Gado no e teki sma partij
„Gado no e teki sma partij . . . , ma na ini ala natie a e feni a sma bun di e frede en èn e du regtvaardikifasi.” — TORI FU DEN APOSTEL 10:34, 35.
1. Sortu prenspari wortu di e go fu ras Paulus ben taki na ini na owru Athene?
„NA Gado di meki grontapu èn ala sani di de na ini, na Masra fu hemel nanga grontapu, no e libi ini tempel di libisma anu meki. . . . Komoto fu wan sma a ben meki ala ras di e libi na grontapu du kon” (Tori fu den Apostel 17:24-26, Na Nyun Testament ini na tongo fu wi ten.) Suma ben taki den wortu disi? Na kristen apostel Paulus, na a yurten di a ben taki a barinen preiki fu en tapu na pikinbergi Mars ofu Areopagus na ini a Griki Athene.
2. San e meki dati a libi kisi kloru èn de moi, èn san ben meki indruk tapu wan Yapan fisitiman ini Zuid-Afrika?
2 Nanga den wortu fu Paulus kande wi e go tanapu denki baka fa na wan wondru fasi difrenti sani de na ini den sani di Gado meki. Yehovah Gado ben meki libisma, meti, fowru, insekt nanga wiwiri èn bon ini someni difrenti sortu. Fa a ben sa de wan soi libi efu den alamala ben de asrefi! Dati den kenki fu makandra e sorgu dati a libi de nanga furu kloru èn de moi. Na so wan fisitiman fu Yapan di ben de na wan kongres fu Yehovah Kotoigi na ini Zuid-afrika, ben kon na ondro na indruk fu den difrenti sortu ras nanga kloru di a ben si drape. A ben taki fa disi de krinkrin tra fasi leki na ini Yapan pe na moro bigi pisi fu den sma abi densrefi raciaal marki.
3. Fa son sma e si wan tra bubakloru, èn san disi e tyari kon?
3 Ma a difrenti na ini kloru na mindri den ras e meki furutron seryusu problema du kon. Furu sma e si sma nanga wan tra skin kloru leki moro mendri. Disi e meki feianti fasi, ori-ati srefi du kon. Èn na krawasi fu raciaal krutu fu wan trawan a fesi. Disi ben de a prakseri fu wi Mekiman? Son ras de ini en ai moro hei? Yehovah e teki sma partij?
Wi Mekiman — e teki sma partij?
4-6. (a) San kownu Yosafat ben taki fu partij-fasi? (b) Fa den wortu fu Yosafat e sori taki den de tru te wi e teki luku san Mozes nanga Paulus ben e taki? (c) Sortu aksi kande son sma sa tyari kon a fesi?
4 Wi kan kisi wan idee fu na fasi tapu fa wi Mekiman e si na heri libismafamiri, te wi sa go poti wisrefi ini a ten di psa. Kownu Yosafat, di ben tiri tapu Yuda fu a ten fu 936 te 911 bifo G.T. ben poti furu afersi reti èn ben seti sani dati na apparaat fu krutu tori ben sa wroko leki fa Gado wet taki. A ben gi na tumsi moi rai disi na den krutuman: „Luku bun san yu e du, bika a no gi libisma yu e taki reti, ma gi Yehovah . . . De voorzigtiki èn handri, bika na Yehovah, wi Gado no wan onregtvaardiki fasi de, no wan teki fu sma partij.” — 2 Kron. 19:6, 7.
5 Hondrohondro yari a fesi na profeiti Mozes ben taigi den lo fu Israel: „Yehovah, yu Gado no e handri nanga no wan sma fudi a e teki en partij” (Deuteronomium 10:17). Èn na ini en brifi gi den Romeinsma Paulus ben fermane: „Wan benawtu skreki sa de gi ibri sma di e du ogri, fosi gi na dyu, iya, ma dan gi na Griki . . . bika Gado no e poti nowan sma fesi a trawan.” — Romeini 2:9-11, Na Nyun Testament ini na tongo fu wi ten.
