Gi glori na a Gado fu howpu
„Na taki fu Yehovah [de so] . . .: ’A sma di e gi mi grani, mi sa gi grani, èn a sma di e feragti mi, mi sa luku leki noti.’” — 1 SAMUËL 2:30.
1. Sortu reide wi abi fu wani gi grani na Yehovah? (1 Timóteus 1:17; Openbaring 4:11)
EFU wi luku den ferwakti di wi kan abi èn di abi den fondamenti na tapu na bijbel, dan a ben de wan sani di fiti èn di redelijk dati wi gi grani na „A Gado fu howpu”, „na Gado di e gi howpu” (Romeini 15:13, PC; Nieuwe Wereldvertaling). Fu san-ede disi de so? Fa wi de soso nyofi èn onvolmaakti libisma kan gi grani na a gran Mekiman fu na heri universum? Èn en fu en sei sa gi grani na wi?
2. Fa Yesus ben prakseri fu a gi grani na Gado?
2 Wi kan teki leri fu san ben psa nanga Yesus Kristus. Nowan sma fu wi sa wani taki a no de so dati Yesus alaten ben wani sote dati en Tata kisi grani èn bigi nen (Yohannes 5:23; 12:28; 15:8). Yesus ben feni srefi fowtu na den Fariseiman nanga meester fu wet, di ’ben gi grani na Gado nanga den mofobuba, ma di ati ben de farawe fu en’. Luku grantangi dati na reide fu san-ede den no ben gi grani na Gado ben de ini na fowtu buweigi fu ati èn du di ben de ini a tori (Mattéus 15:7-9). Ini a geval fu Kristus wi kan taki dati en howpu ben de ini a gi grani fu Gado! Èn fa Yehovah ben du tapu a gi grani di a ben kisi na a fasi dati?
3. Fa wi sabi dati Yesus ben howpu tapu Yehovah?
3 Yesus ben tyari den wortu fu David na ini Psalm 16:10 kon tapu ensrefi: „Yu no sa libi mi sili na ini Sjeool. Yu no sa gi pasi dati na sma di de loyaal na yu si na olo”. Fudi Yesus Kristus ben abi na howpu dati a ben sa wiki komoto fu dede, meki a ben kan taki en dekati wortu gi na ogridu man di ben anga na en sei na wan postu: „Fu tru, tide mi e taigi yu: yu sa de nanga mi ini na Paradijs” (Lukas 23:39-43). Syatu baka dati na ogridu man dati ben dede, sodati dri dei a baka a no ben kan de wan kotoigi dati Yesus howpu fu ben kan opo komoto fu dede ben kontru. Ma wan aikotoigi e skrifi: „Na Yesus disi Gado ben wiki fu dede, fu san wi alamala de kotoigi” (Tori fu den Apostel 2:31, 32). Na opobaka fu en ben de wan tru tori.
4. Sortu grani Yesus ben ferdini èn ben kisi? (Openbaring 5:12).
4 Furu fu den gewoon sma di Yesus ben preiki gi ben sabi dati a ben ferdini respeki ofu grani (Lukas 4:15; 19:36-38; 2 Petrus 1:17, 18). Ne a ben dede leki wan ogridu man. Disi ben kenki wan sani na a tori? Nono, bika Yesus ben abi na bunati fu na Gado tapu suma a ben howpu. Fu dat’ede Yehovah ben tyari en kon na libi. Dati „na Gado fu howpu” ben wiki en Manpikin kon baka na libi, èn ben weri gi en na makti fu no kan dede moro na ini na yeye kondre, e buwijsi dati na Tata ben tan gi en Manpikin grani. Paulus e taki: „Wi e si Yesus nanga glori èn grani fudi nanga na no-ferdini-bunfasi fu Gado a ben sa tesi gi ibriwan sma na dede.” — Hebrewsma 2:7, 9; Fillipi 2:9-11.
