Jesus libi nanga diniwroko

Na fesi a Sanhedrin èn bakadati na Pilatus

A NETI e kon a wan kaba. Petrus ben taki foe na di foe dri tron taki a no sabi Jesus, èn den memre foe na Sanhedrin kaba nanga a falsi kroetoe foe den èn den panja densrefi. Ma den e kon na makandra baka freida mamanten so esi leki dei broko, na leisi disi na ini a Sanhedrin-zaal foe den. Na prakseri foe den de foe meki na kroetoe di den ben hori a neti, kon gersi leki a wet ben horibaka gi dati. Te den e tjari Jesus kon na den fesi, den e taki, neleki fa den ben doe a neti: „Efoe joe na a Krestes, froeteri wi.”

„Awinsi mi ben froeteri oenoe, oenoe no ben sa bribi dati”, Jesus e piki. „Boiti foe dati, efoe mi ben aksi oenoe dati, oenoe no ben sa piki”. Ma nanga deki-ati Jesus e sori tapoe a sma di a de, foe di a e taki: „Foe bigin foe now a Manpikin foe libisma sa sidon na a krakti reti anoe foe Gado.”

„Joe de dan, a Manpikin foe Gado?”, den alamala wani sabi.

„Oenoe srefi e taki, taki mi de dati”, Jesus e piki.

Gi den man disi di wani kiri en, na piki disi de nofo. Den e teki en leki lei gi Gado. „Foe san-ede wi abi moro kotoigi fanowdoe?”, den e aksi. „Foe di wi srefi ben jere dati foe en eigi mofo.” Foe dati-ede den e tai Jesus, èn e tjari en gowe, èn e gi en abra na a granman foe Rome, Pontius Pilatus.

Judas, na toriman foe Jesus, ben loekoe fa sani ben waka. Te a si taki den e leisi strafoe gi Jesus, a e kisi konsensi-fonfon. Foe dati-ede a e go na den ede-priester èn den owroeman foe gi den den 30 solfroemoni baka, ala di a e froeklari: „Mi doe sondoe di mi ben tori regtfardiki broedoe.”

„San wi abi foe doe nanga dati? Dati na joe problema!”, den e piki nanga tranga-ati. Foe dati-ede Judas e trowe den solfroe pisi na ini a tempel, a e waka gowe èn e proeberi foe anga ensrefi. Ma a taki pe Judas e tai a titei, e broko komoto, so leki fa a e sori, èn a skin foe en e fadon go tapoe den klipston di de na ondrosei, pe a e priti opo.

Den ede-priester no de seiker san foe doe nanga den solfroe moni. „A no fiti foe trowe den na ini a santa monikisi”, den e bosroiti, „bikasi a de a prijs foe broedoe.” So boen baka di den taki foe dati nanga makandra, den e bai a gron foe wan patoebakri man foe beri dorosei sma drape. Foe dati-ede meki den e kari na gron „Gron foe Broedoe.”

A de froekoe mamanten ete te den e teki Jesus go na a granman-oso. Ma den djoe di go nanga en, e weigri foe go na inisei foe di den e bribi taki so wan froetrowfasi nanga den heiden sma sa doti den. So boen foe di Pilatus wani fiti ensrefi na den, a e kon na dorosei. „Sortoe kragi oenoe e tjari teige a man disi?”, a e aksi.

„Efoe a man disi no ben de wan ogri man, oenoe no ben sa tjari en kon na joe”, den e piki.

Foe di Pilatus no wani foe boemoei srefisrefi nanga na afersi foe den, a e piki: „Teki en dan oenoe srefi èn kroetoe en akroederi na wet foe oenoe.”

Den djoe e meki a prakseri foe den foe kiri en kon a krin foe di den e taki: „Den no gi wi pasi foe kiri wan sma.” Ija, efoe den kiri Jesus na a ten foe a Paska Fesa, dan disi kande ben sa tjari wan poebliki sekiseki kon, foe di foeroe sma abi dipi respeki gi Jesus. Ma efoe den sorgoe taki den Rome sma kiri en foe di den kragi en foe politik afersi ede, dan disi sondro degedege sa fri den foe gi frantiwortoe a fesi foe a pipel.

So boen den kerki tiriman, di no e taki foe na kroetoe foe den, di ben hori moro a fesi èn pe den ben kragi Jesus taki a lei gi Gado, e prakseri now tra kragi. Den e tjari wan kragi di abi dri pisi: „Wi kon sabi taki a man disi [1] e gi a nâsi foe wi tranga foe meki oproeroe èn [2] e tapoe sma foe pai Caesar belasting èn [3] e taki foe ensrefi taki en na Krestes, wan kownoe.”

A kragi taki Jesus e taki, taki en na wan kownoe, abi na belangstelling foe Pilatus. Foe dati-ede a e go baka na ini a granman-oso, e kari Jesus kon na en, èn e aksi: „Na joe na a kownoe foe den djoe?” Nanga tra wortoe, joe broko a wet nanga a froeklari foe taki, taki joe de kownoe kontrari keisri?

Jesus wani sabi omeni Pilatus jere kaba foe en, èn a e aksi: „Joe e taki disi foe joe srefi, ofoe foe di trawan ben froeteri joe foe mi?”

Pilatus e froeklari taki a no sabi noti foe en èn a wani sabi san de troe. „Mi a no wan djoe, a no so?”, a e piki. „Joe eigi nâsi nanga den ede-priester ben gi joe abra na mi. San joe ben doe?”

Jesus no e doe no wan enkri moeiti, foe wai pasi gi a strei-penti foe a kownoewroko. Na piki di Jesus e gi now, sondro foe misi e froewondroe Pilatus. Lukas 22:66–23:3; Mateus 27:1-11; Markus 15:1; Johanes 18:28-35; Tori foe den Apostel 1:16-20.

◆ Foe san-ede a Sanhedrin agen e kon makandra na a mamanten?

◆ Fa Judas e dede, èn san den e doe nanga den 30 solfroe moni?

◆ Foe san-ede den djoe wani, taki den Rome sma moesoe kiri Jesus, na presi foe den srefi kiri en so leki den ben proeberi foe doe na okasi a fesi?

◆ Sortoe kragi den djoe e tjari kontrari Jesus?