6 Ma kande son sma e aksi: ’Fa a de dan nanga den Israëlsma? Den no ben de a pipel di Gado ben teki? A no ben teki den partij fu na bun fu den? Mozes no ben taigi Israel: „Na yu Yehovah, yu Gado ben teki fu tron en pipel, wan spesrutu gudu komoto fu ala natie?”’ — Deuteronomium 7:6.
7. (a) San ben de a bakapisi di den dyu ben trowe na Messias? (b) Suma kan kisi now tumsi moi blesi fu Gado, èn fa?
7 Nono, Gado no ben teki partij fudi a ben gebroiki den Israelsma fu wan spesrutu marki. Di Yehovah ben teki wan pipel fu meki na Messias kon nanga yepi fu den, dan a ben teki fu dati den bakapikin fu den getrow Hebrew famiri edeman. Ma di den dyu ben trowe na Messias Yesus Kristus, èn ben meki den kiri en, dan den ben lasi na bunati fu Gado. Ma na a momenti disi a de so dati sma fu ibri ras èn ibri natie di e sori bribi na ini Yesus, kan kisi tumsi moi blesi èn na fruwakti fu abi tego libi (Yohannes 3:16; 17:3). Disi e buweisi dati partijfasi no de na Gado. Boiti fu dati Yehova ben komanderi den Israëlsma ’fu lobi na vreemdesma di e libi na un mindri’ èn ’fu no handri en takru’, awinsi sortu ras, ofu nationaliteit a abi (Deuteronomium 10:19; Levitikus 19:33, 34). Sobun wi lobi Tata na ini hemel no de trutru wan sma di e teki partij.
8. (a) San e buwijsi dati Yehovah no ben sori Israël bunati? (b) Fa Yehovah ben e gebroiki Israël?
8 A de tru dati den Israëlsma ben abi spesrutu grani, ma den ben abi ooktu wan hebi frantwortu. Den ben de na ondro na ferplekti fu hori Yehovah wet, èn den sma di no ben gi yesi na den wet disi, ben kon na ondro wan fluku (Deuteronomium 27:26). Iya, den Israëlsma furutron baka ben mu kisi strafu fudi den no ben gi yesi na Gado wet. Yehovah no ben teki den. Na presi fu dati a ben gebroiki den gi profeitis prenki èn fu gi eksempre fu warskow wi. Koloku dati Gado ben tyari nanga yepi fu Israël na Ferlusuman, Yesus Kristus kon, leki blesi gi na heri libismafamiri. — Galasia 3:14; teki gersi nanga Genesis 22:15-18.
Yesus ben teki sma partij?
9. (a) Fa Yehovah nanga Yesus gersi makandra? (b) Sortu aksu e kon a fesi ini a tori fu Yesus?
9 Fudi partijfasi no de na Yehovah, dan a kan de so dati Yesus e teki partij? We, luku a punt disi: Yesus ben taki wan dei: „Mi no e suku mi eigi wani, ma na wani fu en di ben seni mi kon” (Yohannes 5:30). Wan volmaakti wanfasi de na mindri Yehovah nanga en lobi Manpikin, èn Yesus na ala fasi e du a wani fu en Tata. Iya, den gersi makandra so tranga ini a fasi fa den e luku sani èn den sani di den e feti a den baka dati Yesus ben kan taki: „A sma di ben si mi ben si ooktu a Tata” (Yohannes 14:9). Ini a ten moro leki 33 yari Yesus ben ondrofeni fa a ben de fu libi trutru leki libisma a grontapoe, èn a bijbel e tyari kon na krin fa a ben handri nanga kompe libisma. Fa en fasi ben de nanga tra ras? A ben krutu den a fesi ofu teki sma partij? Yesus ben de wan racist?
10. (a) San Yesus ben piki di wan uma fu Fenicië ben aksi en yepi? (b) Yesus ben sori taki a ben e krutu sma a fesi fudi a ben kari heidensma „pikin dagu”? (c) Fa na frow ben wini na genstaki èn nanga sortu bakapisi?