5. Tapu sortu spesrutu fasi Yesus ben kisi grani, èn fa Gado ben kisi moro grani nanga dati?
5 Yesus di ben gi Yehovah grani, ben kari wan spesrutu fasi tapu fa a ben kan gi grani na a Tata. Di na wan bepaalde okasi a ben sori ensrefi na en getrow apostel, a ben taki: „Ala makti ini hemel nanga grontapu mi ben kisi. Go fu dat’ede èn meki disipel fu sma fu ala natie, dopu den na ini a nen fu na Tata èn fu na Manpikin èn fu na Santa yeye . . . Luku! mi de nanga unu ala dei te na a bosroiti fu na seti fu sani” (Mattéus 28:18-20). Sobun na Tata ben gi na Manpikin moro grani ete, fudi a ben gi en aparti makti. Na makti disi ben mu gebroiki fu na bun fu libisma di ben sa du wan wroko sodati grani ben sa gi na a Sma di nanga na muiti fu Yesus alaten ben sa kisi grani. Disi ben wani taki dan dati wi leki onvolmaakti libisma kan gi na Tata grani tapu wan ofu trafasi èn fu wi sei ben kan kisi grani fu en?
Sma e gi Gado grani
6. A wan yoisti sani fu sma angri fu kisi grani, ma sortu kefar de ini disi? (Lukas 14:10)
6 Na a moro bigi pisi fu libisma pikinmoro na prakseri no e kon fu gi Gado grani fosi, bika na belangstelling fu den e go moro no tapu fa den kan kisi grani gi densrefi. Sonwan sa taki kande srefi dati a de wan normaal afersi fu wani kisi grani. Te nanga wan seiker marki dati de tru, bika a de wan normaal afersi fu wani abi wan bun nen, èn na tapu na gron fu dati fu ferwakti wan seiker marki fu grani (1 Timóteus 3:2, 13; 5:17; Tori fu den Apostel 28:10). Toku makriki wan sma kan abi wan lostu di psa marki fu kisi a grani di e kon fu libisma. Na buwijsi fu disi e kon a krin ini den furu sma di fu a lasi fu ala sani e feti baka bigi nen ofu abi ala sani fu gi fu den fesi no fadon.
7. Fu san-rede a abi sowan waarde di skoto fu kisi grani fu libisma?
7 Te yu e go prakseri, dan srefi a moro bigi grani fu a sei fu libisma de wan sani di e psa esesi, bika ala sma e dede baka wan syatu pisten. O, sma kande e memre wantu dek’ati man fu wan pisten nanga grani, ma a moro bigi pisi fu den dedewan sma frigiti. Omeni sma sabi den nen fu den totro ofu sabi suma ben de wan hondro yari psa kaba den tiriman fu a natie fu den? Ofu wan sma ben libi ofu no ben libi, no de wan sani di abi trobi. A de soso wan pikin stof tapu na wegi fu na ten, wan nyofi dropu ini na liba fu libi. Èn srefi efu wan sma e kisi grani ini wan syatu ten baka en dede, dan a no e si noti fu dati (Yob 14:21; 2 Kronieken 32:33; Preikiman 9:5; Psalm 49:12, 20), Na wan enkri sani di kan meki wan difrenti, de efu wan sma abi na howpu di Gado e gi, e gi en grani, èn fu en sei e kisi en grani. Disi e kon na krin ini na libi fu tu sma ini na owru Israël di ben e libi na ini a srefi ten.
