Yesus libi nanga diniwroko

Wan sari-ati Samariaman

YESUS de kande na ini a birti fu Bethanië, wan pikin dorpu di de kande sowan dri kilometer fu Yerusalem. Wan man di de wan sabiman tapu a kontren fu a wet fu Mozes e kon na en èn e aksi en na aksi disi: „Leriman, te mi du san, mi sa kisi tego libi?”

Yesus e si dati a man, wan sabiman fu a wet, no e aksi disi soso fu kisi bodoi, ma fudi a wani tesi Yesus. Kande na sabiman disi fu wet ben wani Yesus gi wan piki di ben sa hati den firi fu den dyu. Fu dat’ede Yesus e tyari a sabiman fu wet go sofara fu ferteri en eigi meine fudi a e aksi: „San skrifi na ini a wet? Fa yu e leisi?

Leki piki na sabiman fu wet di abi wan bun inzicht, e kari den wet fu Gado na ini Deuteronomium 6:5 èn Leviticus 19:18 èn e taki: ’Yu mu lobi Yehovah yu Gado nanga heri yu ati èn nanga heri yu sili èn nanga heri yu krakti èn nanga heri yu frustan’, èn ’yu naaste leki yusrefi.’”

„Yu piki bun”, Yesus e piki. „Tan du disi èn yu sa kisi libi.”

Ma na sabiman fu wet no de tevrede nanga dati. Na piki fu Yesus no de wan apartiwan gi en. A wani dati san Yesus o taki e sori dati en eigi denki de yoisti èn dati a de regtvaardiki ini a fasi fa a e lolo nanga tra sma. Fu dat’ede a e aksi: „Suma na mi naaste dan?”

Den dyu e bribi dati na wortu „naaste” abi soso fu du nanga kompe-dyu, soleki na context fu Leviticus 19:18 e sori. Bakaten no wan tra sma moro leki na apostel Petrus srefi ben taki: „Unu sabi heri bun dati a no mag fu na sei fu wan dyu fu go na wan sma fu wan tra ras èn fu go na en.” Na sabiman fu wet èn kande ooktu Yesus disipel e bribi sobun dati den de regtvaardiki te soso den sori switifasi gi kompe-dyu fudi na ini den ai sma di no de dyu no de trutru den naaste.

Fa Yesus kan kenki na fasi fa den e luku sani sondro fu afrontu en arkiman? A e ferteri wan tori, kande wan sani di ben pasa trutru. ’Wan seiker dyu’, so Yesus e tyari kon a krin „ben saka komoto fu Yerusalem go na Yericho èn ben fadon go na ini anu fu fufuruman, di no wawan puru en krosi na en skin, ma ben naki en ooktu èn dan den ben gwe, aladi den ben libi en didon leki dede”.

„We now”, na so Yesus e go morofara, wan seiker priester e saka na pasi dati, ma di a ben si en, a ben go na a tra sei fu na pasi. Na so ooktu wan leviet ben de di a ben kon na a presi èn ben si en, ben go waka na abrasei. Ma wan seiker Samariaman di ben waka psa a pasi dati ben miti en, èn sari-ati ben buweigi en di a ben si en.

Furu priester èn den tempel yepiman fu den e libi na ini Yericho, wan presi di yu kan doro te yu saka wan kefarlek èn langa pasi fu 23 kilometer èn di de 900 kilometer moro lagi leki Yericho, pe den e du dienst na ini a tempel. Yu ben kan fruwakti fu na priester èn na leviet taki den ben sa yepi wan kompe-dyu di ben de na ini muilekheid. Ma den no ben du disi. Ma wan Samari e du disi. Den dyu no wani si Samariasma srefsrefi na ai, dati no so langa psa kaba den ben afrontu Yesus nanga den moro krakti wortu fudi den ben kari en „wan Samariaman”.

San na Samariman e du fu yepi na dyu? „A e go na en”, Yesus e taki, „èn e tai en soro, aladi a e poti oli nanga win na tapu. Dan a e opo en poti tapu en eigi meti èn e tyari en go na wan bar èn ben taki: ’Sorgu gi en, èn san yu ben mag gebroki moro leki disi, mi sa pai te mi draibaka psa dya.’”

Baka te Yesus ferteri a tori, a e aksi na sabiman fu a wet: „Suma fu den dri sma disi soleki yu e denki, ben meki ensrefi na naaste fu na man di ben fadon go na ini na anu fu fufuruman?”

A sabiman fu wet, di e feni en wan ferferi sani fu taki wan bun sani fu wan Samariaman e piki eenvoudig: „Na sma di ben handri nanga sari-ati gi en.”

„Go dan èn du asrefi”, Yesus e taki leki bosroiti.

Efu Yesus ben sa taigi na sabi man fu a wet langalanga dati sma di no ben de dyu ben de en naaste, dan no wawan dati a man no ben o teki dati, ma a moro bigi pisi fu den sma di ben tanapu lontu kande ben sa teki en sei ini a takmakandra nanga Yesus. Ma na trutru tori disi seiker ben tyari kon na krin dati a mindri wi naaste sa de boiti den sma fu wi eigi ras èn wi eigi nationaliteit. Fa Yesus ben gebroiki wan tumsi moi fasi fu leri sma! Lukas 10:25-37; Tori fu den Apostel 10:28; Yohannes 4:9; 8:48.

◆ Sortu aksi na sabiman fu wet ben poti gi Yesus èn nanga sortu prakseri a ben aksi disi kande?

◆ Leki fa den dyu ben prakseri dan suma ben de den naaste èn sortu reide de fu bribi dati srefi den disipel ben abi na prakseri disi?

◆ Fa Yesus ben tyari na yoisti fasi fu luku sani kon na fesi dati na sabiman fu wet no ben kan poti disi na wan sei?