Dini Yehovah ini wanfasi
„Dan mi sa drai go na den pipel nanga wan soifri tongo, sodati den alamala mag kari na nen fu Yehovah, fu dini en na ini wanfasi.” — ZEFANYA 3:9, American Standard Version.
1, 2. (a) Sortu profeititori Yehovah e meki kon tru? (b) A profeititori disi e gi wi na okasi fu poti sortu aksi?
YEHOVAH GADO e du now wan sani di libisma tapu eigi krakti noiti ben sa kan du. Na ini a prati grontapu disi sma e taki sowan dri dusun tongo, ma Gado e meki en profeititori kon now tru: „Mi sa meki pipel drai go tapu wan soifri tongo, sodati den alamala kan kari na nen fu Yehovah, fu dini en skowru na skowru.” — Zefanya 3:9.
2 San na a „sofri tongo” disi? Suma e taki na tongo disi èn san a wani taki ’fu dini Gado skowru na skowru’?
Den e taki na „soifri tongo”
3. San na a „soifri tongo”, èn fu san-ede den sma di e taki en no de prati?
3 Nanga Pinksteren fu na yari 33 G.T. Gado santa yeye ben kanti tapu den disipel fu Yeus Kristus, sodati den ben man fu taki ini tongo di den no ben leri. Disi ben gi den na mogelekheid fu ferteri na ini furu tongo den sma „fu den bigi du fu Gado”. Na sofasi Yehovah ben bigin fu tyari sma fa ala etnische bakagron kon na ini wanfasi (Tori fu den apostel 2:1-21, 37-42). Di bribi heiden bakaten ben tron bakaman fu Yesus, dan Gado dienstknegti ben tron trutru wan pipel fu furu tongo èn furu ras. Ma noiti den ben prati nanga ala sortu pratifasi di de leki skotu na ini a grontapu, fudi den alamala e taki na „soifri tongo”. Disi na a gemeenschappelek tongo fu bijbel waarheid di Zefanya 3:9 e taki a fesi fu en (Efese 4:25). Den sma di e taki na „soifri tongo” no prati ma ’e taki ini akruderi nanga makandra’, fudi den „de krosbei ini wanfasi na ini na srefi yeye èn ini a srefi fasi fu denki alaten” — 1 Korinte 1:10.
4. Fa Zefanya 3:9 e sori na tapu wan wroko-makandra fu furu tongo èn furu ras, èn pe wi e feni disi now?
4 Na „soifri tongo” ben sa gi fu meki sma fu ala natie èn ras man fu dini Yehovah „skowru na skowru”, letterlek ’nanga wan skowru’. Den ben sa dini Gado „sei na sei” (WV), „na ini wanfasi” (Luthers-vertaling), „nanga wan wanfasi skowru” (Staten Vertaling). Wan tra vertaling de: „Dan mi sa meki den mofobuba fu ala pipel kon krin, sodati den alamala mag kari Yehovah nen èn wroko makandra ini en dienst” (Byington). Sowan wroko makandra fu furu tongo nanga furu ras na ini Gado dienst wan sma e feni wawan na mindri Yehovah Kotoigi.
5. Fu na gebroiki fu san Yehovah Kotoigi man fu gebroiki ibri tongo?
5 Fudi ala kotoigi fu Yehovah e taki na „soifri tongo” fu na bijbel waarheid, meki den man fu gebroiki sortu linisma tongo ooktu gi na moro hei gebroiki — na prijse fu Gado èn meki bekenti fu na bun nyunsu fu na Kownukondre (Markus 13:10; Titus 2:7, 8; Hebrewsma 13:15). O moi a de dati na „soifri tongo” a sowan fasi e meki sma fu ala etnisch grupu man dini Yehovah ini wanfasi!
