A fri di Gado gi, e tjari prisiri kon
„A prisiri foe Jehovah na joe fortresi.” — NEHEMIA 8:10.
1. San a prisiri, èn foe san ede den wan di gi densrefi abra na Gado kan ondrofeni dati?
JEHOVAH e foeroe na ati foe en pipel nanga prisiri. A situwâsi disi foe de nanga bigi prisiri noso foe prisiri pasa marki na a bakapisi foe a kisi noso a froewakti foe wan boen sani. Libisma di gi densrefi na Gado, kan ondrofeni so wan firi bika prisiri na wan froktoe foe en santa jeje noso wroko krakti (Galasiasma 5:22, 23). So boen, srefi efoe hebi tesi e kon na wi tapoe, wi kan prisiri leki dienstknekti foe Jehovah, di a e tiri nanga en jeje.
2. Foe san ede den djoe ben prisiri na wan spesroetoe okasi ini den dei foe Esra?
2 Na wan spesroetoe okasi ini a feifi jarihondro bifo G. T., den djoe ben gebroiki a fri foe den di Gado ben gi foe hori wan Kampoewiwiri fesa ,di ben foeroe nanga prisiri, ini Jerusalem. Baka di Esra nanga tra Leifisma ben leisi èn froeklari Gado Wet gi den, „a pipel ben gowe foe njan èn dringi èn foe seni porsi èn foe abi bigi prisiri, bikasi den ben froestan den wortoe di ben meki bekènti na den.” — Nehemia 8:5-12.
A prisiri foe Jehovah na wi fortresi
3. Ondro sortoe situwasi a „prisiri foe Jehovah” kan de wi fortresi?
3 Na a fesa dati den djoe ben kon si fa den wortoe disi na waarheid: „A prisiri foe Jehovah na joe fortresi” (Nehemia 8:10). A prisiri disi na wi fortresi toe efoe wi e tanapoe kánkan gi a fri di Gado gi wi leki sma di gi densrefi abra, èn teki dopoe leki Kotoigi foe Jehovah. Wan toe foe oenoe ben ondrofeni wan salfoe nanga santa jeje èn a teki di den teki wi ini na osofamiri foe Gado leki hemel medeërfgenaam nanga Krestes (Romesma 8:15-23). Moro foeroe foe wi ini a ten disi abi têgo libi ini wan paradijs grontapoe na wi fesi (Lukas 23:43). Fa wi moesoe de nanga prisiri foe dati ede!
4. Foe san ede kresten sma kan froedrage foe njan pina nanga froefolgoe?
4 Ala di wi e froewakti toemoesi moi sani, a no de makriki foe njan pina nanga froefolgoe. Tokoe wi man doe dati, bika Gado e gi wi en santa jeje. Nanga dati wi abi prisiri èn wi abi na overtoigi dati noti kan foefoeroe a howpoe di wi abi noso a lobi foe Gado. Moro fara, wi kan de seiker dati Jehovah sa de wi fortresi so langa leki wi lobi en nanga heri wi ati, sili, krakti nanga froestan. — Lukas 10:27.
5. Pe wi kan feni reide foe prisiri?
5 Jehovah en pipel e njanboen foe foeroe blesi èn den abi foeroe reide foe prisiri. Son reide foe prisiri Paulus e gi ini en brifi na den Galasiasma. Trawan wi kan feni na tra presi ini den Boekoe. A sa doe wi boen foe go loekoe den sortoe prisiri blesi disi.
Warderi a fri di Gado gi
6. Foe san ede Paulus ben gi den Kresten foe Galasia deki-ati foe tanapoe kánkan?
6 Leki Kresten wi abi a prisiri blesi foe tanapoe ini wan boen demakandra nanga Gado. Foe di Krestes ben fri en bakaman foe a Wet foe Moses, den Galasiasma ben moesoe foe tanapoe kánkan èn no ben moesoe poti densrefi ondro a „tjatjari foe katibo”. Fa a de nanga wi? Efoe wi ben proberi foe den froeklari wi regtfardiki foe di wi ben hori wisrefi na a Wet, dan dati ben o prati wi foe Krestes. Foe di Gado en jeje e jepi wi, wi e froewakti na regtfardikifasi tapoe san wi ben howpoe, èn di de a bakapisi foe bribi di e wroko nanga jepi foe lobi, no foe di den besnij wi na skinfasi noso foe tra wroko foe a Wet. — Galasiasma 5:1-6.