8. Na ini sortu trapu na ini a tori fu a gi fu grani Eli ben kon na ini?
8 Wan fu den ben de Eli. Fotenti yari a ben dini Gado ini na aprti positie fu heipriester èn a ben abi na grani fu taki reti ini Israël (1 Samuël 1:3, 9; 4:18). Ma ete a ben sori baka wan pisten taki a ben de slap nanga den manpikin fu en Hofni nanga Pinehas. Aladi den ben de priester, den ben e gebroiki tapu wan fowtufasi na wroko fu den fudi den ben e fufuru pisi fu a srakti-ofrandi èn ben gi densrefi abra na sekshurudu. Di den papa fu den no ben du furu moro leki fu feni fowtu na den na tapu wan safufasi, dan Gado ben ferklarl dati Eli ’ben tan gi en manpikin moro grani leki Gado’. Yehovah ben pramisi fu tan hori na priesterwroko ini na lo fu Aäron, ma a ben kan koti na oso fu Eli puru fu na heipriesterwroko. Fu san-ede? Gado ben tyari kon a krin: „A sma di e gi mi grani, mi sa gigrani, èn suma e feragti mi, mi sa luku na wan lagi fasi.” — 1 Samuël 2:12-17, 29-36; 3:12-14.
9. Fa Samuël ben de ini na okasi fu gi Yehovah grani?
9 Wan sma di ben de heri trafasi leki en ben de Samuël. Yu sabi kande dati en papa nanga mama ben tyari en yonguyongu kaba go na a tabernakel ini Silo fu du dienst drape. Na wan neti Yehovah ben taki nanga na boi. Kande yu e feni en wan switi sani fu leisi na tori disi na ini 1 Samuël 3:1-14 èn fu tyari disi kon na yu fesi fa na boi disi ben kon wiki, no nanga wan bigi babari, ma nanga wan safri sten di no tapu wan leti fasi a ben hori leki na sten fu na grani Eli. Go prakseri pikinso fa a ben de wan bigi sani gi na yongu Samuël dati a ben musu gi bodoi na a heipriester fu na faste bosroiti fu Gado fu strafu na oso fu Eli. Toku Samuël ben du dati, a ben gi grani na Gado fudi a ben gi yesi. — 1 Samuël 3:18, 19.
10. Fa Gado ben gi grani na Samuël, leki wan bakapisi fu na grani di Samuël ben sori en?
10 Samuël ben tan gi Yehovah grani yari langa leki profeiti, èn Gado ben gi en grani. Overtoigi yu fu disi na ini 1 Samuël 7:7-13. Yehovah e du wantewante wan sani tapu na begi fu Samuël na ini san a e aksi en yepi fu wini den Filistijnsma. Yu no ben firi taki a de wan bigi grani efu yu ben kisi sowan erkenning fu Gado? Di den manpikin fu Samuël no ben broko-ede nanga a tiri fu en, dan Gado no ben trowe en soleki a ben trowe Eli. A de krin dati disi ben du kon fudi Samuël ben du ala san a ben man fu gi grani na Gado. Samuël ben sori disi moro fara fudi a ben taki dati a no ben feni na aksi fu na pipel bun fu obi wan libisma kownu (1 Samuël 8:6, 7). Gado ben gebroiki Samuël fu salfu Saul èn ooktu David. Na a dede fu Samuël Israël ben gi en grani fudi den ben low gi en. Ma san de moro prenspari, Gado ben gi en grani fudi a meki den skrifi en na ini a bijbel makandra nanga tra man di ben frede Gado èn di sa kisi blesi nanga wan opobaka èn nanga den bun sani di Gado abi gi den (Psalm 99:6; Yeremia 15:1; Hebrewsma 11:6, 16, 32, 39, 40). Disi no e sori dati a de fu bigi waarde fu gi grani na „a Gado fu howpu”?
Yu sa „gi grani na a Gado fu howpu”?
11, 12. San wi mu luku ini a tori fu a gi grani na Yehovah èn san na wan fasi fa wi kan du disi?
11 Na geval fu Yesus èn fu Samuël soso fu kari tu bijbeleksempre e sori dati libisma man fu poti nagi grani fu na „Gado fu den fu howpu” kisi na moro hei presi ini den libi. Èn fu den tu geval dati e kon na krin dati te wi e du disi, dati a de tapu en presi fu suku grani fu Gado, èn kisi dati ooktu. Ma fa yu kan du disi nanga wan redelijk marki fu seikerfasi dati yu sa prisiri Gado fudi yu sa gi grani na en èn sa si na kontru fu na howpu di abi en fundamenti tapu na bijbel?