6. Fa Yehovah e si libisma, ma san de bun efu wan marki fu parijfasi de ete na ini a ati fu wan seiker kresten?
6 Di Petrus ben gi kotoigi na Cornelius nanga tra heiden, a ben taki: „Mi e si seiker-seiker dati na Gado partijfasi no de, ma na ini ala natie a sma di e frede en èn e du regtvaardikifasi a e feni bun” (Tori fu den Apostel 10:34, 35, By). Leki fa tra vertaling e taki en dan Yehovah „no de wan sma di e teki wan sma persoon”, ’a no e meki wan difrenti’ èn ’a no e poti wan sma fesi wan trawan’ (SV; Bigi Nyunsu Bijbel; Na Libi Wortu). Leki dienstknegti fu Yehovah wi mu si ibri etnisch grupu soleki fa en e du dati. Ma efu now ete wan marki fu partijfasi e libi doro na ini na ati fu wan seiker kristen? Dan a ben sa bun fu si fa wi Gado di no e teki sma partij e handri nanga en dienstknegti fu ibri natie, lo nanga tongo èn ibri pipel. — Luku ooktu Ontwaakt! fu 8 maart 1985, blz. 3-11.
Den de sani di sma ben sa wani
7. Fa wan kristen no e kenki fu wan tra kristen fu wan tra natie ofu wan tra ras efu a e go fu na matifasi nanga Gado?
7 Efu yu de wandopu kotoigi fu Yehovah, dan wan dei yu ben de ini a situwasi dati yu ’ben e soktu èn e geme fu den tegu sani’ di e feni presi na ini na goddelowsu seti disi (Ezechiél 9:4). Yu ben ’dede ini yu sondu’, ma tapu sar’atifasi Gado ben hari yu kon na en nanga yepi foe Kristus (Efese 2:1-5; Yohannes 6:44). Na ini disi yu no ben kenki furu fu tra sma di de now yu kompe bribiman. Ooktu gi den goddelowsufasi èn tegu sani, ooktu den ben ’dede ini den sondu fu den’ èn ben de sma di ben kisi Gado sar’ati nanga yepi fu Yesus Kristus. Èn awansi sortu ras ofu nationaliteit wi de a de soso nanga bribi datu sortu wan fu wi mag teki wan bub positsi na fesi fu Yehovah Gado leki wan fu en kotoigi. — Romeini 11:20.
8. Fa Haggaï 2:7 e kon tru?
8 Den profeitis wortu fu Haggaï 2:7 e yepi wi fu si fa a luku fu wi mu de tapu kompe bribiman fu tra nationaliteit. Yehovah ben ferklari drape: „Mi wani seki ala natie, en dèn sani fu ala natie di sma ben sa wani sote mu kon na ini; èn mi wani furu na oso disi nanga glori.” Na opo go a loktu disi fu na soifri fasi fu anbegi di taki dya a fesi e feni presi na ini Yehovah tru tempel, na kontren fu en anbegi (Yohannes 4:23, 24). Ma san na den „sani fu ala natie di ala sma wani sote”? A de den dusundusun sma di lobi regtvaardikifasi èn di teki na Kownukondrepreiki na wan bun fasi. Fu ala natie nanga ras den e lon go ’na a bergi fu Yehovah oso’, den e tron dopu kotoigi èn e tron wan pisi fu na internationaal „bigi ipi” (Yesaya 2:2-4; Openbaring 7:9). Den sma di e prijse Yehovah leki wan pisi fu en grontapu organisatie na krin, moreel sma di e gi densrefi na a dini fu Gado — trutru sani di yu e angri trutru fu abi. Ibri tru kristen fu dat’ede seiker sa wani sori brada lobi gi ala den sma disi di yu ben sa wani sote èn di wi gemeenschappelek Tata na ini hemel e teki.
Na persoonlekheid fu den de nyun
9. Awinsi ini a ten di psa wi no ben prakseri bun fu dorosei sma, fu san-ede disi mu de now trafai, now di wi de kresten?
9 Wi yeye brada nanga sisa na a heri grontapu de fu dat’ede sani di yu e angri fu abi fudi den e poti prakseri tapu a rai ’fu puru na owru persoonlekheid nanga en du èn fu weri na nyun persoonlekheid’. „Nanga yepi fu soifri sabi [disi] e kon nyun akruderi na prenki fu na sma di ben meki en, pe no Griki no dyu de, besnijdenis, no-besnijdenfasi, dorosei sma, Scyth, srafu, ma Kristus de ala sani na ini ala sma” (Kolosse 3:9-11). Efu wan sma fosten no ben denki bun fu wan dyu, wan Griki ofu trawan di no ben de fu en eigi pipel, dan dati mu de tra fasi now di a tron wan kristen. Awinsi ras, nationaliteit ofu kuturu, den sma di „abi na nyun persoonlekheid”, e du muiti ini a kweki èn a sori fu na froktu fu Gado santa yeye — lobi, prisiri , vrede, langa pasensi, switifasi, bunfasi, bribi, safri-atifasi èn dwengi yusrefi (Galasia 5:22, 23). Disi e meki kompe anbegiman fu Yehovah lobi en.