7. Fa wi moesoe si santa diniwroko gi Jehovah?
7 A de wan blesi foe gebroiki a fri di Gado gi wi foe „dini Jehovah nanga prisiri” (Psalm 100:2). A de foe troe wan bigi grani pasa marki foe doe santa diniwroko gi „Jehovah Gado, na Almaktiwan”, a „Kownoe foe têgo” ensrefi! (Openbaring 15:3) Efoe oiti wan firi leki joe no warti nofo e teki joe abra, dan a kan jepi joe foe froestan taki Gado ben hari joe kon na en nanga jepi foe Jesus Krestes èn ben gi joe a grani foe abi wan prati ini „a santa wroko foe a boen njoensoe foe Gado” (Romesma 15:16; Johanes 6:44; 14:6). Fa den sani disi de reide foe prisiri èn foe taki Gado tangi!
8. Sortoe reide foe prisiri a pipel foe Gado abi, ini a tori foe Babilon a Bigiwan?
8 Wan tra reide foe prisiri na a fri di Gado fri wi foe Babilon a Bigiwan, a grontapoe makti foe falsi relisi (Openbaring 18:2, 4, 5). Ala di a relisi hoeroe disi „e sidon tapoe foeroe watra”, san wani taki „den pipel, den ipi sma, den nâsi èn den tongo” a no e sidon tapoe, noso na relisifasi abi krakti èn e tiri tapoe, den foetoeboi foe Jehovah (Openbaring 17:1, 15). Wi e prisiri ini a toemoesi moi leti foe Jehovah, ala di den sma di e horibaka gi Babilon a Bigiwan de ini jeje doengroe (1 Petrus 2:9). Ija, a kan de moeilek foe froestan son „dipi sani foe Gado” (1 Korentesma 2:10). Ma den begi foe kisi koni èn so srefi jepi foe a santa jeje, e jepi wi foe froestan den Bijbel waarheid di, na jejefasi, e fri den sma di abi a waarheid. — Johanes 8:31, 32; Jakobus 1:5-8.
9. Efoe wi wani njanboen foe den blesi foe doronomo fri foe relisi fowtoe, dan san wi moesoe doe?
9 Wi e njanboen foe a blesi foe doronomo fri foe den fowtoe di meki na relisifasi, ma foe tan hori a fri dati, wi moesoe trowe sma di fadon komoto na bribi. Den Galasiasma ben lon na Kresten streilon boen, ma son sma ben hendri den foe gi jesi na a waarheid. Na takroefasi dati foe kisi den sma dati na den sei nanga switi wortoe, no ben kon foe Gado èn den ben moesoe kakafoetoe gi dati. Neleki fa wan pikinso sroedeki e meki a heri ipi kon soewa, na so falsi leriman noso denwan di e sori den sondoe eigifasi foe sma di fadon komoto na bribi, kan pori a heri gemeente. Paulus ben winsi dati den wan di ben horibaka gi a besnijdenis èn di ben soekoe foe pori a bribi foe den Galasiasma, no ben moesoe besnij densrefi wawan ma ben moesoe kapadoe [a poeroe foe den koko foe a sjenpresi] densrefi. Dati na krakti wortoe foe troe! Ma efoe wi wani hori a fri foe wi di Gado gi wi foe relisi fowtoe, dan na a srefi fasi wi moesoe tanapoe kánkan te wi e trowe sma di fadon komoto na bribi. — Galasiasma 5:7-12.
