Yeyses libi nanga diniwroko

Gado sten ben de fu yere fu na di fu dri tron

ALADI Yeyses ben de na ini na tenpri a ben de ini bruya fu na dede di heri-esi a ben musu ondrofeni. A e broko en ede ini na fosi presi fu na bakapisi di en dede sa abi na tapu na bun nen fu en Tta, èn fu dati-ede a e begi: „Tta, gi yu nen glori.”

Na tapu dati wan krakti sten e komoto fu heymel di e bari taki: „Mi ben gi en glori èn sa gi en glori agen.”

Na ipi sma di ben e tanapu drape a lontu ben fruwondru srefisrefi. „Wan engel taki nanga en”, sonwan e taki. Trawan e taki, taki na dondru bari. Ma fu tru, a de Yehovah Gado di ben taki! Ma disi a no na fosi leysi di Gado sten ben de fu yere na ini na tori fu Yeyses.

Na a dopu fu Yeyses, dri nanga afu yari a fesi, Yohanes a Dopuman ben yere fa Gado ben taki fu Yeyses: „Disi na mi Manpikin, na lobiwan, di mi feni bun.” Dan wan pisiten baka na Paska di ben waka na fesi disi, di Yeyses skin ben kenki na fesi den, dan Yakobus, Yohanes nanga Petrus ben yere di Gado ben fruklari: „Disi na mi Manpikin, na lobiwan, di mi feni bun; arki na en.” Èn now fu na di fu dri tron, na tapu 10 Nisan, fo dey bifo Yeyses dede, sma e yere Gado sten agen. Ma disi leysi Yehovah e taki na sowan fasi taki bun furu sma kan yere en!

Yeyses e fruklari: „Na sten disi no kon fu mi ede, ma fu unu ede.” A e gi na buweysi taki Yeyses de trutru Gado Manpikin, na pramisi Mesiyas. „Now den e krutu na grontapu disi”, na so Yeyses e go morofara, „now na tiriman fu na grontapu disi sa iti go na doro.” Yeyses kotrow libi nanga waka te yu luku en bun e poti krakti a tapu taki Satan Ddibri, na tiriman fu na grontapu, e frudini „fu iti en go na doro”, ofu puru en na pasi.

Te Yeyses e sori tapu den bakapisi fu en dede di e kon krosibey, a e taki: „Èn toku ete, te den opo mi komoto fu grontapu poti go na loktu, mi sa hari ala sortu fu sma kon na mi.” En dede no de na ini nowan enkri fasi wan lasi, bika nanga yepi fu disi a sa hari trawan kon na en, so taki den kan nyanbun fu têgo libi.

Ma na ipi fu sma no e agri. Den e taki: „Wi ben yere fu na Wèti taki Krestes e tan fu têgo; èn fa yu kan taki dan taki den musu opo Libisma Pikin poti go na loktu? Suma na a Libisma Pikin disi?”

Aladi ala den buweysi de, èn so srefi taki den ben yere Gado eygi sten, toku moro furu sma no e bribi taki Yeses de na trutru Libisma Pikin, na pramisi Mesiyas. Ma so leki Yeyses ben du dati siksi mun a fesi na a wwirikanpufesa, na so a e taki agen fu en srefi leki „na leti” èn e gi den arkiman fu en na deki-ati: „Sori bribi na ini na leti so langa yu abi na leti, so taki te fu kba yu tron pikin fu leti.” Bakadi a taki den sani disi, Yeyses e gwe èn e kibri bika a de krin taki en libi de na ini kofar.

Taki den dyu no e poti bribi na ini Yeyses de wan kontru fu den wortu fu Yesaya di e taki, taki den ’ay fu den sma kon breni èn den ati fu den kon tranga, so taki den no e dray den srefi fu kon gosontu’. Yesaya ben si na ini wan fisyun na heymel tanpresi fu Yehovah, nanga Yeyses ini en glori bifo a ben tron wan libisma na sey Yehovah. Leki na kontru fu san Yesaya ben skrifi dan toku den dyu ini na tranga-edefasi fu den toku e trowe na buweysi, taki na Yeyses disi de den pramisi frulusuman.

Na a tra sey, srefi furu tiriman (a de krin taki a de den memre fu na dyu heykrutu, na Sanhedrin) trutru e poti bribi na ini Yeyses. Nikodeymus nanga Yosef fu Arimateya na tu fu den tiriman disi. Ma den tiriman, te nanga now, e misi fu meki den bribi bekenti, fu di den e frede taki den sa lasi den posisi na ini na snoga. Fa den sma disi e lasi furu!

Yeyses e taki morofara: „Na sma di e poti bribi na ini mi, no e poti bribi na ini mi wwan, ma so srefi na ini en di seni mi kon; èn a sma di e si mi, e si so srefi en di seni mi kon.. . . Ma efu wan sma yere mi wortu èn no e hori den, mi no e krutu en; bika mi no kon fu krutu na grontapu, ma fu frulusu na grontapu.. . . A wortu di mi taki, na san sa krutu en na ini a lasti dey.”

Na lobi fu Yehovah gi na libisma grontapu buweygi en fu seni Yeyses kon, so taki den wan di e poti bribi na ini en, ben sa kan kisi frulusu. Efu sma sa kisi frulusu, sa anga fu na aksi efu den e gi yesi na den sani di Gado taygi Yeyses fu taki. Na krutu sa feni presi „na ini na lasti dey”, na ini Krestes dusun yari tiri.

Yeyses e tapu nanga den wortu: „San mi taki no kon fu mi eygi ati, ma na Tta srefi di seni mi kon, gi mi wan komando fu san mi musu fruteri èn san mi musu taki. Mi sabi so srefi taki en komando wani taki têgo libi. Den sani fu dati-ede di mi e taki, mi e taki yoysti so leki fa na Tta fruteri mi.” Yohanes 12:28-50; 19:38, 39; Mateyus 3:17; 17:5; Yesaya 6:1, 8-10.

◆ Na sortu dri okasi Gado sten ben de fu yere na ini na tori fu Yeyses?

◆ Fa na profeyti Yesaya ben si Yeyses’ glori?

◆ Suma na den tiriman di e poti bribi na ini Yeyses, ma fu san-ede den no taki na publiki taki den e bribi na ini en?

◆ San na „a lasti dey”, èn tapu na gron fu san den sa krutu den sma?