10. Fa Titus 1:5-12 kan yepi wi efu wi kon na ini na tesi fu taki wortu di no bun ini algemeen fu wi kompe bribiman fu sortu ras ofu sortu natie ooktu?
10 Kontrari leki Yehovah anbegiman, dan son grontapu sma e taki tapu wan feragti fasi fu sma di abi wan tra etnische bakagron leki densrefi. Fu en eigi pipel notabene wan profeiti fu den Kreta sma ben taki wan dei: „Kreta sma alaten de leiman, hogri welder meti, tap’ala di no e wroko”! Sma ben memre Paulus na den wortu disi di a ben de fanowdu fu tapu a mofo fu falsi leriman a mindri den kristen tapu na eilanti Kreta. Ma Paulus seiker no ben taki: ’Ala kristen fu Kreta e lei, èn den de ogri en lesi tap’ ala’ (Titus 1:5-12). Nono, bika kristensma no e taki na wan feragti fasi fu trawan. Boiti fu dati, na moro bigi pisi fu den kristen dati fu Kreta ben „weri na nyun persoonlekheid” èn sowan ben abi den yeye kwaliteit fu ben kisi a wroko fu wan owruman. Wi e du bun fu go prakseri disi seryusu efu oiti wi kon ini na kori fu gebroiki takru wortu ini algemeen gi wi yeye brada nanga sisa fu wan bepaalde ras ofu wan bepaalde nationaliteit.
Luku trawan moro hei leki yusrefi
11. Efu partijfasi fu sortu fasi de tu ini na ati fu wan kristen san a kan du dan?
11 Efu na a tra sei wan kristen ben sa de sondro fu teki partij fu na bun fu wan ras ofu nationaliteit, dan a ben sa sori dati kande nanga wortu ofu du. Disi moro fara ben sa meki ferferi firi kon, spesrutu ini wan gemeente di de fu sma fu difrenti etnische bakagron. Seiker nowan kristen ben sa wani hebi na wafasi fu Gado pipel na so wan fasi (Psalm 133:1-3). Efu sobun ini a ati fu wan kristen wan pratifasi kan de, dan a de bun fu begi: „Ondrosuku mi, O Gado, èn sabi mi ati. Ondrosuku mi, èn sabi mi bruya prakseri, èn luku efu ini mi sontron wan sari pasi de, èn tyari mi tapu na pasi fu ten di no abi marki.” — Psalm 139:23, 24.
12. Fu san-ede wi no kan meki bigi ini wisrefi ofu ini trawan fu wi etnische bakagron?
12 A de bun fu abi na luku fu sani leki fa den de dati wi alamala de onvolmaakti sma di no ben kan teki wan bun positsi na fesi fu Gado efu na ofrandi fu Yesus no ben de (1 Yohannes 1:8-2:2). San e meki wi kenki fu dat’ede fu tra sma? Fudi wi no abi noti di wi no ben kisi, san wi mu gafa dan ini wisrefi ofu ini tra sma nanga suma wi abi na srefi etnische bakagron? — Teki gersi nanga 1 Korinte 4:6, 7.
13. Fa wi kan yepi fu na wanfasi fu na gemeente gro èn san de fu leri fu Filipi 2:1-11?
13 Wi kan meki na wanfasi fu na gemeente kon efu wi erken den bun eigifasi fu tra sma èn sori warderi fu dati. Na dyu apostel Paulus ben gi ala sma sani fu go denki di a ben skrifi den heiden Filipisma: „Meki na prisiri fu mi kon bun dorodoro fudi yu e denki asrefi èn abi na srefi lobi, fugu kon makandra ini sili, hori na wan ini prakseri, no du noti fu trobi fasi ofu fu prakseri yusrefi nomo ma nanga sakafasi fu yeye luku na trawan moro hei leki yusrefi.” San de na yoisti fasi gi wi fu sori gi kompe libisma fu sortu ras ofu sortu nationaliteit tu, wi e si ini na eksempre di Yesus ben gi. Aladi a ben de wan yeye mekisani, toku a ben „kon tron leki libisma” èn a ben saka ensrefi gi sondu ibisma fu ibri ras èn ibri natie te na dede na wan pina-udu (Filipi 2:1-11). Wi no mu de fu dat’ede leki Yesus bakaman nanga lobi, sakafasi, sar’atifasi, e erken dati trawan moro hei leki wi?