Dini makandra leki srafoe ini lobi
10. San na wi frantiwortoe leki wan pisi foe a kresten bradafasi?
10 Na fri di Gado gi ben tjari wi ini wan demakandra nanga wan lobi bradafasi, ma wi moesoe doe wi pisi foe sori lobi. Den Galasiasma no ben mag gebroiki a fri foe den leki „wan okasi gi a skin” noso wan foe krin densrefi foe prakseri densrefi nomo sondro foe hori den trawan na prakseri na wan lobifasi. Den ben moesoe wroko leki srafoe gi makandra, foe di lobi e poesoe den (Levitikus 19:18; Johanes 13:35). Wi toe moesoe tan farawe foe taki takroe sani foe makandra èn foe hori trawan na ati foe di dati kan abi leki bakapisi dati wi e pori makandra dorodoro. A no de foe taki, dati disi no sa pasa efoe wi e sori brada lobi. — Galasiasma 5:13-15.
11. Fa wi kan de wan blesi gi trawan, èn fa den kan blesi wi?
11 Te wi e gebroiki a fri foe wi di Gado gi, ini akroederi nanga tiri foe Gado en jeje, wi sa sori lobi èn sa de wan blesi gi trawan. A moesoe de wan gwenti foe meki a santa jeje tiri èn tjari wi. Dan wi no sa abi ini prakseri foe satisferi a sondoe skin foe wi na wan takroe fasi di „de kontrari a jeje ini den lostoe foe en.” Efoe Gado jeje e tjari wi, wi sa doe san boen, ma no foe di wet e aksi foe wi gi jesi èn e gi strafoe na ogriman. Foe eksempel, lobi — no soso wan wet — sa kibri wi foe e gongosa trawan (Levitikus 19:16). Lobi sa poesoe wi foe taki èn handri nanga switifasi. Bika wi e sori lobi, a froktoe foe a jeje, trawan sa blesi wi, noso taki boen foe wi (Odo 10:6). Moro fara, demakandra nanga sa de wan blesi gi den.— Galasiasma 5:16-18.
Heri tra froktoe
12. San na wan toe foe den blesi di abi foe doe nanga a tan farawe foe den sondoe „wroko foe a skin”?
12 Foeroe blesi di abi foe doe nanga a fri foe wi di Gado gi, de na bakapisi foe a wai pasi gi sondoe „wroko foe a skin”. Leki a pipel foe Gado, wi, ini algemeen, e tan farawe foe foeroe pen bika wi no e doe hoeroedoe, dotifasi foe libi, èn no e tjari wisrefi na wan jajo fasi. Foe di wi e tan farawe foe afkodrei, wi abi a prisiri di de a bakapisi foe plisi Jehovah ini na afersi dati (1 Johanes 5:21). Foe di wi no e doe spiritisme, meki wi de fri foe a tiri di den ogri jeje e tiri sma. Na kresten bradafasi foe wi no e pori bika foe feantifasi, strei libi, djaroesoefasi, atibron, feti, pratifasi, sekte nanga ogri-ai. Èn a prisiri di wi abi no lasi ini sidon dringi sopi heri dei èn njan nanga dringi pasa marki. Paulus ben warskow dati den wan di e doe den wroko foe a skin no sa erf Gado Kownoekondre. Bikasi wi e poti prakseri na den wortoe disi, foe dati ede wi e hori tranga na a Kownoekondre howpoe di e foeroe joe nanga prisiri. — Galasiasma 5:19-21.
13. Sortoe froktoe Jehovah en santa jeje e meki?
13 A fri di Gado gi e tjari prisiri bika Kresten e sori a froktoe foe Jehovah jeje. Den wortoe di Paulus ben skrifi den Galasiasma e sori wi, dati den wroko foe a sondoe skin de leki maka kontrari den toemoesi boen froktoe foe a jeje, lobi, prisiri, vrede, langa pasensi, switifasi, boen-atifasi, bribi, safoefasi nanga dwengi joesrefi di prani alamala ini den ati foe sma di e dini Gado. Foe di wi abi na fasti bosroiti foe libi trafasi leki den lostoe foe a sondoe skin, wi wani taki Gado jeje moesoe tjari wi èn foe wi libi akroederi en. Na jeje e meki wi kon abi sakafasi èn lobi gi vrede, a no e meki wi denki ’wisrefi nomo, a no e poti wi foe strei nanga makandra, a no e djaroesoe tapoe makandra.’ A no de foe froewondroe taki a de wan prisiri di abi foe doe nanga den wan di e sori den froktoe foe a jeje! — Galasiasma 5:22-26.
