a sa pasa gwe. Furu sma e „weri fu frede èn fruwakti fu den sani di e kon tapu na grontapu pe sma e libi”. Ma wi kan opo wi ede fudi wi sabi dati wi „ferlusu e kon krosbei” (Lukas 21:25-28). Meki wi du ala muiti fu „dini na Gado di e gi vrede” getrow fu sori o tangi wi de na Yehovah fu na „vrede fu en di e pasa ala prakseri”. — Romeini 15:33; 1 Korinte 15:58.
[Futuwortu]
Punt fu luku san un ben leri
◻ Fa na „vrede fu Gado” e yepi wi ini a ten disi èn ’fa disi e pasa ala prakseri’?
◻ Sortu sani e meki wi kibri vrede fu yeye?
◻ Sortu fini kefar de leki wan kefar gi furu kristen ini a ten disi, èn disi kan tyari wi go na san?
◻ San wan kristen mu du efu a du wan bigi sondu?
[Prenki na tapu bladzijde 7]
Paulus ben sabi fu ondrofeni dati na vrede fu Gado kan kibri na ati
[Prenki na tapu bladzijde 10]
Yu de na ini na kefar fu drifi gwe na yeyefasi?