Arki èn luku
14. Fa wi kan kisi yepi fu si trawan moro hei leki wisrefi?
14 A kan yepi wi fu si trawan moro hei leki wi efu wi e arki trutru te den e taki èn efu wi e luku soifri a waka nanga libi fu den. Na so kande wi ben sa mu beken na wisrefi ini ala opregtifasi dati wan kompe owruman — kande fu wan tra ras — ben psa wi ini na bekwaamheid fu gi rai tapu wan bun fasi tapu na Theokratis diniwrokoskoro. Kande wi e si dati a de en yeyefasi èn no noodzakelijkerwijs en taki ofu fa a e vorm den zin de a sani di e meki a kisi bun winimarki efu a e yepi kompe bribiman fu tron bekwaam Kownukondrepreikiman. Èn a de krin dati Yehovah e blesi en muiti.
15. San wi sa si kande te wi e arki na den wortu fu kompe anbegiman?
15 Te wi e taki nanga wi brada nanga wi sisa ofu e arki na den kommentaar tapu den komakandra, dan kande wi sa si dati sonwan fu den e abi wan moro bun frustan fu bepaalde bijbel waarheid. Kande wi e si dati a bradalobi fu den de moro tranga, dati den e gersi dati den abi moro bribi, ofu dati den e sori wan moro bigi fertrow na ini Yehovah. Efu den abi wi etnische bakagron ofu no, den e gi wi dek’ati fu sori lobi nanga tumsi bun wroko e yepi wi fu tranga wi bribi èn e gi wi reide fu fertrow moro furu tapu wi hemel Tata (Odo 3:5, 6; Hebrewsma 10:24, 25, 39). Yehovah ben kon krosbei fu den èn dati wi mu du ooktu. — Yakobus 4:8.
Kisi blesi èn yepi
16, 17. Gi eksempre dati Yehovah no e teki sma partij na ini a blesi fu en dienstknegti fu sortu nationaliteit ofu ras?
16 Yehovah no e teki sma partij ini na blesi di a e gi en dienstknegti fu sortu nationaliteit ofu ras ooktu. Teki wan kondre leki Brasion. No fu den dorosei zendeling ma fu den mofo fu aiti Brasion seman sma ini Brasion na ini a yari 1920 ben yere fu a fositron na Kownukondreboskopu. Na blesi fu Gado ben de krin, bika na ini a dienst yari 1987 na kondre dati fu 141.302.000 sma di e libi na ini ben abi wan heimarki fu 216.216 Kownukondrepreikiman — wan verhouding fu wán preikiman tapu 654 sma di e libi na ini a kondre.
17 Teki wan tra eksempre fu a blesi fu Gado. Na ini april 1923 den ben seni tu blaka kotoigi fu Yehovah fu na Caribisch eilanti Trinidad go fu go preiki na Kownukondreboskopu na ini West-Afrika. A so a ben kon dati brada nanga sisa W.R. Brown ben dini drape yari langa èn sma ben kon sabi en leki „Bible Brown”. Den ’ben prani’ èn „Gado ben meki a tan gro” di ooktu trawan ben wroko na ini a kefarlek bigi gebied dati (1 Korinte 3:5-9). Now moro leki 32.600 Kownukondrepreikiman de ini Ghana èn moro leki 133.800 ini Nigeria en dati wawan na ini tu kondre.
18, 19. Gi eksempre di e sori dati wi Gado di no e teki sma partij e hori-baka gi en dienstknegti fu ala ras nanga natie.