Tra reide foe prisiri
14. Sortoe fetisani wi abi fanowdoe ini wi feti nanga den ogri jeje makti?
14 Tai nanga a fri foe wi di Gado gi na jejefasi, wi abi a blesi foe a kibri di den e kibri foe Satan nanga den ogri jeje foe en. Foe abi boen bakapisi ini a strei nanga den ogri jeje krakti, wi moesoe weri „a heri fetisani foe Gado”. Wi abi a berebanti foe waarheid fanowdoe èn a borsoewapoe foe geregtighèit. Den foetoe foe wi moesoe weri den soesoe foe a boen njoensoe foe vrede. Wi abi a bigi skild foe bribi fanowdoe toe, nanga san wi kan kiri a faja foe den faja peiri foe na ogriwan. Wi moesoe weri a fetimoesoe foe froeloesoe èn gebroiki „a feti-owroe foe a jeje”, dati na Gado Wortoe. Meki wi so srefi „tan begi ini jeje na ibri okasi” (Efeisesma 6:11-18). Efoe wi e weri a jeje fetisani èn no wani abi foe doe nanga afkodrei, wi no abi foe frede èn kan de nanga prisiri.— Teki gersi Tori foe den Apostel 19:18-20.
15. Sortoe blesi di e gi prisiri wi o abi, foe di wi tjari wisrefi akroederi Gado Wortoe?
15 Prisiri na foe wi bika a fasi fa wi e tjari wisrefi e kroederi nanga Gado Wortoe, èn wi fri foe wan takroe konsensi di foeroe gadolowsoe sma abi. Wi ’moesoe doe moeiti doronomo foe wi abi wan krin konsensi ala ten na fesi Gado èn na fesi libisma’ (Tori foe den Apostel 24:16). Ma, wi no abi foe frede a strafoe foe Gado di a o gi sma di e sondoe foe espresi, sondro foe abi berow (Mateus 12:22-32; Hebrewsma 10:26-31). Te wi e doe a rai foe Odo 3:21-26, wi e kon si a kon troe foe den wortoe dati: „Kibri praktis koni nanga denki krakti, èn den sa boeweisi taki den de libi gi joe sili èn wan moi sani gi joe neki. Ini a kefal dati joe sa waka joe pasi ini seikerfasi, èn srefi joe foetoe no sa stotoe na nowan presi. Awasi pe joe sa kanti didon, joe no sa firi frede; èn seiker joe sa didon, èn a sribi foe joe moesoe switi. Joe no sa frede gi no wan enkri sani di wantewante so e tapoe skreki gi joe, èn no gi a bigi winti di sa wai gi den gadolowsoewan, foe di a e kon. Bika Jehovah srefi sa boeweisi taki a de a froetrow foe joe, èn seiker a sa kibri joe foetoe, so dati sani no sa graboe en.”
16. Fa begi de wan reide foe prisiri, èn sortoe ròl Jehovah en jeje e prei ini a tori disi?
16 Wan tra reide foe prisiri na a fri foe wi di Gado gi wi foe go na en ini begi nanga a seikerfasi dati a sa arki wi. Ija, a e piki den begi foe wi bika wi abi a respeki „frede gi Jehovah” (Odo 1:7). Moro fara, wi e kisi jepi foe tan ini Gado lobi te wi ’e begi nanga santa jeje’ (Judas 20, 21). Disi wi e doe te wi e sori wan ati toestand di Jehovah feni boen èn te wi e begi ondro krakti foe na jeje foe sani di de ini wanfasi nanga en wani èn en Wortoe di e sori wi fa wi moesoe foe begi èn san wi moesoe aksi ini begi (1 Johanes 5:13-15). Efoe wi kisi tesi dorodoro èn no sabi foe san wi moesoe begi, ’a jeje e kon jepi wi nanga wi swakifasi, e taki gi wi nanga geme di joe no man jere’. Gado e piki den sortoe begi dati (Romesma 8:26, 27). Meki wi begi foe santa jeje èn gi a santa jeje pasi foe a meki den froktoe foe en, di de spesroetoe fanowdoe foe horidoro ondro spesroetoe tesi, gro ini wi (Lukas 11:13). Wi sa meki wi prisiri kon moro foeroe efoe ondro begi èn na wan faja fasi wi e studeri Gado Wortoe di skrifi ondro krakti foe santa jeje èn den kresten poeblikasi di sreka ondro tiri foe a jeje.