12 Abi wan opregti èn respeki frede fu no meki Gado kisi atibron de wán fasi (Maleachi 1:6). Kande a de seiker dati wi sa agri nanga den wortu dati. Ma go denki pikinso baka na den manpikin fu Eli. Efu yu ben aksi den efu den ben wani gi Gado grani fudi den ben o frede en nanga respeki, dan kande seiker den ben sa piki taki dati den wani dati. A e kon pas muilek te wi mu drai na lostu fu wi fu gi Gado grani èn fu frede en kon ini trutru du ini na aladei libi.
13. Gi eksempre fu fa a lostu fu gi Gado grani kan yepi wi fudi wi e frede en?
13 Efu wi kon tanapu na fesi fu wan muilek situatie na ini san wi de ini na okasi fu fufuru ofu fu du wan sani di no fiti na tapu seks kontren sondro dati a kon de bekenti algemeen, dan na lostu fu wi fu gi Gado grani ben sa abi krakti tapu den du fu wi? Wi mu kweki na prakseri: ’Awinsi na ogridu ben sa kan tan kibri, dan ete soso a brokokindi gi sowan sondu wani taki syen gi „na Gado fu howpu”, di wi e tyari en nen.’ Èn a de faste dati na sondu no sa tan kibri fu alaten, èn ooktu leki fa a no ben de so ooktu nanga den sani di den manpikin fu Eli ben gi densrefi abra na dati ben tan kibri. Disi Paulus e sori taki a de so nanga den wortu di e go fu „Gado regtvaardiki krutu”: „A sa pai ibriwan sma akruderi en wroko: tego libi na den di nanga horidoro ini wroko di de bun e suku glori nanga grani èn libi fu no kan pori noiti moro; ma den di e suku trobi èn di no e gi yesi na a waarheid, ma e gi yesi na onregtvaardikifasi, atibron nanga faya-ati e wakti den.” — Romeini 2:5-8.
14. San na ete wan fasi tapu fa wi kan gi Gado grani èn san wi ben sa kan aksi wisrefi?
14 Na a tra sei Paulus e kari a teki prati na „a wroko di de bun”, wroko di Gado e kisi grani èn di abi leki bakapisi dati wan sma e kisi glori nanga grani fu Gado. A mindri wan fu den moro prenspari wroko disi na ini a ten disi de a wroko fu san Yesus ben taki fu en na ini Mattéus 28:19, 20: „Meki disipel fu sma fu ala natie, dopu den èn leri den hori ala sani di mi e komanderi unu.” Na a heri grontapu milyunmilyun Kotoigi fu Yehovah de actief bezig nanga preiki èn leriwroko di e gi grani na Gado. Furu e span densrefi krakti fu de leki pionier ini na furuten dienst, efu a de now tapu na gron fu du en alaten ofu ini fakansi fu grontapuwroko ofu skoro. Nanga disi ini prakseri dan ibriwan fu wi ben sa kan abi wini fu en fu luku fa en tanapu nanga na wroko disi. Yu ben sa kan aksi yusrefi fu eksempre: „Mi e gi grani na a „Gado fu howpu” fudi mi e abi wan prati dorodoro na a preikiwroko?”
15. San psa nanga son kristen ini a tori fu na gi grani na Yehovah nanga yepi fu na publiki diniwroko?
15 Son kristen di yari langa ben de actief preikiman, ben go du en safri-safri. A kon de wan patron gi den fu abi wan pikin prati na a prenspari wroko di de ini a meki fu disipel ofu teki prati soso wantu tron na en. Wi no e abi na prakseri fu sma di abi skotu na skinfasi èn e du en safrisafri fu na owrudei di abi krakti tapu den. Ma dorosei fu den sortu sma disi dan na mindri bepaalde kotolgi fu difrenti libimarki wan lagi fu na tempo de fu si. A de wan moi sani dati Paulus no ben poti prakseri tapu wan bepaalde grupu di abi wan bepaalde libimarki di a ben gi kristensma na warskow ’fu no weri’. Kontrari fu dati, awinsi sortu libimarki wan sma abi, a mama fu a tori de dati a teki prati geregeld na a diniwroko e aksi muiti. Soleki seiker a ben e pasa na ini a dei fu na apostel Paulus, dan son sma e tak-go-tak-kon na ini a ten disi: ’Ini ala den yari di psa mi ben du a pisi fu mi, sobun den nyun kristen mu span densrefi krakti now’. — Galacia 6:9; Hebrewsma 12:3.