10 Yesus ben psa a moro bigi pisi fu en libi a mindri dyu sma. Ma tapu wan dei wan uma fu Fenicië ben kon na en, wan sma fu den heiden, di ben begi en fu dresi en umapikin. Yesus ben piki: „Den ben seni mi kon soso gi den lasi skapu fu na oso fu lsraël.” Toku na uma ban begi taki: „Masra yepi mi.” Tapu disi a ben taki: „A no de yoisti fu teki na brede fu den pikin èn trowe dati gi den pikin dagu.” Gi den dyu dan dagu ben de meti di no ben de krin. Sobun Yesus ben sori taki a e krutu heidemsma a fesi fu di a ben kari den „pikin dagu”? Nono, bika dyonsro a ben ferteri fu en spesrutu wroko fu Gado fu sorgu gi den ’lasi skapu’ fu Israël. Fu di a ben gebroiki na verklein wortu (pikin dagu) gi no-dyu sma èn no ben teki den gersi nanga welder dagu, a ben safu nanga dati na eksempre. A no de fu taki dati san a ben taki, ben de wan tesi gi na uma. Nanga sakafasi èn nanga wan faste bosroiti fu wini na gens-taki disi, a uma ben piki nanga tact: „Iya, Masra, ma den pikin dagu e nyan tog ooktu fu den sakasaka di e fadon fu a tafra fu den meister fu den.” Ondro na indruk fu na bribi fu na uma Yesus ben dresi a umapikin fu en wantewante. — Mattéus 15:22-28.
11. Sortu fasi dyu nanga Samariasma ben abi gi makandra, soleki na eksempre e sori pe Yesus ben de na ini?
11 Luku a miti di Yesus ben miti nanga seiker Samariasma. Wan dipi feiantifasi ben de a mindri dyu nanga Samariasma. Na wán okasi Yesus ben seni en boskopuman fu sreka sani na ini wan seiker Samaria dorpu. Ma den Samariasma dati ’no ben teki en, fudi a ben poti en fesi fu go na Yerusalem’. Yakobus nanga Yohannes ben atibron sote dati den ben wani kari fu faya fadon komoto fu hemel kon fu pori den. Ma Yesus ben pir’ai gi den èn den alamala ben go na wan tra dorpu. — Lukas 9:51-56.
12. Fu san-ede wan seiker samaria uma ben fruwondru fu na aksi di Yesus ben aksi watra?
12 Yesus ben teki prati ini na feiantifasi di ben de na mindri dyu nanga Samariasma? We, luku san ben psa na wan tra okasi. Yesus nanga en disipel ben de na pasi fu Yudéa go na Galiléa èn ben musu psa fu dat’ede Samaria. Fudi den ben weri fu a waka meki Yesus ben go sdon sei na watra peti fu Yakob fu bro aladi en disipel ben go na a foto Sichar fu bai nyanyan. Disten wan Samaria uma ben kon kisi watra. Now Yesus srefi na wan tra okasi ben poti den Samariasma ini a grupu fu sma fu ’wan tra ras’ (Lukas 17:16-18, The Kingdom Interlinear Translation of the Greek Scriptures). Ma a ben taigi en: „Gi mi watra fu dringi.” Fudi dyu sma no ben e hori mati nanga Samariasma meki na uma nanga fruwondru ben piki: „Fa yu, aladi yu de wan dyu, e aksi mi watra fu dringi, aladi mi na wan Samaria uma?” — Yohannes 4:1-9.
13. (a) Fa Yesus ben piki na genstaki fu na Samaria uma èn san a ben du? (b) San ben de a bun bakapisi te fu kaba?