Wi abi a blesi foe a jepi di de ala ten
17. Fa den ondrofeni foe Moses èn den wortoe foe David e sori dati Jehovah de nanga En pipel?
17 Te wi e gebroiki a fri foe wi di Gado gi wi na wan leti fasi, wi abi a prisiri foe sabi dati Jehovah de nanga wi. Di Moses ben moesoe libi Egipti foe feanti situwasi ede, dan nanga jepi foe bribi a ’ben tan tanapoe kánkan leki a ben e si a Wan di sma no man si’ (Hebrewsma 11:27). Moses no ben waka en wawan; a ben sabi dati Jehovah ben de nanga en. Na a srefi fasi den manpikin foe Korak ben singi: „Gado de wi kibripresi èn a krakti foe wi, wan tranga jepiman di wi kan feni makriki, ini ala wi nowtoe. Dati ede wi no sa frede; awasi grontapoe srefi sa kenki, èn awasi den bergi e sekiseki, fadon leti na mindri a bigi se; awasi a watra foe en krasi, e meki skoema pasa marki èn awasi a tranga ogridoe foe en sa meki den bergi seki” (Psalm 46:1-3). Efoe joe abi so wan bribi ini Gado, a no sa libi joe noiti. David ben taki: „Efoe mi eigi papa nanga mi eigi mama ben gowe libi mi troetroe, dan tokoe Jehovah ensrefi ben o teki mi” (Psalm 27:10). Fa a de wan prisiri foe sabi dati Gado lobi den dienstknekti foe en sote! — 1 Petrus 5:6, 7.
18. Foe san ede den wan di abi a prisiri foe Jehovah, abi fri di Gado e gi foe toemoesi foeroe broko ede?
18 Foe di wi abi a prisiri foe Jehovah, wi abi a fri di Gado gi foe toemoesi foeroe broko ede. „No broko ede foe no wan sani,” Paulus ben taki, „ma meki na ini ala sani nanga begi èn faja begi makandra nanga taki tangi den tranga begi foe joe kon bekènti na Gado; èn a vrede foe Gado di e pasa ala prakseri, sa kibri joe ati nanga joe memre nanga jepi foe Krestes Jesus” (Filipisma 4:6, 7). A vrede foe Gado na wan korostoefasi, di joe no man teki noti foe gersi nanga en, èn di de srefi ini den moro hebi situwâsi. Nanga dati wi ati e tan korostoe — san boen gi wi na jejefasi, emotioneelfasi èn na skinfasi (Odo 14:30). A vrede disi e jepi wi so srefi foe tan hori wi balansi na froestan sei, foe di wi sabi dati noti san Gado e gi sma pasi foe doe, kan doe wi wan ogri di e tan (Mateus 10:28). Na vrede disi, di de wan bakapisi foe wan krosibei matifasi nanga Gado nanga jepi foe Krestes, de foe wi, bika wi gi wisrefi abra na Jehovah èn saka wisrefi ondro a tiri foe en jeje, di e gi den froktoe disi leki prisiri nanga vrede.