16. Fu san-ede wi ben sa kan feni wini ini na ondrosuku fu wisrefi ini a tori disi?
16 Den sma di e meki na denki disi abi krakti na tapu den, seiker de wan pikinso, ma yu ben sa kan aksi yusrefi: ’Mi o si ini ala opregtifasi na misrefi sowan buweigi? Fa na prati fu mi ini a diniwroko de te mi teki en gersi nanga san mi ben du fosten?’ Efu wi ben go du en moro safrisafri ofu no, wi alamala mu hori na ini prakseri dati wi „Gado fu howpu” e pramisi fu sorgu ini „glori nanga grani nanga vrede gi ibriwan sma di e du san bun” (Romeini 2:10). Paulus ben gebroiki wan Griki wortu di ben wani taki „du wan sani, meki wan sani du kon, presteer wan sani”. Fa a de tumsi prenspari dati wi tan farawe fu san ben psa nanga den fariseiman nanga den meester fu wet di soso ben gi Gado grani nanga wan vorm fu dienst nanga den mofo! (Markus 7:6; Openbaring 2:10) Efu na a tra sei nanga wi heri ati wi e teki prati na a publiki diniwroko, dan wi e kotoigi fu wi srefi nanga trawan dati na howpu fu wi trutru de wan trutru sani gi wi. Wi e gi grani na wi Mekiman èn a sma di e gi wi libi. Èn wi e de bun, dati en gi wi grani, now èn te fu tego alaten. — Lukas 10:1, 2, 17-20.
Nanga den warti sani fu wi
17, 18. San na ete wan fasi tapu fa wi kan gi Gado grani, èn fu san-ede wi no mag draidrai na ini disi?
17 Fu ete wan fasi tapu fa wi kan gi grani na wi „Gado fu howpu”, Odo 3:9 e taki: „Gi grani na Yehovah nanga den warti sani fu yu èn nanga den fosi froktu fu heri den froktu di yu koti.” Spurrell e vertaal a vers disi na a fasi disi: „Gi glori na Yehovah nanga yu gudu, èn nanga den moro bun sani fu ala san yu kisi.” — A Translation of the Old Testament Scriptures from the Original Hebrew.
18 Fudi difrenti kerki fesiman ben kisi takru nen fu den bigi-aifasi fu den di no abi skotu èn fu na bigi libi fu den na ini gudu, meki furu sma e draidrai fu gi bijdrage na kerki èn kerki-organisatie, di kande abi seiker leki marki nomo fu kisi gudu (Openbaring 18:4-8). Ma den sortu fowtu gebroiki disi no e kenki noti na a yoistifasi fu Odo 3:9. Fa wi, ini akruderi nanga na rai disi di komoto fu santa yeye, kan gebroiki wi warti sani fu gi Yehovah, wi „Gado fu howpu” grani?