13 Ma Yesus no poti prakseri na a genstaki fu na uma. Na presi fu dati a ben teki a okasi fu gi en wan kotoigi, pe a ben piki srefi taki a de na Messias! (Yohannes 4:10-26). Disi ben fruwondru na uma dati, a ben libi en watrakan tanapu na a peti, ben lon go baka na a foto èn ben bigin ferteri trawan san ben psa. Aladi a ben libi wan hurudu libi, a ben tyari en belangstelling kon a fesi gi yeye afersi fu di a ben taki: „Disi no ben sa de kande na Kristus?” San ben de na bakapisi te fu kaba? Furu fu den sma di ben libi drape ben poti bribi na ini Yesus fu na tumsi moi kotoigi di na uma ben gi (Yohannes 4:27-42). A de wan moi sani dati na congregationalistische theoloog Thomas O. Figart e taki ini en buku A Biblical Perspective on the Race Problem (Wan bijbel luku tapu a problema fu ras) a sani di e kon now: „Efu wi Masra ben feni en prenspari nofo fu poti wan fowtu raciaal gwenti na wan safu fasi na wan sei, dan wi mi luku bun dati sani no hari wi go na ini a disi ten liba fu racisma.”
14. Sortu buwijsi fu a no teki fu sma partij Yehovah ben gi ini a diniwroko fu Filippus na evangelium preikiman?
14 Na no-teki-partij fu na sei fu Yehovah Gado ben meki dati sma fu ala sortu ras ben tron dyu proseliet. Luku san ben psa tina-neigi hondro jari psa kaba tapu wan sabana pasi mindri Yerusalem nanga Gaza. Wan man nanga wan blakabuba na ini a dienst fu na koningin fu Ethiopië ben rij ini en wagi èn ben leisi na profeititori fu Yesaya. Na beambte disi ben de wan sma di ben tei a dyu bribi èn di den ben besnij, bika „a ben go na Yerusalem fu anbegi”. Yehovah engel ben sori ensrefi na a dyu evangelium preikiman Filippus èn ben taigi en: „Go drape èn go na a wagi disi.” Filippus ben taki: „O nono! A de wan man fu wan tra ras?” Kwetkweti! Filippus nanga ala prisiri ben teki a kari fu na Ethiopiaman fu kren go ini a wagi èn fu tyari Yesaya profeititori di den e go fu Yesus Kristus kon na krin gi en! Di den ben kon na wan watra, na Ethiopiaman ben aksi: „San e tapu mi fu teki dopu?” Di noti ben de di ben tapu en, meki Filippus ben de klarklari fu dopu na Ethiopiaman èn Yehovah ben teki na koloku man dati leki wan salfu bakaman fu en Manpikin, Yesus Kristus di no e teki sma partij (Tori fu den Apostel 8:26-39). Ma heri esi wan tra buweisi fu a no teki fu sma partij ben gi.
Wan bigi kenki
15. Sortu kenki ben feni presi baka Yesus dede èn fa Paulus ben tyari dati kon na krin?
15 Na dede fu Kristus ben meki wan kaba kon na raciaal krutu fu sma na fesi na ini na grontapu. Ma nanga yepi fu en ofrandi dede Gado ben kenki na fasi fa Yesus dyu disipel ben de nanga en heiden bakaman. Na apostel Paulus ben sori tapu disi di a ben skrifi gi heiden kristen na ini Efese èn a ben taki: „Tan fu dat’ede denki dati yu ben de fosten sma fu den natie akruderi na meti; . . . dati ini a ten dati yu ben de sondro Kristus vervreemd fu na kondre Israël èn vreemde sma ini a tori fu na ferbontu fu na pramisi, èn unu no ben abi howpu èn unu ben de sondro Gado na ini na grontapu. Ma now unu di ben de farawe, ben kon ini wanfasi nanga Kristus Yesus, nanga yepi fu na brudu fu na Kristus. Bikasi en na wi vrede, en di ben meki den tu grupu tron wán, èn na skotu a mindri, di ben prati den, a ben broko puru. ’Na skotu’ dati na symbool fu pratifasi, ben de na seti fu na wetferbontu, di ben wroko leki wan prati a mindri dyu nanga heiden. Den ben puru en na pasi tapu a gron fu Kristus dede, sodati nanga yepi fu en, dyu nanga heiden ben sa „kisi pasi go na a Tata” nanga yepi fu wán yeye”. — Efese 2:11-18.
