Yesus libi nanga diniwroko

Go suku na sani di lasi

NA ANGRI fu Yesus e go fu suku èn feni den sma di wani dini Gado nanga sakafasi. Fu dati-ede meki a e go suku den sortu sma disi èn a e taki nanga ala sma fu na Kownukondre, ooktu nanga takru barinen sondari. Den sortu sma disi e go now na en fu arki en.

Te den Fariseiman nanga meister fu wèt e si disi, den e suku fowtu na Yesus fu di a e lolo nanga sma di den e si leki soso sma. Den e knoru: „Na man disi e teki sondari èn e nyan nanga den.” Disi de bun lagi gi na wartifasi fu den! Den Fariseiman nanga den meister fu wèt e behandel na gewoon pipri leki doti na ondro den futu fu den. Fu sori na tegu fasi fu den gi den sortu sma disi, den e geboiki srefi na Hebrew wortu ’am ha.’a’rets, „sma fu na gron”.

Na a tra sei a de so taki Yesus e sori wartifasi, switifasi nanga sar’atifasi gi ibriwan sma. Fu dati-ede den sakafasi sma disi e arki, ini algemeen nanga prisiri na en, makandra nanga den sma di sma sabi fu na ofri fu den. Ma san de fu taki fu na fowtu di den Fariseiman e suku tapu Yesus fu di a e span en srefi gi libisma di den e si leki no warti?

Yesus e du wan sani tapu san den taki fu di a e gebroiki wan eksenpre. A e taki te yu sa luku na tori nanga ai fu den Fariseiman srefi, taki den de regtvaardiki èn e firi den srefi bun na ini na ipi fu Gado ala di den feragti ’am ha.’a’rets e lasi pasi èn de ini wan lasi toestand. Arki pikinso te a e aksi:

„Suma na mindri unu di abi hondro skapu, no sa libi, te a lasi wan, den neigitenti na neigi na ini sabana a baka èn go suku na wan di lasi te leki a feni en? Èn te a feni en, a e poti en tapoe en skowru èn a e prisiri. Te a doro oso, a e kari en mati èn en birti sma kon makandra èn a e taigi den: ’Prisiri nanga mi bika mi ben feni mi skapu di ben lasi pasi.’”

Yesus e tyari na tori fu en kon tapu a ala dei libi te a e taki: „mi e taigi unu taki na net so tu moro prisiri sa de na ini hemel fu wán sondari di abi berow leki neigitenti nanga neigi regtvaardiki sma di no abi berow fanowdu.”

Den Fariseiman e feni taki den de regtvaardiki èn no abi berow fanowdu. Di sonwan fu den wantu yari a fesi ben suku fowtu a tapu Yesus fu di a ben nyan nanga belastingman nanga sondari, a ben taigi den: „Mi no ben kon fu regtvaardiki sma, ma sondari.” Den Fariseiman di regtvaardiki den srefi, èn di no ben si taki den mu abi berow, no ben meki prisiri kon na ini hemel. Trutru den sondari di ben abi berow ben meki dati kon.

Fu meki a punt kon moro srapu a fesi taki a kon bun fu sondari di ben lasi pasi de wan reide fu bigi prisiri, meki Yesus e fruteri ete wan eksempre. A e tak: „Sortu uma di abi tin moni fu wan drakmo èn e lasi wan moni fu wan drakmo no e leti wan lampu èn e sibi en oso èn e suku finifini te leki a feni en? Èn efu a feni èn a e kari en mati nanga birfrow kon makandra èn e taki: ’Prisiri nanga mi, bika mi feni a moni fu wan drakmo di mi ben lasi.’”

Yesus e tyari net so wan sortu gebroiki kon na ini a ala dei libi te a e taki: „Na so mi e taigi unu taki prisiri e de na den engel fu Gado fu wan sondari di abi berow.”

Fa na lobi broko-ede fu den engel fu Gado de wan tumsi moi sani fu na kon bun baka fu wan sondari di ben lasi! Èn spesrutu fu di den sakafasi, feragti ’am ha’a’rets disi te fu kaba den sa feni den bun gi na grani fu de wan pisi fu Gado hemel kownukondre. Na so fasi den e kisi wan positie na ini hemel di hei moro leki di fu den engel srefi! Ma na presi fu dyarusu ofu fu firi leki den poti den na wan sei, den engel e erken nanga sakafasi taki den sondu sma disi ben miti èn wini situwâsi ini a libi di sreka den fu dienst leki sari-ati hemel kownu nanga priester di e firi gi libisma. Lukas 15:1-10; Mattéus 9:13; 1 Korintesma 6:2, 3; Openbaring 20:6.

◆ Fu san-ede Yesus abi demakandra nanga takru barinen sondari, èn sortu fowtu di den Fariseiman e suku e meki disi kon a fesi?

◆ Fa den Fariseiman e si na gewoon pipri?

◆ Sortu eksenpre Yesus e gebroiki èn san wi kan leri fu disi?

◆ Fu san-ede na prisiri fu den engel de wan tumsi aparti moi sani?