Yeyses libi nanga diniwroko

Te na Manpikin fu Gado o sori en srefi

ALADI Yeyses de ete na noordsey (kande na ini Samariya ofu na ini Galileya), dan den Fariseyman aksi en fu na kon fu na kownukondre. Den e bribi taki a sa kon nanga furu pranpran, ma Yeyses taki: „A kownukondre fu Gado no e kon nanga aparti sani fu si, èn so srefi tu wan sma no sa taki: ’Luku dya!’ Ofu: ’Drape!’ bika luku! a kownukondre fu Gado de na ini unu mindri.”

Yeyses wortu „na ini unu mindri” son tron ben poti abra nanga den wortu „na inisey fu unu”. Leki fa son sma e prakseri dan Yeyses ben meyne so bun taki na kownukondre fu Gado e tiri na ini na ati fu Gado futuboy. Ma a de krin taki a kownukondre fu Gado no de na ini a ati fu den Fariseyman di no ben bribi èn di Yeyses ben taki nanga den. Toku a de na ini unu mindri, fu di na Kownu fu Gado kownukondre di poti a wroko, Yeyses Krestes, de a mindri den.

A kan de taki bakadi den Fariseyman ben hari gwe, taki Yeyses e taki moro fara nanga en disipel fu na kon fu na kownukondre. A abi spesrutu na prakseri en denoya ini kownukondre makti ini na ten di e kon te a e warskow: „Sma sa taygi unu: ’Luku drape!’ ofu: ’Luku dya!’ No go èn no waka baka [den falsi Mesiyas disi]. Bika neleki fa faya e koti na tapu e skeyn go fu na wan kontren ondro heymel go na wan tra kontren ondro heymel, na so na Manpikin fu libisma sa de.” Yeyses e sori so bun taki netso leki te faya koti a tapu èn a de fu si abra wan bun fara kontren, a so na buweysi fu en denoya na ini kownukondre makti sa de krin fu si gi ala sma di wani fu si en.

Yeyses e teki eksenpre fu sani di psa na ini owruten fu sori sortu fasi den sma ben sa sori na ini a ten fu en denoya di ben o kon. A e tyari kon na krin: „Èn so leki a ben psa na ini den dey fu Noa, na so a sa de na ini den dey fu a Manpikin fu libisma . . . Èn netso, so leki a ben psa na ini na dey fu Lot: den ben nyan, den ben dringi, den ben bay sani, den ben, seri sani, den ben prani, den ben bow. Ma na a dey di Lot ben komoto fu Sodom, faya nanga swarfu ben fadon fu heymel leki alen èn ben pori den alamala. Na a srefi fasi a sa go na a dey te na Manpikin fu libisma sa sori en srefi.”

Yeyses no e taki taki na pori fu den libisma na ini den dey fu Noa nanga Lot ben kon soso fu di den ben hori den srefi bezig nanga den normaal sani fu nyan, dringi, bay sani, seri sani, prani nanga bow. Noa nanga Lot nanga den famiri fu den so srefi tu ben hori den srefi bezig nanga den sani disi. Ma den trawan ben du den sortu aladey sani disi sondro fu poti wan enkri prakseri tapu a wani fu Gado, èn disi ben de a reyde fu san-ede den ben kisi pori. Na fu a srefi reyde sma sa kisi pori te Krestes sa kon a krin na ini na ten fu na bigi banawtu di e kon tapu na seti fu sani disi.

Yeyses e poti krakti o prenspari a de fu du wan sani esi-esi tapu a buweysi fu en denoya ini kownukondre makti di e kon, te a e taki moro fara: „Meki a sma di na a dey dati de tapu a dak, ma di en ososani de na ini oso, no kon na ondro fu teki en, èn meki so srefi tu a sma di de a dorosey tapu a firigron, no dray go baka na den sani di a ben libi a baka. Prakseri na uma fu Lot.”

Te na buweysi fu na denoya fu Krestes sori en srefi, dan den sma no musu meki lobi gi gudu na skinfasi tapu den fu handri wantewante. Di Lot uma ben gwe libi Sodom, a de krin taki nanga angri a ben dray luku na den sani di a ben musu libi na baka èn a ben tron wan sowtu postu.

Aladi Yeyses e go doro fu taki fu na situwâsi di ben sa de na a ten fu en denoya di e kon, dan a e taygi den disipel fu en: „Na ini na neti dati tu man sa de na ini wán bedi; den sa teki na wan gwe, ma na trawan den sa libi a baka. Tu uma sa miri na a srefi miri; na wan den sa teki gwe ma na trawan den sa libi na baka.”

’Teki gwe’ e kruderi nanga a go di Noa nanga en osofamiri ben musu go na ini na ark èn na tyari di den engel ben musu tyari lot nanga en osofamiri komoto fu Sodom. A ben wani taki frulusu. ’Libi na baka’ wani taki na a tra sey taki wan sma e kisi pori.

Dan den disipel e aksi: „Pe, Masra?”

„Pe na skin de, na drape den aka e kon makandra tu”, Yeyses e piki. Den sma di den „e teki gwe” fu kisi frulusu, de leki aka di e si fara fu di den e kon makandra pe „na skin de”. A skin abi te make nanga na tru Krestes na a ten fu en denoya na ini kownukondre makti di no de fu si èn tapu na yeye fesa nnyan di Yehovah sorgu fu en. Lukas 17:20-37; Genesis 19:26.

◆ Fa na kownukondre ben de na a mindri fu den Fariseyman?

◆ Na sortu fasi na denoya fu Krestes de leki te tapu e koti faya?

◆ Fu san-ede den sma sa kisi pori na ini na ten fu Krestes denoya?

◆ San a wani taki fu teki gwe èn fu libi na baka?