Yesus libi nanga diniwroko

Na afersi fu na abi fu wan papa

NA TAKMAKANDRA di Yesus abi na ini a ten fu na wiwirikampufesa na ini 32 G.T. nanga den dyu tiriman e kon moro faya. „Mi sabi dati yu de geslagti fu Abraham”, Yesus e erken, „ma unu e suku fu kiri mi, fudi mi wortu no man psa go ini unu. Mi e taki den sani di mi ben si na mi Tata; èn unu e du fu dat’ede den sani di un ben yere fu un tata”.

Aladi Yesus no e sori suma na den tata, a e meki kon krin dati den abi wan tra tata leki en. Sondro fu frustan suma Yesus abi na ini prakseri, den dyu tiriman e piki: „Wi tata na Abraham.” Den e prakseri dati den abi na srefi bribi leki Abraham, di ben de Gado mati.

Ma Yesus e seki den fu di a e piki: „Efu un de pikin fu Abraham, du dan den wroko fu Abraham.” A de wan tru sani dati wan tru manpikin e waka na baka en tata. „Ma now unu e suku fu kiri mi, wan sma di ben taigi unu na waarheid, di mi ben yere fu Gado. Abraham no ben du disi.” Fu dat’ede Yesus e taki agen: „Unu e du den wroko fu un tata.”

Te now ete den no e frustan fu suma Yesus e taki. Den e hori dati den de wettig pikin fu Abraham èn e taki: „Wi no gebore fu hurudu.” Aladi den e taki dati netleki Abraham den de tru anbegiman meki den e ferklari fu dat’ede: „Wi abi wán tata, Gado.”

Ma Gado na trutru den Tata? „Efu Gado ben de un tata,” Yesus e piki, „dan un ben sa lobi mi, bika fu Gado mi ben komoto èn mi de dya. Ooktu mi no kon kwetkweti fu misrefi, ma en ben seni mi. Fa a du kon dati un no e frustan san mi e taki?”

Yesus ben pruberi fu meki den kerki fesiman disi si sortu bakapisi a abi te den trowe en. Ma now a e taki sondro fu kibri wan sani: „Unu kon fu un tata, Didibri, èn unu wani du den lostu fu un tata.” Sortu tata Didibri de? Yesus e meki sma kon sabi Didibri leki wan kiriman èn a e taki ooktu ete: „A de wan leiman èn a tata fu den lei.” Fu dat’ede Yesus e kon na a bosroiti: „A sma di komoto fu Gado, e arki ra den wortu fu Gado. Fu dat’ede unu no e arki, fudi unu no kon fu Gado.”

Nanga atibron fu na krutu fu Yesus den dyu e piki: „Wi no e taki nanga reti: yu na wan Samariasma èn yu abi wan takru yeye na yu tapu?” A wortu „Samariasma” e gebroiki na tapu wan feragti fasi èn fu sori dati wan sma no agri nanga wan sani, bika den Samariasma den dyu no ben wani si na ai leki pipel.

Yesus e poti na feragti sani disi a wan sei leki a de wan Samariasma èn e piki: „Mi no abi wan ogri yeye na mi tapu, ma mi e gi grani na mi Tata ma unu e soso mi.” Moro fara Yesus e taki na fruwondru pramisi di e kon now: „Efu wan sma e hori mi wortu, dan seiker noiti a sa si dede.” Yesus a no de fu taki no e bedoel dati ala sma di e waka na en baka, letterlek noiti sa si dede. A e bedoel morofuru dati noiti den sa kon na ini a positsi fu kisi tego pori, ofu fu taki en trafasi „na di fu tu dede” pe opobaka no man de moro.

Ma den dyu ben frustan Yesus wortu letterlek. Fu dat’ede den e taki: Now wi sabi seiker dati yu abi wan ogri yeye na yu tapu. Abraham dede èn ooktu den profeiti, ma yu e taki: ’Efu wan sma hori mi wortu dan seiker a no sa tesi dede noiti.’ Yu de sonte moro bigi leki un tata Abraham, di dede? Ooktu den profeiti dede. Suma yu e taki yu de?

Ini a heri takmakandra disi e kon a krin dati Yesus o sori den man disi dati en de a pramisi Messias. Ma na presi fu piki na aksi fu den fu kon sabi suma na en, Yesus e taki: „Efu mi e gi grani na misrefi, dan na glori fu mi no de noti. A de mi Tata di e gi grani na mi, fu suma unu e taki dati de a Gado fu unu; èn toku unu no hen sabi en. Èn mi ben o taki doti mi no sabi en, dan mi ben sa de netleki unu wan leiman.”

Morofara Yesus e sori agen tapu a getrow Abraham èn a e taki: „Abraham, un tata, ben prisiri srefsrefi fu na fruwakti fu si a dei fu mi, èn a ben si en èn a ben prisiri.” Iya, Abraham nanga ai fu bribi ben luku go na a kon fu na pramisi Messias. Sondro fu bribi den dyu e piki: „Yu no de feifitenti yari srefi, èn toku yu ben si Abraham?”

„Futru, futru, mi e taigi unu”, Yesus e piki, „bifo Abraham ben du kon, mi ben de kaba.” Yesus e sori a no de fu taki dya tapu en de di a ben de bifo a ben tron wan libisma leki wan makti yeye sma na ini hemel.

Nanga atibron fu san Yesus ben taki dati a ben de bifo Abraham, meki den dyu e teki ston fu hiti go na en. Ma a e kibri èn sondro mankeri a e komoto ini a tempel. Yohannes 8:37-59; Openbaring 21:8.

◆ Fa Yesus e sori taki a abi wan tra Tata leki en feianti?

◆ San a wani taki dati den dyu e kari Yesus wan Samariasma?

◆ San Yesus e bedoel te a e taki dati en bakaman noiti sa si dede?