Den blesi di e kon foe di wi e wroko nanga trawan
1 Joe e firi taki joe kan njanboen foe winimarki di e kon, foe di joe e wroko nanga trawan ini a velddienst? Jesus ben firi so. Ala di a kotiwroko ben bigi èn pikinso wrokoman nomo ben de, tokoe a ben seni 70 disipel go ini a velddienst, „toe nanga toe”. Den alamala ben abi so wan prisiri ten di e gi satisfaksi, foe preiki na „ibri foto nanga presi pe ensrefi ben o kon”! — Luk. 10:1, 17; Mat. 9:37.
2 A e gi tranga foe wroko nanga trawan. Sonwan foe wi e sjen èn e feni en wan moeilek sani foe taki nanga freimde sma. Te wi abi wan tra sma na wi sei, dan dati e gi wi deki-ati foe taki fri èn sondro frede foe a Wortoe foe Gado. Te wan sma de nanga wi, dan a kan de moro makriki foe doe a wroko na a fasi fa wi ben leri dati (Odo 27:17). A koni man ben taki: „Toe sma moro boen leki wan.” — Preik. 4:9.
3 A de wan boen sani foe wroko nanga difrenti preikiman nanga pionier. Ini a diniwroko, na apostel Paulus ben wroko toe nanga Barnabas, Silas, Timoteus, nanga Johanes Markus, èn den ben njanboen foe foeroe blesi te den ben e preiki makandra. Na so a kan de toe ini a ten disi. Joe wroko kaba nanga wan sma di de wan langa ten ini waarheid? Baka di joe si a boen fasi fa a e gi kotoigi, dan a no de foe taki, dati joe teki wan toe boen idea foe en abra, di jepi joe foe kon moro boen. Joe wroko kaba nanga preikiman di njoen, te joe teki den gersi nanga trawan? Dan joe ben abi na okasi foe prati wan toe foe den sani di joe leri nanga den, èn na so fasi joe ben kan jepi den foe kon moro boen èn foe abi moro prisiri ini a diniwroko foe den.
4 Joe abi wan bijbelstudie nownow de? Efoe a de so, dan foe san ede joe no e aksi wan foe den owroeman noso a kringopziener foe go nanga joe na a bijbelstudie? A sa de wan boen sani gi den bijbelstudenti foe wi foe kon sabi den owroeman. Efoe joe e draidrai foe hori wan bijbelstudie te wan owroeman drape toe, dan kande na owroeman ben sa wani foe hori en gi joe èn meki joe loekoe fa en e hori a bijbelstudie. Baka dati, firi fri foe aksi en rai foe kan sabi fa joe kan jepi a studenti foe go na fesi moro esi.
5 De wan sma di e gi trawan deki-ati te joe e wroko nanga den. De positief ini den sani di joe e taki foe a gebied. Noiti no taki takroe sani foe trawan noso kragi foe den sani di a gemeente seti. Hori joe prakseri tapoe sani foe a diniwroko èn tapoe den blesi foe Jehovah. Efoe joe e doe so, dan joe nanga den kompe foe joe sa drai go na oso èn firi kowroe-ati na jeje fasi.
6 Den omstandigheid foe joe kan meki en moeilek gi joe foe wroko doronomo nanga tra brada nanga sisa. Ma, efoe a kan, dan foe san ede joe no e seti sani, so taki joe kan wroko nanga wan tra preikiman? Joe nanga en sa kisi blesi! — Rom. 1:11, 12.