16. (a) Fu san-ede Petrus ben kisi den sroto fu na Kownukondre? (b) Omeni sroto den ben de, èn san ben kon fu a gebroiki fu den?
16 Boiti fu dati, na apostel Petrus ben kisi den „sroto fu na kownukondre fu den hemel”, sodati sma fu ibri ras ben kan kisi sabi fu den prakseri fu Gado èn nanga yepi fu santa yeye ben kan kon „gebore nyun baka” èn ben kan tron yeye erfgenaam fu Kristus (Mattéus 16:19; Yohannes 3:1-8). Petrus ben gebroiki dri agersi sroto. A fosi-wan ben de gi den dyu, na di fu tu gi den Samariasma èn na di fu dri gi den heidensma (Tori fu den Apostel 2:14-42; 8:14-17; 10:24-28, 42-48). Na so na Gado Yehovah di no ben teki sma partij ben opo gi den sma di a ben teki puru fu ala ras na grani fu de Yesus yeye brada nanga mede-erfgenaam fu na Kownukondre. — Romeini 8:16, 17; 1 Petrus 2:9, 10.
17. (a) Sortu ongewoon visioen Petrus ben kisi èn fu san-ede? (b) Na oso fu suma seiker man ben tyari Petrus go èn suma ben wakti drape tapu en? (c) Petrus ben memre den heiden dati, na san, èn san Gado toku ete ben leri den krin?
17 Fu ben kan sreka Petrus a fesi fu gebroiki a di fu dri sroto — di fu den heiden — meki a ben kisi wan ongewoon visioen fu meti di no ben krin èn den ben taigi en: „Opo, Petrus, srakti èn nyan!” Na les ben de: „Den sani di Gado ben meki kon krin, yu no mag kari moro langa taki den no krin” (Tori fu den Apostel 10:9-16). Petrus ben de ini bigi ferleigi fu san na visioen ben wani taki. Ma heri esi dri man bon doro di den ben seni fu Cornelius, wan Romein legre edeman di ben de na ini Cesarea. Fudi na ini a foto dati na moro prenspari edekantoro fu Romein srudati ben de na ini Yudea, meki a ben de wan natuulek afersi gi Cornelius fu libi drape. Èn drape ini wan kontren fu soso heiden-sma Cornelius, makandra nanga famiriman èn krosbei mati ben wakti tapu Petrus. Na apostel e memre en na disi: „Yu sabi heri bun dati a no mag gi wan dyu fu go moksi ensrefi na wan sma fu wan tra ras ofu fu go na en; ma toku ete Gado ben sori mi dati mi no mag kari wan sma doti ofu no krin. Fu dat’ede di den ben seni kari mi, mi ben kon trutru sondro bezwaar.” — Tori fu den Apostel 10:17-29.
18. (a) Sortu prenspari wortu Petrus ben abi gi Cornelius nanga en fisitiman? (b) Sortu aparti sani di ben psa baka di Petrus gi kotoigi fu Yesus? (c) San ben du na a ten dati gi den bribi heiden dati?
18 Bakadi Cornelius ben tyari kon na krin fa Gado ben tiri den afersi, Petrus ben taki: „Mi e si seiker-seiker dati Gado no e teki sma partij, ma na ini ala natie na sma di e frede en èn e du regtvaardikifasi a e feni bun” (Tori fu den Apostel 10:30-35). Ne, aladi na apostel ben e go doro ete fu gi kotoigi fu Yesus Kristus, wan fruwondru sani ben psa! „Aladi Petrus ben e taki fu den afersi disi ete, na santa yeye ben fadon na tapu alamala di ben yere a wortu.” Den dyu kompe fu Petrus „ben fruwondru, fudi na fri presenti fu na santa yeye ben kanti ooktu tapu sma fu den natie. Bika den ben yere den e taki na ini tongo èn ben e prijse Gado.” Petrus ben piki: „Wan sma kan tapu watra, sodati den disi, di ben kisi ooktu na santa yeye, no ben sa mu teki dopoe?” Suma ben sa abi bezwaar fu dati, fudi na santa yeye fu na Gado di no e teki sma partij èn di de na ini hemel ben kanti santa yeye tapu den heiden di ben e bribi? Fu dat’ede Petrus ben komanderi dati den ben sa dopu den ini na nen fu Yesus Kristus. — Tori fu den Apostel 10:36-48.