19. Gi eksempre fa son sma ben gebroiki Odo 3:9.
19 Yehovah Kotoigi e si dati na nomru fu sma di e gro dei fu dei èn di tapu wan bunfasi e teki na kownukondre boskopu e meki a de fanowdu dati zaal mu meki kon moro bigi ofu nyunwan mu bow. Sobun dya wan fasi de fu ’gi glori na Yehovah nanga yu gudu’. Yongu nanga owrusma abi geregeld na disi wan prati, fu eksempre fu di den e teki persoonlijk na bosroiti fu gi wan bijdrage na a wan ofu tra bowfonsu. Fu hori densrefi na den sortu bosroiti disi di denteki sondro fu wan sma sabi, kan aksi a dwengi fu densrefi persoonlijk ofu srefi wani taki wan offer, spesrutu efu na planning ofu na kon klari fu wan bowprojekt e go fu wan langa pisten (2 Korinte 9:6, 7). Ma ete nanga a gebroiki tapu a fasi disi fu moni grani e sori trutru na Yehovah bika na kownukondrezaal de wan presi pe kristensma e anbegi en èn pe den nanga den kompe bribiman fu den e kisi sabi fu Gado. Den wortu fu Yesus na ini Mattéus 6:3, 4 e gi wi bun reide fu fertrow a tapu dati Gado sa gi grani na den sma di tapu a fasi dati e gi grani na en.
20. (a) Fu san-ede na ondrosuku fu wisrefi de wan sani di fiti ini na gebroiki fu Odo 3:9? (b) Sortu aksi wi ben sa kan poti gi wisrefi?
20 Ma dyaso wan wortu fu warskow de: Den Fariseiman nanga meester fu wet di, soleki Yesus ben taki, no ben poti a gi grani na Gado tapu na fosi presi, ben sorgu dati den ben de den fosiwan di ben nyan bun fu den gudu fu den. Na rai ini Mattéus 15:4-8 sobun abi na rikomanderi na wi fu ondrosuku wisrefi ini a tori fu na ’gi grani na Yehovah nanga den warti sani fu wi’ (Yeremia 17:9, 10). Wan kristen fu eksempre di abi en bun fu en wroko ede, ben kan taki reti fu ensrefi dati a tan wroko heri dei fu kan kisi moro moni. A ben sa kan tak-go-tak-kon: ’Trawan e go ini a pionierwroko ofu e froisi go fu dini pe preikiman de tranga fanowdu, ma mi spesrutu fasi fu dini Gado de fu kisi moro moni sodati mi kan gi bijdrage srefsrefi.’ Nanga den bijdrage fu en kande furu bun kan du. Ma a ben sa kan aksi ensrefi seikerseiker: ’Na persoonlijk libistijl fu mi e sori dati mi moro prenspari buweigi fu ati fu ferdini moro nanga moro moni de dati mi wani gebroiki na moni fu gi Gado grani?’ (Lukas 12:16-19; teki gersi nanga Markus 12:41-44) Èn: ’Mi ben sa kan seti mi afersi so dati persoonlijk mi ben sa kan abi wan moro bigi prati na a moro prenspari wroko gi wi ten — na meki bekenti fu na bun nyunsu?’ Wans fa a no fa, awinsi fa wi libi omstandigheden de ooktu, wi kan ondrosuku wi buweigi fu ati èn den du fu wi èn aksi wisrefi ’fa mi kan dini a Sma di gi mi libi èn „a Gado fu howpu” moro bun?’
21. Sortu ferwakti wi abi efu wi e gi Yehovah grani now?
21 Yehovah no sa meki wi fesi fadon. Fa a de wan tumsi moi ferwakti na wi fesi dati en, now èn na ini ala tego ten ini a ten di e kon, sa kan taki fu wi san a ben taki fu na getrow Israël: „Tapu a gron dati yu ben de diri ini mi ai, meki mi ben si yu nanga grani, èn misrefi ben lobi yu”! (Yesaya 43:4) Asrefi Gado dati e pramisi „tego libi na den di e suku glori nanga grani”. A pramisi disi a e taki nanga den sma di e hori doro „ini a wroko di de bun”. Fa a de wan „Gado fu howpu”!
Fa yu ben sa piki?
◻ San wi kan leri fu na eksempre fu Yesus tapu na fasi fa sma kan gi Yehovah grani?
◻ Fa Eli ben de trafasi leki Samuël ini a fasi tapu fa den ben gi Gado grani?
◻ San na wantu fasi tapu fa wi kan gi Gado moro grani, èn sortu sani yu kan ferwakti?
◻ Sortu tamara e wakti den sma di e poti a gi grani fu na Gado fu wi „fu howpu” na a fosi presi?