18 No wawan Yehovah e blesi en dienstknegti fu ala natie èn ras, ma a e yepi den ooktu. Luku fu eksempre na geval fu tu Yapan kotoigi fu Yehovah. Tapu 21 yuni 1939 Katsoeo Mioera èn en uma skowtu ben kisi tapu wan onregtvaardikifasi, ben poti den na ini straf’oso èn ben de aparti fu den feifi yari manpikin di en granmama ben mu sorgu now fu en. Sisa Mioera den ben lusu baka aiti mun, ma brada Mioera moro leki tu yari den ben hori en bifo en afersi benkon a fesi krutubakra. Den ben mishandel en, den ben leisi strafu gi en èn a ben kisi wan strafu fu feifi yari. Na ini a dungru-oso fu Hirosjima Gado ben yepi en nanga yepi fu na bijbel, di ben gi wan trowstu nanga krakti di noiti ben misi. Nanga san trutru ben gersi wan wondru brada Mioera ben tan na libi di tapu 6 augustus 1945 na baster fu wan atoombom pori na straf’oso fu en. Tu mun a baka a ben man fu de baka na en uma nanga en manpikin noordsei fu Yapan.
19 Na ini a ten fu na di fu Tu Grontapufeti Yehovah Kotoigi na ini furu kondre ben psa faya ferfolgu. Robert A. Winkler fu eksempre ben de wan Doisri brada di ben ondrofeni na ini nazi-concentratiekampu na ini Doisrikondre nanga Nederland furu pina. Fudi a no ben wani tori en kompe kotoigi, meki den ben naki en na wan hogri-ati fasi dati yu no ben man sbi en. Ma a ben skrifi: „Den prakseri di mi ben prakseri Yehovah pramisi fu yepi wi na ini ala sortu muilekheid, ben gi mi trowstu èn krakti fu ferdrage ala disi. . . .Satra na Gestapo ben naki mi, èn na tra munde fu en den ben o go aksi mi sani baka. San ben psa now èn san mi ben mu du? Mi ben go ini begi na Yehovah, nanga a fretrow tapu den pramisi fu en. Mi ben sabi dati disi ben sa wani taki fu meki gebroiki fu theokratis fetistrategie fu na bun fu na Kownukondrewroko èn fu kibri wi kristen brada. A ben de wan bigi tesi gi mi fu horidoro èn na di fu tina-seibi dei mi ben weri petepete, ma mi ben gi Yehovah tangi dati mi ben man fu psa na ini en krakti na tesi disi èn fu ben kibri mi soifri-retifasi.” — Psalm 18:35; 55:22; 94:18.
Grantangi fu na bradafasi fu wi
20. Fa na respeki fu wi gi kompe bribiman fu sortu ras nanga sortu natie kan gro?
20 A no de fu taki dati Yehovah e blesi èn e hor’baka gi en kotoigi fu ala natie nanga ala ras. A no e teki sma partij, èn leki dienstknegti fu en di gi densrefi abra wi no abi wan enkri excuus, no wan enkri reide fu sori wisrefi partijfasi. Boiti fu dati a respeki fu wi gi wi brada nanga sisa fu ibri natie nanga ibri ras sa gro efu wi e luku na ini san den de moro hei leki wi. Densrefi tu e sori koni fu hemel, wan koni di no tapu wan partijfasi e meki difrenti na ini sani ma e tyari wan tumsi bun froktu kon (Yakobus 3:13-18). Iya, èn bunfasi, na fasi fu lobi gi sani, lobi nanga tra eigifasi fu a dini fu Gado e gi wi tumsi moi eksempre.
21. Sortu fasti bosroiti wi mu teki?
21 Fa wi kan de nanga tangi gi wi bradafasi di de fu furu ras èn furu nationaliteit! Meki wi, nanga yepi èn blesi fu wi hemel Tata, dini ’en skowru na skowru’ ini brada lobi èn respeki gi makandra. Iya, a mu de wi opregti winsi èn seiker prakseri fu dini Yehovah ini wanfasi.
San na den kommentaar fu yu?
◻ San na „soifri tongo” fu ala etnische bakagron e yepi den fu du?
◻ Fa Haggaï 2:7 e kon tru, èn fa disi mu abi krakti na tapu a luku fu wi tapu tra dienstknegti fu Gado?
◻ Fa Filipi 2:3 kan abi krakti na tapu a fasi fa wi de nanga sma fu ibri ras èn natie?
◻ Te wi e arki èn e luku sani, san wi sa si dan fu kompe bribiman fu ala nationaal bakagron?
[Prenki na tapu bladzijde 7]
Sma fu ibri ras èn ibri natie e prijse Yehovah ini wanfasi
[Prenki na tapu bladzijde 8]
Arki bun èn poti prakseri. Na lobi nanga bribi di e kon na fesi na ini den wortu fu tra kotoigi fu Yehovah sa buweigi yu