Yeyses libi nanga diniwroko

Sorgu gi a ten di e kon nanga praktijk koni

DYONSRODE Yeyses ben fruteri wan tori fu na lasi manpikin gi wan ipi sma pe yu ben abi a mindri den en disipel, bidrigi belastingman èn tra sondari di sma ben sabi, èn ooktu meystri fu wèt èn Fariseyman. Te a e drai taki now nanga en disipel. a e fruteri wan agersitori fu wan guduman di ben kisi wan takru nyunsu fu a tiriman ofu basya fu en oso.

Leki fa Yeyses taki, dan na guduman e kari en basya kon na en èn e fruteri en taki a sa puru en a wroko. „San mi musu du now di mi e si taki mi meystri sa puru a wroko na mi anu?”, a basya e aksi en srefi, „mi no tranga nofo fu go diki gron, mi e syen fu begi. Ay! Mi sabi san mi sa du, so taki te mi lasi na wroko fu basya, den sma sa teki mi na den oso.”

Sortu prakseri na basya abi? We a kari den sma kon di musu pay en meystri. „Omeni yu musu pay mi meystri?”, a ben aksi.

’2200 liter olijf-oli,’ na fosiwan e piki.

’Teki na skrifi kontrakt baka èn go sdon èn skrifi esi-esi 1100,’ a e taygi en.

Na a trawan a e aksi: ’Èn yu omeni yu mu pay?’

’220 hectoliter [2200 liter] tarwe (wan sortoe aleisi)’ a e taki.

’Teki yu skrifi kontrakt baka èn skrifi 180.’

Na basya abi na reti fu meki den moni di sma mu pay en meystri kon moro mendri, fu di te now ete a e du den moni afersi fu en meystri. Sobun fu di a mendri den moni, a e meki mati nanga den sma di fu den sey baka kan sori en wan bun te a lasi en wroko.

Te a meystri yere san psa, dan a e fruwondru. „Ala di a basya ben de onregtvaardiki, a meystri e prijse en, fu di a handri na ini akruderi nanga praktijk koni.” Èn Yeyses e taki tapu disi moro fara: „Den manpikin fu na seti fu sani disi de ini den eygi geslagti ini praktijk moro koni leki den manpikin fu na leti.”

Ala di Yeyses e leri en disipel now sortu leri den mu teki fu disi, a e gi den tranga: „Meki mati nanga yepi fu onregtvaardiki gudu, so taki te den disi gwe libi yu, den mag teki yu ini den têgo libipresi.”

Yeyses prijse na basya no fu na onregtvaardikifasi ede fu en ma fu na luku ede di a luku sani go a fesi, na praktijk koni. „Den manpikin fu na seti fu sani disi” e gebroyki den moni ofu posisi nofotron na wan koni fasi fu meki mati di fu den sey kan du den wan bun. Fu dati-ede meki Gado dienstknegti ofu „den manpikin fu leti” mu gebroyki den gudu na skinfasi, („onregtvaardiki gudu”) ooktu tapu wan frustandiki fasi fu kisi wini fu dati.

Ma so leki Yeyses e taki, dan den mu meki nanga yepi fu na gudu disi mati di kan teki den na ini „den têgo tanpresi”. Gi den memre fu na pikin ipi den presi disi de na ini heymel; gi den tra skapu den de na ini a grontapu Paradijs. Fu di soso Yehovah Gado èn En Manpikin kan teki sma na ini den presi disi, meki wi mu gebroyki fayafaya ala „onregtvaardiki gudu” di wi ben sa kan abi fu horibaka gi den kownukondre belang èn na so fasi meki matifasi nanga den. Te wi no abi den gudu moro ofu te den pori, san seyker sa psa, dan wi têgo tamara de seyker.

Yeyses e taki dan taki sma di e sorgu getrow gi srefi den sani disi na skinfasi ofu den mendri sani disi ooktu sa de getrow na ini na du fu moro prenspari sani, èn a e taki tapu disi moro fara. „Efu fu dati-ede yu no sori taki yu de getrow ini a tori fu onregtvaardiki gudu, suma kan gi yu dan na trutru wan, [dati wani taki den yeye belang ofu Kownukondrebelang]? Èn efu yu no ben sori taki yu de getrow ini a tori fu san de fu wan trawan [den Kownukondrebelang di Gado gi en dienstknegti] suma sa gi yu dan san de fu yu srefi [na payman fu libi na ini den têgo tanpresi]?”

Sobun wi no kan de na a srefi ten tru dienstknegti fu Gado èn strafu fu na onregtvaardiki gudu, gudu na skinfasi, so leki Yeyses e taki te fu kaba: „No wan osoknegti kan de wan srafu fu tu meystri, bika a no sa wani si a wan na ai srefisrefi èn lobi na trawan ofu tay hori na a wan èn fru-agti na trawan. Yu no kan de srafu fu Gado èn fu na gudu.” Lukas 15:1, 2; 16:1-13.

◆ Fa na basya na ini Yeyses agersitori e kisi mati di baka ten kan yepi en?

◆ San na a „onregtvaardiki gudu”, èn fa wi kan meki mati gi wi srefi nanga yepi fu dati?

◆ Suma kan poti wi na ini „den têgo tanpresi” èn sortu presi den de?