„Fu ala natie”
19. Fu san-ede raciaal feiantifasi e gro èn na ini sortu fasi?
19 Wi de now na ini „den lasti dei”, èn „muilek ten . . . di tranga fu psa” de nownow wan trutru sani di yu no man fu psa. Wan fu den problema de dati den sma lobi densrefi nomo, dati den asranti, de nanga heimemre, de sondro natuurlek lobi, no e gi densrefi fu iniwan kruderi, sondro fu dwengi densrefi, krasi èn abi bigifasi (2 Timoteus 3:1-5). Nanga sowan sociaal klimaat a no mu fruwondru wi dati raciaal feiantifasi nanga kesekese e kon moro furu na a heri grontapu. Na ini furu kondre sma fu difrenti ras ofu buba e feragti makandra ofu no wani si makandra srefi na ai. Na ini son kondre a kon srefi trutru fu feti èn srefi tegu hogri-ati sani ben psa. Srefi na ini den sokari ferlekti gemeenschap furu sma abi muiti fu wini raciaal krutu fu sma a fesi. Èn na „siki” disi gersi taki a e panya ensrefi go na ini kontren pe yu no ben sa fruwakti dati, soleki eilanti na ini farawe se di wan dei ben abi pikinmoro wan idyllische vrede.
20. (a) Sortu visioen di kon fu santa yeye Yohannes ben si? (b) Ofara na profeitis visioen disi e kon tru? (c) Sortu muilekheid son sma no ben wini krinkrin ete, èn pe den mu suku na lusu?
20 Aladi mankeri fu raciaal wanfasi na ini difrenti pisi fu na grontapu de toku na Gado, Yehovah di no e teki partij ben taki a fesi dati opregti sma fu ala ras nanga natie ben sa tyari kon na wan na ini wan aparti internationaal wanfasi. Na ondro na krakti fu santa yeye na apostel Yohannes ben si „wan bigi ipi, di no wan sma ben kan teri, fu ala ras èn lo èn pipel èn tongo. Den ben tanapu na fesi a troon èn na fesi na Lam” èn den ben prijse Yehovah (Openbaring 7:9, WV). Na profeititori disi e kon tru kaba. Nownow na ini 210 kondre moro leki 3.300.000 kotoigi fu Yehovah fu ala natie nanga ras e nyanbun fu wanfasi èn raciaal wanfasi. Ma den de te now ete onvolmaakti. Srefi sonwan fu den abi muiti nanga en fu wini raciaal krutu fu sma a fesi krinkrin, aladi kande den no e de sabisabi fu disi. Fa wi kan wini na problema disi? Wi sa taki fu na afersi disi ini na tra artikel èn wi sa abi leki fondamenti bun rai fu na Wortu di skrifi nanga santa yeye fu na Gado, Yehovah di no e teki sma partij.
San yu ben sa piki?
◻ Fu san-ede yu ben sa taki dati Yehovah no e teki sma partij fudi a ben gebroiki den Israëlsma?
◻ Sortu buwijsi de dati Yesus Kristus no ben abi raciaal krutu fu sma a fesi ofu teki sma partij?
◻ Fa Petrus ben kisi yepi fu si dati ’Gado no e teki sma partij’?
◻ Sortu profeititori di e sori tapu wanfasi, e kon tru now aladi mankeri fu raciaal wanfasi de na ini a grontapu?
[Prenki na tapu bladzijde 1]
Na apostel Paulus ben ferteri den Athenesma dati Gado ben meki ala ras du kon komoto fu wán libisma
[Prenki na tapu bladzijde 3]
Fu di Yesus no ben teki sma partij, meki a ben gi kotoigi a wan Samaria-uma na a yakobpeti ini a birti fu Sichar