19. A tapoe san wi moesoe tan poti wi ati, san o jepi wi foe de nanga prisiri?
19 Te wi e hori wi ati fasti tapoe a fri foe wi di Gado gi èn tapoe Kownoekondre howpoe, dan dati sa jepi wi foe de nanga prisiri. Foe eksempel, sontron wi no kan doe foeroe na wan takroe gesontoe, ma wi kan begi foe konifasi nanga krakti foe libi nanga en èn wi man firi boen te wi e prakseri foe a jeje gesontoe foe san wi e njanboen foe en now èn a kon boen baka na skin fasi, di sa feni presi ondro a Kownoekondre tiri (Psalm 41:1-3; Jesaja 33:24). Ala di wi e ondrofeni a mankeri foe sani ini a ten disi, wi no sa mankeri sani di wi o abi fanowdoe foe libi na a Paradijs grontapoe di de so krosibei (Psalm 72:14, 16; Jesaja 65:21-23). Ija, wi hemel Tata sa horibaka gi wi now èn te foe kaba a sa meki wi prisiri kon dorodoro. — Psalm 145:14-21.
Boboi a fri di Gado gi joe
20. So leki fa Psalm 100:1-5 e taki, dan fa wi moesoe presenteri wisrefi a fesi foe Jehovah?
20 Leki a pipel foe Jehovah, wi seiker moesoe boboi a fri di Gado gi wi, di ben tjari prisiri nanga someni blesi. A no de foe froewondroe dati Psalm 100:1-5 e gi wi a deki-ati foe kon ini a denoja foe Gado „nanga wan prisiri babari”. Wi na foe Jehovah èn a e sorgoe gi wi leki wan lobi Skapoeman. Ija,„wi na en pipel èn den skapoe foe en wèi”. A de di a de wi Mekiman nanga den toemoesi bigi eigi fasi foe en, e boeweigi wi foe go na ini a fesi djari foe en santapresi nanga prèise èn taki tangi. Wi ati e troesoe wi foe ’blesi en nen’, foe taki boen foe Jehovah Gado. Moro fara, wi kan froetrow ala ten tapoe en lobi boen-atifasi noso sari-ati sorgoe, gi wi. „Lo baka lo”, Jehovah de getrow, e tanapoe kánkan ini a sori foe lobi gi den wan di e doe en wani.
21. Sortoe deki-ati den ben gi ini a fosi uitgave foe a tijdschrift disi, èn san wi moesoe doe ini a tori foe a fri di Gado gi?
21 Leki onvolmaakti libisma, wi no man lon gowe now gi ala den tesi. Ma, nanga jepi foe Gado, wi kan de Kotoigi foe Jehovah di abi deki-ati èn de nanga prisiri. Prenspari foe loekoe ini a tori disi na den wortoe disi di wi e feni ini a fosi uitgave foe na tijdschrift disi (Juli 1879): „Abi deki-ati. . . mi kresten brada noso sisa, di e soekoe foe lon na smara pasi nanga weriweri. No poti prakseri tapoe a hebi foe a pasi; a kisi blesi èn a meki kon santa nanga jepi foe den blesi foetoe foe a Meester. Loekoe ibri maka leki wan bromki; ibri srapoe krepiston leki wan marki, di e poesoe joe foe go pe joe wani doro. . . . Tan hori joe ai fasti tapoe a prijs.” Den miljoenmiljoen sma di e dini Jehovah now, e tan hori den ai tapoe a prijs èn den abi foeroe reide foe abi deki-ati èn prisiri. Tanapoe kánkan nanga den, gi a fri di Gado gi. No misi a marki foe en, èn meki a de so taki a prisiri foe Jehovah ala ten sa de a fortresi foe joe.
Fa joe ben sa piki?
◻ Fa „a prisiri foe Jehovah” kan de wi fortresi?
◻ Te wi e taki foe en na relisi fasi, dan sortoe blesi a fri di Gado gi ben tjari gi Jehovah en pipel?
◻ Foe san ede wi moesoe dini makandra leki srafoe ini lobi?
◻ San na wan toe blesi di abi foe doe nanga a fri di Gado e gi?
◻ Fa Gado pipel kan tan nanga prisiri?
[Prenki na tapoe bladzijde 32]
„Loekoe ibri maka leki wan bromki; ibri srapoe krepiston leki wan marki, di e poesoe joe foe go pe joe wani doro”